Ngumo Ĩrĩa ya Bata Makĩria ya Mũrutani Mwega
1. Ngumo ĩrĩa ya bata makĩria ya mũrutani mwega nĩ ĩrĩkũ?
1 Nĩ kĩĩ kĩhotithagia mũndũ gũtuĩka mũrutani mwega wa Bibilia? Hihi nĩ gĩthomo gĩa gũkũ thĩ? Nĩ ũmenyeru? Nĩ ũũgĩ wa mũciarĩre? Hatarĩ nganja, nĩ ngumo ĩrĩa ĩhingagia Watho, oyo ĩrĩa ĩkũũranaga arũtwo a Jesu, na noyo ngumo ĩrĩa nene na ya kũgucĩrĩria makĩria ya Jehova. (Joh. 13:35; Gal. 5:14; 1 Joh. 4:8) Ngumo ĩyo nĩ wendo. Arutani ega nĩ monanagia wendo.
2. Kwenda andũ arĩa angĩ nĩ kwa bata nĩkĩ?
2 Enda Andũ: Mũrutani ũrĩa Mũnene, Jesu, nĩ onirie andũ wendo, naguo ũndũ ũcio ũgĩtũma mamũthikĩrĩrie. (Luk. 5:12, 13; Joh. 13:1; 15:13) Angĩkorũo nĩ tũrũmbũyagia andũ, tũrĩhunjagia rĩrĩa rĩothe twagĩa na mweke. Mathĩna ta kũnyarirũo na kwaga gũthikĩrĩrio matirĩtũgiragia tũhunjie. Nĩ tũrĩonagia arĩa tũrahunjĩria wendo wa ma, na tũkaarĩrĩria maũndũ marĩa maratangĩkĩra na njĩra ĩkũmahutia. Tũtirĩhũthagĩra mahinda na mũrutwo wa Bibilia o rĩrĩa tũreruta tu, ĩndĩ nĩ tũrĩhũthagĩra mahinda kwĩhaarĩria mbere nĩ ũndũ wa o ithoma.
3. Kwenda ma cia Bibilia kũngĩtũteithia atĩa ũtungata-inĩ?
3 Enda ma cia Bibilia: Ningĩ Jesu nĩ eendete ma cia Bibilia na aacionaga irĩ cia goro. (Mat. 13:52) Tũngĩenda ma, tũrĩhunjagia tũcanjamũkĩte, na ũndũ ũcio no ũtũme andũ makenere gũtũthikĩrĩria. Wendo ũcio ũrĩtũteithagia kũiga meciria harĩ bata wa ũhoro ũrĩa tũrutanaga handũ ha gũtindanĩra na ũtingiaru witũ ithuĩ ene, naguo ũndũ ũcio nĩ ũrĩtũmaga twage guoya tũkĩhunjia.
4. Tũngĩkũria wendo na njĩra ĩrĩkũ?
4 Kũria Wendo: Tũngĩkũria wendo harĩ andũ na njĩra ĩrĩkũ? Tũngĩĩcũũrania igũrũ rĩgiĩ wendo ũrĩa Jehova na Mũrũ wake monanĩtie o hamwe na thĩna mũnene wa kĩĩroho ũrĩa andũ thĩinĩ wa itũũra rĩrĩa tũhunjagia makoragwo naguo. (Mar. 6:34; 1 Joh. 4:10, 11) Wendo witũ harĩ ma cia Bibilia no wongerereke makĩria angĩkorũo nĩ tũrĩkoragwo na wĩruti wa mũndũ kĩũmbe na tũgecũũranagia. Wendo nĩ gĩcunjĩ kĩmwe kĩa maciaro ma roho. (Gal. 5:22) Kwoguo no tũhoe Jehova atũhe roho mũtheru na atũteithie tũkũrie wendo. (Luk. 11:13; 1 Joh. 5:14) Gũtekũmakania gĩthomo kĩrĩa tũrĩ nakĩo, ũmenyeru witũ, kana ũũgĩ wa mũciarĩre, no tũtuĩke arutani ega tũngĩonanagia wendo.