Gwĩtĩkĩrĩka nĩ Ngai Gũtongoragia Muoyo-inĩ wa Tene na Tene

“Amu mũndũ mũthingu-rĩ, nĩ kũrathima ũrĩmũrathimaga; wee Jehova, ũgũtũũra ũmũirigĩire na wega waku o ta arĩ ngo.”—Thab. 5:12.

1, 2. Elija aahoire kĩĩ kuuma kũrĩ mũtumia wa Zarefathu, na aamũmĩrĩirie atĩa?

MŨTUMIA ũrĩa wa Zarefathu na mũrũwe, o hamwe na mũnabii wa Ngai maarĩ ahũũtu. Rĩrĩa mũtumia ũcio eehaaragĩria gwakia mwaki-rĩ, mũnabii Elija akĩmũhoya maĩ na mũgate. Nĩ endaga kũmũhe maĩ, no irio iria ciothe aarĩ nacio, ciarĩ ‘o kamũtu ka rũhĩ rũmwe kaarĩ ndigithũ-inĩ, na tũguta tũnini twarĩ cuba-inĩ.’ Ndoonaga ta aarĩ na irio njiganu cia kũgaĩra mũnabii ũcio, na akĩmwĩra ũguo.—1 Ath. 17:8-12.

² Elija akĩmwĩra ũũ: “Amba ũ’thondekere kamũgate kanini kaguo, ũndehere, na thutha wa ũguo wĩthondekere wee mwene mwĩ na mũrũguo. Nĩ gũkorũo Jehova, Ngai wa Isiraeli, oigĩte ũũ: Ndigithũ ĩo ya mũtu ndĩninũka, o na kana cuba ũcio wa maguta ũninũke.”—1 Ath. 17:13, 14.

3. Ithuothe tũrabatara gũtua itua rĩrĩkũ rĩa bata?

³ Itua rĩrĩa mũtumia ũcio aabataraga gũtua rĩarĩ rĩa bata makĩria ma o kwamũra kana nĩ ekũgaĩra mũnabii ũcio tũirio tũu aarĩ natuo. Hihi nĩ angĩehokire Jehova amahonokie marĩ na mũrũwe, kana aangĩonire mabataro make ma kĩĩmwĩrĩ marĩ ma bata gũkĩra gwĩtĩkĩrĩka harĩ Ngai na kũgĩa na ũrata nake? Ithuothe nĩ tũrabatara gũtua itua o ta rĩu. Hihi nĩ tũkuonania atĩ nĩ tũrenda mũno gwĩtĩkĩrũo nĩ Jehova gũkĩra gwĩcarĩria ũgitĩri wa indo cia kĩĩmwĩrĩ? Tũrĩ na itũmi njiganu cia kwĩhoka Ngai na kũmũtungatĩra. Na nĩ kũrĩ makinya tũngĩoya nĩgetha twĩtĩkĩrĩke nĩ Ngai.

‘Wee nĩ Wagĩrĩire Gũthathaiyo’

4. Twagĩrĩirũo gũthathaiya Jehova nĩkĩ?

⁴ Jehova arĩ na kĩhooto gĩa kwĩrĩgĩrĩra atĩ andũ othe nĩ mekũmũtungatĩra ũrĩa kwagĩrĩire. Gĩkundi kĩa ndungata ciake cia kũũrĩa igũrũ nĩ kĩoonanirie ũũma wa ũndũ ũcio rĩrĩa kĩoigire ũũ: “Wee Mwathani witũ, Ngai witũ-rĩ, wee nowe wagĩrĩirũo nĩ kũgoocagwo na gwĩkĩrĩrũo, na ũgĩage na ũhoti; amu nĩwe wombire indo ciothe, na kwenda gwaku nĩkuo gwatũmire igĩe na ciũmbĩke.” (Kũg. 4:11) Tondũ Jehova nĩwe Mũũmbi, nĩkĩo twagĩrĩirũo kũmũthathaiya.

5. Wendo wa Ngai wagĩrĩirũo gũtũma tũmũtungatĩre nĩkĩ?

⁵ Ũndũ ũngĩ ũtũmaga tũtungatĩre Jehova nĩ wendo wake mũnene mũno harĩ ithuĩ. Bibilia yugaga ũũ: “Ngai agĩgĩtũma kũgĩe andũ, matariĩ ta mũhianĩre wake we mwene, agĩgĩtũma magĩe na mũhianĩre o ta wa Ngai; agĩtũma magĩe kuo marĩ mũndũ mũrũme na mũndũ mũka.” (Kĩam. 1:27) Ngai aaheire mũndũ wĩyathi wa gwĩthuurĩra ũrĩa ekwenda gwĩka, na ũhoti wa gwĩciria na gũtua matua. Na njĩra ya gũtũhe muoyo, Jehova aatuĩkire Ithe wa andũ othe. (Luk. 3:38) O ta mũciari o wothe mwega, Jehova nĩ aheete ciana ciake maũndũ marĩa cirabatara nĩgetha cikenere ũtũũro. ‘Atũmaga riũa rĩake rĩrathe’ na ‘akoiria mbura’ nĩgetha Thĩ ĩgĩe na irio kwa ũingĩ nĩ ũndũ witũ, na tũikare kũndũ gũthaka.—Mat. 5:45.

6, 7. (a) Nĩ mathĩna marĩkũ Adamu aareheire ciana ciake ciothe? (b) Igongona rĩa Kristo rĩkaahingĩria arĩa othe merutanagĩria gwĩtĩkĩrũo nĩ Ngai ũndũ ũrĩkũ?

⁶ Jehova ningĩ nĩ atũkũũrĩte kuuma harĩ moimĩrĩro mooru mũno ma mehia. Rĩrĩa Adamu eehirie, aahanire ta mũndũ ũiyaga mbeca cia famĩlĩ yake agathiĩ gũũtha kamarĩ nacio. Kũremera Jehova gwatũmire Adamu atunye ciana ciake kĩĩrĩgĩrĩro gĩa gĩkeno gĩa tene na tene. Kwĩyenda gwake kwaingĩririe andũ ũkombo-inĩ wa kwaga gũkinyanĩra. Na nĩkĩo andũ othe marwaraga, makagĩo nĩ ihooru, na mũthia-inĩ magakua. Nĩgetha ngombo yohorũo no mũhaka hakorũo na irĩhi, na Jehova nĩ arĩhĩte nĩgetha tuohorũo maũndũ-inĩ macio mothe mooru. (Thoma Aroma 5:21.) Agĩka kũringana na wendi wa Ithe, Jesu Kristo nĩ aarutire “muoyo wake ũtuĩke wa gũkũũra andũ aingĩ.” (Mat. 20:28) Ica ikuhĩ arĩa metĩkĩrĩkĩte nĩ Ngai nĩ marĩamũkĩra irathimo ciothe cia ũkũũri ũcio.

⁷ Mũũmbi witũ, Jehova, ekĩte maũndũ maingĩ mũno gũkĩra mũndũ ũngĩ o wothe nĩgetha tũgĩe na ũtũũro ũrĩ na muoroto na gĩkeno. Tũngĩtĩkĩrĩka nĩwe, nĩ tũrĩona ũrĩa arĩka nĩgetha eherie maũndũ mothe mooru marĩa makoretwo makĩnyarira andũ. Jehova nĩ egũthiĩ na mbere gũtuonia o mũndũ kĩũmbe ũrĩa aheaga “andũ arĩa mamũcaragia ngerenwa yao.”—Ahib. 11:6.

“Kĩrĩndĩ Gĩaku Gĩkerehage o na Mwĩendero”

8. Ũhoro wa Isaia ũratũruta atĩa igũrũ rĩgiĩ gũtungatĩra Ngai?

⁸ Nĩgetha twĩtĩkĩrĩke nĩ Ngai no mũhaka tũhũthĩre wega wĩyathi witũ wa gwĩthuurĩra, tondũ Jehova ndaringagĩrĩria mũndũ o na ũmwe amũtungatĩre. Mahinda-inĩ ma Isaia oririe ũũ: “Nũ ngũrekia, ningĩ-rĩ, nũ ũgũtũthiĩra?” Jehova nĩ aaheire mũnabii Isaia gĩtĩo na njĩra ya gwĩtĩkĩra atĩ aarĩ na kĩhooto gĩa gwĩthuurĩra. Ta wĩcirie gĩkeno kĩrĩa mũnabii ũcio aarĩ nakĩo agĩcokia ũũ: “Niĩ ũyũ haha; ta ndekia arĩ niĩ.”—Isa. 6:8.

9, 10. (a) Nĩ mwerekera ũrĩkũ twagĩrĩirũo gũkorũo naguo tũgĩtungatĩra Ngai? (b) Nĩkĩ gũtungatĩra Jehova na ngoro yothe nĩ gũtwagĩrĩire?

⁹ Andũ makoragwo na wĩyathi wa gũtungatĩra Ngai kana kwaga kũmũtungatĩra. Jehova endaga tũmũtungatĩre na kwĩyendera. (Thoma Joshua 24:15.) Mũndũ o wothe ũtendaga gũthathaiya Ngai ndangĩmũkenia, ningĩ Ngai ndetĩkagĩra ũthathaiya wa arĩa mekaga ũguo no getha makenie andũ. (Kol. 3:22) Tũngĩtĩkĩria maũndũ ma thĩ maingĩrĩre ũthathaiya witũ nginya tũremwo nĩ gũtungatĩra Ngai na “ngoro yothe,” tũtingĩtĩkĩrĩka nĩwe. (Thab. 119:2) Jehova nĩ oĩ atĩ kũmũtungatĩra na ngoro yothe nĩkuo gũtwagĩrĩire. Musa eekĩrire Aisiraeli ngoro mathuure muoyo na njĩra ya ‘kwendaga Jehova Ngai wao, na gwathĩkagĩra uuge wake, na kwĩgwatanagia nake.’—Gũcok. 30:19, 20.

¹⁰ Mũthamaki Daudi wa Isiraeli ya tene aainĩire Jehova ũũ: “Mũthenya wa ita ciaku kĩrĩndĩ gĩaku gĩkerehage o na mwĩedero, kĩĩ na ũgemu ũrĩa wa ũtheru; aanake aku wĩ nao mahaana ta ireera, o ũrĩa rĩoima nda ya rũcinĩ ruoro rũatema.” (Thab. 110:3) Andũ aingĩ ũmũthĩ mathingataga mũno ũtonga na maũndũ ma gwĩkenia. No harĩ arĩa mendete Jehova-rĩ, ũtungata wao harĩ Jehova nĩguo ũndũ ũrĩa wa bata gũkĩra maũndũ marĩa mangĩ mothe. Kĩyo kĩao gĩa kũhunjia nĩ kĩonanagia maũndũ marĩa monaga marĩ ma bata makĩria ũtũũro-inĩ wao. Makoragwo mehokete Jehova biũ atĩ arĩ na ũhoti wa kũmahe mabataro mao ma o mũthenya.—Mat. 6:33, 34.

Magongona Marĩa Metĩkĩrĩkaga nĩ Ngai

11. Aisiraeli meerĩgagĩrĩra irathimo irĩkũ maarutĩra Jehova magongona?

¹¹ Rungu rwa watho wa kĩrĩkanĩro, andũ a Ngai nĩ maarutaga magongona magĩrĩru nĩguo metĩkĩrĩke nĩwe. Maũndũ ma Alawii 19:5 yugaga ũũ: “Hĩndĩ ĩrĩa mũkũrutĩra Jehova igongona rĩa ũiguano, rĩrutagei na njĩra ĩrĩa ĩngĩtũma mwĩtĩkĩrĩke nĩwe.” Ibuku-inĩ o ro rĩu tũthomaga ũũ: “Hĩndĩ ĩrĩa mũkũruta igongona rĩa gũcokeria Ngai ngatho, mũrĩrutage na njĩra ĩrĩa rĩngĩĩtĩkĩrĩka nĩ Jehova ũhoro-inĩ wanyu.” (Alaw. 22:29) Aisiraeli maarutĩra Jehova igongona rĩagĩrĩire rĩa nyamũ kĩgongona-inĩ, ndogo ĩrĩa yaambataga yahaanaga ta “mũtararĩko ũrĩa ũnungaga wega” harĩ Ngai ũrĩa wa ma. (Alaw. 1:9, 13) Aaiguaga ahooreirio na acanjamũrĩtwo nĩ wonania ũcio wa wendo kuuma kũrĩ andũ ake. (Kĩam. 8:21) Mawatho-inĩ macio nĩ tuonaga ũrutani tũngĩhũthĩra ũmũthĩ. Andũ arĩa marutaga magongona ta macio nĩ metĩkĩrĩkaga nĩ Jehova. Etĩkagĩra magongona marĩkũ? Reke twarĩrĩrie maũndũ merĩ megiĩ ũtũũro: mĩthiĩre iitũ na mĩario iitũ.

12. Nĩ maũndũ marĩkũ mangĩtũma ‘igongona riitũ’ rĩrakarie Ngai?

¹² Marũa-inĩ make kũrĩ Aroma, mũtũmwo Paulo aandĩkire ũũ: “Mwĩrute mĩĩrĩ yanyu ĩtuĩke ihaki rĩa kũmũhakĩra igongona narĩo rĩrĩ muoyo, na rĩrĩ itheru, o rĩrĩa rĩngĩĩtĩkĩrĩka nĩ Ngai, arĩ guo ũtungati wa ũũhĩgu ũrĩa ũmwagĩrĩire.” (Rom. 12:1) Nĩgetha mũndũ etĩkĩrĩke nĩ Ngai arabatara kũiga mwĩrĩ wake na njĩra ĩrakenia Ngai. Angĩĩthũkia na mbakĩ, mĩraa, ndawa cia ũrĩĩu, kana ahũthĩre njohi ũũru, ndangĩtĩkĩrĩka nĩ Ngai. (2 Kor. 7:1) Ningĩ-rĩ, tondũ “mũndũ wa kũhũra maraya, nĩ mwĩrĩ wake mwene ekwĩhia,” waganu o wothe ũtũmaga igongona rĩa mũndũ rĩrakarie Jehova. (1 Kor. 6:18) Nĩgetha mũndũ akenie Ngai no mũhaka ‘atuĩke mũtheru mĩthiĩre-inĩ yake yothe.’—1 Pet. 1:14-16.

13. Nĩkĩ nĩ twagĩrĩirũo kũgoocaga Jehova?

¹³ Igongona rĩngĩ rĩkenagia Jehova rĩkoniĩ mĩario iitũ. Andũ arĩa mendete Jehova makoretwo makĩaria ũhoro wake mwega marĩ gatagatĩ-inĩ ka andũ na rĩrĩa marĩ mĩciĩ-inĩ yao. (Thoma Thaburi 34:1-3.) Thoma Thaburi 148-150 na wone ũrĩa ĩtwĩkagĩra ngoro maita maingĩ tũgooce Jehova. Na ma-rĩ, “andũ arĩa arũngĩrĩru nĩo magĩrĩirũo nĩ kũmũkumia.” (Thab. 33:1) Na Jesu Kristo, ũrĩa arĩ we Kĩonereria giitũ kĩnene, nĩ aatĩtĩrithirie bata wa kũgooca Ngai na njĩra ya kũhunjia ũhoro ũrĩa mwega.—Luk. 4:18, 43, 44.

14, 15. Hosea eerire Aisiraeli marute magongona marĩkũ, na Jehova eekire atĩa?

¹⁴ Na njĩra ya kũhunjia na kĩyo tuonanagia atĩ nĩ twendete Jehova na nĩ twĩriragĩria gwĩtĩkĩrũo nĩwe. Kwa ngerekano-rĩ, ta wĩcirie ũrĩa mũnabii Hosea aataarire Aisiraeli arĩa maambĩrĩirie ũthathaiya wa maheeni na magatiga gwĩtĩkĩrĩka harĩ Ngai. (Hos. 13:1-3) Hosea aameerire mathaithe Jehova ũũ: “ Eheria waganu wothe, na ũiyũkie ũndũ ũrĩa mwega; na noguo ithuĩ na ithuĩ tũrĩrutaga iheo cia mĩromo iitũ ituĩke ta ndegwa cia magongona.”—Hos. 14:1, 2.

¹⁵ Ndegwa nĩyo yarĩ nyamũ ya goro mũno Mũisiraeli angĩarutĩire Jehova. Kwoguo ‘iheo cia mĩromo iria ciahaanaga ta ndegwa cia magongona’ ciarĩ ciugo cia ma, ciambĩte gwĩcirio wega cia kũgooca Ngai ũrĩa wa ma. Jehova eekaga atĩa kũrĩ arĩa maarutaga magongona ta macio? Oigire ũũ: ‘Ngũmenda mũno o ndĩyendeire.’ (Hos. 14:4) Arĩa othe maarutaga magongona ta macio ma kũmũgooca, Jehova aamohagĩra, akametĩkĩra, na agatuĩka mũrata wao.

16, 17. Rĩrĩa wĩtĩkio harĩ Ngai watũma mũndũ ambĩrĩrie kũhunjia ũhoro ũrĩa mwega-rĩ, Jehova amũkagĩra rũgooco rũu atĩa?

¹⁶ Kũgoocaga Jehova gatagatĩ-inĩ ka andũ gũkoretwo kũrĩ ũndũ wa bata mũno ũthathaiya-inĩ wa ma. Gũtũũgĩria Ngai kwarĩ ũndũ wa bata mũno harĩ mũtungi wa Thaburi nginya agĩthaitha Ngai ũũ: “Ta ĩtĩkĩra mahaki ma kanua gakwa, Jehova, maya ngũruta o na mwĩendero.” (Thab. 119:108) Ĩ ũmũthĩ naguo? Akĩaria ũhoro wa kĩrĩndĩ kĩingĩ kĩa mahinda maitũ, Isaia aarathire ũũ: ‘Nĩ makaaheanaga ũrĩa Jehova akumagio. O na ningĩ iheo ciao ciahaicio kĩgongona-inĩ kĩa Ngai, nĩigetĩkĩrĩka na gĩkeno.’ (Isa. 60:6, 7) Andũ milioni nyingĩ nĩ mararutĩra Ngai ‘igongona rĩa kũmũgooca; naguo nĩ ta kuuga maciaro moimĩte tũnua-inĩ twa arĩa moimbũraga rĩĩtwa rĩake,’ na njĩra ĩyo ũrathi ũcio ũkahinga.—Ahib. 13:15.

¹⁷ Ĩ wee nawe? Hihi nĩ ũrarutĩra Ngai magongona magĩrĩru? Angĩkorũo tiguo-rĩ, hihi nĩ ũgwĩka ũgarũrũku ũrĩa ũrabatarania nĩgetha wambĩrĩrie kũgoocaga Jehova na njĩra ya kũhunjia? Hĩndĩ ĩrĩa wĩtĩkio watũma wambĩrĩrie kũhunjagia ũhoro ũrĩa mwega, igongona rĩaku nĩ rĩrĩkenagia “Jehova gũkĩra kũmũhe ndegwa.” (Thoma Thaburi 69:30, 31.) Gĩa na ma atĩ “mũtararĩko ũrĩa ũnungaga wega” wa igongona rĩaku rĩa kũgooca nĩ ũgũkinyĩra Jehova, na atĩ nĩ egũgwĩtĩkĩra. (Ezek. 20:41) Gĩkeno kĩrĩa ũgũkorũo nakĩo weka ũguo nĩ kĩnene mũno.

‘Jehova we Mwene nĩ Arĩrathimaga Mũndũ o Wothe Mũthingu’

18, 19. (a) Andũ aingĩ ũmũthĩ makoragwo na mawoni marĩkũ igũrũ rĩgiĩ ũthathaiya wa ma? (b) Kwaga gwĩtĩkĩrĩka harĩ Ngai gũkoragwo na moimĩrĩro marĩkũ?

¹⁸ Andũ aingĩ ũmũthĩ makinyagĩrĩrũo nĩ kuuga o ta ũrĩa andũ amwe a hĩndĩ ya Malaki mooigire: “Gũtungatĩra Ngai nĩ wĩra wa tũhũ, o nakuo kũmwathĩkĩra-rĩ, kũrĩ na uumithio ũrĩkũ?” (Mal. 3:14) Magĩtongorio nĩ merirĩria ma indo cia kĩĩmwĩrĩ, monaga muoroto wa Ngai ta ũtangĩkinyanĩra na ta mawatho ma Ngai matangĩhũthĩka ũmũthĩ. Harĩ o-rĩ, kũhunjia ũhoro wa ũthamaki nĩ gũte mahinda na nĩ ũndũ ũmarakaragia.

¹⁹ Kĩhumo kĩa mwerekera ũcio nĩ mũgũnda wa Edeni. Shaitani nĩwe watũmire Hawa age kuona bata wa ũtũũro mwega mũno ũrĩa maahetwo nĩ Jehova na kwoguo akĩaga kuona gwĩtĩkĩrĩka nĩ Jehova arĩ ũndũ wa bata. Ũmũthĩ Shaitani atũmaga andũ metĩkie atĩ kũhingia wendi wa Ngai gũtirĩ uumithio. O na kũrĩ ũguo-rĩ, Hawa na mũthuriwe nĩ maamenyire atĩ kwaga gwĩtĩkĩrĩka nĩ Jehova kwoigaga kũũrũo nĩ ũtũũro wao. Andũ arĩa marũmagĩrĩra kĩonereria kĩao kĩũru o ica ikuhĩ nĩ marĩguũkĩrũo nĩ ũũma ũcio.—Kĩam. 3:1-7, 17-19.

20, 21. (a) Mũtumia ũrĩa wa Zarefathu eekire atĩa, na ũndũ ũcio warĩ na moimĩrĩro marĩkũ harĩ we? (b) Twagĩrĩirũo kwĩgerekania na mũtumia wa Zarefathu na njĩra ĩrĩkũ na nĩkĩ?

²⁰ Ta ringithania moimĩrĩro mooru ma Adamu na Hawa na moimĩrĩro marĩa mekũgwetetwo megiĩ Elija na mũtumia ũrĩa wa ndigwa wa Zarefathu. Thutha wa gwĩkĩrũo ngoro nĩ Elija-rĩ, mũtumia ũcio aambĩrĩirie kũruga na akĩamba kũihũrĩra mũnabii o na gũtuĩka aarĩ o na tũirio tũnini. Nake Jehova akĩhingia ũrĩa oigĩte kũgerera Elija. Bibilia yugaga ũũ: “Nake mũtumia ũcio, o na Elija, o na andũ a nyũmba yake, makĩrĩa kandũ kau matukũ maingĩ. Nayo ndigithũ ĩo ndĩigana gũthira mũtu, o na kana cuba ũgĩthira maguta, o ta ũrĩa uuge wa Jehova watariĩ ũrĩa aaririe na kanua ka Elija.”—1 Ath. 17:15, 16.

²¹ Mũtumia ũcio wa Zarefathu eekire ũndũ andũ aingĩ mũno arĩa maraatũũra ũmũthĩ matangĩka. Eehokire biũ Ngai ũrĩa ũhonokanagia, nake Ngai ndaamũtiganĩirie. Ũhoro ũcio na ũngĩ ũrĩa ũkoragwo thĩinĩ wa Bibilia ũronania nĩ twagĩrĩirũo kwĩhoka Jehova. (Thoma Joshua 21:43-45; 23:14.) Mũtũũrĩre wa Aira a Jehova ũmũthĩ ningĩ nĩ wonanagia atĩ gũtirĩ hĩndĩ Jehova agaatiganĩria arĩa metĩkĩrĩkĩte nĩwe.—Thab. 34:6, 7, 17-19.a

22. Nĩkĩ arĩ ũndũ wa bata mũno tũcarie ũrĩa tũngĩtĩkĩrĩka nĩ Ngai tũtekũgonderera?

²² Mũthenya wa Ngai wa ciira “nĩũkahobanĩria andũ arĩa othe magakorũo matũire gũkũ thĩ guothe.” (Luk. 21:34, 35) Tũtingĩhota kũũrĩra. Gũtirĩ ũtonga kana indo cia gũkũ thĩ ingĩiganana na kũigua mũtuanĩri ciira ũrĩa ũthuurĩtwo nĩ Ngai akiuga ũũ: “Ũkani, inyuĩ mũrathimĩtwo nĩ Awa, gwatai igai rĩa ũthamaki ũrĩa mwathondekeirũo.” (Mat. 25:34) Ĩĩ-ni, ‘Jehova we mwene nĩ arĩrathimaga mũndũ o wothe mũthingu; egũtũũra amũirigĩire na wega wake ta arĩ ngo.’ (Thab. 5:12) Na githĩ tũtikĩagĩrĩirũo gũcaria ũrĩa tũngĩtĩkĩrũo nĩ Ngai?

[Kohoro ka magũrũ-inĩ]

Hihi nĩ Ũraririkana?

• Twagĩrĩirũo gũthathaiya Jehova kuuma ngoro nĩkĩ?

• Nĩ magongona marĩkũ Jehova etĩkagĩra ũmũthĩ?

• ‘Iheo cia mĩromo iria cihaana ta ndegwa cia magongona’ nĩ kuuga atĩa, na twagĩrĩirũo kũrutĩra Jehova iheo icio nĩkĩ?

• Twagĩrĩirũo gũcaria ũrĩa tũngĩtĩkĩrĩka nĩ Ngai nĩkĩ?

[Mbica karatathi ka 19]

Mũnabii wa Ngai oririe mũtumia warĩ mũthĩni na mũhũũtu atue itua rĩrĩkũ?

[Mbica karatathi ka 21]

Tũgunĩkaga atĩa twarutĩra Jehova igongona rĩa kũmũgooca?

[Mbica karatathi ka 23]

Wehoka Jehova biũ ndarĩ hĩndĩ agaagũtiganĩria