Twagĩrĩirũo Kuonania Ũkirĩrĩria Ũtungata-inĩ
1. Jehova onanĩtie ũkirĩrĩria harĩ andũ na njĩra ĩrĩkũ?
1 Ngai nĩ onanagia ũkirĩrĩria mũingĩ kwerekera andũ. (Tham. 34:6; Thab. 106:41-45; 2 Pet. 3:9) Njĩra ĩmwe nene onanagia ũkirĩrĩria wake wĩ wendo nĩ kũgerera wĩra wa thĩ yothe wa kũhunjia Ũthamaki. Jehova nĩ arutithanĩtie wĩra na andũ kwa ihinda rĩa mĩaka ta 2,000, na no arathiĩ na mbere kũgucĩrĩria andũ arĩa marenda kũgĩa na ũkuruhanu nake moke kũrĩ we. (Joh. 6:44) Ũtungata witũ ũngĩonania atĩa ũkirĩrĩria ta wa Jehova?
2. Tũngĩonania ũkirĩrĩria na njĩra ĩrĩkũ rĩrĩa tũrahunjia gĩcigo-inĩ giitũ?
2 Ũtungata wa Nyũmba kwa Nyumba: Twĩgerekanagia na ũkirĩrĩria wa Jehova na njĩra ya kũhunjia ‘tũtegũtiga’ icigo-inĩ iria andũ matonanagia kũgucĩrĩrio nĩ ũhoro ũrĩa tũhunjagia. (Atũm. 5:42) Tũkiragĩrĩria kũnyũrũrio, gũkarario, na andũ kwaga gũkenio nĩ ũhoro ũrĩa tũhunjagia. (Mar. 13:12, 13) Ningĩ tuonanagia ũkirĩrĩria na njĩra ya gũthiĩ na mbere kwĩrutanĩria gũitĩrĩria maĩ mbeũ cia ma, o na rĩrĩa twaga gũkora andũ megũtũthikĩrĩria mĩciĩ-inĩ.
3. Ũkirĩrĩria ũbataranagia nĩkĩ rĩrĩa tũracokera andũ na rĩrĩa tũrarutana Bibilia?
3 Arutwo a Bibilia: Gũkũria mũmera nĩ kũbataraga ũkirĩrĩria. No tũũtungate, ĩndĩ tũtingĩhota gũtengʼeria gũkũra kwaguo. (Jak. 5:7) Ũndũ ũmwe na ũguo, gũkũra kĩĩroho nĩ ũndũ ũthiaga na mbere kahora ikinya gwa ikinya. (Mar. 4:28) Arĩa twĩrutaga nao no mone arĩ ũritũ gũtigana na wĩtĩkio wa ndini cia maheeni kana mĩtugo ĩtarĩ ya kĩĩmandĩko. Tũtiagĩrĩirũo kũgeria kũhatĩrĩria arũtwo a Bibilia meke ũgarũrũku mũtũũrĩre-inĩ wao. Ũkirĩrĩria nĩ ũbataranagia nĩguo ihinda rĩiganu rĩhĩtũke rĩa roho wa Ngai kũruta wĩra thĩinĩ wa ngoro ya mũrutwo.—1 Kor. 3:6, 7.
4. Ũkirĩrĩria ũngĩtũteithia atĩa tũhunjĩrie andũ a Famĩlĩ ciitũ arĩa matarĩ Akristiano?
4 Andũ a Famĩlĩ Matarĩ Akristiano: O na gũtuĩka nĩ twĩriragĩria mũno andũ a Famĩlĩ ciitũ arĩa matarĩ Akristiano merute ma, tuonanagia ũkirĩrĩria na njĩra ya gweterera ihinda rĩrĩa rĩagĩrĩire nĩguo tũmeere maũndũ megiĩ wĩtĩkio witũ, tũkĩĩmenyerera tũtikamahe ũhoro ũkĩrĩte ũrĩa mangĩhota gũtaũkĩrũo. (Koh. 3:1, 7) Kwa ihinda rĩrĩ-rĩ, tũrekaga ciĩko ciitũ cionanie tũrĩ andũ a mũthemba ũrĩkũ, na tũgaikara twĩhaarĩirie kũmeera igũrũ rĩa wĩtĩkio witũ tũrĩ na ũhoreri na gĩtĩo kĩnene. (1 Pet. 3:1, 15) Nĩ ma, ũtungata ũronania ũkirĩrĩria nĩ ũrĩkoragwo na moimĩrĩro mega na nĩ ũrĩkenagia Ithe witũ ũrĩ igũrũ.