ATHOMI AITŨ MARORIA ATĨRĨ . . .

Hihi thĩ nĩ ĩgaathira?

▪ Andũ amwe meetĩkĩtie atĩ thĩ ĩngĩathirire Oktomba 21, 2011. Ĩndĩ ndĩigana gũthira. Kwoguo, ũrathi wa Harold Camping, mũtangathi wa redio wa Amerika ndwahingire. Aarathĩte atĩ Mũthenya ũcio wa Ituĩro ũngĩokire Mĩĩ 21, 2011​—gĩthingithia kĩnene kĩngĩagũmĩire thĩ yothe, na mĩeri ĩtano thutha ũcio, Oktomba 21, thĩ nĩ ĩngĩaniinirũo.

Ĩndĩ, thĩ ndĩkaniinwo o rĩ o rĩ. Mũũmbi wa thĩ ndageetĩkĩria ũndũ ũcio wĩkĩke. Kiugo gĩake kiugaga ũũ: “Thĩ nĩwe ũmĩrũmĩtie, nayo ĩgagĩikara o ho.”​—Thaburi 119:⁠90.

O na kũrĩ ũguo, athomi amwe a Bibilia no maregane na ũhoro ũcio, moige atĩ thĩ ĩno nĩ ĩkaaninwo na mwaki. Mahũthagĩra rĩandĩko rĩa 2 Petero 3:​7, 10 kũnyita ũndũ ũcio mbaru: “No rĩrĩ, Igũrũ rĩrĩa rĩĩ ho rĩu, o na thĩ, nĩ kũigĩrũo ciigĩirũo mwaki, nĩ ũndũ wa kiugo o ro kĩu, igagĩeterera mũthenya ũrĩa wa cira, o na wa kũninwo kwa andũ arĩa matetigagĩra Ngai. . . . No rĩrĩ, mũthenya ũrĩa wa Mwathani nĩũgoka o ta mũici; naguo mũthenya ũcio-rĩ, nĩguo Igũrũ rĩkarindũka na mũrurumo mũnene, nacio ciũmbe iria itũire igũrũ nĩikahĩa nĩ mwaki mũnene ithire, nayo thĩ o na indo ciothe iria ithondeketwo kuo nĩigacinwo biũ.” Hihi twagĩrĩirũo gũtaũkĩrũo nĩ ciugo cia mũtũmwo Petero o ũguo itariĩ?

Aca. Nĩkĩ? Tondũ gũtaũkĩrũo nĩ mĩhari ĩyo no mũhaka gũtwarane na ciugo iria ithiũrũrũkĩirie marũa ma Petero na Bibilia ĩrĩ yothe. Ũtaũku wa ĩmwe kwa ĩmwe wa mĩhari ĩyo ũngĩonania atĩ igũrũ​—⁠njata nyingĩ mũno na indo ingĩ iria ikoragwo kuo​—nĩ ikahĩa nĩ mwaki atĩ tondũ gacunjĩ o kamwe tu ga cio gakoragwo na andũ oru. Hihi no ũcine ikũnia igima rĩa njũgũ atĩ tondũ njũgũ ĩmwe nĩ mbuthu? Ũcio ndũngĩkorũo ũrĩ ũndũ wa ũũgĩ! Ũguo noguo Jehova atangĩniina ũũmbi wake wothe atĩ tondũ ũregani nĩ waingĩrire thĩinĩ wa gĩcunjĩ o kĩmwe tu kĩa ũũmbi ũcio.

Makĩria ma ũguo, mawoni ta macio nĩ mũgarũ na ciugo ici cia Jesu Kristo: “Gũkena-rĩ, nĩ arĩa ahoreri, nĩ gũkorũo nĩmakagaya thĩ.” (Mathayo 5:5; Thaburi 37:29) Hihi mũthuri wendete famĩlĩ yake no amĩakĩre nyũmba njega acoke acine nyũmba ĩyo? (Thaburi 115:16) Ndangĩka ũndũ ta ũcio! Makĩria ma Jehova gũkorũo arĩ we Mũũmbi, nĩ Ithe witũ ũtwendete mũno.​—⁠Thaburi 103:13; 1 Johana 4:⁠8.

Mũhari-inĩ ũcio Petero ahũthĩrĩte kiugo “thĩ” na njĩra ya mũhaano, akĩaria ũhoro wa andũ​—andũ aganu. Rora wone atĩ Petero aringithanĩtie ũndũ ũcio na Kĩguũ kĩa hĩndĩ ya Nuhu. (2 Petero 3:​5, 6) Hĩndĩ ĩyo, no andũ arĩa aganu maaninirũo; thĩ yo nyene na Nuhu ũrĩa warĩ mũthingu o hamwe na famĩlĩ yake nĩ maahonokire. O ta ũguo Petero aahũthĩrire kiugo “igũrũ” na njĩra ya mũhaano. Ũhoro-inĩ ũcio, “igũrũ” nĩ wathani wa andũ magĩatha arĩa matetigĩrĩte Ngai. Nĩ ũndũ ũcio andũ arĩa aganu nĩ magaathira, o hamwe na thirikari ciothe njũru, iria ikeherio na ithenya rĩacio Ũthamaki wa igũrũ wa Ngai wĩhande.​—Danieli 2:44.

Kwoguo-rĩ, thĩ nĩ ĩgaathira? Aca. Kĩrĩa gĩgaathira nĩ thĩ ya mũhaano, nĩ yo andũ arĩa aganu. Thĩ yo nyene ĩgũtũũra tene na tene, o nao andũ arĩa magaakorũo marĩ etigĩri Ngai magaatũũra tene na tene.​—Thimo 2:​21, 22.