ŨTŨŨRO WA GĨKRISTIANO
Rũmia Ithimi cia Jehova Ciĩgiĩ Mĩtugo
Jehova nĩ aigagĩra andũ ithimi iria magĩrĩire kũrũmĩrĩra ciĩgiĩ mĩtugo. Kwa ngerekano, oigĩte atĩ kĩhiko nĩ mũbango wa gũtũũra gatagatĩ ka mũthuri na mũtumia. (Mat 19:4-6, 9) Nĩ areganĩte na mĩthemba yothe ya ngomanio itagĩrĩire. (1Ko 6:9, 10) O na nĩ aheanĩte motaaro megiĩ mwĩhumbĩre na kwĩgemia marĩa matũmaga andũ ake makorũo marĩ ngũrani.—Gũc 22:5; 1Ti 2:9, 10.
Andũ aingĩ thĩinĩ wa thĩ nĩ maregaga kũrũmĩrĩra ithimi cia Jehova. (Ro 1:18-32) Mĩĩhumbĩre yao, mĩĩgemerie yao, na mĩtugo yao nĩ ĩrĩa yendetwo nĩ andũ aingĩ. Aingĩ nĩ manĩkaga ciĩko ciao njũru na nĩ mamenagĩrĩria arĩa makoragwo marĩ ngũrani nao.—1Pe 4:3, 4.
Tũrĩ Aira a Jehova no mũhaka, tũrĩ na ũcamba, tũrũmie ithimi cia Ngai ciĩgiĩ mĩtugo. (Ro 12:9) Na njĩra ĩrĩkũ? Nĩ twagĩrĩirũo kwĩra andũ arĩa angĩ na njĩra ya ũũgĩ maũndũ marĩa Ngai etĩkagĩra. No ningĩ nĩ twagĩrĩirũo kũrũmagĩrĩra ithimi cia Ngai mũtũũrĩre-inĩ witũ. Kwa ngerekano, hĩndĩ ĩrĩa tũrathuura nguo kana ũrĩa tũkwĩgemia no twĩyũrie ũũ: ‘Hihi kĩrĩa ndĩrathuura kĩronania nũmagĩrĩra ithimi cia Jehova kana cia thĩ? Hihi nguo ciakwa na mwĩgemerie nĩ ironania atĩ ndĩ Mũkristiano wĩtigĩrĩte Ngai?’ Rĩrĩa tũrathuura tabarĩra kana thenema ĩrĩa tũkwĩrorera no twĩyũrie ũũ: ‘Hihi Jehova no akenio nĩ tabarĩra ĩno? Ĩragathĩrĩria ithimi irĩkũ cia mĩtugo? Hihi maũndũ marĩa ndĩrathuura ma gwĩkenia no matũme nemwo nĩ kwĩgirĩrĩria maũndũ moru? (Thab 101:3) Hihi no mahĩnge andũ a famĩlĩ kana andũ angĩ?’—1Ko 10:31-33.
Nĩkĩ nĩ harĩ bata mũno kũrũmia ithimi cia Jehova ciĩgiĩ mĩtugo? Nĩ tondũ ihinda rĩtarĩ kũraihu Jesu nĩ ekũniina andũ arĩa aganu o hamwe na waganu wothe. (Ezk 9:4-7) No arĩa tu mekaga wendi wa Ngai magatigara. (1Joh 2:15-17) Rekei tũthiĩ na mbere kũrũmia ithimi cia Jehova ciĩgiĩ mĩtugo nĩ getha arĩa marĩyonagĩra mĩtugo itũ mĩega magoocage Ngai.—1Pe 2:11, 12.
Nguo iria thuuraga cionanagia nũmagĩrĩra ithimi irĩkũ cia mĩtugo?
MWĨROREREI VIDEO TUĨKA MŨRATA WA JEHOVA—MŨTHURI ŨMWE, MŨTUMIA ŨMWE, MŨCOKE MWARĨRĨRIE CIŨRIA ICI:
Nĩkĩ nĩ ũndũ wa ũũgĩ gũtũũra kũringana na ithimi cia Jehova?
Aciari magĩrĩirũo kwambĩrĩria kũruta ciana ciao ithimi cia Jehova ciĩgiĩ mĩtugo irĩ o nini nĩkĩ?
Ciana o hamwe na andũ agima mangĩteithia andũ atĩa nĩguo magunĩke kuumana na kĩĩrĩgĩrĩro kĩa ihinda rĩũkĩte kĩrĩa Ngai atũheete?