Wĩgerekanie na Wĩtĩkio Wao
1. Kwambĩrĩria kiumia kĩa Oktomba 19 tũgaathoma kĩ hĩndĩ ya Wĩruti wa Bibilia wa Kĩũngano?
1 Kiumia kĩa Oktomba 19, mwaka wa 2015, nĩ tũkaambĩrĩria gũthoma ibuku rĩa Wĩgerekanie na Wĩtĩkio Wao thĩinĩ wa mũcemanio wa Wĩruti wa Bibilia wa Kĩũngano. Ibuku rĩrĩ rĩarĩrĩirie maũndũ ma mĩtũũrĩre ya athuri na atumia 14 a wĩtĩkio magwetetwo kuuma thĩinĩ wa Bibilia. Rĩandĩkĩtwo na njĩra ĩtũteithagia kũhũra mbica ya andũ acio meciria-inĩ, na rĩgatũteithia kuona ũrĩa maagereire moritũ magĩtungatĩra Jehova. Ningĩ nĩ rĩonanagia maũndũ marĩa tũngĩĩruta kuumana na andũ acio na ũrĩa tũngĩmahũthĩra mũtũũrĩre-inĩ.—Ahib. 6:12.
2. Taarĩria maũndũ mamwe thĩinĩ wa ibuku rĩa Wĩgerekanie na Wĩtĩkio Wao.
2 Maũndũ Marĩa Marĩ Thĩinĩ: Ibuku rĩu rĩrĩ na mabu, na mĩaka ĩrĩa maũndũ meekĩkire ma gũtũteithia kũmenya nĩ rĩ na nĩ kũ o mũndũ aaikaraga. Makĩria, o gĩcunjĩ kĩrĩ na “Ciũria cia Gwĩciria . . . ,” iria igũtũteithia gwĩcũrania maũndũ marĩa twathoma na ũrĩa tũngĩmahũthĩra. Ningĩ ibuku rĩu rĩrĩ na mbica thaka, ihaarĩirio kũgerera ũthuthuria na kinyi, iria irĩtũteithagia kũhũra mbica ũndũ ũrĩa tũrathoma.
3. Tũngĩka atĩa nĩguo tũgunĩke nĩ ũthomi wa ibuku rĩrĩ?
3 Ũrĩa Ũngĩgunĩka: Marũa ma kũhingũra kuuma kũrĩ Kĩama Kĩrĩa Gĩtongoragia matwĩkagĩra ngoro na ciugo ici: “Geria kũhũũra mbica meciria-inĩ ũkĩhũthĩra maitho maku, maniũrũ, matũ na ciĩga ingĩ. Geria kũigua ũrĩa andũ acio maaiguaga na wone kĩrĩa moonaga. Ringithania ũrĩa meekire rĩrĩa maacemanirie na maũndũ mamwe na ũrĩa wee ũngĩekire korũo warĩ ho.” No rĩrĩ, kũhũra mbica ti kuuga twĩcirie gũkiria njano, no nĩ kũgeria kuona rũgano rũu rũtongoretio nĩ roho ũrĩa rugĩte na kwĩĩkĩra iratũ-inĩ cia andũ acio. Gwĩka ũguo nĩ kwendaga ihinda na gwĩcũrania. (Neh. 8:8) Ithomo rĩngĩambĩrĩria gatagatĩ ga gĩcunjĩ, ũrĩa ũratongoria ekwamba kũhũthĩra sekondi 30-60 gũcokera maũndũ marĩa meerutire ithomo rĩa kiumia gĩthiru. Angĩkorũo ithomo rĩu rĩkĩrĩkĩrĩria rĩtirĩ na “Ciũria cia Gwĩciria . . . ,” kĩũria kĩmwe kana igĩrĩ cia gũcokera no ciũrio.
4. Tũrabatara kwĩruta ibuku rĩa Wĩgerekanie na Wĩtĩkio Wao nĩkĩ?
4 Tũratũũra thĩinĩ wa thĩ ĩrageria o mũthenya gũthũkia kana kwenyenyia wĩtĩkio witũ na njĩra itiganĩte. Ibuku rĩrĩ, o hamwe na icunjĩ iria irathiĩ na mbere gũcabwo thĩinĩ wa Mũrangĩri ciĩgiĩ ngʼano icio, nĩ kĩheo kuuma kũrĩ Jehova gĩa gwĩkĩra wĩtĩkio witũ hinya. (Jak. 1:17) Rekei tũkenere ibuku rĩrĩ na njĩra ya gũka hĩndĩ ya Wĩruti wa Bibilia wa Kĩũngano tũtegũtĩra na twĩrutanĩrie biũ kũruta macokio tũkĩrĩthoma tũrĩ hamwe!