Mĩeke Makĩria ya Gũcokeria Jehova Ngatho

1. Nĩ mũbango ũrĩkũ mwerũ ũrĩtũteithagia ‘gũcokeria Jehova ngatho mũno’?

¹ Kwambĩrĩria Machi ya mwaka ũyũ, nĩ kũragĩire na mũbango mwerũ wa gũteithia ahunjia gũtungata marĩ mapainia a gũteithĩrĩria makĩhũthĩra mathaa 30 mĩeri-inĩ ya Machi na Ĩpuro, na mweri wa hĩndĩ ya iceera rĩa mũrori wa mũthiũrũrũko. Angĩkorũo iceera rĩa mũrori wa mũthiũrũrũko nĩ rĩrataganĩria mĩeri ĩĩrĩ, arĩa mangĩenda kũhunjia mathaa 30 no macagũre mweri ũmwe harĩ ĩyo ĩĩrĩ. Mapainia othe a gũteithĩrĩria no makenere mũcemanio wothe ũrĩa mũrori wa mũthiũrũrũko ekaga hamwe na mapainia a hĩndĩ ciothe na a mwanya. Kwoguo, angĩkorũo tũtingĩhota kũhingia mathaa 50, no tũhote ‘gũcokeria Jehova ngatho mũno’ maita mana harĩ mwaka tũkĩhunjia mathaa 30 tũrĩ mapainia a gũteithĩrĩria.—Thab. 109:30; 119:171.

2. Nĩ maũndũ marĩkũ arĩa marĩtungataga marĩ mapainia a gũteithĩrĩria marĩkenagĩra hĩndĩ ya iceera rĩa mũrori wa mũthiũrũrũko?

² Hĩndĩ ya Iceera rĩa Mũrori wa Mũthiũrũrũko: Ahunjia aingĩ rĩu nĩ megũkenera gũtungata marĩ mapainia a gũteithĩrĩria hĩndĩ ya iceera rĩa mũrori wa mũthiũrũrũko o na ningĩ makenere kũũmanĩrĩria rĩrĩa marahunjia nake. (Rom. 1:11, 12) Mapainia aingĩ a gũteithĩrĩria hihi nĩ makoya rũtha mũthenya ũmwe gatagatĩ-inĩ ga kiumia nĩgetha mahunjie nake. Arĩa matangĩoneka gatagatĩ-inĩ ka wiki no morie mũrori wa mũthiũrũrũko kana no mabange mahunjie nake Njuuma kana Kiumia. Makĩria ma ũguo-rĩ, githĩ mapainia a gũteithĩrĩria matigekĩrũo ngoro mũno mũcemanio-inĩ ũcio wa mũrori wa mũthiũrũrũko hamwe na mapainia a hĩndĩ ciothe na a mwanya?

3. Nĩkĩ hĩndĩ ya Kĩririkano nĩ ihinda rĩega rĩa gũtuĩka painia wa gũteithĩrĩria?

³ Mweri-inĩ wa Machi na Ĩpuro: Arĩa maatungatire marĩ mapainia a gũteithĩrĩria mweri ũmwe hĩndĩ ya Kĩririkano kũringana na mũbango wa hau kabere wa kũhunjia mathaa 30, rĩu no mongerere ‘igongona rĩao rĩa kũgooca.’ (Ahib. 13:15) Machi na Ĩpuro nĩ mĩeri mĩega mũno ya kwandandũra ũtungata witũ tũrĩ mapainia a gũteithĩrĩria. O mwaka mĩeri-inĩ ĩyo, nĩ tũnyitanagĩra tũkenete kambĩini-inĩ ya gwĩta andũ moke Kĩririkano. Ningĩ tondũ ahunjia aingĩ nĩ mandandũraga ũtungata wao hĩndĩ ya Kĩririkano, no tuone mweke wa kũrutithania wĩra na ahunjia mwanya mwanya. Thutha wa Kĩririkano, nĩ tũkaagĩa na mweke wa gũcokera arĩa mookĩte Kĩririkano na tũmekĩre ngoro moke mathikĩrĩrie mĩario ya mwanya. Hihi ngoro yaku nĩ ĩgagũtindĩka kũhũthĩra mĩeke ĩyo ũtungate ũrĩ painia wa gũteithĩrĩria?—Luk. 6:45.