GATHANDŨKŨ KA ŨRUTANI GA 19B
Karũũĩ Kanini Gũtuĩka Rũũĩ Rũrĩ na Maĩ Maingĩ!
Ezekieli oonire karũũĩ kanini gagĩtherera koimĩte harĩa hatheru ha Jehova na kũgerera kĩama gagatuĩka rũũĩ rũriku rũrĩ na maĩ maingĩ thutha wa itĩna ta rĩa mairo ĩmwe tu! Hũgũrũrũ-inĩ cia rũũĩ rũu, akĩona mĩtĩ mĩruru yarutaga maciaro mega ma kũrĩo, na ĩkaruta mathangũ ma kũhonania. Maũndũ macio mothe meendaga kuuga atĩa?
Rũũĩ rũu Rũrehaga Irathimo
MAHINDA MA TENE: Rĩrĩa andũ arĩa maarĩ ithamĩrio maacokire bũrũri-inĩ wao, nĩ maakinyĩirũo nĩ irathimo makĩnyitanĩra harĩ gũcokia ũthathaiya mũtheru hekarũ-inĩ
MAHINDA MAYA: Mwaka wa 1919, ũthathaiya mũtheru nĩ wacokirio, ũkĩhingũrĩra ndungata njĩhokeku cia Ngai njĩra ya gũkinyĩrũo nĩ irathimo cia kĩĩroho na njĩra ĩtarĩ yoneka mbere ĩyo
MAHINDA MOKĨTE: Thutha wa Hari–Magedoni, irathimo iria ikoima harĩ Jehova igaakorũo irĩ cia kĩĩmwĩrĩ na cia kĩĩroho
Maĩ ma Kũrehe Muoyo:
MAHINDA MA TENE: Jehova nĩ aaheire andũ ake athĩki irathimo nyingĩ, o na rĩrĩa maathiire na mbere kũingĩha, agĩtũma magaacĩre kĩĩroho
MAHINDA MAYA: Thĩinĩ wa paradiso ya kĩĩroho ĩrĩa ĩrathiĩ ĩkĩaramaga, andũ arĩa marathiĩ o maingĩhĩte nĩ magunĩkĩte kuumana na irathimo cia Jehova cia kĩĩroho iria irathiĩ na mbere kuongerereka na nĩ macokete muoyo na njĩra ya kĩĩroho
MAHINDA MOKĨTE: Andũ arĩa makaahonoka Hari–Magedoni nĩ magaatũũrania na andũ milioni nyingĩ arĩa makaariũkio, na irathimo cia Jehova nĩ ikaaingĩhĩra andũ othe
Mĩtĩ ya Irio na ya Kũhonania
MAHINDA MA TENE: Jehova nĩ aaheire andũ ake ehokeku irio cia kĩĩroho marĩ bũrũri-inĩ wao thutha wa gũcokio; ningĩ nĩ aamahonirie mũrimũ wa kĩĩroho ũrĩa maakoretwo naguo kwa ihinda iraihu
MAHINDA MAYA: Irio nyingĩ cia kĩĩroho nĩ irateithia andũ gwĩthema mũrimũ na ngʼaragu ya kĩĩroho iria itheremete mũno thĩinĩ wa thĩ ũmũthĩ
MAHINDA MOKĨTE: Kristo na arĩa 144,000 magaathana hamwe nake nĩ magaateithia andũ othe athĩki gũtuĩka akinyanĩru na gũkenera ũgima mwega wa mwĩrĩ na hinya wao tene na tene!