Wĩgerekanie na Anabii—Nahumu
1. Ibuku rĩa Nahumu rĩtũrutaga ũndũ ũrĩkũ?
1 Matigari ma itũũra rĩa tene rĩa Nineve nĩ ũira wa atĩ o ta ũrĩa Nahumu aarathĩte, Jehova nĩ erĩhagĩria harĩ thũ ciake, na atĩ o na thũ iria irĩ na hinya mũno itingĩhota kũmũtooria. (Nahu. 1:2, 6) Twathuthuria ũrathi wa Nahumu nĩ tũkwĩruta maũndũ maigana ũna mangĩtũteithia ũtungata-inĩ.
2. Tũngĩka atĩa nĩguo ndũmĩrĩri iitũ ĩkorũo ĩrĩ ya kũhooreria andũ?
2 Hooragĩria Andũ na Ũkamahe Mwĩhoko: Mũndũ angĩthoma ibuku rĩa Nahumu riita rĩa mbere, angĩona ta rĩarĩrĩirie o maũndũ moru marĩa mangĩakorire Nineve, itũũra inene na rĩarĩ na riri rĩa Ashuri ya tene. (Nahu. 1:1; 3:7) No ndũmĩrĩri ĩyo yarĩ ũhoro mwega harĩ andũ a Jehova. Nahumu, ũrĩa rĩĩtwa rĩake riugĩte “Mũhorerania,” omĩrĩirie Ayahudi arĩa angĩ akĩmeera atĩ thutha wa kahinda kanini thũ yao nĩ ĩngĩaninirũo biũ! Aacokire akĩmaririkania atĩ Jehova nĩ “kĩhingo kĩrũmu mũthenya wa mĩnyarirĩko.” (Nahu. 1:7) Rĩrĩa tũrahunjia, o na ithuĩ nĩ twĩraga andũ ũhoro mwega na tũkamekĩra ngoro morĩre harĩ Jehova.—Nahu. 1:15.
3. Tũngĩĩgerekania atĩa na Nahumu harĩ kũhũthĩra ngerekano?
3 Hũthagĩra Ngerekano: Jehova aatongoririe Nahumu na roho kũringithania ũrĩa Nineve ĩngĩanangirũo na ũrĩa itũũra rĩa No-amoni rĩa Misiri ya tene rĩanangĩtwo nĩ Ashuri. (Nahu. 3:8-10) Rĩrĩa tũrera andũ ũhoro wĩgiĩ mũico wa mũtabarĩre ũyũ mũũru wa maũndũ, no tũmataarĩrie morathi ma Bibilia marĩa monanagia atĩ Jehova nĩ ahingagia uuge wake nginya kaũndũ karĩa kanini biũ. Kwa ngerekano, rĩrĩa Ababuloni na Amedia mokĩrĩire itũũra rĩa Nineve mwaka wa 632 mbere ya Kristo, nĩ kwoirire mbura nene ĩgĩtũma Rũĩ rwa Nili rũiyũre, nginya thingo imwe ciarĩ na hinya cia itũũra rĩu ikĩmomoka. Thutha wa kahinda kanini, itũũra rĩu rĩa Nineve rĩgĩtahwo o ta ũrĩa Jehova aarathĩte.—Nahu. 1:8; 2:6.
4. Tũngĩka atĩa nĩguo andũ mataũkĩrũo nĩ ndũmĩrĩri iitũ tũrĩ ũtungata-inĩ?
4 Aragia na Njĩra Andũ Megũtaũkĩrũo: Nahumu aandĩkire na njĩra ĩrataarĩria ũhoro wega na ĩngĩgucĩrĩria mũthomi. Maũndũ marĩa aandĩkire nĩ maataũkĩkaga wega. (Nahu. 1:14; 3:1) O na ithuĩ twagĩrĩirũo kũhũthĩra ciugo hũthũ andũ mekũhota gũtaũkĩrũo nĩcio. (1 Kor. 14:9) Waceerera mũndũ riita rĩa mbere, mũtaarĩrie wega gĩtũmi kĩa ũmũceerere. Rĩrĩa ũraruta andũ Bibilia, mateithie gũkũria wĩtĩkio harĩ Jehova na Kiugo gĩake, na kũmenya ũrĩa mangĩhũthĩra ũhoro ũcio ũramaruta ũtũũro-inĩ wao.—Rom. 10:14.
5. Ũrathi wa Nahumu ũtũheaga ũũma wa ũndũ ũrĩkũ?
5 Ibuku rĩrĩa Nahumu aandĩkire nĩ rĩonanagia wega ũrĩa aarĩ na ma biũ atĩ no mũhaka uuge wa Jehova ũhinge. O ũrĩa mũico wa mũtabarĩre ũyũ wa Shaitani ũrakuhĩrĩria, nĩ twĩkĩragwo ngoro nĩ ciugo iria Ngai oigire atĩ, “ndagacoka gũtũma kũgĩe mĩnyamaro rĩngĩ rĩa kerĩ.”—Nahu. 1:9.