Athomi Aitũ Maroria Atĩrĩ . . .

Hihi nĩ kũrĩ rũruka Ngai onaga rũrĩ rwa bata gũkĩra rũrĩa rũngĩ?

▪ Aca. Bibilia yugaga wega atĩ: “Ngai ndatĩagĩra andũ maũthĩ: no thĩinĩ wa ndũrĩrĩ ciothe mũndũ ũrĩa ũmwĩtigagĩra na ageka maũndũ ma ũthingu nĩetĩkagĩrũo nĩwe.”—Atũmwo 10:34, 35.

Mawoni ma Ngai megiĩ ũndũ ũcio nĩ ma igũrũ mũno gũkĩra mawoni ma andũ matarĩ akinyanĩru. Andũ aingĩ metĩkĩtie atĩ rũruka rũmwe (na makĩria rwao) nĩ rwa bata kũrĩ iria ingĩ. Mwerekera ũcio mũũru wonanagia mwĩcirĩrie ta wa Charles Darwin, ũrĩa waandĩkire ũũ: “Ica ikuhĩ, . . . iruka iria ithiĩte na mbere nĩ irĩniina biũ iruka iria itathiĩte na mbere.” Ũndũ wa kĩeha nĩ atĩ andũ aingĩ mananyamario nĩ andũ a iruka iria ciĩyonaga irĩ cia bata.

Hihi nĩ harĩ mũthingi o wothe wa kuona rũruka rũmwe rũrĩ rwa bata kũrĩ iria ingĩ? Kwa ngerekano-rĩ, hihi sayanisi nĩ ĩhotete kuonania atĩ iruka imwe nĩ cia bata na atĩ iria ingĩ ti cia bata? Ngũrani na ũguo-rĩ, mũthomi ũmwe wa iruka cia andũ na nĩ profesa wa Oxford wĩtagwo Bryan Sykes oigire ũũ: “Gũtirĩ mũthingi o wothe wonanagia atĩ nĩ kũrĩ rũruka kana rũrĩrĩ rwa bata kũrĩ rũrĩa rũngĩ kũringana na mũmbĩre waruo. . . . Maita maingĩ nĩ njũragio kana nĩ kũrĩ DNA ya Mũgiriki kana ya Mũitariani, no ma nĩ atĩ gũtirĩ. . . . Ithuothe tũrĩ a rũrĩra rũmwe.”

Ũtuĩria ũcio nĩ ũringanĩte na ũhoro ũrĩa tũthomaga Maandĩko-inĩ. Bibilia ĩrutanaga atĩ iruka ciothe cia andũ cioimanire na mũthuri na mũtumia ũmwe, arĩa Ngai ombire. (Kĩambĩrĩria 3:20; Atũmwo 17:26) Kwoguo, maitho-inĩ ma Ngai kũrĩ o rũruka rũmwe tu—rũruka rwa andũ.

Jehova ndonaga rangi wa mũndũ kana maũthĩ make marĩ ma bata mũno. Ithenya rĩa ũguo, kĩrĩa onaga kĩrĩ kĩa bata mũno nĩ ngoro iitũ ya mũhaano kana ũrĩa tũtariĩ thĩinĩ witũ. Oigĩte ũũ: “Mũndũ . . . abaraga one ũrĩa mũndũ atariĩ akĩonwo na maitho, no rĩrĩ Jehova abaraga ngoro thĩinĩ.” (1 Samueli 16:7) Kũririkana ũndũ ũcio no gũtwĩkĩre ngoro mũno. Na njĩra ĩrĩkũ?

Gũtekũmakania tũrĩ a rũruka rũrĩkũ, aingĩ aitũ nĩ kũrĩ maũndũ tuonaga mategũtũkenia megiĩ ũrĩa mĩĩrĩ iitũ ĩtariĩ, ĩndĩ tũtirĩ na ũhoti wa gũcenjia maũndũ ta macio. O na kũrĩ ũguo, no tũhote kwagĩria kĩrĩa kĩa bata makĩria—meciria na ngoro ciitũ. (Akolosai 3:9-11) Tũngĩĩthuthuria wega no twĩtĩkĩre atĩ nĩ twĩyonaga tũrĩ a bata o na akorũo no hanini kana hihi tũkeyona tũtarĩ a bata twĩringithanĩtie na andũ a rũruka rũngĩ. Tondũ mawoni macio matiringaine na mwĩcirĩrie wa Ngai-rĩ, nĩ twagĩrĩirũo nĩ kwĩrutanĩria kweheria mĩerekera ta ĩyo ngoro-inĩ ciitũ.—Thaburi 139:23, 24.

Twerutanĩria kwĩyona na kuona andũ arĩa angĩ ta ũrĩa Jehova atuonaga-rĩ, nĩ arĩtũteithagia. Kiugo gĩake gĩtũririkanagia ũũ: “Nĩ gũkorũo Jehova orũragia maitho kũndũ guothe thĩ yothe akĩonania atĩ e na hinya mũno wa gũteithia andũ arĩa mamũrũmagĩrĩra na ngoro yao yothe.” (2 Maũndũ ma Matukũ ma Tene 16:9) Ũcio nĩ ũhoro wa ma gũtekũmakania tũrĩ a rũruka rũrĩkũ.