“Rekei Ũtheri Wanyu Ũtheragĩre Andũ”
1. Twĩ na gĩtĩo gĩa gũtwarĩra andũ kĩĩ?
1 Kuuma kĩroko nginya o hwaĩ-inĩ, ũthaka wa ũtheri ũrĩa tuonaga nĩ ũgoocithagia Jehova Ngai. No rĩrĩ, Jesu eeraga arutwo ake magĩe na ũtheri wa mũthemba ũngĩ—“ũtheri wa muoyo.” (Joh. 8:12) Kũgĩa na ũtheri ũcio wa kĩĩroho nĩ gĩtĩo kĩa mwanya na kĩrehaga wĩra mũnene. Jesu oigire ũũ: “Rekei ũtheri wanyu ũtheragĩre andũ,” nĩguo ũtuĩke ũteithio kũrĩ andũ arĩa angĩ. (Mat. 5:16) Nĩ ũndũ wa nduma nene ya kĩĩroho ĩrĩa ĩrĩ kuo ũmũthĩ, no mũhaka ũtheri ũcio ũtwarĩrũo andũ. Ũndũ ũcio nĩ wa bata mũno ũmũthĩ gũkĩra hĩndĩ ĩngĩ o yothe! O ta Kristo-rĩ, tũngĩreka ũtheri witũ ũtheragĩre andũ na njĩra irĩkũ?
2. Jesu onanirie atĩa bata wa gũtwarĩra andũ ũtheri wa kĩĩroho?
2 na Njĩra ya Kũhunjia: Jesu aahũthĩrire mahinda make, hinya wake, na indo iria aarĩ nacio nĩguo amenyithie andũ ũtheri ũrĩa wa ma mĩciĩ-inĩ yao, mũingĩ-inĩ, irĩma-inĩ—kũrĩa guothe andũ mangĩoonekire. Nĩ aamenyaga bata mũnene wa kũhe andũ ũtheri wa ma ya kĩĩroho. (Joh. 12:46) Nĩguo ũtheri ũcio ũkinyĩre andũ aingĩ makĩria, Jesu aahaarĩirie arutwo ake matuĩke “ũtheri wa thĩ.” (Mat. 5:14) Maarekaga ũtheri wao ũtheragĩre andũ na njĩra ya kũmekĩra maũndũ mega na kũmahunjĩria ma cia kĩĩroho.
3. Tũngĩonania atĩa atĩ nĩ tũkenagĩra biũ ũtheri ũrĩa wa ma?
3 Andũ a Ngai moyaga na ũritũ watho wa “gũthiaga na mĩthiĩre ya ciana cia ũtheri,” na mahunjagia kũrĩa guothe andũ mangĩoneka. (Ef. 5:8) Gũthoma Bibilia kana mabuku mangĩ ma Gĩkristiano ũkĩonagwo nĩ andũ ihinda rĩa kũhurũka ũrĩ wĩra-inĩ kana cukuru, no kũrehe mweke wa kwambĩrĩria ndeereti ya Kĩĩmaandĩko. Na njĩra ta ĩyo, mwarĩ ũmwe wa Ithe witũ aambĩrĩirie kwĩruta Bibilia na mũrutwo ũmwe, na agĩtigĩra arutwo angĩ 12 a kĩrathi kĩao mabuku!
4. Nĩkĩ ‘kũreka ũtheri witũ ũtheragĩre andũ’ nĩ hamwe na gũkorũo tũrĩ kĩonereria kĩega kĩa mĩthiĩre?
4 Kũgerera Ciĩko Njega: Kũreka ũtheri witũ ũtheragĩre andũ ningĩ nĩ kuonanagio kũgerera mĩthiĩre iitũ ya o mũthenya. (Ef. 5:9) Tũrĩ wĩra-inĩ, cukuru, kana kũndũ kũngĩ kũrĩ na andũ, mĩthiĩre ya Gĩkristiano yonekanaga ĩrĩ ngũrani na kwoguo ĩgatũhe mĩeke ya kũhunjĩria andũ ma cia Bibilia. (1 Pet. 2:12) Kwa ngerekano-rĩ, mĩtugo mĩega ya kahĩĩ kamwe ka mĩaka ĩtano yatũmire mwarimũ ete aciari ako. Mwarimũ ũcio oigire ũũ: “Ndirĩ ndona mwana ũngĩ wendete gwĩka ũrĩa kwagĩrĩire ta ũyũ!” Nĩ ma, ũtungata witũ na mĩthiĩre mĩega, nĩigucagĩrĩria andũ harĩ “ũtheri wa muoyo” na ikagoocithia Ngai.