ITHOMO RĨA 09
Kuhĩrĩria Ngai Kũgerera Mahoya
Hihi nĩ kũrĩ hĩndĩ ũiguaga ũkĩbatara ũtongoria ũtũũro-inĩ? Hihi nĩ kũrĩ ciũria cia bata wĩyũragia ũngĩenda gũcokerio? Nĩ ũbataraga kũũmĩrĩrio kana gwĩkĩrũo ngoro? No wende kũigua ũkuhĩrĩirie Jehova makĩria? Mahoya no magũteithie maũndũ-inĩ macio mothe. No wagĩrĩirũo kũhoya na njĩra ĩrĩkũ? Hihi Ngai athikagĩrĩria mahoya mothe? Ũngĩka atĩa nĩguo Ngai athikagĩrĩrie mahoya maku? Reke tuone.
1. Twagĩrĩirũo kũhoya ũũ, na tũngĩhoya igũrũ rĩgiĩ maũndũ marĩkũ?
Jesu aarutanire atĩ twagĩrĩirũo kũhoya o Ithe witũ wa igũrũ tu. Jesu we mwene aahoyaga Jehova. Ooigire: “Nĩ ũndũ ũcio, hoyagai na njĩra ĩno: ‘Ithe witũ ũrĩ igũrũ . . . ’ ” (Mathayo 6:9) Rĩrĩa twahoya Jehova, nĩ twĩkĩraga hinya ũrata witũ hamwe nake.
No tũhoe igũrũ rĩgiĩ ũndũ o wothe. No nĩguo Ngai acokie mahoya maitũ, no mũhaka makorũo makĩringana na wendi wake. “Tũngĩhoya ũndũ o na ũrĩkũ kũringana na wendi wake, nĩ atũiguaga.” (1 Johana 5:14) Jesu nĩ aatwĩrire nĩ maũndũ ta marĩkũ tũngĩhoya igũrũ rĩamo. (Thoma Mathayo 6:9-13.) Makĩria ma kũhoya igũrũ rĩgiĩ maũndũ maitũ ene, nĩ twagĩrĩirũo gũcokagĩria Ngai ngatho nĩ ũndũ wa maũndũ marĩa atwĩkĩire na tũkamũũria ateithĩrĩrie andũ arĩa angĩ.
2. Twagĩrĩirũo kũhoya atĩa?
Bibilia ĩtwĩkagĩra ngoro ‘tũitũrũragĩre Ngai ngoro citũ.’ (Thaburi 62:8) Kwoguo mahoya maitũ magĩrĩirũo kuuma ngoro. No tũhoe twanĩrĩire kana na ngoro na tũikarĩte na njĩra o yothe ĩronania atĩ nĩ tũheete Jehova gĩtĩo. No tũhoe ihinda o rĩothe na tũrĩ handũ o hothe.
3. Ngai acokagia mahoya maitũ atĩa?
Acokagia na njĩra itiganĩte. Jehova nĩ atũheete Kiugo gĩake Bibilia, kĩrĩa gĩcokagia ciũria nyingĩ iria twĩyũragia. Gũthoma Kiugo kĩa Ngai no “[gũtũme] mũndũ ũtarĩ na ũmenyeru agĩe na ũũgĩ.” (Thaburi 19:7; thoma Jakubu 1:5.) No atũhe thayũ wa meciria rĩrĩa tũrahiũrania na moritũ. Na no atũme ndungata ciake itũteithie rĩrĩa tũrabatara ũteithio.
THUTHURIA MAKĨRIA
Reke tũthuthurie tuone ũrĩa tũngĩhoya kuuma ngoro na njĩra ĩrakenia Ngai, na tuone ũrĩa mahoya mangĩtũteithia.
4. Nĩ maũndũ marĩkũ Ngai erĩgagĩrĩra tũhingie nĩguo aigue mahoya maitũ?
Nĩ maũndũ marĩkũ mangĩtũma mahoya maitũ metĩkĩrĩke harĩ Ngai kana mage gwĩtĩkĩrĩka? Mwĩrorerei VIDEO ĩno.
Jehova endaga tũmũhoe arĩ we. Thomai Thaburi 65:2, mũcoke mwarĩrĩrie ciũria ici:
Nĩ ũkuona ta “Mũigua wa mahoya” endaga wee ũmũhoe? Ũngiuga ũguo nĩkĩ?
No mũhaka twĩrutanĩrie gũtũũra kũringana na ithimi cia Ngai angĩkorũo nĩ tũrenda aiguage mahoya maitũ. Thomai Mika 3:4 na 1 Petero 3:12, mũcoke mwarĩrĩrie kĩũria gĩkĩ:
Tũngĩka atĩa nĩguo Jehova athikagĩrĩrie mahoya maitũ?
Rĩrĩa kwagĩa na mbaara, mĩena yerĩ ĩrĩa ĩrarũa nĩ ĩhoyaga nĩguo ĩhootane. Hihi no twĩrĩgĩrĩre Ngai acokie mahoya ta macio?
5. Mahoya maitũ magĩrĩirũo kuuma ngoro
Andũ amwe marutĩtwo gũcokagĩra mahoya o marĩa marĩa. No hihi ũguo nĩguo Ngai endaga tũmũhoe? Thomai Mathayo 6:7, mũcoke mwarĩrĩrie kĩũria gĩkĩ:
Ũngĩĩthema atĩa ‘gũcokagĩra maũndũ o marĩa marĩa’ rĩrĩa ũrahoya?
O mũthenya, wĩciragie ũhoro wa kĩrathimo kĩmwe ũrĩ nakĩo ũtũũro-inĩ waku na ũgacokeria Jehova ngatho nĩ ũndũ wakĩo. Ĩkaga ũguo o mũthenya ihinda-inĩ rĩa kiumia kĩmwe na nĩ ũkuona atĩ ũgũkorũo ũhoete igũrũ rĩgiĩ maũndũ mũgwanja ngũrani ũtegwĩcokera.
Mũciari mwega endaga mwana wake amwĩre ũrĩa araigua ngoro-inĩ. Ũndũ ũmwe na ũcio, Jehova endaga tũmũhoe kuuma ngoro
6. Mahoya nĩ kĩheo tũheetwo nĩ Ngai
Mahoya mangĩtwĩkĩra hinya atĩa makĩria rĩrĩa tũrahiũrania na moritũ ũtũũro-inĩ? Mwĩrorerei VIDEO ĩno.
Bibilia ĩtwĩrĩte atĩ mahoya no matũteithie kũgĩa na thayũ wa ma wa meciria. Thomai Afilipi 4:6, 7, mũcoke mwarĩrĩrie ciũria ici:
O na gũtuĩka ti hingo ciothe mahoya matũmaga thĩna ũrĩa tũrĩ naguo ũthire-rĩ, matũteithagia atĩa?
Ũngĩenda kũhoya igũrũ rĩgiĩ maũndũ ta marĩkũ?
Hihi nĩ ũĩ?
“Ameni” nĩ kuuga “nĩ gũtuĩke guo” kana “nĩ ma.” Kiugo “ameni” nĩ gĩkoretwo gĩkĩhũthĩrũo kũrĩkĩrĩria mahoya kuuma o mahinda-inĩ ma Bibilia.—1 Maũndũ ma Matukũ ma Tene 16:36.
7. Caragia mahinda ma kũhoya
Rĩmwe na rĩmwe no tũkorũo na maũndũ maingĩ mũno ma gwĩka nginya tũkariganĩrũo nĩ kũhoya. Hihi Jesu oonaga mahoya marĩ ma bata na gĩkĩro kĩrĩkũ? Thomai Mathayo 14:23 na Mariko 1:35, mũcoke mwarĩrĩrie ciũria ici:
Jesu eekaga atĩa nĩguo agĩe na mahinda ma kũhoya?
Nĩ rĩ ũngĩona mahinda ma kũhoya?
ANDŨ AMWE MOIGAGA: “Mahoya matiteithagia, no gũtũma matũmaga mũndũ aigue wega.”
Wee ũngiuga atĩa?
ŨRĨA TWERUTA
Mahoya moimĩte ngoro nĩ matũmaga tũkuhĩrĩrie Ngai makĩria, magatũma tũgĩe na thayũ wa meciria, na magatũhe hinya ũrĩa tũrabatara nĩguo tũkenagie Jehova.
Ciũria cia gũcokera
Twagĩrĩirũo kũhoya ũ?
Twagĩrĩirũo kũhoya atĩa?
Tũgunĩkaga na njĩra ta irĩkũ rĩrĩa twahoya?
RIKĨRA
Thoma wone macokio ma ciũria iria andũ aingĩ meyũragia.
homa wone twagĩrĩirũo kũhoya nĩkĩ, na ũrĩa tũngĩagagĩria mahoya maitũ.
Thoma wone Bibilia ĩtũrutaga twagĩrĩirũo kũhoya ũ.
“Hihi nĩ Njagĩrĩirũo Kũhoya Atheru?” (Gĩcunjĩ thĩinĩ wa jw.org/ki)
Ũkĩĩrorera video ĩno ya rwĩmbo, rora wone kana nĩ kũmakanagia harĩa ũrahoera kana ihinda rĩrĩa ũrahoya.