Jesu Aarĩ na Mawoni Marĩkũ Kwerekera Ũteti?

ANDĨKI a Injiri nĩ maarĩtie ũhoro wa maũndũ maigana ũna megiĩ ũtungata wa Jesu marĩa maatũmaga ahiũranie na ũteti. Kwa ngerekano, kahinda kanini thutha wa Jesu kũbatithio arĩ wa mĩaka ta 30, Mũcukani nĩ eendaga kũmũhe gĩtĩ kĩa mwathi wa thĩ yothe. Thutha-inĩ arĩ ũtungata-inĩ wake, kĩrĩndĩ nĩ kĩendaga kũmũtua mũthamaki wao. O na thutha ũcio andũ nĩ maageririe kũmũtua mwarĩrĩria wa maũndũ ma gĩũteti. Jesu eekire atĩa? Rekei twarĩrĩrie maũndũ macio.

Mwathi wa thĩ yothe. Maandĩko ma Injiri moigaga atĩ Mũcukani erĩire Jesu “mothamaki mothe ma thĩ.” Ta wĩcirie maũndũ marĩa mothe mega Jesu angĩekĩire andũ korũo nĩ aagĩire na hinya wa gwatha thĩ yothe! Nĩ mũndũ ũrĩkũ wendete ũteti na wendaga kuona andũ makĩgacĩra ũngĩaregire mweke ta ũcio? No Jesu nĩ aaũregire.—Mathayo 4:8-11.

Mũthamaki. Andũ aingĩ a hĩndĩ ya Jesu nĩ meriragĩria mũno kũgĩa na Mũthamaki ũngĩahotire kũmaniinĩra mathĩna ma kĩĩmbeca na ma gĩũteti. Nĩ ũndũ wa gũkenio nĩ ũhoti wa Jesu, andũ nĩ meendaga Jesu aingĩre ũteti-inĩ. Hihi eekire atĩa? Johana mwandĩki wa Injiri oigire ũũ: ‘Jesu ona atĩ makiriĩ gũũka kũmũtwara na hinya makamũtue mũthamaki wao, agĩcoka kĩrĩma-inĩ arĩ wiki.’ (Johana 6:10-15) Hatarĩ nganja Jesu nĩ aaregire kwĩingĩria ũteti-inĩ.

Mũrũĩrĩri maũndũ ma gĩũteti. Rora wone ũndũ ũrĩa wekĩkire Jesu atanoragwo. Arũtwo a Afarisai, arĩa meriragĩria wĩyathi kuuma harĩ Wathani wa Roma, marĩ na amwe a kĩama kĩa Herode, kĩrĩa kĩanyitaga Roma mbaru, nĩ maathire kwĩ Jesu. Meendaga kũmũtindĩkĩrĩria onanie mũrũgamo wake wa gĩũteti. Makĩmũria kana Ayahudi nĩ maagĩrĩirũo kũrĩha igoti kũrĩ Roma.

Mariko nĩ aandĩkire ũrĩa Jesu aamacokeirie: “Mũkũngeria nĩkĩ? Ta ndeherai ciringi ndĩmĩone. Nao makĩmĩrehe. Nake akĩmoria, Nĩ cia ũ, mũhianano ũyũ na rĩĩtwa rĩrĩ? Makĩmwĩra, Nĩ cia Kaisari. Nake Jesu akĩmera atĩrĩ, Nengagĩrai Kaisari indo cia Kaisari, o nake Ngai mũmũnengagĩre indo cia Ngai.” (Mariko 12:13-17) Rĩkĩarĩrĩria kĩrĩa gĩatũmire Jesu acokie ũguo, ibuku rĩĩtagwo Church and State—The Story of Two Kingdoms riugĩte ũũ: “Nĩ aaregire gũtuĩka mesia wa gĩũteti na akĩonania na njĩra njega kwĩ maũndũ ma Kaisari na ma Ngai.”

Mathĩna ta ũkĩa, ungumania, na waagi wa kĩhooto nĩ maaiguithagia Jesu ũũru ngoro. Ti itherũ, Bibilia yonanagia atĩ nĩ aacayagĩra mũno andũ arĩa maarĩ na mathĩna manene. (Mariko 6:33, 34) Ĩndĩ, Jesu ndaigana kwambĩrĩria kambĩini ya kũniina waagi wa kĩhooto, o na gũtuĩka amwe nĩ mageragia mũno kũmũingĩria ngucanio-inĩ cia hĩndĩ yake.

Hatarĩ nganja-rĩ, o ta ũguo ngerekano icio ironania, Jesu nĩ aaregire kũingĩra maũndũ-inĩ ma gĩũteti. Ĩ nao Akristiano ũmũthĩ? Maagĩrĩirũo gwĩka atĩa?