Josia nĩ Eendete Watho wa Ngai

Josia aatuĩkire mũthamaki wa Juda arĩ na mĩaka ĩnana. Matukũ-inĩ macio, andũ nĩ meeingĩranagia mũno na ũgo na ũhoi wa mĩhianano. Josia arĩ na mĩaka 16 nĩ aambĩrĩirie kwĩruta gũthathaiya Jehova na njĩra ĩrĩa yagĩrĩire. Arĩ na mĩaka 20, akĩambĩrĩria kwananga mĩhianano na kũndũ kũrĩa kwarutagĩrũo magongona bũrũri-inĩ wothe. Na arĩ na mĩaka 26, akĩbanga nyũmba ya Jehova ĩthondekwo kũrĩa yathũkangĩte.

Nakuo hekarũ-inĩ, Hilikia, ũrĩa warĩ Mũthĩnjĩri-Ngai-Mũnene nĩ oonire ibuku rĩa Watho, na no kũhoteke ibuku rĩu nĩ rĩrĩa rĩaandĩkĩtwo nĩ Musa. Shafani ũrĩa warĩ mwandĩki wa mũthamaki, nĩ aatwarĩire Josia ibuku rĩu na akĩambĩrĩria kũmũthomera Watho na mũgambo mũnene. Rĩrĩa Josia aathikagĩrĩria, nĩ aamenyire atĩ andũ matiakoretwo magĩathĩkĩra Jehova kwa ihinda rĩa mĩaka mĩingĩ. Mũthamaki Josia eerire Hilikia ũũ: ‘Jehova nĩ mũrakaru mũno nĩ ithuĩ. Thiĩ warie nake nĩguo atwĩre ũrĩa twagĩrĩrũo nĩ gwĩka.’ Jehova nĩ aamacokeirie akĩhũthĩra mũtumia wetagwo Hulida ũrĩa warĩ mũnabii, na akĩmwĩra ũũ: ‘Andũ a Juda nĩ mandiganĩirie. Nĩ ngũmaherithia, no ndigwĩka ũguo ihinda-inĩ rĩrĩ Josia arathamaka, tondũ we nĩ enyihĩtie.’

Rĩrĩa Mũthamaki Josia aaiguire ndũmĩrĩri ĩyo, aathiire hekarũ-inĩ ya Jehova na agĩcokanĩrĩria andũ othe a Juda. Agĩcoka akĩmathomera Watho wa Jehova anĩrĩire na mũgambo mũnene. Josia na andũ acio nĩ meehĩtire na makiuga atĩ nĩ marĩathĩkagĩra Jehova na ngoro ciao ciothe.

Andũ a Juda matiakoretwo magĩkũngũĩra Pasaka kwa ihinda rĩa mĩaka mĩingĩ. No rĩrĩa Josia aathomire thĩinĩ wa Watho atĩ Pasaka yaagĩrĩirũo gũkũngũyagĩrũo o mwaka, eerire andũ ũũ: ‘Nĩ tũgũkũngũĩra Pasaka nĩ ũndũ wa Jehova.’ Josia agĩcoka akĩhaarĩria magongona maingĩ ma kũruta na akĩbanga gũkorũo na andũ a kũina nyĩmbo hekarũ-inĩ. Andũ magĩkũngũĩra Pasaka, magĩcoka magĩkũngũĩra Gĩathĩ kĩa Mĩgate Ĩtarĩ Mĩimbie kwa ihinda rĩa thikũ mũgwanja. Gũtiakoretwo na Pasaka ĩngĩ ta ĩyo kuuma hĩndĩ ya Samueli. Josia nĩ eendete Watho wa Ngai mũno. Hihi nĩ ũkenaga ũkĩĩruta ũhoro wa Jehova?