Hihi no Ũteithie Mũthuri Kana Mũtumia wa Mũkristiano Ũngĩ Amenye Ma?

1. Nĩkĩ Akristiano arĩa maikaraga thĩinĩ wa famĩlĩ ĩgayũkanĩte kĩĩndini to o aiki mendaga athuri kana atumia ao merute ma?

¹ Hihi thĩinĩ wa kĩũngano kĩanyu nĩ kũrĩ ahunjia amwe marĩ na athuri kana atumia materutĩte ma? Angĩkorũo nĩ kũrĩ, hatirĩ nganja ahunjia acio nĩ meriragĩria athuri kana atumia ao merute ma na manyitanĩre nao ũthathaiya-inĩ wa ma. No to o aiki mendaga ũndũ ũcio, ĩndĩ kĩũngano gĩothe nĩ kĩonanagia mwerekera wa Ngai wa “andũ othe mahonokio na matũĩke a kũmenya ũhoro-wa-ma.” (1 Tim. 2:⁠4) Tũngĩteithia athuri kana atumia materutĩte ma a Akristiano angĩ thĩinĩ wa kĩũngano giitũ na njĩra ĩrĩkũ?

2. Ũtaũku ũngĩtũteithia atĩa twĩrute ma na mũthuri kana mũtumia wa Mũkristiano ũngĩ?

² Ũndũ wa mbere nĩ atĩ, twagĩrĩirũo kũgeria kuona maũndũ na njĩra ĩrĩa mũndũ ũcio ũterutĩte ma aramona. Andũ aingĩ materutĩte ma nĩ mendete famĩlĩ ciao na nĩ mageragia gũkorũo marĩ ega harĩ athuri kana atumia ao na gũkorũo marĩ aciari ega. Hihi no makorũo na wĩtĩkio ngũrani na witũ. No gũkorũo matiũĩ maũndũ maingĩ megiĩ Aira a Jehova tiga o marĩa merĩtwo nĩ arata ao arĩa matatũũĩ wega kana arĩa matũthũire. Amwe matikenagio nĩ mahinda marĩa athuri kana atumia ao mahũthagĩra ũthathaiya-inĩ marĩa tene maahũthagĩra hamwe na famĩlĩ ciao. Ũtaũku nĩ ũgũtũteithia tũgĩe na ũrata na mũndũ ũcio ũterutĩte ma, tũmũhe gĩtĩo na twĩtheme gũkorũo na guoya rĩrĩa tũrĩ hakuhĩ nake.​—⁠Thim. 16:⁠20-23.

3. Nĩ njĩra ĩrĩkũ njega mũno ĩngĩgucĩrĩria mũthuri kana mũtumia wa Mũkristiano ũngĩ erute ma?

³ Mũrũmbũiye: Njĩra ĩrĩa njega mũno ĩngĩgucĩrĩria mũthuri kana mũtumia wa Mũkristiano ũngĩ erute ma, nĩ ciĩko ciitũ no ti kũmũruta Bibilia. (1 Pet. 3:⁠1, 2) Ũndũ ũrĩa wa bata nĩ kũmuonia atĩ nĩ ũramũrũmbũiya. Thĩinĩ wa kĩũngano aarĩ a Ithe witũ nĩ magĩrĩire kũrũmbũiya mũtumia wa mũrũ wa Ithe witũ, nao ariũ a Ithe witũ magĩrĩire kũrũmbũiya mũthuri wa mwarĩ wa Ithe witũ ũrĩa ũterutĩte ma. Na njĩra ĩrĩkũ?

4. Tũngĩonania nĩ tũramarũmbũiya na njĩra ĩrĩkũ?

⁴ Angĩkorũo ndũrĩ wacemania na mũthuri kana mũtumia ũterutĩte ma wa Mũkristiano ũngĩ-rĩ, hihi no wĩke ũguo thutha wa kwarĩrĩria ũhoro ũcio na mũrũ kana mwarĩ wa Ithe witũ. Ndũkarakare angĩkorũo ndekũgucĩrĩrio rĩa mbere nĩ ũhoro ũcio. Gũtuma ndũgũ nake na kũmũrũmbũiya no kũmũtindĩke agĩe na mawoni marĩa magĩrĩire kwerekera Aira a Jehova. (Rom. 12:20) Akristiano amwe agima kĩĩroho maaneta kwao mĩciĩ Akristiano ta acio hamwe na athuri kana atumia arĩa materutĩte ma marĩ na famĩlĩ ciao nĩguo marĩanĩre hamwe, marĩ na muoroto wa kũmenyana wega na kweheria nganja iria mangĩkorũo nacio. Handũ ha kũmatindĩkĩrĩria maũndũ-inĩ ma kĩĩroho tu-rĩ, maragĩrĩria igũrũ rĩa maũndũ marĩa mamakenagia. Thutha-inĩ, mũthuri kana mũtumia wa Mũkristiano ũcio angĩenda, no mwarĩrĩrie maũndũ megiĩ Maandĩko kũngĩhoteka. Kana ahota gwĩtĩkĩra gũũka mũcemanio-inĩ ũmwe witũ wa kĩũngano nĩguo eyonere maũndũ marĩa mũtumia wake areruta, makĩria tondũ nĩ amenyanĩte na andũ amwe thĩinĩ wa kĩũngano. O na angĩkorũo ndeharĩirie kwĩruta ma, nĩ agĩrĩire gũcokerio ngatho nĩ ũrĩa anyitaga mũtumia wake mbaru.

5. Athuri a kĩũngano mangĩteithia mũthuri kana mũtumia wa Mũkristiano ũterũtĩte ma atĩa?

⁵ Athuri a kĩũngano magĩrĩire gũ­teithia mũthuri kana mũtumia wa Mũkristiano na hĩndĩ ciothe magako­rũo mehaarĩirie kũmũhunjĩria mĩeke ĩngĩonekana. Mũthuri kana mũtumia ũkoretwo atekwenda ndũmĩrĩri ya Bibilia no athikĩrĩrie ma­andĩko ma kũmwĩkĩra ngoro rĩrĩa arĩ thibitarĩ kana rĩrĩa anyitwo nĩ ũndũ mũritũ ta wa ndwari. Angĩkorũo famĩlĩ ĩgayũkanĩte kĩĩndini nĩyakorũo nĩ ũndũ mũritũ ta gũkuĩrũo nĩ ũmwe wao, athuri a kĩũngano no maikare thĩ hamwe nao nginya ũrĩa ũterutĩte ma rĩrĩa maramoomĩ­rĩria.

6. Tweruta atĩa ũndũ-inĩ wĩgiĩ gũteithia athuri kana atumia a Akristiano arĩa materutĩte ma?

⁶ Ta wĩcirie gĩkeno kĩrĩa Mũkristiano thĩinĩ wa kĩũngano giitũ angĩkorũo nakĩo mũthuri kana mũtumia wake angĩtĩkĩra kwĩruta ma! Ũndũ ta ũcio wa gĩkeno ningĩ nĩ ũrehagĩra Jehova, araika na andũ othe thĩinĩ wa kĩũngano gĩkeno kĩnene. (Luk. 15:⁠7, 10) No rĩrĩ, angĩkorũo mũndũ ũcio ndaroneka ta arenda kwĩruta ma, no tũgũthiĩ o na mbere gũkena tondũ kĩyo giitũ nĩ gĩkenagia Jehova, “nĩ ũndũ ndendaga mũndũ o na ũmwe ore, no atĩ othe matuĩke a kwĩrira.”—2 Pet. 3:⁠9.

[Karatathi ga 6]

Njĩra ĩrĩa njega mũno ĩngĩgucĩrĩria mũthuri kana mũtumia wa mũkristiano ũngĩ erute ma, nĩ ciĩko ciitũ no ti wĩruti wa Bibilia