Wĩgerekanie na Anabii—Jona
1. Jona aarĩ na ngumo irĩkũ njega?
1 Wĩciragia atĩa rĩrĩa wecũrania ũhoro wa mũnabii Jona? Andũ amwe monaga ta aarĩ kĩguoya kana mũndũ waarĩ na ngoro nyũmũ. O na kũrĩ ũguo, nĩ onanirie wega atĩ aarĩ na wĩnyihia, ũcamba, na aarĩ na roho wa kwĩima. ‘Tũngĩĩgerekania’ atĩa na ngumo njega cia Jona?—Jak. 5:10, NW.
2. Tũngĩĩgerekania atĩa na wĩnyihia wa Jona?
2 Wĩnyihia: Jona atũmwo, ambire kũũrĩra mwena ngũrani biũ na kũrĩa aatũmĩtwo. Ũcio ti ũndũ wa magegania tondũ Aashuri maarĩ na ngumo njũru ya ũhinya, na Nineve rĩetagwo “itũũra rĩrĩa rĩitithagia thakame.” (Nahu. 3:1-3) O na kũrĩ ũguo, Jehova nĩ aarũithirie Jona, ũrĩa wonanirie wĩnyihia na njĩra ya gwĩtĩkĩra wĩra ũrĩa aahetwo rĩrĩa aaheirũo kaanya ga kerĩ. (Thim. 24:32; Jona 3:1-3) O na gũtuĩka nĩ ambĩte kũũra, nĩ aahingirie wendi wa Jehova. (Mat. 21:28-31) Hihi ithuĩ nĩ tũtuĩte itua rĩa kũhunjia ũhoro ũrĩa mwega, o na akorũo nĩ tũrũithĩtio kana tũgacemania na moritũ gĩcigo-inĩ kĩrĩa tũhunjagia?
3. Nĩ mahinda marĩkũ tũbataraga ũcamba na kwĩima ũtungata-inĩ?
3 Ũcamba na Kwĩima: Rĩrĩa Jona aamenyire atĩ itua rĩake rĩũru nĩ rĩaingĩrĩtie mĩoyo ya arĩa maarĩ nao meri-inĩ ũgwati-inĩ, nĩ eehaarĩirie gũkua nĩ ũndũ wao. (Jona 1:3, 4, 12) Thuutha-inĩ, rĩrĩa ahingagia wĩra ũrĩa aahetwo kũu Nineve, aingĩrire itũũra-inĩ thĩinĩ, hihi agĩetha handũ harĩa haagĩrĩire nĩguo amemerekie ituĩro rĩa Jehova. Icio ciarĩ ciĩko cia mũnabii wa Ngai waarĩ na ũcamba no ti cia kĩguoya! (Jona 3:3, 4) Ĩ ithuĩ na ithuĩ ũmũthĩ? Nĩ tũrabatara ũmĩrĩru kuuma kũrĩ Ngai nĩguo tũhunjie tũrĩ na ũcamba rĩrĩa twakarario. (Atũm. 4:29, 31) Nĩ tũrabatara kwĩima nĩguo tũhũthĩre mahinda na indo ciitũ ũtungata-inĩ.—Atũm. 20:24.
4. Nĩ ũndũ kĩ nĩ twagĩrĩirũo kuoya ihinda gwĩcũrania igũrũ rĩgiĩ cionereria njega twaigĩirũo nĩ anabii a Jehova?
4 Rĩrĩa wathoma ũhoro wĩgiĩ mũnabii mũna wa Jehova, no ũgunĩke angĩkorũo nĩ ũkwĩyona ta arĩ we wahĩtũkagĩra maũndũ-inĩ macio aarĩ namo. Wĩyũrie ũũ: ‘Ingĩekire atĩa? Ingĩĩgerekania atĩa na ngumo ciake njega ũtũũro-inĩ wakwa?’ (Ahib. 6:11, 12) Icunjĩ-inĩ iria igũka thuutha-inĩ thĩinĩ wa Ũtungata Witũ wa Ũthamaki nĩ ikaarĩrĩria maũndũ mangĩ ma bata tũngĩĩruta kuumana na anabii angĩ maarĩ ehokeku harĩ Jehova.