“Araganagia Wega Ũthiĩro wa Magũrũ Maku” Nĩguo Ũthiĩ na Mbere Kĩĩroho

JEHOVA nĩ onanirie aarĩ na bata mũno na rũgendo rwa Aisiraeli rwa gũcoka Jerusalemu makiuma Babuloni mwaka wa 537 mbere ya Kristo. Aamerire ũũ: ‘Thondekerai andũ njĩra; araganiai, araganiai kĩngʼaratua kĩa njĩra, mũũnganie mahiga mũmeherie kuo.’ (Isa. 62:10) Ta wĩcirie ũrĩa Ayahudi meekire nĩguo mahingie watho ũcio. No kũhoteke arĩa maathiagire mbere nĩo maathondekire njĩra, hihi kũmĩaragania na gũthika marima. Gwĩka ũguo nĩ kũngĩahũthirie rũgendo rwa ariũ a Ithe wao arĩa maamarũmĩrĩire magĩcoka Jerusalemu.

Ũndũ ũcio no ũringithanio na njĩra ĩrĩa mũndũ ageragĩra nĩguo akinyĩre mĩoroto ya kĩĩroho. Jehova endaga ndungata ciake ciothe igerage njĩra ĩyo itekũhĩngwo nĩ maũndũ matarĩ ma o mũhaka. Kiugo gĩake gĩtwĩraga ũũ: ‘Araganagia wega ũthiĩro wa magũrũ maku nacio njĩra ciaku ciothe irĩkoragwo ikindĩirũo.’ (Thim. 4:26) Ithuothe no tũgunĩke nĩ ũtaaro ũcio wa Kiugo kĩa Ngai.

TUAGA MATUA MEGA NĨGUO WĨTHONDEKERE NJĨRA

Bibilia yugaga ũũ: “Hinya wa aanake nĩguo ũgemu wao, nao athuri, ũthaka wao nĩ mũtwe ũrĩ mbuĩ.” (Thim. 20:29) Andũ aingĩ ethĩ nĩ marĩ ũgima mwega wa mwĩrĩ, hinya, ũũgĩ, na nĩ meriragĩria kũgaacĩra ũtũũro-inĩ. Kaingĩ andũ nĩ monaga ũhoti ũrĩa andũ ethĩ makoragwo naguo, na magatanya atĩ andũ ethĩ nĩ mekũũhũthĩra biũ ũtũũro-inĩ wao. Mũndũ mwĩthĩ angĩhũthĩra hinya na ũhoti wake gũtungatĩra Jehova no akinyĩre mĩoroto ya kĩĩroho na agĩe na gĩkeno kĩa ma.

O na kũrĩ ũguo, andũ thĩinĩ wa thĩ nĩ monaga ũũgĩ na ũhoti ũrĩa ciana citũ ikoragwo naguo. Angĩkorũo Mũkristiano mwĩthĩ nĩ ahĩtũkaga wega cukuru, ataarani, arutani, kana arutwo arĩa angĩ, no mamwĩkĩre ngoro athingate gĩthomo kĩa igũrũ nĩguo agaacĩre ũtũũro-inĩ ũyũ. Ningĩ mũrũ kana mwarĩ wa Ithe witũ mwĩthĩ angĩkorũo na ũhoti mwega mathako-inĩ, andũ no mamwĩkĩre ngoro athingate ũndũ ũcio. Hihi ũrĩ wacemania na ũndũ ta ũcio, kana ũkamenya mũndũ ũracemania na ũndũ ta ũcio? Nĩ kĩĩ kĩngĩteithia Mũkristiano ahote gũtua itua rĩa ũũgĩ?

Morutani ma Bibilia no mateithie mũndũ ehaarĩrie gũthiĩra njĩra-inĩ ĩrĩa njega mũno ya muoyo. Kohelethu 12:1 yugaga ũũ: “Ririkanaga ũrĩa Mũkũũmbi matukũ maku ma ũnyinyi.” Hihi mũndũ angĩhota atĩa ‘kũririkana Mũũmbi wake’?

Ta wĩcirie ũhoro wa mwanake wĩtagwo Erica kuuma Afrika ya Ithũĩro. Nĩ eendete gũthaka mũbira wa magũrũ. Akiuga akinyie mĩaka 15, nĩ aathurĩtwo gũthaka thĩinĩ wa timũ ĩrĩa yathakagĩra bũrũri wao. Ũguo nĩ kuuga atĩ thutha wa ihinda nĩ angĩathire Rũraya akamenyerio makĩria, na hihi acoke andĩkwo wĩra wa gũthaka mũbira. Ihinda-inĩ rĩu nĩrĩo aambĩrĩirie kwĩruta Bibilia na Aira a Jehova. Hihi angĩahũthĩrire atĩa ũtaaro wa ‘kũririkana Mũũmbi wake’? Na tũngĩĩruta atĩa kuumana na ũrĩa eekire?

Kũgerera wĩruti wa Bibilia, Eric nĩ aamenyire atĩ Jehova nĩ akaanina biũ mathĩna marĩa andũ macemanagia namo. Kwoguo, akĩona bata wa kũhũthĩra hinya na mahinda make gwĩka wendi wa Ngai, handũ ha gũthingata mathako. Nĩ ũndũ ũcio, akĩbatithio na akĩambĩrĩria gũthingata maũndũ ma kĩĩroho. Thutha wa ihinda, nĩ aatuĩkire mũteithia wa ũtungata na agĩcoka agĩĩtwo Cukuru ya Bibilia ya Ariũ a Ithe Witũ Arĩa Matahikanĩtie.

Korũo Eric aathingatire mathako ma mũbira nĩ angĩagĩire igweta na ũtonga. Nĩ aamenyire ũũma wa ciugo ici cia Bibilia: “Ũtonga wa mũndũ gĩtonga nĩ ta gĩtũũro e nakĩo kĩirige na hinya; ũhaana ta rũthingo rũraya na igũrũ, we akĩĩgereria.” (Thim. 18:11) Ma nĩ atĩ, ũgitĩri ũrĩa mũndũ angĩona ta arĩ naguo nĩ ũndũ wa ũtonga, hatarĩ nganja nĩ wa maheeni. Makĩria ma ũguo, arĩa mathingataga mũno ũtonga kaingĩ nĩ ‘gwĩtheca methecaga ngoro na kĩeha kĩingĩ.’—1 Tim. 6:9, 10.

Ũndũ wa gĩkeno nĩ atĩ, andũ aingĩ ethĩ nĩ magĩte na gĩkeno na ũgitĩri wa gũtũũra nĩ ũndũ wa kũingĩra thĩinĩ wa ũtungata wa hĩndĩ-ciothe. Eric oigaga ũũ: “Rĩu ngoragwo thĩinĩ wa ‘timũ’ nene ya ndungata cia Jehova cia hĩndĩ-ciothe. Ĩyo nĩyo timũ ĩrĩa njega mũno, na nĩ njokagĩria Jehova ngatho nĩ ũndũ wa kũndeithia menye njĩra ĩrĩa tu ĩrehaga gĩkeno kĩa ma na ũgaacĩru ũtũũro-inĩ.”

Ĩ wee nawe? Handũ ha gũthingata maũndũ ma gũkũ thĩ-rĩ, na githĩ ti wega wĩthondekere “njĩra ciaku” mbere ya Jehova na njĩra ya gũtuĩka painia?—Rora rungu rwa kĩongo “Ũguni Ũtangĩoneka Thĩinĩ wa Yunivasĩtĩ.”

THIĨ ŨKĨEHERAGIA MAŨNDŨ MARĨA MANGĨKŨHĨNGA

Rĩrĩa mũrũ wa Ithe witũ ũmwe na mũtumia wake maathire gũceera Betheli ya United States, nĩ moonire gĩkeno kĩrĩa aarĩ na ariũ a Ithe witũ arĩa matungataga kũu makoragwo nakĩo. Mwarĩ wa Ithe witũ aacokire akĩandĩka ũũ: “Twaiguaga tũiganĩire mũno tũkĩhingia o maũndũ manini.” Nĩ ũndũ ũcio mũrũ wa Ithe witũ ũcio na mũtumia wake magĩtua itua rĩa kũhũthĩra mahinda na hinya wao gũthingata mĩoroto ya kĩĩroho.

O na kũrĩ ũguo, ndwarĩ ũndũ mũhũthũ harĩ o gwĩka ũgarũrũku ũrĩa wabataranagia. Ĩndĩ mũthenya ũmwe, nĩ mecũũranirie ũhoro wa rĩandĩko rĩa Johana 8:31. Riugaga ũũ: “Mwatũũra o mwĩtĩkĩtie uuge wakwa, mũrĩ arutwo akwa kũna.” Ũndũ ũcio watũmire matue ũũ: “Ũndũ o wothe ũrĩa tũgwĩka nĩguo tũhũthie mũtũũrĩre witũ nĩ ũndũ mwagĩrĩru.” Nĩ ũndũ ũcio makĩendia nyũmba yao, makĩeheria indo ingĩ itaarĩ cia o mũhaka, na magĩthamĩra kĩũngano kĩabataraga ũteithio. Rĩu makoragwo marĩ mapainia, na ningĩ nĩ mateithagĩrĩria gwaka Nyũmba cia Ũthamaki na makerutĩra hĩndĩ ya igomano cia thikũ ithatũ. Mawoni mao nĩ marĩkũ rĩu? “Tũkoragwo na gĩkeno kĩnene mũno nĩ ũndũ wa gũtũũra mũtũũrĩre mũhũthũ o ta ũrĩa ithondeka rĩa Jehova rĩtwĩkagĩra ngoro twĩke.”

THIĨ NA MBERE GŨTHINGATA MĨOROTO YA KĨĨROHO

Suleimani aandĩkire ũũ: “Maitho maku ta nĩmarorage o na mbere, imone ciaku nĩcierekagĩre na mbere yaku wega.” (Thim. 4:25) O ta ũrĩa ndereba ũratwarithia ngaari aikaraga arorete mbere, o na ithuĩ nĩ twagĩrĩirũo gwĩthema maũndũ marĩa mangĩtũhĩnga harĩ gũthingata na gũkinyĩra mĩoroto ya kĩĩroho.

1. Aira a Jehova makĩĩrutanĩria gũkinyĩra mĩoroto ya kĩĩroho rĩrĩa marĩ ethĩ; 2. Njĩra yeheritio indo iria ingĩhĩnga mũndũ

Nĩ mĩoroto ĩrĩkũ ya kĩĩroho ũngĩĩigĩra na ũmĩkinyĩre? Muoroto ũmwe mwega nĩ kũingĩra thĩinĩ wa ũtungata wa hĩndĩ-ciothe. Ũngĩ naguo no ũkorũo ũrĩ gũthiĩ gũteithia kĩũngano kĩrĩ hakuhĩ, kĩrĩa kĩngĩkorũo na bata wa ahunjia marĩ na ũmenyeru a gũteithĩrĩria kũhunjia gĩcigo kĩao. Kana hihi ũthiĩ ũgateithie kĩũngano kĩrĩ na ahunjia aingĩ marĩ na ũmenyeru no gĩtirĩ na athuri na ateithia a ũtungata a kũigana. Hihi no ũthingate ũmwe wa mĩoroto ĩyo? Angĩkorũo no wende gũteithĩrĩria, aria na mũrori wanyu wa mũthiũrũrũko. Ningĩ angĩkorũo no wende gũthiĩ gũtungata kũndũ kũraihu, no ũhoe ũhoro makĩria wĩgiĩ ciũngano iria irĩ na bata wa ahunjia.b

Reke tũcoke harĩ ũhoro ũrĩa ũrĩ thĩinĩ wa Isaia 62:10. No kũhoteke Ayahudi amwe nĩ marutĩte wĩra mũritũ mũno wa kwaragania na gũtheria njĩra nĩguo andũ a Ngai macoke bũrũri wao. Angĩkorũo nĩ ũrerutanĩria nĩguo ũkinyĩre mĩoroto ya kĩĩroho, ndũgakue ngoro. O nawe no ũhote gũkinyĩra mĩoroto ĩyo nĩ ũndũ wa ũteithio wa Jehova. Thiĩ na mbere kũmũhoya akũhe ũũgĩ, o ũkĩĩrutanagĩria kweheria maũndũ marĩa mangĩkũhĩnga. Thutha wa ihinda, no kũhoteke nĩ ũrĩona ũrĩa arĩgũteithagia ‘kwaragania wega ũthiĩro wa magũrũ maku.’—Thim. 4:26.

a Rĩĩtwa nĩ rĩcenjetio.

b Thoma Tengenezo Linalofanya Mapenzi ya Yehova, karatathi ka 111-112.

Ũguni Ũtangĩoneka Thĩinĩ wa Yunivasĩtĩ

FLAVIA arĩ kairĩtu kanini, nĩ aahunjĩirio nĩ cũcũ wao ũrĩa warĩ Mũira wa Jehova. Nake ithe aarĩ mwarimũ, na nĩ aageragia kũmwĩkĩra ngoro athiĩ yunivasĩtĩ agathomere maũndũ ma sayanisi. Kũrĩ andũ angĩ nao maamwĩraga ũũ: “Inyuĩ andũ ethĩ no mũhote kũhonokia thĩ ndĩgathũkio.” Ithe nĩ aamũteithirie nginya agĩthiĩ yunivasĩtĩ ĩmwe ĩrĩ igweta, kũrĩa aambĩrĩirie gũthuthuria njĩra cia gũthondeka maguta ma ngaari marĩa matangĩthũkia rĩera.

Thutha wa ihinda inini Flavia nĩ aamenyire atĩ arutwo aingĩ matiarĩ na bata wa ‘kũhonokia thĩ ndĩgathũkio.’ Ningĩ nĩ aamenyire atĩ ũthuthuria wa mathomo mamwe ma yunivasĩtĩ wateithagĩrĩrio kĩĩmbeca nĩ kambuni cia biacara, na nĩ ũndũ ũcio arutwo magĩka ũthuthuria nĩ maathutũkanagia mageka maũndũ ma kũguna kambuni icio. Ũndũ ũcio nĩ wathumbũraga Flavia mũno. Rĩrĩa Aira a Jehova mookire kũmũhunjĩria, nĩ aakenirio rĩngĩ nĩ ũrĩa Bibilia ĩrutanaga igũrũ rĩgiĩ Ngai na mahinda mokĩte.

Nĩ eetĩkĩrire ũhoro wa ma na akĩbatithio. Ĩndĩ, tondũ mahinda marĩa maingĩ aakoragwo yunivasĩtĩ akĩongerera gĩthomo, ndaakoragwo na mathaa maingĩ ma kũhunjia. Mũthenya ũmwe nĩ aathikĩrĩirie mũrori wa mũthiũrũrũko akĩarĩrĩria rĩandĩko rĩa Jakubu 4:17, rĩrĩa riugaga ũũ: “Mũndũ ũrĩa ũũĩ gwĩka wega, na ndawĩke, ũcio nĩ kwĩhia ehagia.” Ũndũ ũcio nĩ watũmire ecirie ũhoro wake mwene. Oigire ũũ: “Nĩ ndeendaga irathimo cia Jehova, na ningĩ no ndeendaga gũthoma makĩria ũhoro wa sayanisi. No mũhaka ingĩathuurire ũndũ ũmwe.”

Flavia nĩ aatuire itua rĩa gũtigĩra gĩthomo gĩake kĩa yunivasĩtĩ harĩa akinyĩtie. Hihi nĩ eeriraga nĩ ũndũ wa itua rĩu? Oigaga ũũ:

“Ũtungata-inĩ wa Jehova, ngĩte na ũguni ũtangĩoneka thĩinĩ wa yunivasĩtĩ. Jehova nĩ andathimĩte mũno. Nĩ andeithĩtie kuonania ũtugi, wendo, na gũteithia arĩa angĩ kĩĩroho. Ngoragwo na kĩhiko kĩrĩ na gĩkeno na kĩĩrĩgĩrĩro kĩa mahinda mega maroka gũkĩra kĩrĩa kĩngĩrehwo nĩ sayanisi. No Jehova wiki tu ũngĩhota kũhonokia thĩ ndĩgathũkio. Ndirĩ hĩndĩ ngaamũtiga.” Flavia marĩ na mũthuri wake matungataga wabici-inĩ nene ya thĩ ya Aira a Jehova thĩinĩ wa New York.