Ũrĩa Ũngĩruta Ciana Ũhoro wa Ngai—Nĩ Njĩra Irĩkũ Ikoretwo na Moimĩrĩro Mega?

“Mohoro maya ndĩrakũhe ũmũthĩ ngĩgũtaara-rĩ, reka matũũre ngoro-inĩ yaku; na ũmarute ciana ciaku na kĩyo, na waragie ũhoro wamo hĩndĩ ĩrĩa ũikarĩte nyũmba yaku thĩinĩ, na hĩndĩ ĩrĩa ũgũthiĩ na njĩra, na hĩndĩ ĩrĩa ũkomete, o na rĩrĩa ũũkĩrĩte.”—GŨCOKERITHIA MAATHANI 6:6, 7.

RĨNGĨ na rĩngĩ aciari no maigue maritũhĩirũo nĩ wĩra wa kũruta ciana ciao. Magĩcaria ũtaaro, nĩ ũhũthũ mahĩngĩcwo nĩ maũndũ maingĩ marĩa maraigua na magathoma ũhoro wamo. Arata na andũ a famĩlĩ nĩ makoragwo makĩenda mũno kũmeera ũrĩa mangĩka. Namo mabuku, magathĩti, na Intaneti ikoragwo ikĩhe aciari ũtaaro mũingĩ mũno na rĩngĩ ũtaratwarana.

Ĩndĩ Bibilia, ĩheaga aciari ũtaaro mwega wa maũndũ marĩa magĩrĩirũo nĩ kũruta ciana ciao o hamwe na kũmonia ũrĩa mangĩciruta. O ta ũrĩa mĩhari ĩyo ya Bibilia ĩgwetetwo hau igũrũ ĩronania-rĩ, aciari nĩ mabataire gũcaria mĩeke ya kwaria ũhoro wa Ngai na ciana ciao o mũthenya. Haha mũhuro harĩ na njĩra inya ciumanĩte na Bibilia iria ikoretwo igĩteithia aciari aingĩ kũruta ciana ciao ũhoro wĩgiĩ Ngai.

1. Hũthĩra ũũmbi. Mũtũmwo Paulo aandĩkire ũũ: “Maũndũ make [Ngai] marĩa matonekaga—na nĩmo hinya wake ũrĩa ũtũũraga o ho, o naguo ũngai wake-rĩ—nĩmonagwo wega tondũ wa ũrĩa makũũranĩkaga nĩ ũndũ wa indo iria ciombirũo.” (Aroma 1:20) Aciari no mateithie ciana ciao mũno kuona atĩ kũna Ngai arĩ kuo mangĩhũthĩra wĩra wake wa ũũmbi, na macoke maciteithie kũmenya ngumo cia Ngai iria ciguũragio nĩ ũũmbi.

Jesu nĩ aahũthĩrire njĩra ĩyo kũruta arutwo ake. Kwa ngerekano-rĩ, oigire ũũ: “Ta rorai nyoni cia rĩera-inĩ, atĩ itihandaga, kana ikagetha, kana igaita makũmbĩ; na Ithe wanyu ũrĩa wĩ Igũrũ nĩaciheaga irio. Githĩ inyuĩ mũtikĩrĩ bata mũnene kũrĩ icio?” (Mathayo 6:26) Jesu aarutanaga ũhoro wa ngumo ya Jehova ya wendo na ũcayanĩri. No harĩ ũndũ ũngĩ eekire. Nĩ aateithirie arutwo ake mecirie ũrĩa Ngai onanagia ngumo icio kwerekera ciana ciake.

Mũthamaki mũũgĩ Suleimani nĩ aaririe ũhoro wa ũũgĩ ũrĩa Ngai aheete thigiriri na akĩhũthĩra tũnyamũ tũu tũnini kũrutana ũndũ wa bata. Aandĩkire ũũ: “Thiĩ harĩ thigiriri, wee kĩgũta gĩkĩ, ũgacũranie mĩtugo yayo, nĩguo ũkĩũhĩge! Thigiriri yo ndĩrĩ na mũthamaki, kana mũrũgamĩrĩri, kana mũmĩathi, Na no ĩĩigagĩra mũthithũ wa irio hingo ya riũa, ĩgakĩũnganagia kandũ kayo hingo ya magetha.” (Thimo 6:6-8) Ĩyo nĩ njĩra njega mũno ya kũrutana bata wa kwĩigĩra matanya marĩa magĩrĩire na tũgacoka tũkahũthĩra hinya ũrĩa tũheetwo nĩ Ngai kũmakinyĩra!

Aciari no megerekanie na Jesu na Suleimani kũhũthĩra njĩra ĩrĩ na moimĩrĩro mega mangĩka maũndũ maya: (1) Kũũria ciana ciao ikenagio nĩ mĩmera na nyamũ irĩkũ. (2) Kwĩruta ũhoro makĩria wĩgiĩ mĩmera ĩyo na nyamũ icio. (3) Kũhũthĩra ũũmbi ta ũcio kũrutana ũhoro wa Ngai.

2. Wĩgerekanie na mwerekera ũrĩa Jesu aarĩ naguo harĩ arĩa aarutaga. Harĩ andũ arĩa othe manakorũo kuo, gũtirĩ wanakorũo na maũndũ ma bata ma kwaria ta Jesu. O na kũrĩ ũguo, kaingĩ aahũthagĩra ciũria. Aakoragwo akĩenda mũno kũmenya kĩrĩa kĩrĩ thĩinĩ wa ngoro na meciria ma arĩa aarutaga. (Mathayo 17:24, 25; Mariko 8:27-29) O nao aciari makoragwo na motaaro maingĩ ma bata mũno ma kũhe ciana ciao. No nĩguo magĩe na moimĩrĩro mega-rĩ, nĩ mabatiĩ megerekanie na Jesu na mekĩre ciana ciao ngoro ciĩyaragie itegwĩtigĩra.

Ĩ ciana cingĩkorũo na mwerekera mũũru kana cikorũo citekũnyita maũndũ mamwe marĩa ũraciruta? Wĩcirie njĩra iria Jesu aahũthĩrire kũruta atũmwo. Kũrĩ hĩndĩ maakararanagia mũno o ene na matianyitire na ihenya bata wa gũkorũo marĩ enyihia. O na kũrĩ ũguo-rĩ, Jesu nĩ aamakirĩrĩirie na akĩmaruta ũhoro wĩgiĩ wĩnyihia maita maingĩ. (Mariko 9:33, 34; Luka 9:46-48; 22:24, 25) Aciari arĩa megerekanagia na Jesu nĩ makiragĩrĩria ciana ciao na rĩrĩa kwabatarania, nĩ macokagĩra ũndũ ũrĩa maraciruta nginya cimenye biũ bata wa ũndũ ũcio.a

3. Tuĩka kĩonereria. Aciari nĩ magĩrĩirũo nĩ gwathĩkĩra ũtaaro ũrĩa mũtũmwo Paulo aaheire Akristiano arĩa maatũraga Roma. Aamandĩkĩire ũũ: “Githĩ wee ũrutaga andũ arĩa angĩ ndũngĩĩruta wee mwene? Wee ũhunjagia atĩ mũndũ ndakanaiye, githĩ nĩũiyaga?”—Aroma 2:21.

Ũtaaro ũcio nĩ wagĩrĩire tondũ ciana cĩirutaga makĩria kuumana na maũndũ marĩa cionaga aciari magĩka gũkĩra marĩa iraigua makiuga. Ma nĩ atĩ, aciari arĩa mekaga ũrĩa marutaga ciana ciao kaingĩ nĩ cimathikagĩrĩria magĩciruta.

4. Ambĩrĩria mwana arĩ o mũnyinyi. Timotheo ũrĩa maagendaga na Mũtũmwo Paulo ũtungata-inĩ wa mishonarĩ aarĩ na ngumo njega mũno itũũra-inĩ rĩao. (Atũmwo 16:1, 2) Gĩtũmi kĩmwe nĩ tondũ ‘gwata hĩndĩ ĩrĩa arĩ kaana’ nĩ aarutĩtwo “Maandĩko marĩa matheru.” Nyina na cũwe wa Timotheo maamũthomagĩra Maandĩko na makĩria ma ũguo,makamũteithia kuona ma ĩrĩa ĩrĩ thĩinĩ wamo.—2 Timotheo 1:5; 3:14, 15.

Kũrĩa Ũngĩruta Ũteithio

Aira a Jehova nĩ marutĩte mabuku maingĩ marongoreirio gũteithia aciari kũruta ciana ma ĩrĩa ĩkoniĩ Ngai. Mamwe mandĩkĩtwo marĩ ma gũteithia ciana nyinyi. Mangĩ namo no mateithie aciari kuumĩrania ngoro na ciana ciao iria irĩ mĩaka-inĩ ya wĩthĩ.b

Hatarĩ nganja, mbere ya aciari kũruta ciana ũhoro wa Ngai, nĩ marabatara kũmenya macokio ma ciũria iria nditũ ciana ciao cingĩũria. Kwa ngerekano-rĩ, ũngĩcokia atĩa ciũria ta ici: Ngai etĩkĩrĩtie mĩnyamaro nĩkĩ? Muoroto wa Ngai harĩ thĩ nĩ

atĩa ciũria ta ici: Ngai etĩkĩrĩtie mĩnyamaro nĩkĩ? Muoroto wa Ngai harĩ thĩ nĩ ũrĩkũ? Akuũ marĩ kũ? Aira a Jehova no makenere gũgũteithia kũmenya macokio ma ciũria icio na ingĩ nĩguo wee na famĩlĩ yaku mũhote gũkuhĩrĩria Ngai.—Jakubu 4:8.

[Mohoro ma magũrũ-inĩ]