Ndigiri ya Balaamu Kwaria

Aisiraeli maaikarĩte werũ-inĩ hakuhĩ mĩaka 40. Nĩ maahootete matũũra maingĩ marĩa maarĩ na ũhoti mũnene wa mbaara. Rĩu ihinda rĩao rĩarĩ ikinyu rĩa kũingĩra Bũrũri wa Kĩĩranĩro, na maambĩte hema ciao werũ-inĩ wa Moabi mwena wa irathĩro wa Rũũĩ rwa Jorodani. Mũthamaki wa Moabi wetagwo Balaki nĩ eetigagĩra kũhootwo nĩ Aisiraeli. Nĩ ũndũ ũcio, agĩtũmanĩra mũndũ wetagwo Balaamu athiĩ Moabi nĩguo akarume Aisiraeli.

No Jehova akĩra Balaamu ũũ: ‘Ndũkarume Aisiraeli.’ Kwoguo Balaamu akĩrega gũthiĩ. Mũthamaki Balaki nĩ aamũtũmanĩire riita rĩa kerĩ na akĩmwĩra nĩ ekũmũhe kĩrĩa gĩothe angĩendire. Ĩndĩ o na riita rĩu Balaamu nĩ aaregire. Ngai agĩcoka akĩmwĩra ũũ: ‘No ũthiĩ, ĩndĩ wagĩrĩirũo kwaria o ciugo iria ngũkwĩra uuge.’

Balaamu agĩikarĩra ndigiri yake na akĩambĩrĩria thabarĩ ya gũthiĩ Moabi. Aarĩ na mũbango wa kũruma Aisiraeli o na gũtuĩka Jehova nĩ aamwĩrĩte ndageke ũguo. Mũraika wa Jehova akĩmuumĩrĩra maita matatũ arĩ njĩra-inĩ, ĩndĩ Balaamu ndaamuonaga, no ndigiri yake nĩ yamuonaga. Riita rĩa mbere, ndigiri ĩyo yeeherire njĩra-inĩ ĩgĩthiĩ mũgũnda. Rĩa kerĩ ĩkĩĩhatĩrĩria rũthingo-inĩ na ĩkĩhinyĩrĩria kũgũrũ kwa Balaamu rũthingo-inĩ. Rĩa mũico, ĩgĩkoma gatagatĩ ka njĩra. Maita macio mothe ndigiri ĩyo yekaga ũguo, Balaamu nĩ aamĩhũũraga na rũthanju.

Balaamu ahũũra ndigiri ĩyo riita rĩa gatatũ, Jehova nĩ aatũmire yarie. Yoririe Balaamu ũũ: ‘Kaĩ ngwĩkĩte atĩa nĩguo ũikare ũkĩhũũraga?’ Nake akĩmĩcokeria: ‘Ũratũma haane kĩrimũ nĩkĩ? Korũo ndĩ na rũhiũ rwa njora, no gũkũũraga ingĩkũũraga!’ Nayo ndigiri ĩkĩmwĩra: ‘Ndũire ngũkuuĩte ihinda iraihu. Nĩ ndĩ ndagwĩka ũndũ ta ũyũ rĩngĩ?’

Jehova aacokire agĩteithia Balaamu kuona mũraika. Mũraika ũcio akĩmũũria ũũ: ‘Githĩ Jehova ndaragũkanirie kũruma Aisiraeli?’ Nake Balaamu akiuga: ‘Nĩ njĩhĩtie. Na nĩ ngũcoka mũciĩ.’ No mũraika akĩmwĩra ũũ: ‘No ũthiĩ Moabi, ĩndĩ ũkaaria o ũhoro ũrĩa Jehova agaakwĩra.’

Hihi Balaamu nĩ eerutire na ũndũ ũcio? Aca, tondũ aacokire akĩgeria kũruma Aisiraeli maita matatũ, no handũ ha kũmaruma, Jehova aatũmaga amarathime maita macio mothe matatũ. Mũthia-inĩ, Aisiraeli nĩ maatharĩkĩire itũũra rĩa Moabi na makĩũraga Balaamu. Ũngĩarĩ ũndũ mwega harĩ Balaamu korũo nĩ aathikĩrĩirie Jehova kuuma o kĩambĩrĩria.