‘Ũndũ Waku wa Kwĩrahĩra’ nĩ Ũrĩkũ?
1.Tũkoragwo na ũndũ ũrĩkũ wa kwĩrahĩra o mũico wa mweri?
1 Rĩrĩa mũico wa mweri wakinya na andũ othe morio marute riboti ciao cia ũtungata-rĩ, ‘ũndũ waku wa kwĩrahĩra’ ũkoragwo ũrĩ ũrĩkũ? (Gal. 6:4) Tũkorũo tũrĩ mapainia a mwanya arĩa mahunjagia mathaa 130 kana ahunjia metĩkĩrĩtio kũhunjia ndagĩka 15 na makĩria, ithuothe nĩ twagĩrĩirũo gũkenera ũtungata witũ wa ngoro yothe kũrĩ Jehova.—Thab. 100:2.
2.Twagĩrĩirũo kwĩrutanĩria biũ ũtungata-inĩ wa Jehova nĩkĩ?
2 Arĩ we Mwathani Mwene Hinya Wothe igũrũ na thĩ, Jehova nĩ agĩrĩire kũheo kĩndũ kĩrĩa kĩega biũ tũngĩheana. (Mal. 1:6) Nĩ ũndũ wa wendo witũ harĩ we, nĩ tũmwĩyamũrĩire nĩguo twĩkage wendi wake. Kwoguo, angĩkorũo mũthenya wathira kana mũico wa mweri nĩ tũkoragwo na ma atĩ nĩ tũheanĩte ‘mĩgerio ya uumithio kana kĩrĩa kĩega biũ’ kĩa mahinda, ũhoti, na hinya witũ harĩ ũtungata wa Jehova, nĩ tũkoragwo na ũndũ wa kwĩrahĩra. (Thim. 3:9) No angĩkorũo thamiri citũ nĩ itũcukaga, nĩ twagĩrĩirũo gwĩciria ũrĩa tũngĩka nĩguo tũgarũrĩre.—Rom. 2:15.
3.Nĩkĩ ti ũndũ wa ũũgĩ kwĩringithania na arĩa angĩ?
3 ‘Roragia Wĩra Waku no Ti wa Mũndũ Ũngĩ’: Ti ũndũ wa ũũgĩ kwĩringithania na andũ angĩ kana na ũrĩa twahaanaga rĩrĩa twarĩ na hinya mũingĩ. Maũndũ nĩ macenjagia. Andũ marĩ ũhoti ngũrani. Kwĩringithania kaingĩ kũrehaga macindano kana mũndũ kwĩigua atarĩ kĩene. (Gal. 5:26; 6:4) Jesu ndaaringithanagia andũ. Ithenya rĩa ũguo, aagathagĩrĩria mũndũ kũringana na kĩrĩa angĩahotire kũhingia.—Mar. 14:6-9.
4.Nĩ maũndũ marĩkũ ma bata tũngĩĩruta na ngerekano ya Jesu ya taranda?
4 Ngerekano-inĩ ya Jesu ya taranda, o ngombo yaaheirũo taranda “kũringana na ũhoti wayo.” (Mat. 25:15) Rĩrĩa mwathi wao aacokire na akĩũria o mũndũ aheane ũhoro wa wĩra wake, arĩa maarutĩte wĩra na kĩyo kũringana na ũhoti na maũndũ mao, nĩ maagathĩrĩirio na makĩingĩra gĩkeno-inĩ kĩa mwathi wao. (Mat. 25:21, 23) O na ithuĩ twatũũria kĩyo wĩra-inĩ wa kũhunjia Ũthamaki, nĩ tũrĩkoragwo na ma atĩ nĩ tũretĩkĩrĩka harĩ Ngai na tũkagĩa ũndũ wa kwĩrahĩra!