Teithia Ũrĩa Mũrahunjia Nake
1. Tũngĩĩgerekania atĩa na Paulo rĩrĩa tũrĩ ũtungata-inĩ?
1 Mahinda marĩa mũtũmwo Paulo aahũthĩrire hamwe na Akristiano arĩa angĩ, aamonaga marĩ mĩeke ya ‘kũũmanĩrĩria.’ (Rom. 1:12) Rĩrĩa ũrĩ ũtungata-inĩ, hihi nĩ ũcaragia mĩeke ya kũũmĩrĩria na gũteithia ũrĩa mũrahunjia nake? Nĩ wega kwarĩrĩria hamwe nake maũndũ marĩa magũteithĩtie ũkorũo ũrĩ mũhunjia ũrĩ na moimĩrĩro mega.
2. Tũngĩongerera ũmĩrĩru wa ũrĩa tũrahunjia nake atĩa, na nĩkĩ ũndũ ũcio nĩ wa bata?
2 Mũteithie Agĩe na Ũmĩrĩru: Ahunjia amwe matikoragwo na ũmĩrĩru, na ũndũ ũcio no woneke ũthiũ-inĩ wao kana mwarĩrie-inĩ wao. No tuongerere ũmĩrĩru wao na njĩra ya kũmagathĩrĩria kuuma ngoro. Nĩ njĩra ingĩ irĩkũ ingĩmateithia magĩe na ũmĩrĩru? Mũrori ũmwe ũgendaga eraga ũrĩa marahunjia nake maũndũ marĩa mamwĩkĩraga guoya na ũrĩa ahoyaga kaingĩ nĩguo atoorie maũndũ macio. Mũrũ wa Ithe witũ ũngĩ oigire ũũ igũrũ rĩa kĩrĩa gĩtũmaga agĩe na ũmĩrĩru: “Ũndũ wa mbere nĩ kũgĩa na ũthiũ mũcanjamũku. Rĩmwe na rĩmwe nĩbataraga kũhoya nĩguo twĩke ũguo.” Nĩ harĩ ũndũ hihi ũgũteithĩtie kũgĩa na ũmĩrĩru ũtungata-inĩ? Ĩra ũrĩa mũrahunjia nake.
3. Nĩ maũndũ marĩkũ tũngĩarĩrĩria na ũrĩa tũrahunjia nake nĩguo agĩe na moimĩrĩro mega ũtungata-inĩ?
3 Muonie Njĩra cia Kũhunjia: Hihi ũrĩ woria kĩũria kana ũkĩambĩrĩria ndeereti ũkĩhũthĩra ũndũ mũna wĩyoneire kwanyu na ũkĩgĩa na moimĩrĩro mega? Hihi nĩ harĩ ũndũ wendete kũhũthĩra na nĩ ũkoragwo na moimĩrĩro mega? Ĩra ũrĩa mũrahunjia nake. (Thim. 27:17) Hĩndĩ ĩrĩa mũrĩ njĩra-inĩ mũgĩthiĩ gũcokera mũndũ, no mwarĩrĩrie muoroto wa iceera rĩu na ũrĩa mũkũũhingia. Thutha wa kwĩruta na mũndũ Bibilia, no ũtaarĩrie kĩrĩa gĩatũma ũthuure ũndũ mũna, rĩandĩko, kana njĩra ya ũrutani kwarĩrĩria mabataro ma mũrutwo waku.
4. Twagĩrĩirũo gũteithia arĩa tũrahunjia nao nĩkĩ?
4 Ahunjia karine-inĩ ya mbere matiakenagio tu gũteithia arĩa maahunjagĩria, no nĩ moonaga bata wa gwĩkĩrana ngoro o ene. (Atũm. 11:23; 15:32) Mũtũmwo Paulo aamenyeririe Timotheo agĩcoka akĩmwĩkĩra ngoro o nake ateithie andũ arĩa angĩ. (2 Tim. 2:2) Rĩrĩa twathiĩ na mbere gũteithia Akristiano arĩa angĩ tũrĩ ũtungata-inĩ, magĩaga na moimĩrĩro mega, tũkongerera gĩkeno kĩao, na makĩria tũgakenia Ithe witũ wa matu-inĩ, Jehova.—Ahib. 13:15, 16.