◼ Thaa cia Tabarĩra: Tabarĩra ĩkaambĩrĩria na tũrwĩmbo twa kĩnanda thaa 3:20 rũcinĩ mĩthenya yothe ĩtatũ. Hĩndĩ ĩyo ithuothe twagĩrĩirũo gũikara thĩ nĩguo tabarĩra yambĩrĩrie na njĩra ĩrĩ na gĩtĩo na mũbango. Mũthenya wa Njumaa na Njuuma tabarĩra ĩgaathira thaa 10:55 hwaĩ-inĩ, na Kiumia ĩgaathira thaa 9:50 hwaĩ-inĩ.
◼ Igomano cia Kĩĩmabũrũri: Mabũrũri-inĩ mamwe nĩ gũgaakorũo na igomano cia kĩĩmabũrũri. Ririkana atĩ, wabici ya rũhonge nĩ ĩheete ciũngano imwe mweke wa gũgaathiĩ igomano icio thutha wa gwĩciria ũhoro wa itĩ, kũndũ gwa kũiga ngaari na mĩkawa ĩrĩa ĩngĩoneka. Ahunjia mangĩthiĩ kĩgomano gĩa kĩĩmabũrũri mataheetwo mweke ũcio, no kũgĩe na andũ aingĩ mũno nginya maage gwa gũikara. O na angĩkorũo ũgathiĩ kĩgomano kĩngĩ tiga kĩrĩa ũgaĩirũo, hihi nĩ ũndũ wa maũndũ maku, ndũgathuure gũthiĩ gĩa kĩĩmabũrũri.
◼ Ngaari: Kũndũ guothe igomano igekĩrũo, nĩ gũgaakorũo na kũndũ gwa kũiga ngaari hatarĩ marĩhi, mũndũ akaaheagwo ha kũiga ngaari kũringana na thaa iria akinya. Kaingĩ handũ ha kũiga ngaari hakoragwo harĩ hanini, kwoguo arĩa marĩ ngaari no mecirie ũrĩa mangĩkuana handũ ha o mũndũ gũũka na ngaari yake. Arĩa magakorũo na marũa kana kĩbaũ gĩa kuonania atĩ marĩ na wathe wa mwĩrĩ, no o tu magetĩkĩrio kũiga ngaari ciao harĩa hatigĩtwo nĩ ũndũ wa andũ ta acio.
◼ Kũiga Itĩ: Rũcinĩ ihingo ciahingũrũo, tũkũũrio tũtikahanyũke gũthiĩ kũiga itĩ ta arĩ gũtharana tũratharanĩra gwa gũikara. Roho wa kwĩima nĩ ũndũ wa arĩa angĩ, nĩ wonanagia atĩ tũrĩ Akristiano a ma na makĩria ũgatũma arĩa maratuona magooce Jehova. (Joh. 13:34, 35; 1 Kor. 13:4, 5; 1 Pet. 2:12) No ũige itĩ cia arĩa tu mũraikara nao kwanyu mũciĩ, arĩa mũrathiĩ nao ngaari ĩmwe, kana arutwo arĩa ũreruta nao Bibilia. Itĩ nĩ igaakorũo ciigĩtwo nĩ ũndũ wa arĩa akũrũ na arĩa arũaru. Itĩ icio itikoragwo irĩ nyingĩ, kwoguo no arĩa akũrũ na arĩa arũaru na hihi mũndũ ũmwe kana eerĩ arĩa maramateithĩrĩria mangĩikara ho.
◼ Irio cia Mĩaraho: Ũkũũrio ũgakuua irio handũ ha gũgathiĩ gũcaria irio nja ya harĩa kĩgomano gĩgeekĩrũo. No ũkuue irio na kĩndũ gĩtarĩ kĩnene kĩrĩa kĩngĩiganĩra rungu rwa gĩtĩ. Tũtiĩtĩkĩrĩtio gũkuua indo nene mũno cia irio kana indo cia ngirathi kĩgomano-inĩ.
◼ Mĩhothi: No tuonanie ngatho ciitũ nĩ ũndũ wa mĩbango ya kĩgomano na njĩra ya kũruta mĩhothi ya kwĩyendera nĩ ũndũ wa wĩra wa thĩ yothe. Ceki o yothe yagĩrĩire kwandĩkwo “International Bible Students Association.” Mĩhothi ningĩ no ĩheanwo na njĩra ĩngĩ o yothe ta kũhũthĩra kadi cia marĩhi.
◼ Ũrigitani: Angĩkorũo nĩ harĩ ndawa ũhũthagĩra, ndũkanariganĩrũo gũkuua cia kũigana, tondũ gũtigakorũo na ndawa ta icio kĩgomano-inĩ. Cindano na indo iria ihũthagĩrũo gwĩtheca nĩ ũndũ wa mũrimũ wa cukari ciagĩrĩire gũteo harĩa hagĩrĩire no ti harĩa tũikagia mahuti tũrĩ kĩgomano-inĩ kana hoteli-inĩ.
◼ Kwĩmenyerera: Nĩ wega kwĩmenyerera kuumana na ũndũ o wothe ũngĩtũma ũgurare nĩ ũndũ wa kũgitũka kana gũtindirũka. O mwaka nĩ kuonekaga nguraro ciigana ũna iria ciumanaga na iratũ, makĩria iratũ cia mĩkanye. Nĩ wega gwĩkĩra iratũ njega, irakũigana wega nĩguo ndũgakorũo na thĩna ũkĩambata ngoroba, ngathĩ-inĩ, tũcĩra-inĩ, na kũndũ kũngĩ ta kũu.
◼ Maguta na Maraci: Igomano nyingĩ ciĩkagĩrũo nyũmba thĩinĩ. Nĩ ũndũ ũcio-rĩ, no ũkorũo ũrĩ ũndũ mwega kwaga kũhũthĩra maguta kana maraci marĩ na mũtararĩko mũnene ũrĩa ũngĩtũma arĩa makoragwo na mathĩna makonainie na kũhuhia mathĩnĩke.—1 Kor. 10:24.
◼ Bomu cia Tafadhali Fuatia Upendezi (S-43): Hũthĩra bomu ya Tafadhali Fuatia Upendezi kũheana ũhoro wĩgiĩ mũndũ o wothe ũhunjĩirio hĩndĩ ya kĩgomano na akonania gũkenio nĩ ũhoro ũcio. Thutha wa kũmĩiyũria, bomu ĩyo no ĩneanwo kũrĩ Rũhonge rwa Mabuku kana wacoka kĩũngano-inĩ ũnengere mwandĩki wa kĩũngano kĩanyu.
◼ Mĩkawa: Goocithia rĩĩtwa rĩa Jehova na njĩra ya mĩthiĩre yaku mĩega ũrĩ mĩkawa-inĩ. Wĩhumbe na njĩra ĩronania ũrĩ Mũkristiano. He aruti a wĩra mbacici angĩkorũo kwanyu nĩ gwĩkagwo ũguo.
◼ Hoteli:
Ũkũũrio ndũkaigithie rumu makĩria ma iria ũkũhũthĩra, na thĩinĩ wa rumu ĩyo mũtigaikare mũrĩ aingĩ makĩria ma ũrĩa gwĩtĩkĩrĩtio.
Ndũgakanje mĩbango ya kũrĩa ũigithĩtie gwa gũgaakoma tiga o kuumĩrire ũndũ ũterĩgĩrĩirũo, na o hĩndĩ ĩyo ũmenyithie arũgamĩrĩri a hoteli nĩgetha andũ angĩ maheo rumu ĩyo. (Mat. 5:37) Angĩkorũo no mũhaka ũkanjithie, tigĩrĩra atĩ nĩ waheo marũa ma kuonania nĩ wakanjithia. Mũndũ angĩkanja mũbango ta ũcio itigarĩtie thikũ igĩrĩ, no aage gũcokerio mbeca iria aarutĩte.
Ririkana atĩ angĩkorũo ũrahũthĩra kadi ya marĩhi ũkĩoya rumu, hoteli imwe nĩ irĩ hũthĩra ya gũtinia mbeca nyingĩ makĩria nĩ ũndũ wa kũrĩhĩra indo iria hihi ũngĩthũkia hĩndĩ ĩyo ũraikara kũu. Ndũngĩcokerio mbeca icio nginya o rĩrĩa makarĩkia kũrutithania mahũthĩro maku thikũ cigana ũna thutha wa kuuma kũu.
Hũthĩra gakaari ga gũkuua mĩrigo o rĩrĩa ũrakabatara, na ũgacokie narua warĩkia nĩguo andũ arĩa angĩ o nao makahũthĩre.
Heana mbacici kũrĩ arĩa magũthondekagĩra rumu na aruti a wĩra a hoteli arĩa magũkuuĩra mĩrigo, angĩkorũo kwanyu nĩ mwĩkaga ũguo.
Rugĩra tu o rumu-inĩ iria ciĩtĩkĩrĩtio.
Ndũkahũthĩre ũũru indo iria iheanagwo hoteli-inĩ, ta irio cia rũcinĩ, kahũa, kana indo ingĩ ta icio na njĩra ya gũcikuua ũgĩthiĩ kĩgomano-inĩ.
Hĩndĩ ciothe onanagia maciaro ma roho rĩrĩa ũrahiũrania na aruti a wĩra a hoteli. Makoragwo magĩtungatĩra ageni aingĩ na no makene mũno tũngĩonania ũtugi, ũkirĩrĩria, na gwĩciria arĩa angĩ.
Aciari magĩrĩirũo kũrora ciana ciao mahinda mothe rĩrĩa marĩ hoteli-inĩ, hamwe na kũndũ gwa gũtubĩra, gwa kwamũkĩra ageni, tũcĩra-inĩ, na kũndũ kũngĩ.
Marĩhi marĩa monanĩtio rĩthiti-inĩ ma rumu makoragwo maturanĩirũo mbeca cia mũthenya ũmwe hatarĩ na igoti. Ũngĩrĩhio makĩria ma ũrĩa honanĩtio, ũkũũrio waranĩrie na Rũhonge rwa Handũ ha Gũkoma na ihenya o ũrĩa kwahoteka.
Kũngiumĩra mathĩna megiĩ rumu yaku ya hoteli, menyithia Rũhonge rwa Handũ ha Gũkoma ũrĩ kĩgomano-inĩ nĩguo ũteithio.
◼ Ũtungata wa Kwĩrutĩra: Mũndũ o wothe ũngĩenda kwĩrutĩra gũteithĩrĩria, no athiĩ Rũhonge-inĩ rwa Ũtungata wa Kwĩrutĩra kĩgomano-inĩ. Ciana iria itakĩrĩtie mĩaka 16 na no ciende kwĩrutĩra gũteithĩrĩria, no ciĩke ũguo irĩ rungu rwa mũciari kana mũndũ ũngĩ mũgima wĩtĩkĩrĩtio nĩ mũciari.