Wĩgerekanie na Anabii—Amosi
1. Nĩkĩ kĩonereria kĩa Amosi nĩ gĩtwĩkĩraga ngoro?
1 Hihi nĩ ũrĩ waigua ta ũtaagĩrĩire kũhunjia nĩ ũndũ wa mũrerere waku kana gũkorũo ũtarĩ na gĩthomo gĩa kũigana? Angĩkorũo nĩguo, no wĩkĩrũo ngoro nĩ kĩonereria kĩa Amosi. Aarĩ mũrĩithi wa ngʼondu na mũruti wĩra wa cibarũa, ĩndĩ Jehova nĩ aamũhotithirie kũheana ndũmĩrĩri ya bata. (Amos 1:1; 7:14, 15) O na ũmũthĩ, Jehova nĩ ahũthagĩra andũ arĩa monagwo marĩ a kĩrathi gĩa thĩ. (1 Kor. 1:27-29) Nĩ maũndũ marĩkũ mangĩ tũngĩĩruta kuumana na mũnabii Amosi tũngĩhũthĩra ũtungata-inĩ witũ?
2. Nĩkĩ no tũikare twĩhandĩte o na twakarario ũtungata-inĩ?
2 Ikaraga Wĩhandĩte o na Wakarario: Rĩrĩa Amazia, ũrĩa warĩ mũthĩnjĩri ngai cia maheeni ũthamaki-inĩ wa mĩhĩrĩga ikũmi ya Isiraeli, aiguire ũrathi wa Amosi, aamwĩrire ũndũ ta ũyũ: ‘Inũka! Tũtige! Tũrĩ na ndini itũ!’ (Amos 7:12, 13) Amazia nĩ aagarũranirie ciugo cia Amosi rĩrĩa oragia Mũthamaki Jeroboamu amũkaanie kũratha. (Amos 7:7-11) No Amosi ndaigana gũcoka na thutha. Ũmũthĩ, atongoria amwe a ndini nĩ macaragia ũteithio wa ateti nĩguo mahote kũnyarira andũ a Jehova. O na kũrĩ ũguo, Jehova nĩ atũũmagĩrĩria atĩ gũtirĩ matharaita mathondeketwo ma gũtũkĩrĩra, mangĩgaacĩra.—Isa. 54:17.
3. Ndũmĩrĩri ĩrĩa tũhunjagia ĩkoragwo na maũndũ marĩkũ merĩ?
3 Hunjagia Ituĩro rĩa Ngai na Irathimo Iria Akaarehe: O na gũtuĩka Amosi nĩ aarathire gũtuĩrũo kwa ũthamaki wa mĩhĩrĩga -ikũmi ya Isiraeli, aarĩkĩrĩirie na kũratha ũhoro wa kĩĩranĩro kĩa Jehova gĩa kũmacokia bũrũri-inĩ wao, na kũmarathima mũno. (Amos 9:13-15) O na ithuĩ nĩ tũhunjagia ũhoro wa gũka kwa “mũthenya ũrĩa wa cira,” na ndũmĩrĩri ĩyo no gĩcunjĩ kĩmwe kĩa ‘ũhoro mwega wa ũthamaki’ ũrĩa arĩ o mũhaka tũũhunjie. (2 Pet. 3:7; Mat. 24:14) Rĩrĩa Jehova akaniina andũ arĩa aganu hĩndĩ ya Hari-Magedoni, ũndũ ũcio nĩ ũkaaharĩria thĩ ĩtuĩke paradiso.—Thab. 37:34.
4. Tũrĩ na ũũma ũrĩkũ atĩ no tũhote kũhingia wendi wa Jehova?
4 Kũhunjĩria andũ maratũkararia ndũmĩrĩri ya Ũthamaki, nĩ kũgeragia kĩyo giitũ gĩa gũtũũra kũringana na wĩyamũrĩri witũ harĩ Jehova na gwĩka wendi wake. (Joh. 15:19) O na kũrĩ ũguo, tũrĩ na ma atĩ Jehova nĩ egũthiĩ na mbere gũtũhe kĩrĩa gĩothe tũrabatara nĩguo tũhingie wendi wake, o ta ũrĩa aateithirie Amosi.—2 Kor. 3:5.