Gwĩcũrania na Njĩra ya Mahoya nĩ kwa Bata Harĩ Ndungata Irĩ na Kĩyo
1. Nĩ kĩĩ gĩateithirie Jesu ndagatigane na wĩra wake ũrĩa warĩ wa bata?
1 Jesu aahũthĩrĩte mahinda ma hwaĩ-inĩ kũhonia andũ na kũingata ndaimono. Arutwo ake maamuona mũthenya ũyũ ũngĩ, makĩmwĩra atĩrĩ: “Nĩũracario nĩ andũ othe,” makĩmwĩkĩra ngoro athiĩ na mbere na mawĩra make ma hinya. O na kũrĩ ũguo-rĩ, gũtirĩ ũndũ o na ũrĩkũ ũngĩatũmire Jesu atigane na wĩra wake wa bata wa kũhunjia ũhoro ũrĩa mwega. Akĩmacokeria atĩrĩ: “Nĩtuume gũkũ tũthiĩ mĩciĩ ĩrĩa ĩngĩ, ngaheane ũhoro o nakuo; amu nĩkĩo ndokire.” Nĩ kĩĩ gĩateithirie Jesu gũtũũria kĩyo kĩu gĩake? Okĩrĩte tene nĩguo ahoe na ecũranie. (Mar. 1:32-39) Gwĩcũrania na njĩra ya mahoya kũngĩtũteithia atĩa tũkorũo tũrĩ ahunjia marĩ na kĩyo?
2. Tũngĩĩcũrania maũndũ marĩkũ nĩguo tũtũũrie kĩyo giitũ ũtungata-inĩ?
2 Gwĩcũrania Igũrũ rĩa Kĩ? Jesu aarorire andũ akĩona “nĩmaanyamarĩkĩte, na makahurunjũka ta mbũri itarĩ na mũrĩithi.” (Mat. 9:36) O ũndũ ũmwe, no twĩcũranie na tũone ũrĩa andũ mabataire ũhoro ũrĩa mwega. No twĩthugunde na tũone ũrĩa ũndũ ũcio ũrabatara gwĩkwo na mĩtũkĩ. (1 Kor. 7:29) No twĩcũranie mawĩko ma Jehova na ngumo ciake, mweke wa gũkorũo tũrĩ Aira a Jehova, na maũndũ ma bata ma kĩĩroho marĩa twĩrutĩte kuuma Kiugo-inĩ kĩa Ngai marĩa matoĩkaine nĩ andũ itũũra-inĩ riitũ.—Thab. 77:11-13; Isa. 43:10-12; Mat. 13:52.
3. Twagĩrĩirũo gwĩcũrania rĩ?
3 Gwĩcũrania Rĩ? O ta Jesu, andũ amwe mokĩraga tene rĩrĩa gũkirĩte. Angĩ monaga arĩ wega gwĩcũrania hwaĩ-inĩ matanakoma. (Kĩam. 24:63) O na tũrĩ na maũndũ maingĩ ma gwĩka, no twethe mahinda ma gwĩcũrania. Amwe mecũranagia rĩrĩa marĩ ngari-inĩ magĩthiĩ rũgendo. Angĩ mahũthagĩra gacunjĩ ka mahinda mao ma mĩaraho gwĩcũrania. Andũ aingĩ monaga arĩ wega gwĩcũrania mbere ya gũthiĩ ũtungata-inĩ o gwa kahinda kanini, gũkĩmateithia kũhunjia marĩ na kĩyo na ũcamba mũingĩ.
4. Twagĩrĩirũo gwĩcũrania nĩkĩ?
4 Gwĩcũrania na njĩra ya mahoya nĩ gũtũmaga twĩrirĩrie mũno gũtungatĩra Jehova, tuone ũthathaiya witũ ũrĩ wa bata ũtũũro-inĩ witũ, na gũgekĩra hinya itua riitũ rĩa gũthiĩ na mbere kũhunjia. Jesu, Ndungata Ĩrĩa Nene ya Ngai, nĩ aagunĩkire kuumana na gwĩcũrania, na o na ithũĩ no tũgunĩke.