Ũrĩa Ũngĩgĩa na Ũtũũro Mwega

ŨTŨŨRO ũmũthĩ ndũtariĩ ta ũrĩa Ngai aabangĩte. Thĩ yagĩrĩirũo gũkorũo ĩiyũire andũ maheete ũnene wa Mũũmbi wao gĩtĩo, maragunĩka nĩ ũtongoria wake, na makonania ngumo ya wendo na ngumo ingĩ ciake njega. Ngai eendaga andũ makoragwo na gĩkeno rĩrĩa marateithania kũrũmbũiya famĩlĩ ciao, kwĩruta maũndũ merũ, na gũthondeka thĩ yothe ĩtuĩke paradiso.

NGAI NĨ ERANĨIRE ATĨ NĨ AGAACENJIA ŨTŨŨRO THĨINĨ WA THĨ ŨHAANE ŨRĨA EENDAGA

• “Aniinaga mbaara kũndũ guothe thĩinĩ wa thĩ.”​—Thaburi 46:9.

• “Ihinda rĩrĩa rĩatuĩtwo rĩgĩkinya . . . rĩa kwananga arĩa manangaga thĩ.”​—Kũguũrĩrio 11:18.

• “Gũtirĩ mũikari wakuo ũkoiga: ‘Ndĩ mũrwaru.’”​—Isaia 33:24.

• “Andũ akwa arĩa athuure nĩ magaakenagĩra wĩra wa moko mao biũ.”​—Isaia 65:22.

Hihi morathi macio makaahingio atĩa? Ngai nĩ athuurĩte Mũrũwe Jesu, atuĩke Mũthamaki wa thirikari nginyanĩru ĩrĩa ĩgaathana gũkũ thĩ kuuma kũrĩa igũrũ. Bibilia ĩtaga thirikari ĩyo Ũthamaki wa Ngai. (Danieli 2:44) Bibilia yugaga ũũ igũrũ rĩgiĩ Jesu: ‘Ngai nĩ akaamũhe gĩtĩ kĩa ũnene, na nĩ agaathana arĩ Mũthamaki.’—Luka 1:32, 33.

Rĩrĩa Jesu aarĩ gũkũ thĩ, nĩ aaringire ciama nyingĩ, kuonania atĩ rĩrĩa agaakorũo agĩathana arĩ Mũthamaki nĩ agaateithia andũ makorũo na ũtũũro mwega gũkĩra ũrĩa marĩ naguo ũmũthĩ.

JESU NĨ OONANIRIE ŨRĨA AGAATEITHIA ANDŨ ARĨA ATHĨKI

• Nĩ aahonagia andũ mĩrimũ ya mĩthemba yothe, kuonania ũrĩa akaaniinĩra andũ mĩrimũ yothe.​—Mathayo 9:35.

• Nĩ aahooreririe iria, kuonania ũrĩa akaagitĩra andũ na njĩra ya gũkorũo na ũhoti igũrũ rĩgiĩ maũndũ ma ndũire.​—Mariko 4:36-39.

• Nĩ aaheire andũ ngiri nyingĩ irio, kuonania atĩ nĩ akaahingĩria andũ mabataro mao ma o mũhaka.​—Mariko 6:41-44.

• Nĩ aagarũrire maĩ magĩtuĩka ndibei rĩrĩa aarĩ ũhiki-inĩ, na ũndũ ũcio ũkĩonania atĩ nĩ agaateithia andũ gũkenera ũtũũro.​—Johana 2:7-11.

Wagĩrĩirũo gwĩka atĩa nĩguo ũgĩe na ũtũũro ũrĩa Ngai arahaarĩria nĩ ũndũ wa arĩa mamwendete? Nĩ harĩ “njĩra” ũrabatara kũgerera. Bibilia yugaga atĩ nĩ “njĩra ĩrĩa ĩkinyagia andũ muoyo-inĩ . . . , na andũ arĩa mamĩonaga nĩ anini.”—Mathayo 7:14.

ŨRĨA ŨNGĨMENYA NJĨRA YA MUOYO

Njĩra ya muoyo nĩ ĩrĩkũ? Ngai oigĩte ũũ: “Niĩ Jehova, nĩ niĩ Ngai waku, o we Ũrĩa ũkũrutaga nĩguo ũgunĩke wee mwene, o we Ũrĩa ũgũtongoragia njĩra-inĩ ĩrĩa wagĩrĩirũo kũgerera.” (Isaia 48:17) No ũkorũo na ũtũũro mwega ũngĩgerera njĩra ĩyo.

Nake Jesu ooigire ũũ: “Nĩ niĩ njĩra na nĩ niĩ ũhoro ũrĩa wa ma na nĩ niĩ muoyo.” (Johana 14:6) No tũkuhĩrĩrie Ngai na tũkoragwo na ũtũũro mwega tũngĩtĩkia maũndũ marĩa Jesu aarutanire na tũrũmĩrĩre kĩonereria kĩrĩa aatũigĩire.

Ũngĩmenya njĩra ya muoyo atĩa? Kũrĩ na ndini nyingĩ, no Jesu ooigire ũũ: “Ti mũndũ o wothe ũnjĩtaga, ‘Mwathani, Mwathani,’ ũkaaingĩra Ũthamaki-inĩ wa igũrũ, no nĩ ũrĩa wĩkaga wendi wa Ithe witũ wa igũrũ ũkaaingĩra.” (Mathayo 7:21) Ningĩ akiuga: “Nĩ mũrĩmamenyaga kũgerera maciaro mao.” (Mathayo 7:16) Bibilia no ĩgũteithie kũmenya ndini ya ma na ũrĩa ĩrĩ ngũrani na ndini iria ingĩ.—Johana 17:17.

Ũngĩambĩrĩria atĩa kũgerera njĩra-inĩ ya muoyo? Nĩ ũrabatara kũmenya ũrĩa waheanire muoyo: Nĩwe ũ? Etagwo atĩa? Hihi atariĩ atĩa? Areka atĩa rĩu? Hihi endaga twĩke atĩa?a

Muoroto wa Ngai ndwarĩ o andũ marutage wĩra, kũrĩa, gũthaaka, na kũrũmbũiya famĩlĩ. No tũmenyane na Mũũmbi witũ na tũtuĩke arata ake. No tuonanie atĩ nĩ tũmwendete na njĩra ya gwĩka wendi wake. Jesu ooigire ũũ: “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma.”—Johana 17:3.

ŨRĨA ŨNGĨAMBĨRĨRIA KŨGERERA NJĨRA-INĨ YA MUOYO

Nĩguo ũkenie Ngai ũrĩa ũmwe wa ma, no ũbatare gwĩka mogarũrũku ũtũũro-inĩ. Ũndũ ũcio no ũkorũo ũtarĩ mũhũthũ. No ũtũũro witũ no wagĩre tũngĩambĩrĩria kũgerera njĩra-inĩ ya muoyo. Nĩguo wone macokio ma ciũria cia bata ciĩgiĩ Ngai, Aira a Jehova no merutĩre kwĩruta Bibilia hamwe nawe mahinda na kũndũ kũrĩa gũkwagĩrĩire. No wone ũhoro makĩria thĩinĩ wa website itũ ya www.jw.org/ki.