Ũteithio wa Gũkirĩrĩria Mathĩna

MŨRIMŨ ŨTANGĨHONA

Rose oigire ũũ: “Nĩ ngoragwo na mũrimũ ndaciarirũo naguo na nĩ ũtũmaga ngorũo na ruo rũingĩ rũtarathira. Ũgima wakwa wa mwĩrĩ ũthiaga o ũthũkĩte.” Ũndũ ũmwe wamũthumbũraga mũno nĩ atĩ rĩmwe meciria make nĩ moraga akĩĩruta Bibilia, na arĩ maũndũ-inĩ mangĩ ma kĩĩroho. No nĩ aateithirio mũno nĩ ciugo cia Jesu iria irĩ thĩinĩ wa Mathayo 19:26: “Harĩ Ngai maũndũ mothe no mahoteke.” Rose nĩ aamenyire atĩ nĩ kũrĩ njĩra nyingĩ cia kwĩruta. Tondũ rĩmwe ruo nĩ rwatũmaga aremwo nĩ gũthoma, nĩ aambĩrĩirie gũthikagĩrĩria Bibilia ĩrĩa ĩrekondetwo na mabuku marĩ na ũhoro wa Bibilia.a Aacokire akiuga ũũ: “Korũo ndiekire maũndũ macio, ndiũĩ ũrĩa ũrata wakwa na Ngai ũngĩhaana.”

Rĩrĩa Rose arĩ na kĩeha nĩ ũndũ wa kũrigwo nĩ ũrĩa angĩka, nĩ omagĩrĩrio nĩ ciugo ici irĩ thĩinĩ wa 2 Akorintho 8:12, iria ciugaga: “Tondũ rĩrĩ, angĩkorũo o mbere harĩ na wendi wa gwĩka ũndũ, nĩ wĩtĩkĩrĩkĩte kũringana na kĩrĩa mũndũ arĩ nakĩo, no ti kũringana na kĩrĩa atarĩ nakĩo.” Ciugo ici nĩ iririkanagia Rose atĩ Ngai nĩ akenagio nĩ ũrĩa ekaga, tondũ nĩ erutanagĩria gwĩka ũrĩa wothe angĩhota.

KĨEHA

Delphine ũrĩa ũgwetetwo kĩambĩrĩria-inĩ oigire ũũ: “Thutha wa mũirĩtu wakwa ũrĩa warĩ na mĩaka 18 gũkua, ndarĩ na ruo rũingĩ mũno ũũ atĩ ndionaga ta ingĩhota gũthiĩ na mbere na ũtũũro. Maũndũ nĩ mangĩacenjirie biũ.” No nĩ omĩrĩirio mũno nĩ ciugo cia Thaburi 94:19, harĩa mwandĩki wa Thaburi eerire Ngai ũũ: “Rĩrĩa nyingĩhĩirũo thĩinĩ wakwa nĩ mĩtangĩko ũhoreria waku nĩguo ũngenagia ngoro.” Aacokire akiuga ũũ: “Nĩ ndahoire Ngai andeithie njethe maũndũ ingĩka marĩa mangĩandeithirie kũniina ruo rũu.”

Nĩ eimire na akĩambĩrĩria wĩra wa kwĩrutĩra. Thutha wa ihinda nĩ eringithanirie na tũramu twa kũgemia tondũ o na rĩrĩa tunĩkangĩte no tũgemagia. O ta ũguo, o na akorũo nĩ aiguaga akuĩte ngoro, nĩ aamenyire atĩ nĩ angĩahotire gũteithia andũ angĩ. Nĩ aaririkanire ũũ: “O rĩmwe nĩ ndamenyire atĩ rĩrĩa ndahũthĩra ũtaaro wa Kĩĩmandĩko na njĩra cia Kiugo kĩa Ngai kũũmĩrĩria arutwo a Bibilia, ĩyo ĩkoragwo ĩrĩ njĩra ya Jehova ya gũthuuthĩra na kũnyũmĩrĩria.” Nĩ aandĩkire marĩĩtwa ma andũ arĩa marĩ Bibilia-inĩ arĩa hĩndĩ ĩmwe nĩ maarĩ na kĩeha kĩingĩ. Nĩ aamenyire atĩ “andũ acio othe nĩ maahoyaga mũno.” Ningĩ nĩ aamenyire atĩ “no mũhaka mũndũ athome Bibilia nĩguo ahote kũhiũrania na mathĩna.”

Nĩ ũndũ wa kwĩruta Bibilia, Delphine nĩ amenyete atĩ agĩrĩirũo kũiga meciria make harĩ maũndũ marĩa marĩ mbere no ti marĩa mahĩtũku. Nĩ omagĩrĩrio nĩ kĩĩranĩro kĩrĩa kĩrĩ thĩinĩ wa Atũmwo 24:15: “Nĩ gũkaariũkio andũ arĩa athingu na arĩa matarĩ athingu.” Hihi arĩ na ma biũ atĩ Jehova nĩ akariũkia mũirĩtu wake? Oigire ũũ: “Nĩ hũũraga mbica tũrĩ na mũirĩtu wakwa. Nĩ nyonaga ‘mũthenya’ ũrĩa ngaamuona ihinda-inĩ rĩrĩa Jehova atuĩte. Nyonaga tũrĩ nake mũgũnda-inĩ witũ o ta ũrĩa ndamuonire na ngĩmwenda rĩa mbere aciarũo.”