Ũrĩa Araika Mangĩgũteithia

Bibilia yonanagia atĩ rĩmwe araika managitĩra athathaiya a ma na gĩkĩro kĩna nĩguo mahingie wendi wa Ngai. (Thaburi 34:7) Kwa ngerekano:

• Rĩrĩa Jehova aaniinire matũũra maarĩ na waganu ma Sodomu na Gomora, araika nĩ maateithirie Loti, ũrĩa warĩ mũthingu, o hamwe na famĩlĩ yake kũũra kuuma kũu.​—Kĩambĩrĩria 19:1, 15-26.

• Thĩinĩ wa Babuloni ya tene, rĩrĩa anake atatũ Ahibirania maaikirio mwaki-inĩ, Ngai ‘aatũmire mũraika wake, akĩhonokia ndungata ciake.’​—Danieli 3:​19-28.

• Thutha wa Danieli, ũrĩa warĩ mũthingu, kũraara ũtukũ mũgima irima-inĩ rĩa mĩrũthi, aataarĩirie atĩ aagire kũrĩo nĩyo tondũ ‘Ngai aatũmire mũraika wake, akĩhinga mĩrũthi tũnua.’​—Danieli 6:​16, 22.

ARAIKA NĨ MAATEITHAGIA KĨŨNGANO GĨA GĨKRISTIANO GĨA KARINE YA MBERE

Rĩmwe araika nĩ maatũmagwo nĩ Ngai gũteithĩrĩria kĩũngano gĩa Gĩkristiano gĩa karine ya mbere rĩrĩa muoroto wa Jehova wabataraga kũhingio. Kwa ngerekano:

• Mũraika nĩ aahingũrire mĩrango ya njera na akĩĩra atũmwo arĩa mohetwo kũu mathiĩ makahunjie hekarũ-inĩ.​—Atũmwo 5:​17-21.

• Mũraika nĩ eerire mũhunjia ũrĩa wetagwo Filipu athiĩ barabara-inĩ ya werũ-inĩ ĩrĩa yoimĩte Jerusalemu nginya Gaza na ahunjĩrie Mũethiopia ũrĩa wokĩte Jerusalemu gũthathaiya Ngai.​—Atũmwo 8:​26-33.

• Rĩrĩa ihinda rĩa Ngai rĩakinyire rĩa andũ mataarĩ Ayahudi gũtuĩka Akristiano, mũraika nĩ oimĩrĩire mũnene wa mbũtũ ya Roma wetagwo Korinelio kĩoneki-inĩ na akĩmwĩra atũmanĩre mũtũmwo Petero oke gwake mũciĩ.​—Atũmwo 10:​3-5.

• Rĩrĩa mũtũmwo Petero aarĩ njera, mũraika nĩ aamumĩrĩire na akĩmũruta njera.​—Atũmwo 12:​1-11.

ŨRĨA ARAIKA MANGĨGŨTEITHIA

Mahinda-inĩ maya gũtirĩ ũira wonanagia atĩ Ngai nĩ ahũthagĩra araika gũteithia andũ na njĩra ya ciama ta ũrĩa eekaga mahinda-inĩ ma Bibilia. O na kũrĩ ũguo, Jesu oigire ũũ akĩaria ũhoro wa mahinda maitũ: “Ũhoro ũyũ mwega wa Ũthamaki nĩ ũkaahunjio thĩ yothe ũtuĩke ũira kũrĩ ndũrĩrĩ ciothe, na hĩndĩ ĩyo nĩrĩo mũico ũgaakinya.” (Mathayo 24:14) Hihi nĩ ũĩ atĩ arutwo a Kristo marutaga wĩra ũcio rungu rwa ũtongoria wa araika?

Ibuku rĩa Kũguũrĩrio rĩonanagia atĩ araika mangĩgakorũo marĩ na kĩyo magĩteithia andũ thĩ yothe kwĩruta ũhoro wĩgiĩ Jehova Ngai na muoroto wake harĩ andũ. Mũtũmwo Johana aandĩkire ũũ: “Ngĩcoka ngĩona mũraika ũngĩ akĩũmbũkĩra igũrũ gatagatĩ arĩ na ũhoro mwega wa tene na tene nĩguo ahunjĩrie andũ arĩa maikaraga thĩinĩ wa thĩ, ndũrĩrĩ ciothe na mĩhĩrĩga na thiomi na iruka cia andũ. Na oigaga na mũgambo mũnene atĩrĩ: ‘Mwĩtigĩrei Ngai na mũmũgooce, tondũ ihinda rĩake rĩa gũtuanĩra nĩ ikinyu, nĩ ũndũ ũcio thathaiyai Ũrĩa wombire igũrũ na thĩ na iria o na ithima cia maĩ.’” (Kũguũrĩrio 14:​6, 7) Maũndũ maingĩ marĩa monekete mahinda-inĩ maya, nĩ ũira wa atĩ araika nĩ mateithagĩrĩria wĩra-inĩ wa kũhunjia thĩinĩ wa thĩ yothe. O na rĩrĩa mwĩhia ũmwe erira na acokerera Jehova, “araika a Ngai magĩaga na gĩkeno.”​—Luka 15:10.

Gũgathiĩ atĩa rĩrĩa wĩra wa kũhunjia ũgakinya mũico? Araika, arĩa nĩ “mbũtũ cia igũrũ,” nĩ makanyitanĩra na Jesu Kristo, Mũthamaki wa athamaki, harĩ kũrũa “mbaara ya mũthenya ũrĩa mũnene wa Ngai Mwene Hinya Wothe” ya Hari–​Magedoni. (Kũguũrĩrio 16:​14-16; 19:​14-16) Araika marĩ na hinya nĩ makaniina arĩa magakorũo matuĩrĩirũo kũniinwo rĩrĩa Mwathani Jesu akarehe “ituĩro igũrũ rĩa andũ arĩa . . . matathĩkagĩra ũhoro ũrĩa mwega wa Mwathani witũ Jesu.”​—2 Athesalonike 1:​7, 8.

Nĩ ũndũ ũcio, korũo na ma atĩ araika nĩ makenagio nĩ we. Nĩ marũmbũyagia mũno ũhoro wa andũ arĩa marenda gũtungatĩra Ngai, na Jehova nĩ amahũthĩrĩte maita maingĩ gwĩkĩra hinya na kũgitĩra ndungata ciake njĩhokeku gũkũ thĩ.​—Ahibirania 1:14.

Nĩ ũndũ ũcio, o ũmwe witũ arĩ na itua rĩa bata arabatara gũtua. Hihi nĩ tũgũthikĩrĩria na twathĩkĩre ũhoro mwega ũrĩa ũrahunjio thĩinĩ wa thĩ yothe? Aira a Jehova a gĩcigo gĩa kwanyu nĩ megũkena gũgũteithia wone ũrĩa ũngĩgunĩka nĩ ũteithio wa araika a Ngai marĩ hinya.