Hihi Nĩ Kũrĩ Hĩndĩ Ũhinya Ũgaathira?
Hihi wee kana mũndũ wa famĩlĩ yanyu mwanacemania na maũndũ ma ũhinya? Nĩ harĩ bata wa gwĩtigĩra atĩ no ũcemanie na ũndũ ta ũcio? Gũtuĩkaga atĩ ũhinya nĩ “mũrimũ ũratherema na gĩkĩro kĩnene mũno thĩinĩ wa thĩ.” ta wĩcirie ũhoro wa ngerekano ici:
HAARO CIA MĨCIĨ NA KŨNYITWO KĨA HINYA: Riboti ĩmwe ya Ũrũmwe wa Mabũrũri yugaga ũũ: “Mũtumia ũmwe harĩ atatũ aanakorũo hatĩka-inĩ ya kũhũũrũo mbaara ya mwĩrĩ kana kũnyitwo kĩa hinya nĩ mũthuriwe kana mũndũ wa hakuhĩ. Kwĩrĩkanaga atĩ thĩinĩ wa thĩ yothe mũtumia ũmwe harĩ atano nĩ ekũnyitwo kĩa hinya kana ekore hatĩka-inĩ ya kũnyitwo kĩa hinya.”
WĨKI-NAĨ: Kwĩrĩkanaga atĩ makĩria ma ikundi 30,000 cia wĩki-naĩ nĩ iraagagia andũ thĩinĩ wa United States. Nakuo thĩinĩ wa Latin America, hakuhĩ mũndũ ũmwe harĩ atatũ aanacemania na wĩki-naĩ.
ANDŨ KŨŨRAGA ARĨA ANGĨ: Kwĩgeragĩrio atĩ hakuhĩ andũ nuthu milioni nĩ moragĩtwo mwaka-inĩ ũmwe wa ica ikuhĩ, na nĩ makĩria ma arĩa mooragĩirũo mbaara-inĩ. Gĩcigo kĩa mũhuro wa Africa na kĩa America ya gatagatĩ nĩcio ciarĩ na njũragano nyingĩ mũno. Njũragano icio ciarĩ makĩria ma maita mana ma iria ikoretwo kuo thĩ yothe. Kwa ihinda rĩa mwaka ũmwe, andũ makĩria ma 100,000 nĩ mooragirũo gĩcigo-inĩ kĩa Latin America, nakuo Brazil gwiki gũkĩũragwo andũ ta 50,000. Hihi ũhinya no ũthire kaimana?
HIHI ŨHINYA NO ŨTHIRE?
Ũhinya ũtheremete ũguo nĩkĩ? Maũndũ maingĩ ta maya monanĩtio haha nĩmo matũmĩte ũhinya ũthereme: kũmena andũ nĩ ũndũ wa ũrĩa matariĩ, njohi na ndawa cia kũrebia, ũhinyanĩrĩria, ciana kwĩrorera maũndũ ma ũhinya, na gũkorũo atĩ andũ arĩa mekaga maũndũ ma ũhinya matioyagĩrũo ikinya.
Ũhoro wa ma nĩ atĩ, mabũrũri mamwe thĩinĩ wa thĩ nĩ merutanĩirie mũno kũrũa na ũhinya. Kwa ngerekano, taũni-inĩ ĩrĩa ĩrĩ na andũ aingĩ mũno ya São Paulo, Brazil, kũrerĩkana atĩ ciĩko cia andũ kũũraga arĩa angĩ nĩ inyihĩte na gĩcunjĩ kĩa 80 harĩ igana kwa ihinda rĩa mĩaka ikũmi mĩhĩtũku. O na kũrĩ ũguo, ciĩko ingĩ cia ũhinya no itheremete mũno taũni-inĩ ĩyo, na andũ arĩa marakua nĩ ũndũ wa kũũragwo, nĩ ta 10 harĩ 100,000. Nĩ kĩĩ gĩgaakĩniina ũhinya kaimana?
Rĩrĩa andũ magaacenjia mwerekera na mĩtugo yao nĩrĩo ũhinya ũgaathira. Nĩguo andũ arĩa mekaga maũndũ ma ũhinya macenjie, no mũhaka matigane na mwĩtĩo, mũkoroko, na mwĩyendo na makũrie ngumo ta wendo, gĩtĩo, na gwĩciria arĩa angĩ.
Nĩ kĩĩ kĩngĩteithia mũndũ eke mogarũrũku manene ũguo? Ta wĩcirie ũrĩa Bibilia ĩrutanaga:
“Nĩ gũkorũo kwenda Ngai nĩ atĩrĩ, tũrũmagĩrĩre maathani make.”—1 Johana 5:3.
“Gwĩtigĩra Jehova-rĩ, nĩ gũthũũra ũũru.”a—Thimo 8:13.
Kwenda Jehova na gwĩtigĩra kũmũrakaria nĩmo maũndũ marĩa mangĩtũma nginya mũndũ ũrĩ na ũhinya agarũre mũtũũrĩre wake, o na acenjie ũmũndũ wake biũ. Hihi ũyũ nĩ ũndũ wanekĩka?
Ta wĩcirie ũhoro wa Alexb kuuma Brazil, ũrĩa woohetwo njera mĩaka 19 nĩ ũndũ wa ciĩko cia ũhinya. Eerutire Bibilia na Aira a Jehova na akĩbatithio mwaka wa 2000 agĩtuĩka Mũira wa Jehova. Hihi nĩ atiganĩte biũ na mĩtugo yake ya ũhinya? Hatarĩ nganja! Alex nĩ eriraga mũno nĩ ũndũ wa maũndũ moru marĩa aaneka. No oigaga ũũ: “Nĩ hotete gũkũria wendo mũingĩ harĩ Ngai tondũ nĩ aanjoheire. Wendo na ngatho ciakwa harĩ Jehova nĩ cindeithĩtie kũgarũrĩra mĩthiĩre yakwa.”
César o nake kuuma Brazil, aarĩ mũici wa mũcinga na nĩ aatuaga nyũmba ciene. Ũguo nĩguo aatũũraga kwa ihinda rĩa mĩaka 15. Nĩ kĩĩ kĩamũteithirie kũgarũrũka? Arĩ njera, nĩ aacereirũo nĩ Aira a Jehova na akĩĩruta Bibilia. Ataaragĩria ũũ: “Nĩ ndagĩire na muoroto ũtũũro-inĩ. Ngĩĩruta kwenda Jehova na kũmwĩtigĩra, ũguo nĩ kuuga gwĩtigĩra gũcokerera maũndũ moru marĩa mangĩmũrakaria. Ndiendaga kwaga kuonania ngatho nĩ ũndũ wa tha iria Jehova aanyonetie. Wendo ũcio na gwĩtigĩra Jehova nĩ kwandeithirie gũcenjia.”
Wĩrute ũrĩa ũngĩtũũra thĩinĩ wa thĩ ĩtarĩ na ũhinya
Maũndũ macio maratuonia ũndũ ũrĩkũ? Atĩ Bibilia ĩrĩ na hinya wa kũgarũra mĩtũũrĩre ya andũ na gĩkĩro kĩnene, na njĩra ya gũcenjia mwĩcirĩrie wao. (Aefeso 4:23) Alex ũrĩa ũkũgwetetwo hau kabere oigire: “Maũndũ marĩa ndeerutire kuuma Bibilia-inĩ maatariĩ ta maĩ matheru maraikũrũka mwĩrĩ-inĩ wakwa, magathiĩ magĩĩtheragia kahora kahora, makĩeheragia mwĩcirĩrie mũru. Ũcio nĩ ũndũ itangĩeciririe no ũhoteke.” Tũngĩihũria ndũmĩrĩri theru ya Bibilia meciria-inĩ maitũ, no yeherie kana ĩthambie ũũru wothe. Kiugo kĩa Ngai nĩ kĩrĩ hinya wa gũtheria. (Aefeso 5:26) Macũngĩrĩro-inĩ, andũ eyendi na matarĩ tha no magarũrĩre mĩthiĩre yao na matuĩke andũ a kũiga thayũ na marĩ na tha. (Aroma 12:18) Magĩaga na thayũ nĩ ũndũ wa gũtũũra kũringana na motaaro ma Bibilia.—Isaia 48:18.
Aira a Jehova makĩria ma milioni inyanya thĩinĩ wa mabũrũri 240 nĩ mamenyete kĩhonia kĩa ũhinya. Andũ a mĩthemba yothe kuuma kũndũ guothe nĩ merutĩte kwenda Ngai na kũmwĩtigĩra, kwendana o ene, na gũikarania na thayũ marĩ famĩlĩ ĩmwe thĩinĩ wa thĩ yothe. (1 Petero 4:8) Nĩ monanagia mũtũũrĩre-inĩ wao atĩ andũ no mahote gũikarania gũtarĩ na ũhinya.
THĨ NJERŨ ĨTARĨ NA ŨHINYA ĨRĨ HAKUHĨ!
Bibilia nĩ ĩranĩire atĩ ica ikuhĩ Ngai nĩ egũtheria thĩ ĩno ĩthire ũhinya. Andũ arĩa mekaga maũndũ ma ũhinya nĩ metereirio “mũthenya ũrĩa wa gũtuanĩra na wa kũniinwo kwa andũ arĩa matetigĩrĩte Ngai.” (2 Petero 3:5-7) Andũ acio matikaanyamaria arĩa angĩ rĩngĩ. Tũngĩkorũo na ma atĩa atĩ Ngai nĩ endaga kweheria ũhinya?
Bibilia yonanagia atĩ, Ngai nĩ athũire mũndũ ũrĩa wendete ũhinya. (Thaburi 11:5) Mũũmbi witũ nĩ endete thayũ na kĩhooto. (Thaburi 33:5; 37:28) Nĩkĩo atangĩtĩkĩria andũ arĩa mekaga maũndũ ma ũhinya matũũre tene na tene.
Hatarĩ nganja, thĩ njerũ ĩrĩa ĩrĩ na thayũ ĩrĩ hakuhĩ. (Thaburi 37:11; 72:14) Na githĩ ti wega wĩrute makĩria ũrĩa ũngĩka nĩguo wagĩrĩre gũtũũra thĩinĩ wa thĩ ĩyo ĩtagaakorũo na ũhinya!