Ohanagĩrai

ŨTAARO WA BIBILIA: ‘Ohanagĩrai o mũndũ na ũrĩa ũngĩ, angĩkorũo nĩ harĩ mũndũ matetanĩtie na ũrĩa ũngĩ-rĩ, kĩohanagĩrei inyuene o ta ũrĩa Mwathani nake aamuoheire inyuĩ.’​—Akolosai 3:13.

Ũguo nĩ kuuga atĩa? Thĩinĩ wa Bibilia, mehia maringithanagio na thiirĩ na kuohanĩra gũkaringithanio na kwehereria mũndũ thiirĩ. (Luka 11:4) Ibuku rĩmwe rĩoigire atĩ, thĩinĩ wa Maandĩko, kiugo gĩa Kĩngiriki kĩrĩa gĩtaũrĩtwo “kuohanĩra” kiugaga “kũrekera mũndũ thiirĩ ũtekũmwĩtia.” Kwoguo, rĩrĩa tuohera mũndũ ũtũhĩtĩirie, tũmũrekagĩra tũtekwĩrĩgĩrĩra ũndũ ũngĩ kuuma kũrĩ we. Gũkorũo twĩharĩirie kuohanĩra ti kuuga atĩ tũrona ũndũ ũcio twĩkĩtwo ũrĩ mwega, o na ti kũhũthia ruo rũrĩa tũrĩ naruo. Ithenya rĩa ũguo, tũthuuraga kwaga kũiga marakara ngoro o na angĩkorũo tũrĩ na gĩtũmi kĩega gĩa gwĩka ũguo nĩ ũndũ wa kũhĩtĩrio.

Hihi ũtaaro ũcio no ũhũthĩke ũmũthĩ? Tondũ tũtirĩ akinyanĩru, ithuothe nĩ twĩhagia. (Aroma 3:23) Kwoguo nĩ ũndũ wa ũũgĩ kuohera andũ arĩa angĩ, tondũ o na ithuĩ no tũrĩbatara kuoherũo. Makĩria ma ũguo, rĩrĩa tuohera arĩa angĩ, o na ithuĩ nĩ tũgunĩkaga. Na njĩra ĩrĩkũ?

Rĩrĩa twaiga marakara na muku ngoro-inĩ, na twaga kuohanĩra, nĩ tũtuuragia ngoro citũ. Rĩrĩa tweka ũguo, no twage gĩkeno na tũritũhĩrũo nĩ ũtũũro. O na ningĩ no tũthũkie ũgima witũ wa mwĩrĩ. Riboti ĩmwe ya Journal of the American College of Cardiology, ĩrĩa yaandĩkirũo nĩ ndagĩtarĩ wĩtagwo Yoichi Chida na Profesa wĩtagwo Andrew Steptoe, yoigĩte ũũ: “Gũkorũo mũndũ arĩ na marakara na muku, nĩ ũndũ wonekete atĩ no ũrehe mũrimũ wa ngoro.”

Rĩu ta wĩcirie ũguni wa kuohanĩra. Rĩrĩa tuohanĩra, nĩ tũgitagĩra thayũ na ũrũmwe na kwoguo tũgatũũria ũrata na andũ. Ũndũ ũngĩ wa bata nĩ atĩ, nĩ twĩgerekanagia na Ngai, ũrĩa wohagĩra ehia arĩa merirĩte na erĩgagĩrĩra o na ithuĩ twĩke o ũguo.​—Mariko 11:25; Aefeso 4:32; 5:1.