Hũthĩra Wega Turakti Wee no Wende Kũmenya Ma?
1. Turakti, Kũmenya Ma ĩngĩtũteithia gwĩka atĩa?
1 Turakti, Wee no Wende Kũmenya Ma? ĩhaarĩirio nĩguo ĩtũteithie kwambĩrĩria wĩruti wa Bibilia na andũ. Ningĩ nĩ turakti ĩngĩkorũo na moimĩrĩro mega tũngĩmĩhũthĩra kũhura mbeũ cia ma. (Koh. 11:6) Haha nĩ harĩ na maũndũ mamwe mangĩtũteithia tũmĩhũthĩre wega.
2. Tũngĩhũthĩra turakti atĩa kwambĩrĩria mĩario?
2 Kwambĩrĩria Mĩario: No ũnengere mwene nyũmba turakti, ũmuonie ciũria ithathatũ iria irĩ karatathi-inĩ ka mbere, na ũmũũrie: “Nĩ kĩũria kĩrĩkũ wee waneyũria harĩ ici?” Thutha wa kũigua macokio make, muonie kuuma turakti-inĩ macokio ma Bibilia megiĩ kĩũria gĩake na ũthome rĩandĩko rĩmwe rĩa marĩa monanĩtio. Thoma kana warĩrĩrie na njĩra nguhĩ maũndũ marĩa marĩ karatathi-inĩ ka mũthia na ũmũhe ibuku Bibilia Ĩrutanaga. O na angĩaga gwĩtĩkĩra ibuku, nĩ ũkũmũhete turakti, ĩrĩa ĩngĩtũma ma ĩgĩe na mĩri thĩinĩ wa ngoro yake.—Mat. 13:23.
3. Angĩkorũo mwene nyũmba arĩ na wĩra mũingĩ-rĩ, tũngĩka atia?
3 Angĩkorũo Mwene Nyũmba Arĩ na Wĩra Mũingĩ: No uuge ũũ: “Tondũ ndagũkora ũrĩ na wĩra mũingĩ-rĩ, reke ngũtigĩre turakti ĩno. Ĩrĩ na ciũria ithathatũ cia mũthingi iria aingĩ aitũ twanooria na ĩkaheana macokio ma ĩmwe kwa ĩmwe harĩ o kĩũria kuuma Bibilia-inĩ. Rĩrĩa tũkonana rĩngĩ nĩngenda kũigua mawoni maku.”
4. Tũkĩhunjia barabara-inĩ tũngiuga atĩa rĩrĩa tũraheana turakti?
4 Rĩrĩa Ũrahunjia Barabara-inĩ: No uuge ũũ: “Ũhoro waku. Hihi ũrĩ weyũria kĩũria o na kĩmwe gĩa ici? [Eterera acokie.] Turakti ĩno ĩronania macokio mega, marĩa moimĩte thĩinĩ wa Bibilia.” Angĩkorũo mũndũ ũcio ndarĩ na ihenya, no mwarĩrĩrie macokio ma kĩũria kĩmwe kuuma turakti-inĩ o na no ũmũhe ibuku Bibilia Ĩrutanaga.
5. Rĩmwe na rĩmwe tũngĩhũthĩra turakti ĩno atĩa mĩciĩ ĩrĩa twakora ĩtarĩ na andũ?
5 Mĩciĩ Ĩrĩa Ĩtarĩ na Andũ: Kũndũ kũngĩ, ahunjia nĩ matigaga turakti handũ itangĩonwo nĩ andũ angĩ mĩciĩ ĩrĩa ĩtarĩ na andũ. Angĩkorũo kĩũngano kĩanyu nĩ mwĩkaga ũguo-rĩ, na githĩ mũtikĩagĩrĩirũo rĩmwe na rĩmwe gũtiga turakti Kũmenya Ma. Ũgĩcoka no uuge ũũ: “Hĩndĩ ĩrĩa twarĩ gũkũ, tũtiagũkorire, kwoguo nĩ twatigire turakti ta ĩno mũrango-inĩ waku. Harĩ ciũria ici-rĩ, nĩ kĩrĩkũ ũngĩenda gũcokerio?”
6. Nĩkĩ gĩtũmaga turakti Kũmenya Ma ĩkorũo ĩrĩ na moimĩrĩro mega wĩra-inĩ wa kũhunjia?
6 Turakti Kũmenya Ma ĩtaaragĩria ma na njĩra hũthũ, na ya ĩmwe kwa ĩmwe. Ĩgucagĩrĩria andũ a ndini na mĩhĩrĩga yothe. Nĩ hũthũ kũmĩheana; ciana na ahunjia erũ o nao no mahote kũmĩheana. Hihi we nĩ ũramĩhũthĩra mahinda mothe marĩa magĩrĩire?