“Maũndũ Mothe nĩ Kũmerũhia Ndĩramerũhia”

Hihi nĩ wĩriragĩria gũtũũra ihinda iraya hamwe na famĩlĩ yaku mũrĩ na ũgima mwega wa mwĩrĩ? Nĩ wĩriragĩria gũtũũra thĩ ĩtarĩ ruo, mĩnyamaro na gĩkuũ? Gũtũũra thĩinĩ wa thĩ ta ĩyo ti ũndũ wa gwĩcirĩrio. Tondũ ica ikuhĩ, nĩ gũgũkorũo na thĩ njerũ ĩrĩ na ũthingu ta ũrĩa Jehova Ngai eranĩire. Ta rora wone ũrĩa kũhingio gwa kĩĩranĩro kĩu gũtaarĩirio thĩinĩ wa Kũguũrĩrio 21:3-5.—Thoma.

“[Ngai] nĩekũmagiria maithori mothe mathire maitho mao.” (Kũguũrĩrio 21:4) Hihi nĩ maithori ma mũthemba ũrĩkũ andũ makaagirio? Ti maithori marĩa moimanaga na gĩkeno. Ĩndĩ, nĩ maithori marĩa marehagwo nĩ mĩnyamaro na kĩeha. Ngai to kũgiria akaagiria andũ maithori; ĩndĩ nĩ akaaniina kaimana mĩnyamaro na kĩeha, maũndũ marĩa matũmaga andũ marĩre.

“Gĩkuũ gĩtirĩ hingo gĩgacoka kũgĩa.” (Kũguũrĩrio 21:4) Gĩkuũ nĩkĩo thũ ĩrĩa nene ya andũ, tondũ nĩ gĩtũmaga andũ marĩre mũno. Jehova nĩ agaakũũra andũ arĩa ehokeku kuuma ũkombo-inĩ wa gĩkuũ. Ageeka ũguo atĩa? Na njĩra ya kwehereria andũ mehia marĩa maagaire kuuma kũrĩ Adamu, o mo matũmaga makue. (Aroma 5:12) Jehova nĩ agaatũma andũ arĩa ehokeku matuĩke akinyanĩru kũgerera igongona rĩa ũkũũri rĩa Jesu.a Thutha ũcio, gĩkuũ, thũ ĩrĩa ya kũrigĩrĩria ‘nĩ gĩkaaniinwo.’ (1 Akorintho 15:26) Hĩndĩ ĩyo, andũ arĩa ehokeku nĩ makaahota gũtũũra tene na tene marĩ na ũgima mwega wa mwĩrĩ, o ta ũrĩa Ngai aabangĩte.

“O na gũtirĩ hingo gũgacoka kũgĩa na . . . ruo.” (Kũguũrĩrio 21:4) Hihi nĩ ruo rwa mũthemba ũrĩkũ rũtagaakorũo kuo rĩngĩ? Nĩ ruo ruothe rũrĩa rũgũmĩire andũ milioni nyingĩ, rwa meciria, ngoro, na mwĩrĩ, rũrĩa ruumanaga na mehia na kwaga gũkinyanĩra kwa andũ.

Ica ikuhĩ, andũ nĩ marĩtũũra matekũrĩra, matekũigua ruo, na mategũkua. Wahota kwĩyũria ũũ: ‘Nĩ kũ kũu magaatũũraga?’ ‘Hihi kĩĩranĩro kĩu kĩa Ngai nĩ gĩa gũgatũũra kũrĩa igũrũ?’ Aca. Nĩkĩ hihi? Wa mbere, kĩĩranĩro kĩu kĩambĩrĩirie na ciugo ici, “gĩikaro kĩa Ngai kĩĩ hamwe na andũ,” na andũ maikaraga gũkũ thĩ. (Kũguũrĩrio 21:3) Wa kerĩ, kĩĩranĩro kĩu kiugĩte atĩ, “gĩkuũ gĩtirĩ hingo gĩgacoka kũgĩa” thĩinĩ wa thĩ, thĩ o ĩrĩa ĩkoragwo na gĩkuũ no hĩndĩ ĩyo, gĩgaakorũo gĩ kĩniine kaimana. Kũrĩa igũrũ gũtikuagwo, ĩndĩ nĩ gũkũ thĩ andũ matũũrĩte makuĩte. Kwoguo-rĩ, ũtũũro mwega ũrĩa Ngai eranĩire, ũgaakorũo gũkũ thĩ.

Jehova arenda twĩtĩkie kĩĩranĩro kĩu gĩake kĩgiĩ thĩ njerũ ĩrĩ na ũthingu, tondũ thutha wa kũgweta irathimo icio, oigĩte ũũ: “Nĩ atĩrĩ, maũndũ mothe nĩ kũmerũhia ndĩramerũhia.” Ningĩ akongerera akoiga: “Ciugo icio nĩ cia kwĩhokwo na nĩ cia ma.” (Kũguũrĩrio 21:5) Na githĩ ti wega wĩrute ũhoro makĩria wĩgiĩ ũrĩa wee na endwa aku mũngĩkorũo mũrĩ gatagatĩ-inĩ ka athathaiya a Ngai, arĩa magaakenera kuona kĩĩranĩro kĩu gĩkĩhinga?