“Ithirĩro” Nĩ Maũndũ Marĩkũ Magekĩka?

Nĩ ũndũ ũrĩkũ ũkaga meciria-inĩ maku rĩrĩa waigua ciugo ici? “Ithirĩro rĩ hakuhĩ!” Hihi wĩciragia ũhoro wa mũhunjia ũrahũyũka arĩ haarĩa mbere kanitha-inĩ agĩikagia moko anyitĩte Bibilia? Kana hihi wonaga mũthuri mũkũrũ ũrĩ na nderu nene arũgamĩte handũ kona-inĩ ya tũbara twa taũni ehumbĩte gĩkuo kĩraihu kĩoheirũo njohero-inĩ na mũkanda, anyitĩte kĩbaũ kĩandĩkĩtwo ũhoro wĩgiĩ ithirĩro? Gwĩciria maũndũ ta macio no gũtũme andũ amwe mathumbũke mũno, na arĩa angĩ makorũo na nganja kana mone ũrĩ ũndũ wa mathekania.

Bibilia nĩ yugaga atĩ: ‘Ithirĩro nĩ rĩgakinya.’ (Mathayo 24:14) Ihinda rĩu no rĩo rĩtagwo “mũthenya ũrĩa mũnene wa Ngai” na “Hari–Magedoni.” (Kũguũrĩrio 16:​14, 16) Ma nĩ atĩ, ndini nĩ irutanaga morutani maingĩ andũ matataũkagĩrũo nĩmo megiĩ ithirĩro, na maũndũ ma kũmakania na gwĩkĩra guoya magatherema. O na kũrĩ ũguo, Bibilia yo nyene nĩ ĩtaarĩirie wega biũ ũhoro wĩgiĩ ithirĩro​—ĩgataarĩria nĩ maũndũ marĩkũ makaahaanĩka na nĩ marĩkũ matakaahanĩka. Kiugo kĩa Ngai ningĩ nĩ gĩtũteithagia kũmenya wega biũ kana ithirĩro rĩrĩ hakuhĩ. O na makĩria, nĩ gĩtũrutaga ũrĩa tũngĩka nĩguo tũkaahonoka! No mbere, reke twambe tweherie mawoni mamwe mahĩtanu megiĩ ithirĩro, na tũtaũkĩrũo wega nĩ ũndũ ũcio. Kũringana na Bibilia-rĩ, “ithirĩro” nĩ kĩĩ?

IHINDA RĨA ITHIRĨRO TI

1. KŨNIINŨO GWA THĨ NA MWAKI.

   Bibilia yugaga ũũ: “Thĩ-rĩ, [Ngai] aamĩakĩrĩire igũrũ rĩa itina ciayo, ndĩkae gũkenyenyeka o na tene.” (Thaburi 104:5) Rĩandĩko rĩu na mangĩ, matũheaga ũũma atĩ Ngai ndarĩ hĩndĩ akaniina thĩ kana etĩkĩrie ĩniinwo​—o narĩ!​ ​—Kohelethu 1:4; Isaia 45:18.

2. ŨNDŨ ŨGOKA O ŨGUO ŨTABANGĨIRŨO.

   Bibilia nĩ ĩguũrĩtie atĩ ithirĩro nĩ rĩbangĩirũo​—Ngai nĩ aigĩte ihinda rĩrĩa ithirĩro rĩgooka. Tũthomaga ũũ: “No ũhoro wa mũthenya ũcio kana ihinda rĩu, gũtirĩ mũndũ ũũĩ, o na araika arĩa me Igũrũ, o na kana Mũriũ, tiga o Ithe witũ. Wĩmenyagĩrĩrei, mwĩhũgage na mũhoyage: amu mũtiũĩ ihinda rĩrĩa rĩgakinya.” (Mariko 13:​32, 33) Hatarĩ nganja, Ngai (“Ithe”) nĩ aigĩte “ihinda” rĩrĩa akarehe ithirĩro.

3. RĨTIKAREHŨO NĨ ANDŨ, KANA MAHIGA MAKAHARŨRŨKA NA MŨRURUMO KUUMA NA IGŨRŨ.

   Ithirĩro rĩkaarehũo nĩ kĩĩ? Ibuku rĩa Kũguũrĩrio 19:11 riugaga ũũ: “Nĩndonire Igũrũ rĩhingũkĩte; na nĩ atĩrĩ, kwĩ mbarathi njerũ, na ũrĩa ũmĩhaicĩte, wĩtagwo Mwĩhokeku na Wa-ma.” Mũhari wa 19 ũgathiĩ na mbere kuuga: “Ngĩcoka ngĩona nyamũ ĩrĩa, o na athamaki a thĩ, na ita ciao, mecokanĩrĩirie marũe na ũcio wahaicĩte mbarathi, o na ita yake.” (Kũguũrĩrio 19:​11-​21) O na gũtuĩka rũthiomi rũrĩa rũhũthĩrĩtwo mĩhari-inĩ ĩno nĩ na njĩra ya ngerekano-rĩ, no tũhotete gũtaũkĩrũo nĩ ũndũ ũyũ: Ngai agaatũma ita rĩa araika kũniina thũ ciake.

IHINDA RĨA ITHIRĨRO NĨ

1. KŨNIINWO GWA THIRIKARI CIA THĨ.

   Bibilia Itaaragĩria ũũ: “Na rĩrĩ, hĩndĩ ya athamaki acio-rĩ, nĩguo Ngai-wa-Igũrũ akahanda ũthamaki [thirikari] ũrĩa ũtagacoka gũthario o rĩ, o rĩ, o na kana wathani waguo ũneanwo moko-inĩ ma andũ angĩ, no nĩ kũmemenda ũkamemenda mothamaki macio mangĩ, ũmanine biũ, naguo ũtũũre wĩhandĩte tene na tene.” (Danieli 2:44) O ta ũrĩa hau mbere hagwetetwo, “athamaki a thĩ, na ita ciao” arĩa magakorũo “mecokanĩrĩirie marũe na ũcio wahaicĩte mbarathi, o na ita yake” nĩ makaaninwo.​—Kũguũrĩrio 19:19.

2. KŨNINWO KWA MBAARA, ŨHINYA, NA WAGI WA KĨĨHOTO.

   “[Ngai] nĩ mũnini mbaara nginya o gĩturi gĩa thĩ.” (Thaburi 46:9) “Andũ arĩa arũngĩrĩru nĩo a gũtũũra bũrũri, acio akinyanĩru-rĩ, nĩo a gũgatigara kuo. No andũ arĩa aaganu nĩ kũrindũrũo makarindũrũo [kũninwo] bũrũri, mĩgarũka ĩo nĩ kuombororio ĩkombororio kuo.” (Thimo 2:​21, 22) “Maũndũ mothe nĩ kũmerũhia ndĩramerũhia.”​—Kũguũrĩrio 21:​4, 5.

3. KŨNINŨO KWA NDINI IRIA ITEKAGA WENDI WA NGAI NA ITAGUNAGA ANDŨ.

   “Anabii [acio] marathaga mohoro ma maheni, nao athĩnjĩri-Ngai magaathana o ta ũrĩa anabii acio mekwenda; . . . No rĩrĩ, kĩrĩkĩrĩro-inĩ kĩa maũndũ macio-rĩ, mũgagĩĩka atĩa?” (Jeremia 5:31) “Mũthenya ũcio andũ aingĩ nĩmakanjũria, Mwathani ũyũ, Mwathani ũyũ, githĩ tũtiigana kũratha mohoro na rĩĩtwa rĩaku, o na tũkĩingata ndaimono na rĩĩtwa rĩaku, o na tũkĩruta mawĩra maingĩ ma hinya na rĩĩtwa rĩaku? Na hĩndĩ ĩo nĩngamoimĩrĩria ndĩmere atĩrĩ, Gũtirĩ hĩndĩ ndamũũĩ; umai kũrĩ niĩ, inyuĩ mwĩkaga waganu.”​—Mathayo 7:​21-23.

4. KŨNINWO KWA ANDŨ ARĨA MAREHAGE NA MAKANYITA MBARU MAŨNDŨ MARĨA MARĨ THĨINĨ WA THĨ.

   Jesu Kristo oigire ũũ: “Gĩtũmi gĩa gũtuwo ũguo nĩ atĩrĩ, atĩ ũtheri nĩ ũũkĩte thĩ, nao andũ nĩmendire nduma mbere ya ũtheri; nĩ ũndũ mawĩko mao maarĩ moru.” (Johana 3:19) Bibilia nĩ ĩtaarĩirie kũninwo gwa thĩ yothe matukũ-inĩ ma Nuhu, ũrĩa warĩ mũthuri mwĩhokeku. “Thĩ ĩrĩa yarĩ kuo hĩndĩ ĩo nĩyatomire [ĩkĩniinwo] nĩ ũndũ wa kũhumbwo nĩ maĩ. No rĩrĩ, Igũrũ rĩrĩa rĩĩ ho rĩu, o na thĩ, nĩ kũigĩrũo ciigĩirũo mwaki, nĩ ũndũ wa kiugo o ro kĩu, igagĩeterera mũthenya ũrĩa wa cira, o na wa kũninwo kwa andũ arĩa matetigagĩra Ngai.”​—2 Petero 3:​5-7.

Ta rora wone atĩ, “mũthenya ũrĩa wa cira, o na wa kũninwo” ũrĩa ũroka ũringithanĩtio na kũninwo gwa “thĩ” ya mahinda ma Nuhu. Hihi nĩ thĩ ĩrĩkũ yaniinirwo? Thĩ ĩno iitũ ndĩaninirũo, no “andũ arĩa matetigagĩra Ngai”​—thũ cia Ngai​—nĩo maaninirũo. Na njĩra o ta ĩyo, ihinda-inĩ rĩa “mũthenya ũrĩa wa cira” rĩrĩa rĩroka, arĩa mathuuraga gũkorũo marĩ thũ cia Ngai nĩo makaaninwo. No arata a Ngai nĩ makaahonokio ta ũrĩa Nuhu na famĩlĩ yake maahonokirio.​—Mathayo 24:​37-42.

Ta hũũra mbica ũrĩa thĩ ĩno ĩgakorũo ĩrĩ njega thutha wa Ngai kũniina arĩa othe marehaga maũndũ moru! Hatarĩ nganja, ndũmĩrĩri ya Bibilia ĩgiĩ ithirĩro ti ya ũhoro mũru, ĩndĩ nĩ ya ũhoro mwega. O na kũrĩ ũguo-rĩ, wahota kwĩyũria atĩrĩ: ‘Hihi Bibilia nĩ ĩtwĩrĩte rĩrĩa ithirĩro rĩgoka? No rĩkorũo rĩrĩ hakuhĩ? Ingĩka atĩa nĩguo ngaahonoka?’