Jesu Gũkuĩra Gologotha

Anene a athĩnjĩri-Ngai maatwarire Jesu kwa ngavana mũciĩ. Pilato akĩmoria ũũ: ‘Mũndũ ũyũ mũramũthitangĩra kĩĩ?’ Nao makĩmũcokeria: ‘Arauga atĩ we nĩ mũthamaki!’ Pilato akĩũria Jesu: “Wee nĩwe Mũthamaki wa Ayahudi?” Nake Jesu akĩmũcokeria: “Ũthamaki wakwa ti wa thĩ ĩno.”

Thutha ũcio Pilato akiuga Jesu atwarũo kũrĩ Herode, ũrĩa waathanaga Galili, nĩguo Herode one kana Jesu aarĩ na mahĩtia. Herode ndoonire mahĩtia o na manini harĩ Jesu, na kwoguo akiuga acokio kũrĩ Pilato. Nake Pilato akĩra andũ ũũ: ‘Niĩ na Herode tũtinona mahĩtia o na manini harĩ mũndũ ũyũ. Nĩ ngũmũrekereria.’ Kĩrĩndĩ gĩkĩanĩrĩra ũũ: ‘Mũũrage! Mũũrage!’ Thigari ciahũũrire Jesu na kĩboko, ikĩmũtuĩra mata, na ikĩmũringa mũtwe. Maacokire makĩmwĩkĩra thũmbĩ ya mĩigua mũtwe makĩmwĩraga: ‘Geithĩka, wee Mũthamaki wa Ayahudi!’ Pilato akĩra kĩrĩndĩ ũũ o rĩngĩ: ‘Niĩ ndinona ũndũ mũũru mũndũ ũyũ ekĩte.’ No kĩrĩndĩ gĩkĩanĩrĩra gĩkiuga ũũ: ‘Nĩ acuurio mũtĩ igũrũ!’ Nĩ ũndũ ũcio Pilato akĩmũneana nĩguo oragwo.

Thigari ciatwarire Jesu handũ heetagwo Gologotha, ikĩmũhũũrĩra mĩcumarĩ mũtĩ-inĩ, igĩcoka ikĩũrũgamia. Jesu akĩhoya Jehova ũũ: ‘Awa, mohere tondũ matiũĩ ũrĩa mareka.’ Andũ maanyũrũragia Jesu makĩmwĩraga ũũ: ‘Angĩkorũo ũrĩ Mũrũ wa Ngai wĩrute hau igũrũ! Wĩhonokie.’

O na kũrĩ ũguo, mũici ũmwe wacuurĩtio hakuhĩ na Jesu aamwĩrire ũũ: “Ũkaandirikana rĩrĩa ũkaaingĩra thĩinĩ wa Ũthamaki waku.” Nake Jesu akĩmwĩra: “Nĩ ũgaakorũo hamwe na niĩ thĩinĩ wa Paradiso.” Thutha wa mĩaraho, nĩ kwagĩire nduma bũrũri wothe kwa ihinda rĩa mathaa matatũ. Arutwo amwe a Jesu maaikarĩte hakuhĩ na hau aacuurĩtio, na nyina, Mariamu, aarĩ ho. Jesu akĩra Johana arũmbũyagie Mariamu ta arĩ nyina mũmũciari.

Mũthia-inĩ, Jesu akiuga ũũ: “Maũndũ mothe nĩ mahinga!” Agĩcoka akĩinamia mũtwe na akĩhuhia rĩa mũthia. O hĩndĩ ĩyo gũkĩgĩa gĩthingithia kĩnene. Nakuo thĩinĩ wa hekarũ, gĩtaama kĩrĩa kĩagayanĩtie Harĩa Hatheru na Harĩa Hatheru Mũno gĩgĩtarũka na gatagatĩ. Mũthigari ũmwe akiuga ũũ: ‘Hatarĩ nganja ũyũ ararĩ Mũrũ wa Ngai.’