ITHOMO RĨA 37
Ũrĩa Bibilia Yugaga Igũrũ Rĩgiĩ Wĩra na Mbeca
Hihi nĩ ũrĩ waigua ũritũhĩirũo nĩ mĩtangĩko ĩgiĩ wĩra kana mbeca? No tũritũhĩrũo nĩ kũrũmbũiya mabataro maitũ na ihinda-inĩ o rĩu tũhe Jehova ũthathaiya ũrĩa ũmwagĩrĩire. Bibilia nĩ ĩtũheaga ũtaaro wa bata ũngĩtũteithia.
1. Bibilia yugaga atĩa igũrũ rĩgiĩ wĩra?
Ngai nĩ endaga tũkenere wĩra witũ. Bibilia yugaga atĩ “gũtirĩ ũndũ mwega harĩ mũndũ, ũkĩrĩte . . . gũkenera wĩra wake mũritũ.” (Kohelethu 2:24) Jehova nĩ arutaga wĩra na kĩyo. Tũngĩĩgerekania nake na njĩra ya kũruta wĩra na kĩyo, nĩ tũmũkenagia na tũkaigua tũiganĩire.
Wĩra nĩ wa bata. O na kũrĩ ũguo, tũtiagĩrĩirũo kũwĩtĩkĩria ũtuĩke wa bata gũkĩra ũthathaiya witũ harĩ Jehova. (Johana 6:27) Atwĩrĩire atĩ tũngĩiga ũtungata wake mbere ũtũũro-inĩ, nĩ arĩrũmbũyagia mabataro maitũ.
2. Nĩ muonere ũrĩkũ wagĩrĩire wĩgiĩ mbeca?
O na gũtuĩka Bibilia nĩ yugaga atĩ mbeca “ikoragwo irĩ ũgitĩri,” nĩ ĩtũheaga mũkaana wa atĩ mbeca ciki itingĩtũma tũkorũo na gĩkeno. (Kohelethu 7:12) Nĩ ũndũ ũcio, ĩtwĩkĩraga ngoro tũtikende mbeca no ‘tũiganagĩre na indo iria tũrĩ nacio.’ (Thoma Ahibirania 13:5.) Tũngĩiganagĩra na kĩrĩa tũrĩ nakĩo, nĩ tũrĩĩthemaga gũtangĩka mũno nĩ ũndũ wa kuona ta tũtarĩ na indo cia kũigana. Nĩ tũrĩĩthemaga mathiirĩ matarĩ ma o mũhaka. (Thimo 22:7) Ningĩ nĩ tũrĩĩthemaga mogwati marĩa moimanaga na gũũtha kamarĩ na biacara iria iheenagia andũ atĩ no matonge na ihenya.
3. Tũngĩhota atĩa gũkorũo tũrĩ ataana na mbeca citũ?
Jehova nĩ Ngai mũtaana na nĩ twĩgerekanagia nake rĩrĩa twatuĩka “ataana,” na twakorũo “[twĩhaarĩirie] kũgayagĩra andũ arĩa angĩ indo [citũ].” (1 Timotheo 6:18) No tũkorũo tũrĩ ataana na mbeca citũ na njĩra ya gũteithĩrĩria kĩũngano na gũteithia arĩa mabatara ũteithio, makĩria aarĩ na ariũ a Ithe witũ. Jehova ndaroraga mũno mũigana wa kĩrĩa tũraheana, no aroraga muoroto witũ wa kũheana. Tũngĩheanaga kuuma ngoro tũrĩ na ũtaana, nĩ tũrĩkoragwo na gĩkeno na tũgakenia Jehova.—Thoma Atũmwo 20:35.
THUTHURIA MAKĨRIA
Reke tũthuthurie tuone ũguni wa gũkorũo na mwerekera ũrĩa wagĩrĩire wĩgiĩ wĩra na kũiganĩra na kĩrĩa tũrĩ nakĩo.
4. Tĩithagia Jehova kũgerera ũrĩa ũrutaga wĩra
Ũrata witũ na Jehova nĩ wagĩrĩire kũhutia mwerekera witũ wĩgiĩ wĩra. Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
Kũringana na video ĩyo-rĩ, nĩ ũndũ ũrĩkũ wagũkenia wĩgiĩ mwerekera wa Jason na mĩthiĩre yake arĩ wĩra-inĩ?
Nĩ kĩĩ kĩamũteithagia gũkorũo na mwerekera ũrĩa wagĩrĩire wĩgiĩ wĩra?
Thomai Akolosai 3:23, 24, mũcoke mwarĩrĩrie kĩũria gĩkĩ:
Mwerekera witũ wĩgiĩ wĩra nĩ wa bata nĩkĩ?
Wĩra nĩ wa bata. O na kũrĩ ũguo, tũtiagĩrĩirũo kũwĩtĩkĩria ũtuĩke wa bata gũkĩra ũthathaiya witũ harĩ Jehova
5. Nĩ tũgunĩkaga rĩrĩa twaiganĩra na kĩrĩa tũrĩ nakĩo
Andũ aingĩ mageragia gũcokanĩrĩria mbeca nyingĩ o ũrĩa mangĩhota. No Bibilia ĩtwĩkĩraga ngoro tũkorũo na mwerekera ngũrani. Thomai 1 Timotheo 6:6-8, mũcoke mwarĩrĩrie kĩũria gĩkĩ:
Bibilia ĩtwĩkĩraga ngoro gwĩka atĩa?
No tũkorũo na gĩkeno o na angĩkorũo tũtirĩ na indo nyingĩ. Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
O na gũtuĩka andũ acio matikoragwo na mbeca nyingĩ-rĩ, nĩ kĩĩ kĩmateithagia gũkorũo na gĩkeno?
Ĩ angĩkorũo tũrĩ na indo nyingĩ ĩndĩ no tũrenda nyingĩ makĩria? Jesu nĩ aaheanire ngerekano ĩronania ũgwati wa mwerekera ta ũcio. Thomai Luka 12:15-21, mũcoke mwarĩrĩrie kĩũria gĩkĩ:
Weruta atĩa kuumana na ngerekano ĩyo ya Jesu?—Rora mũhari wa 15.
Thomai na mũringithanie Thimo 10:22 na 1 Timotheo 6:10, mũcoke mwarĩrĩrie ciũria ici:
Ũgwĩciria nĩ ũndũ ũrĩkũ wa bata makĩria, nĩ kũgĩa na ũrata na Jehova kana nĩ kũgĩa na mbeca nyingĩ? Ũngiuga ũguo nĩkĩ?
Nĩ mathĩna marĩkũ moimanaga na gũtengʼerania na mbeca?
6. Jehova nĩ arĩrũmbũyagia mabataro maitũ
Mathĩna megiĩ wĩra na mbeca no monanie kana nĩ twĩhokete Jehova. Mwĩrorerei VIDEO ĩno nĩguo muone ũrĩa tũngĩhiũrania na mathĩna ta macio, mũcoke mwarĩrĩrie ciũria iria irũmĩrĩire.
Kũringana na video ĩyo-rĩ, mũrũ wa Ithe witũ ũcio aacemanirie na moritũ marĩkũ?
Eekire atĩa nĩguo ahote gũtooria moritũ macio?
Thomai Mathayo 6:25-34, mũcoke mwarĩrĩrie kĩũria gĩkĩ:
Nĩ ũndũ ũrĩkũ Jehova erĩire arĩa mamũigaga mbere ũtũũro-inĩ wao?
ANDŨ AMWE MOIGAGA: “No mũhaka ndute wĩra na kĩyo nĩguo hingĩrie famĩlĩ yakwa mabataro. Ndingĩhota gũthiaga mĩcemanio ya kĩũngano o kiumia.”
Nĩ rĩandĩko rĩrĩkũ rĩratũma ũkorũo na ma atĩ kũiga ũthathaiya wa Jehova mbere ũtũũro-inĩ nĩrĩo itua rĩrĩa rĩega biũ ũngĩtua?
ŨRĨA TWERUTA
Wĩra na mbeca nĩ cia bata, no itiagĩrĩire kũingĩrĩra ũtungata witũ harĩ Jehova.
Ciũria cia gũcokera
Nĩ kĩĩ kĩngĩgũteithia gũkorũo na muonere ũrĩa wagĩrĩire wĩgiĩ wĩra?
Ũgunĩkaga atĩa nĩ ũndũ wa kũiganĩra na kĩrĩa ũrĩ nakĩo?
Ũngĩonania atĩa atĩ nĩ wĩtĩkĩtie kĩĩranĩro kĩa Jehova gĩa kũhingĩria andũ ake mabataro mao?
RIKĨRA
Thuthuria wone kana Bibilia yugaga mbeca nĩ njũru.
“Hihi Mbeca Nĩcio Kĩhumo kĩa Maũndũ Mothe Moru?” (Gĩcunjĩ thĩinĩ wa jw.org/ki)
Thoma wone nĩ kũheana kũrĩkũ gũkenagia Ngai.
“Bibilia Yugaga Atĩa Igũrũ Rĩgiĩ Kũheana?” (Gĩcunjĩ thĩinĩ wa jw.org/ki)
Hihi nĩ ũũru gũũtha kamarĩ?