‘Wĩra Ũrĩa Ũrarutwo nĩ Mũnene’

KŨRĨ na mũcemanio wa bata mũno Jerusalemu. Mũthamaki Daudi etĩte anene othe na njamba ciothe cia ita. Ũndũ ũrĩa merwo mũcemanio-inĩ ũcio nĩ wamakenia mũno. Jehova nĩ aheete Suleimani mũrũ wa Daudi wĩra wa gwaka nyũmba ya gũthathaĩria Ngai ũrĩa wa ma. Daudi nĩ onetio kũgerera kĩoneki mũcoro wa nyũmba ĩyo na nĩ aũnengerete Suleimani. Daudi akoiga ũũ: “Wĩra ũrĩa ũkũrutwo nĩ mũnene; nĩ gũkorũo nyũmba ĩo ya ũnene ti mũndũ wa gũkũ thĩ ũgwakĩrũo, tiga o Jehova Ngai.”—1 Maũ. 28:1, 2, 6, 11, 12; 29:1.

Daudi agacoka akoria ũũ: “Nũ ũgũkĩĩamũra mũthenya ũyũ wa ũmũthĩ, harĩ Jehova arute indo na ũndũ wa kwĩendera na ngoro yake?” (1 Maũ. 29:5) Korũo warĩ mũcemanio-inĩ ũcio-rĩ, ũngĩekire atĩa? Hihi nĩ ũngĩarutire indo ciaku nĩguo ũteithĩrĩrie wĩra ũcio? Aisiraeli matiarĩire marĩĩgu. Bibilia yugaga ũũ: “Magĩkena nĩ ũndũ nĩmaarutĩte indo ciao na kwĩendera, nĩ gũkorũo maarutĩire Jehova indo icio ciao na ngoro yao yothe.”—1 Maũ. 29:9.

Mĩaka mĩingĩ thutha ũcio, Jehova nĩ aambĩrĩirie ũndũ ũngĩ warĩ mũnene gũkĩra nyũmba ĩyo. Nĩ aambĩrĩirie hekarũ nene ya kĩĩroho, nĩyo mũbango wa andũ gũthathaiya Ngai kũgerera igongona rĩa ũkũũri rĩa Jesu. (Ahib. 9:11, 12) Ũmũthĩ Jehova arateithia andũ maiguithanio nake na njĩra ĩrĩkũ? Nĩ kũgerera wĩra ũrĩa tũraruta wa gũtua andũ arutwo. (Mat. 28:19, 20) Nĩ ũndũ wa wĩra ũcio, o mwaka andũ milioni nyingĩ nĩ mararutwo Bibilia, aingĩ ao makabatithio, na gũkambĩrĩrio ciũngano nyingĩ.

Nĩ ũndũ wa wongerereku ũcio, nĩ kũrabatarania gũcabwo mabuku maingĩ marĩa maragĩrĩria Bibilia, gwaka na kũmenyerera Nyũmba cia Ũthamaki na kũrĩa tũcemanagia nĩ ũndũ wa igomano. Hihi nĩ wonete ũrĩa wĩra witũ wa kũhunjia ũrĩ mũnene na ũrĩ na irathimo?—Mat. 24:14.

Nĩ ũndũ wa wendo wao harĩ Ngai na andũ, na ningĩ nĩ ũndũ wa wĩra wa kũhunjia, andũ a Jehova nĩ ‘maramũrutĩra indo ciao’ kũgerera mĩhothi ya kwĩyendera. Na githĩ ti ũndũ ũrĩ gĩkeno mũno ‘gũtĩithagia Jehova na indo iria tũrĩ nacio,’ na kuona ũrĩa irahũthĩrũo na njĩra njega harĩ gũtwarithia na mbere wĩra ũrĩa mũnene wanakorũo kuo thĩinĩ wa thĩ?—Thim. 3:9.

Njĩra Iria Amwe Mahũthagĩra Kũruta Mĩhothi

Andũ aingĩ ũmũthĩ nĩ ‘maigaga kĩndũ’ kana makabangĩra mbeca mũigana mũna na magacikia thĩinĩ wa ithandũkũ rĩa mĩhothi ya “Wĩra wa Thĩ Yothe.” (1 Kor. 16:2) O mweri, ciũngano nĩ itũmaga mĩhothi ĩyo wabici-inĩ ya Aira a Jehova ĩrĩa ĩrũgamĩrĩire bũrũri wao. Ningĩ no ũtũme mĩhothi yaku ĩmwe kwa ĩmwe kũrĩ rũhonge rwĩtĩkĩrĩku kĩĩwatho, rũrĩa rũhũthagĩrũo nĩ Aira a Jehova bũrũri-inĩ wanyu. Nĩguo ũmenye rĩĩtwa rĩa rũhonge rũu, no waranĩrie na wabici ya Aira a Jehova ĩrĩa ĩrũgamĩrĩire bũrũri wanyu. Andirethi cia wabici ĩyo no cioneke thĩinĩ wa jw.org. Mĩthemba ya mĩhothi ĩrĩa ũngĩtũma ĩmwe kwa ĩmwe nĩ:

MĨHOTHI YA ĨMWE KWA ĨMWE

Mũndũ no arute mĩhothi yake kũgerera electronic bank transfer, debit card, credit card kana gũtũma mbeca na thimũ. Thĩinĩ wa wabici imwe cia honge mũndũ no atũme mĩhothi ĩyo kũgerera jw.org kana website ĩngĩ ĩrĩa ĩthurĩtwo.
Mbeca, mathaga ma goro, kana indo ingĩ cia bata. Nĩ wega gũtũma marũa maronania atĩ mbeca kana indo icio nĩ mĩhothi ya ĩmwe kwa ĩmwe.

MĨHOTHI ĨRĨ NA MĨHAKA

Mĩhothi ĩno nĩ mbeca irĩkanĩirũo atĩ no icokio mũheani angĩcibatara.
Nĩ wega gũtũma marũa maronania atĩ mĩhothi ĩyo ĩrĩ na mĩhaka.

MĨHOTHI ĨNGĨ

Makĩria ma iheo cia mbeca na indo cia bata, nĩ harĩ njĩra ingĩ cia kũhotha nĩguo mũndũ ateithĩrĩrie wĩra wa Ũthamaki wa thĩ yothe. Njĩra icio nĩ cionanĩtio haha mũhuro. O njĩra ĩrĩa ũngĩenda kũhũthĩra, amba warie na wabici ya Aira a Jehova ĩrĩa ĩrũgamĩrĩire bũrũri wanyu nĩguo ũmenye nĩ njĩra irĩkũ ingĩhũthĩka. Na tondũ mawatho ma mabũrũri na ma kũruta igooti nĩ matiganĩte, harĩ bata kwaranĩria na mũndũ ũĩ wega ũhoro wa watho na wa kũruta igooti, ũtanathuura njĩra ĩrĩa njega ya kũhotha.

Marĩhi ma Kũrũgamĩrĩra Ũndũ Ũterĩgĩrĩirũo (Insurance): Ĩno nĩ mĩhothi ĩrutĩtwo na njĩra ya kũgweta atĩ rũhonge rũna rũhũthagĩrũo nĩ Aira a Jehova nĩruo rũkaagunĩka nĩ marĩhi macio kana mbeca iria mũndũ arĩhagwo ũkũrũ-inĩ kana atiga wĩra.

Akaunti cia Bengi: Ici nĩ akaunti cia bengi, marũa ma marĩhi, kana akaunti ya mbeca cia ritaya, ĩrĩa ĩngĩĩhokerũo kana ĩrĩhwo kũrĩ rũhonge rũna rũhũthagĩrũo nĩ Aira a Jehova, kũringana na mĩtaratara ya bengi cia kwanyu, thutha wa gĩkuũ kĩa mũndũ ũcio.

Cĩya na Bondi (stocks and bonds): Cĩya na bondi no iheanwo kũrĩ rũhonge rũna rũhũthagĩrũo nĩ Aira a Jehova irĩ kĩheo kĩa ĩmwe kwa ĩmwe kana kũiguanĩra atĩ nĩ igaatuĩka cia rũhonge rũu mũndũ akua.

Nyũmba na Mĩgũnda: Ici nĩ nyũmba na mĩgũnda ĩrĩa ĩheanagwo kũrĩ rũhonge rũna rũhũthagĩrũo nĩ Aira a Jehova, hihi irĩ iheo cia ĩmwe kwa ĩmwe kana angĩkorũo nĩ nyũmba ya gũikara, no marĩkanĩre atĩ mũheani egũthiĩ na mbere kũmĩikara hĩndĩ yothe ĩrĩa egũkorũo muoyo.

Bacici cia o Mwaka: Ici nĩ mbeca kana indo iria iheanagwo kũrĩ rũhonge rũna rũhũthagĩrũo nĩ Aira a Jehova harĩ na mũbango atĩ mũheani aamũkagĩre mũigana mũna wa bacici o mwaka hĩndĩ ĩrĩa yothe e muoyo. Mũheani no anyihanyihĩrio igooti mwaka ũrĩa mũbango ũcio wambĩrĩria.

Marũa ma Kwĩgaya na Ũramati (Wills and Trusts): Indo kana mbeca no ciĩhokerũo rũhonge rũhũthagĩrũo nĩ Aira a Jehova kũgerera marũa ma kĩĩwatho ma kwĩgaya, kana kũgweta atĩ rũhonge rũu nĩruo rũkaagunĩka nĩ mũbango wa ũramati. Mũbango ũcio no ũkorũo na ũguni mũna mwena-inĩ wa kũruta igooti.

Mĩhothi ya mĩthemba ta ĩyo nĩ ĩbataraga mũbango harĩ mũheani. Nĩ ũndũ wa gũteithĩrĩria andũ arĩa mangĩenda gũteithia wĩra wa thĩ yothe wa Aira a Jehova kũgerera njĩra imwe cia icio, broshua ĩĩtagwo Charitable Planning to Benefit Kingdom Service Worldwide nĩ ĩhaarĩirio na Gĩthũngũ na Kĩhispania. Broshua ĩyo yaandĩkirũo nĩguo ĩtaarĩrie njĩra imwe cia kũheana iheo ihinda-inĩ rĩrĩ kana thutha-inĩ, ta kũheana igai mũndũ akua. Ũhoro ũmwe ũrĩa ũrĩ broshua-inĩ ĩyo no wage kũhũthĩka harĩ we nĩ ũndũ wa mawatho ma kũruta igooti kana mawatho mangĩ ma bũrũri wanyu. Kũgerera njĩra icio cia kũruta mĩhothi, andũ aingĩ nĩ mahotete kũnyita mbaru wĩra witũ wa Ũthamaki na wa gũteithia andũ thĩ yothe na makanyihanyihia marĩhi mao ma igooti. Angĩkorũo broshua ĩyo nĩ yonekaga bũrũri-inĩ wanyu, no wĩre mwandĩki wa kĩũngano kĩanyu akũhe.

Ũngĩenda ũhoro makĩria hingũra website ya jw.org/ki, na ũthiĩ mwena wa mũhuro ũhingũre “Ruta Mũhothi nĩ Ũndũ wa Wĩra Witũ wa Thĩ Yothe”, kana waranĩrie na wabici ya rũhonge.