Gũteithia Arĩa Mataragucĩrĩrio nĩ Bibilia Ĩrutanaga
1. Hihi nĩ mũndũ wothe ũrĩtĩkagĩra ibuku Bibilia Ĩrutanaga twamũhunjĩria riita rĩa mbere? Taarĩria.
1 Nĩguo mũndũ atuĩke Mũira wa Jehova, no mũhaka erute Bibilia. O na kũrĩ ũguo, andũ amwe nĩ a ndini itarĩ cia Gĩkristiano na matiĩtĩkĩtie atĩ Bibilia nĩ Kiugo kĩa Ngai. Angĩ nao matiĩtĩkĩtie Ngai o na hanini na matitĩĩte Bibilia. Hihi nĩ indo irĩkũ cihaarĩirio na ikoneka atĩ no iteithie arĩa maregaga ibuku Bibilia Ĩrutanaga? Maũndũ maya marũmĩrĩire maheanĩtwo nĩ ahunjia kuuma mabũrũri 20 ngũrani.
2. Mũndũ angĩtwĩra atĩ ndetĩkĩtie Ngai, nĩ atĩa tũngĩgeria gwĩka, na nĩkĩ?
2 Arĩa Matetĩkĩtie Ngai: Mũndũ angĩkwĩra atĩ ndetĩkĩtie Ngai, harĩ bata kũmũũria gĩtũmi. Hihi nĩ tondũ etĩkĩtie atĩ indo nĩ kwĩyumĩria cieyumĩririe? Hihi atigĩte gwĩtĩkia Ngai nĩ tondũ wa ũhinga wa ndini kana wagi wa kĩhooto thĩinĩ wa thĩ? Hihi oimĩte kũndũ andũ magiragio gwĩtĩkia Ngai? No kũhoteke mũndũ ũcio ndaregaga atĩ Ngai arĩ kuo, no ndonaga bata wa kũmwĩtĩkia. Ahunjia aingĩ nĩ monete atĩ kũũria mũndũ, “Hihi ũguo nĩguo wĩtĩkĩtie kuuma tene?” nĩ gũtũmaga eyarie. Mũthikĩrĩrie na kinyi ũtekũmũtinia. Rĩrĩa twataũkĩrũo nĩ kĩrĩa gĩtũmaga mũndũ aage gwĩtĩkia Ngai, nĩ tũrĩmenyaga ũrĩa tũkũmwĩra na ibuku rĩrĩa tũkũmũtigĩra.—Thim. 18:13.
3. Tũngĩonania atĩa atĩ nĩ tũratĩĩa mũndũ o hamwe na wĩtĩkio wake?
3 Rĩrĩa tũratereta na mũndũ, nĩ wega gwĩthema kwaria maũndũ mangĩtũma one ta tũraingĩrĩra mawoni make. Ũhoro ũyũ ũheanĩtwo kuuma Amerika: “Tondũ o mũndũ nĩ akoragwo na wĩyathi wa gwĩthuurĩra kĩrĩa egwĩtĩkia, nĩ ũndũ wa bata mũno gũtĩĩa itua rĩao. Nĩ wega kũũria andũ ciũria cia kũmateithia mecirie na mahote gũtua matua handũ ha gũkararania nao.” Thutha wa gũthikĩrĩria mwene nyũmba akĩĩyaria, mũrori ũmwe ũgendaga oragia kĩũria gĩkĩ, “Hihi ũrĩ weciria kana ũndũ ũyũ no ũhoteke?”
4. Tũngĩteithia atĩa andũ a ndini ya Buddha?
4 Andũ aingĩ a ndini ya Buddha matiĩtĩkĩtie atĩ nĩ kũrĩ Ngai. Ahunjia amwe thĩinĩ wa Ngeretha mendete kũhũthĩra broshua Lasting Peace and Happiness—How to Find Them rĩrĩa marahunjĩria andũ ta acio. Thutha wa gwĩciria ciugo cia kwambĩrĩria, maragĩrĩria gĩcunjĩ “Is There Really a Most High Creator?” magacoka makarĩrĩria gĩcunjĩ “A Guidebook for the Blessing of All Mankind.” Marigĩrĩrio-inĩ nĩ mahotaga kũnengera mwene nyũmba ibuku Bibilia Ĩrutanaga magacoka makamwĩra ũũ: “O na gũtuĩka ndwĩtĩkĩtie Ngai, kwĩruta Bibilia nĩ kũrĩ ũguni tondũ nĩ ĩkoragwo na motaaro maingĩ mangĩgũteithia.” Painia ũmwe ũtungataga itũũra rĩkoragwo na andũ a China thĩinĩ wa Amerika oigire: “Andũ aingĩ itũũra-inĩ riitũ nĩ mendete gũthoma na kaingĩ tũgĩcoka tũkoraga marĩkĩtie gũthoma ibuku rĩrĩa twamatigĩire. O na kũrĩ ũguo, no makorũo matekũmenya bata wa kwĩruta Bibilia. Nĩ ũndũ ũcio, ndĩmatigagĩra broshua Ũhoro Mwega rĩrĩa ndamahunjĩria riita rĩa mbere tondũ yandĩkĩtwo na njĩra ya kwarahũra ndeereti.” Mũrori ũmwe wa mũthiũrũrũko ũceeragĩra ciũngano iria ciaragia Gĩcaina bũrũri-inĩ wa Amerika, oigire atĩ no kũhoteke tũhũthĩre ibuku Bibilia Ĩrutanaga riita rĩa mbere. O na kũrĩ ũguo, handũ ha kwarĩrĩria gĩcunjĩ kĩa mbere kĩrĩa gĩtaaragĩria Ngai nũũ, nĩ wega kwambĩrĩria na gĩa kerĩ kĩrĩa kĩaragĩrĩria Bibilia.
5. Ngumo ya wetereri nĩ ya bata nĩkĩ?
5 Tondũ mũndũ nĩ oyaga ihinda iraihu nĩguo akũrie wĩtĩkio harĩ Ngai, nĩ habataranagia ngumo ya wetereri. Ndeereti iitũ ya mbere na mũndũ to mũhaka ĩtũme etĩkie atĩ Ngai arĩ kuo. No kũhoteke thutha wa ihinda nĩ arĩtĩkia, kana oige atĩ nĩ akinyĩte kũmenya kĩrĩa kĩngĩtũma mũndũ etĩkie Ngai.
6. Nĩ kĩĩ gĩtũmaga andũ amwe mage gwĩtĩkia Bibilia?
6 Arĩa Mekagĩrĩra Bibilia Nganja: Maita maingĩ, mũndũ wĩkagĩra nganja atĩ Ngai arĩ kuo ndakenagio nĩ ũrĩa Bibilia ĩrutanaga tondũ ndetĩkĩtie atĩ yo nĩ Kiugo kĩa Ngai. No gũkorũo aikaraga bũrũri ũtarĩ wa Gĩkristiano na onaga Bibilia ĩrĩ ya Gĩkristiano. Kana rĩngĩ aikaraga bũrũri wa Gĩkristiano kũrĩa andũ matatindanagĩra na ndini na rĩngĩ ndeciragia atĩ Bibilia no ĩmũteithie. Tũngĩteithia atĩa andũ ta acio makenio nĩ Bibilia na metĩkĩre kwĩruta ibuku Bibilia Ĩrutanaga?
7. Njĩra ĩrĩa njega ya kũrurumũra andũ mende Bibilia nĩ ĩrĩkũ?
7 Wabici ya rũhonge ya Greece yaandĩkire: “Njĩra ĩrĩa njega makĩria ya gũteithia arĩa meekagĩrĩra Bibilia nganja nĩ kũmĩhumbũria na kũmonia kĩrĩa kĩrĩ thĩinĩ wayo. Ahunjia aingĩ nĩ meyoneire atĩ gũthomera mũndũ Bibilia nĩ kũhutagia ngoro gũkĩra ũndũ o wothe ũrĩa mangĩgweta na kanua. (Ahib. 4:12) Kuonia andũ rĩĩtwa rĩa Ngai thĩinĩ wa Bibilia nĩ gũteithĩtie aingĩ mende kũmĩthuuthuria.” Wabici ya rũhonge ya India yaandĩkire: “Kũmenya ma ĩgiĩ muoyo na gĩkuũ nĩ kũgucagĩrĩria Ahĩndĩ aingĩ. Ningĩ nĩ makenagio nĩ kĩĩranĩro kĩa Bibilia gĩa thĩ ĩtarĩ na mũthutũkanio.” Kwarĩrĩria maũndũ marĩa marathĩnia andũ, kaingĩ nĩ kũheaga ahunjia mweke wa kuonia andũ thĩinĩ wa Bibilia ũrĩa Ũthamaki wa Ngai ũgeka.
8. Tũngĩra atĩa andũ arĩa matatĩĩte Bibilia nĩ ũndũ wa ndini iria ciĩĩtaga cia Gĩkristiano?
8 Angĩkorũo mũndũ agaga kũhe Bibilia gĩtĩo nĩ ũndũ wa ndini iria ciĩĩtaga cia Gĩkristiano, mũteithie amenye atĩ ndini icio ihũthagĩra Bibilia na morutani mayo ũũru. Wabici ya rũhonge ya India yaandĩkire: “Rĩmwe na rĩmwe nĩ tũbataraga gũteithia andũ mamenye atĩ makanitha timo mehokeirũo Bibilia.” Ningĩ wabici ĩyo yaandĩkire atĩ kaingĩ Ahĩndĩ nĩ makenagio nĩ ithomo rĩa 4 rĩa broshua Ni Nini Lililo Kusudi la Uhai?—Wewe Waweza Kulipataje?, rĩrĩa rĩtaaragĩria ũrĩa ndini cigeretie gũthũkia Kiugo kĩa Ngai. Painia ũmwe thĩinĩ wa Brazil eraga andũ ũũ: “Kaĩ ũtangĩthuthuria Bibilia wee mwene wone kĩrĩa kĩrĩ thĩinĩ wayo? Andũ aingĩ nĩguo mekaga matekũnyitĩrĩra mawoni o mothe ma ndini. Weka ũguo nĩ ũkũgunĩka mũno.”
9. Nĩkĩ tũtiagĩrĩire gũkua ngoro angĩkorũo kĩambĩrĩria-inĩ mũndũ ndarakenio nĩ morutani ma Bibilia?
9 Jehova athuthuragia mũndũ ngoro. (1 Sam. 16:7; Thim. 21:2) Agucagĩrĩria arĩa marĩ na mwerekera mwega matuĩke aira ake. (Joh. 6:44) Andũ aingĩ ta acio matiakoretwo marutĩtwo ũhoro wa Ngai kana magakorũo na ũmenyo mũingĩ wĩgiĩ Bibilia. Wĩra witũ wa kũhunjia ũmaheaga mweke wa ‘kũhonokio na matuĩke a kũmenya ũhoro-wa-ma.’ (1 Tim. 2:4) Kwoguo ndũgakue ngoro angĩkorũo amwe matiretĩkĩra morutani ma Bibilia kĩambĩrĩria-inĩ. Hũthĩra ibuku rĩngĩ rĩa rũthiomi rwanyu nĩguo ũrurumũre ngoro ciao. Thutha-inĩ, hihi no kũhoteke nĩ ũkwambĩrĩria gũthoma nake ibuku ritũ rĩa kũruta andũ Bibilia, Bibilia Ĩrutanaga Atĩa Kũna?
[Mbica karatathi ka 4]
Mwene nyũmba angiuga ndetĩkĩtie atĩ nĩ kũrĩ Ngai, geria ũũ:
• Nĩguo ũmenye gĩtũmi mũũrie, “Hihi ũkoretwo na mawoni macio hingo ciothe?”
• Angĩkorũo nĩ wa ndini ya Buddha hũthĩra broshua Lasting Peace and Happiness—How to Find Them karatathi ga 9-12.
• Angĩkorũo etĩkĩtie atĩ indo nĩ kwĩyumĩria cieyumĩririe, no ũhũthĩre:
Icunjĩ cia Amkeni! iria irĩ kĩongo “Je, ni Kazi ya Ubuni?”
Video Maajabu ya Uumbaji Yanafunua Utukufu wa Mungu
Broshua Jinsi ya Kupata Maisha Yenye Kuridhisha, gĩcunjĩ gĩa 4; Uhai—Ulitokana na Muumba?; na Chanzo Cha Uhai—Maswali Matano Muhimu Kuhusu
• Angĩkorũo atigĩte gwĩtĩkia Ngai nĩ ũndũ wa mĩtangĩko na wagi wa kĩhooto, no ũmuonie:
Gĩcunjĩ gĩa 10 kĩa ibuku Je, Kuna Muumba Anayekujali?
Gĩcunjĩ gĩa 6 kĩa broshua Je! Kweli Mungu Anatujali? na gĩcunjĩ gĩa 6 kĩa Ni Nini Lililo Kusudi la Uhai?
• O narua thutha wa mũndũ ũcio kuona atĩ Ngai no akorũo kuo, mũnengere ibuku Bibilia Ĩrutanaga. Nĩ wega kwambĩrĩria gũthoma nake gĩcunjĩ gĩa 2 kana kĩngĩ kĩrĩa kĩmwagĩrĩire.
[Mbica karatathi ka 5]
Angĩkorũo mwene nyũmba ndetĩkĩtie Bibilia geria:
• Kwarĩrĩria nake gĩcunjĩ gĩa 17 na 18 kĩa ibuku Life—How Did It Get Here? By Evolution or by Creation?
• Kũhũthĩra broshua Why Should We Worship God in Love and Truth? angĩkorũo nĩ Mũhĩndĩ.
• Kũhũthĩra broshua Je! Ulimwengu Usio na Vita Utakuwako Wakati Wowote? karatathi ga 3 -11, angĩkorũo mũndũ ũcio nĩ Mũyahudi.
• Arĩrĩriai ũguni wa kũrũmĩrĩra motaaro ma Bibilia. No ũhũthĩre indo ici kuonia mũndũ ũrĩa Bibilia ĩtũgunaga:
Mũrũmanĩrĩrio wa icunjĩ cia Amkeni! “Msaada Kwa Ajili Ya Familia”
Video The Bible—Its Power in Your Life
Broshua Ũhoro Mwega Kuuma Kũrĩ Ngai!, ithomo rĩa 9 na 11; Kitabu kwa Ajili ya Watu Wote, karatathi ka 22 -26; na Jinsi ya Kupata Maisha Yenye Kuridhisha, ithomo rĩa 2.
Hũthĩra broshua The Pathway to Peace and Happiness, karatathi ga 3-7 ũkĩhunjĩria mũndũ wa ndini ya Buddha.
Hũthĩra broshua Imani ya Kweli—Siri ya Kuwa na Maisha Yenye Furaha, ithomo rĩa 3 ũkĩhunjĩria Mũithĩramu.
Angĩkorũo ũrahunjia kũndũ andũ manyararĩte Bibilia, ti wega kũmathomera ĩmwe kwa ĩmwe nginya rĩrĩa ũrĩmacokera maita maigana ũna.
• No ũhũthĩre indo ici gũtaarĩria ũrĩa morathi ma Bibilia mahingĩte:
Video The Bible—Accurate History, Reliable Prophecy
Broshua Kitabu kwa Ajili ya Watu Wote, karatathi ka 27-29
• Mũndũ angĩũria kĩũria kĩgiĩ ũrutani mũna wa Bibilia, ambĩrĩria gũthoma nake Bibilia Ĩrutanaga ũtekũrĩa marĩĩgu.
[Mbica karatathi ka 6]
Mwene nyũmba angiuga: “Ndiĩtĩkĩtie Ngai,” no ũmwĩre ũũ:
• “Hihi no ngũtaarĩrie na njĩra nguhĩ kĩrĩa gĩtũmaga niĩ njĩtĩkie atĩ nĩ kũrĩ Ngai?” Arĩrĩria nake maũndũ mamwe thĩinĩ wa Kutoa Sababu karatathi ka 223-224, kana ũbange gũkamũrehera ibuku rĩrĩa wakeneire gũthoma.
• “No angĩkorũo Ngai arĩ kuo-rĩ, ũngĩenda akorũo arĩ wa mũthemba ũrĩkũ?” Andũ aingĩ moigaga mangĩenda Ngai ũrĩ wendo, kĩhooto, tha, na ũtarĩ mũthutũkanio. Ũcoke ũmuonie thĩinĩ wa Bibilia atĩ Ngai nĩ arĩ ngumo icio. (O na no kũhoteke ũhũthĩre Bibilia Ĩrutanaga, gĩcunjĩ kĩa 1 kwambĩrĩria kĩbungo gĩa 6.)
Mwene nyũmba angiuga: “Niĩ ndiĩtĩkĩtie Bibilia,” no ũmwĩre ũũ:
• “Nĩ kũrĩ andũ aingĩ makoragwo na mawoni ta maku. Amwe meciragia atĩ Bibilia nĩ ĩhĩtagia maũndũ-inĩ ma sayansi kana atĩ motaaro mayo matingĩtũteithia. Ta njĩra atĩrĩrĩ, hihi ũrĩ wagĩa na mweke wa gũthoma Bibilia? [Eterera acokie. Ũcoke ũmuonie ũhoro wa kwambĩrĩria wa broshua Kitabu kwa Ajili ya Watu Wote karatathi-inĩ ga 3.] Andũ aingĩ matigĩte gwĩtĩkia Bibilia tondũ ndini nĩ igonyorete morutani mayo. Nĩ tũkarĩrĩria kĩonereria karatathi-inĩ ga 4 na ga 5 hĩndĩ ĩyo ĩngĩ.”
• “Andũ aingĩ makoragwo na mawoni ta maku. Ta reke nguonie ũndũ ũrĩa ũngenagia thĩinĩ wa Bibilia. [Thoma Ayubu 26:7 kana Isaia 40:22, ĩrĩa yonanagia atĩ Bibilia yaragia ma maũndũ-inĩ ma sayansi.] Ningĩ Bibilia nĩ ĩkoragwo na ũhoro ũngĩteithia famĩlĩ. Nĩ ngenda gũkuonia ngerekano hĩndĩ ĩyo ĩngĩ.”
• “Nĩ wega nĩ ũndũ wa kũnjĩra mawoni maku. Angĩkorwo Ngai no andĩkĩre andũ ibuku-rĩ, ũngĩĩciria rĩngĩkorũo na ũhoro ũrĩkũ?” Ũcoke wonie mũndũ ũcio thĩinĩ wa Bibilia ũndũ ũratwarana na mawoni make.