Rũmena Nĩ Thĩna Ũrĩ Thĩ Yothe

MŨNDŨ ũmwe waaciarĩirũo Amerika nĩ aciari a kuuma Korea wĩtagwo Jonathan, nĩ onagio rũmena kuuma aarĩ mũnini. Rĩrĩa aagimarire nĩ aathamĩire kũndũ eerĩgagĩrĩra atĩ andũ matingĩamuonirie rũmena nĩ ũndũ wa rũrĩrĩ rwake. Agĩtuĩka ndagĩtarĩ taũni-inĩ ya Alaska, U.S.A., kũrĩa andũ aingĩ arĩa aarigitaga maarĩ a rũrĩrĩ rwake. Nĩ onaga atĩ o na gũtuĩka taũni ĩyo yarĩ heho mũno, nĩ aahotete kũũrĩra mbaara ya heho ĩrĩa yoimanaga na rũmena.

Ĩndĩ nĩ aamenyire atĩ matanya make matingĩahingire rĩrĩa aarigitire mũtumia ũmwe wa mĩaka 25. Rĩrĩa mũtumia ũcio eeiguire na akĩona Jonathan, aamũnyũrũririe arĩ na marakara kuonania rũmena rũrĩa aarĩ naruo kwerekera rũrĩrĩ rwa Akorea. Ũndũ ũcio nĩ waiguithirie Jonathan ruo rũingĩ mũno amenya atĩ gũthama gũtiamũteithirie kũũrĩra rũmena.

Ũndũ ũcio wekĩkire harĩ Jonathan ũronania ũndũ ũkoragwo kuo na ũrehaga ruo rũingĩ. Rũmena rũrĩ kũndũ guothe thĩinĩ wa thĩ. Nĩ ũhoro wa ma atĩ kũndũ guothe kũrĩ andũ gũtiagaga rũmena.

Andũ aingĩ nĩ mathũire rũmena mũno o na gũtuĩka rũiyũire kũndũ guothe. Ũndũ ũcio nĩ ũrigithagia mũno. Kũngĩhoteka atĩa atĩ ũndũ ũthũirũo mũno ũiyũire thĩ yothe? Ũrĩa kũrĩ nĩ atĩ andũ aingĩ arĩa mathũire rũmena nĩ marĩ ũndũ ũcio wa rũmena. Hihi ũguo nĩguo ũtariĩ? Ũngĩcokia atĩa kĩũria kĩu?

WĨTHUTHURIE

Tũkĩmenyaga kana tũtekũmenya, nĩ ũndũ mũritũ mũno harĩ ithuĩ kuona ũndũ ũcio wa rũmena ngoro-inĩ ciitũ. Bibilia nĩ ĩtaaragĩria gĩtũmi ĩkoiga ũũ: “Ngoro ya mũndũ nĩĩhenanagia gũkĩra ciũmbe iria ingĩ ciothe.” (Jeremia 17:9) Kwoguo, no twĩheenie na gwĩciria atĩ nĩ twendete andũ a mĩthemba yothe. Kana twĩtetagĩre atĩ tũrĩ na gĩtũmi kĩega gĩa kũmenereria andũ amwe.

Nĩguo tuone ũrĩa arĩ ũndũ mũritũ kũmenya kana tũrĩ na ũndũ ũcio wa rũmena-rĩ, ta wĩcirie ũndũ ũyũ: Nĩ gũthiĩ ũrathiĩ na njĩra ũtukũ kũrĩ na nduma ũrĩ wiki. Ũkona arũme erĩ ũtarĩ wacemania nao rĩngĩ magĩũka. Maroneka marĩ na hinya na ũmwe wao nĩ ta harĩ kĩndũ anyitĩte.

Hihi ũgũtua atĩ nĩ megũkũgera ngero? Nĩ ũhoro wa ma atĩ maũndũ marĩa wanacemania namo no matũme wĩhũge, no hihi maũndũ macio nĩ magĩrĩirũo gũtũma ũtue atĩ arũme acio ti ega? Kĩũria kĩrĩa kĩnene wagĩrĩirũo kwĩyũria nĩ, Hihi ngwĩciragĩria arũme acio nĩ a rũrĩrĩ rũrĩkũ? Macokio ma kĩũria kĩu no monanie ũndũ ũrĩa ũrĩ ngoro-inĩ yaku. No monanie atĩ kwa njĩra ĩmwe kana ĩrĩa ĩngĩ, nĩ ũhandĩte mbeũ ya rũmena ngoro-inĩ.

Tũngĩĩthuthuria wega, no tuuge atĩ ngoro-inĩ ciitũ, nĩ tũkoragwo na rũmena rwa mũthemba mũna. O na Bibilia nĩ yonanagia rũmena rũmwe rũkoragwo na andũ aingĩ, tondũ yugaga ũũ: ‘Mũndũ wa gũkũ thĩ abaraga ũrĩa mũndũ atariĩ akĩonwo na maitho.’ (1 Samueli 16:7) Tondũ ithuothe nĩ tũrĩ ũndũ ũcio ũkoragwo na moimĩrĩro moru-rĩ, hihi nĩ harĩ mwĩhoko atĩ no tũhote gũtooria kana kũniina rũmena ũtũũro-inĩ witũ? Na hihi nĩ kũrĩ hingo thĩ yothe ĩtagaakorũo na rũmena?