ŨTŨŨRO WA GĨKRISTIANO

Hũthagĩra Ũũgĩ Ũgĩthuura Maũndũ ma Gwĩkenia

Twagĩrĩirũo kũhũthĩra ũũgĩ tũgĩthuura maũndũ ma gwĩkenia nĩkĩ? Tondũ rĩrĩa tũrathuura thenema ĩrĩa tũkwĩrorera, rwĩmbo rũrĩa tũgũthikĩrĩria, website ĩrĩa tũkũhingũra, ibuku rĩrĩa tũgũthoma, kana mũthaako wa video ũrĩa tũgũthaaka, tũkoragwo tũgĩthuura maũndũ marĩa tũgwĩkĩra meciria-inĩ maitũ. Kĩrĩa twathuura nĩ kĩhutagia mĩthiĩre itũ. Ũndũ wa kĩeha nĩ atĩ, maũndũ maingĩ ma gwĩkenia ũmũthĩ makoragwo na maũndũ marĩa Jehova akaananĩtie. (Thb 11:5; Ga 5:19-21) Nĩkĩo Bibilia ĩtwĩraga tũthiage na mbere gwĩciria maũndũ marĩa matĩithagia Jehova.—Afi 4:8.

WĨRORERE VIDEO YA NĨ ŨNDŨ ŨRĨKŨ MWEGA WA GWĨKENIA NAGUO? ŨCOKE ŨCOKIE CIŨRIA ICI:

Maũndũ ma gwĩkenia ũmũthĩ mahaanaine atĩa na mĩthako ya andũ a Roma ya tene arĩa meetagwo gladiators?
Akristiano arĩa angĩ kĩũngano-inĩ mangĩteithia andũ ethĩ atĩa mahũthagĩre ũũgĩ magĩthuura maũndũ ma gwĩkenia?
Rĩandĩko rĩa Aroma 12:9 rĩngĩtũteithia atĩa tũgĩthuura maũndũ ma gwĩkenia?
Nĩ maũndũ ta marĩkũ mega ma gwĩkenia makoragwo gĩcigo-inĩ gĩa kwanyu?

NĨ MAŨNDŨ MARĨKŨ WENDETE GWĨKENIA NAMO?

Maũndũ maingĩ na gwĩkenia ũmũthĩ marutaga andũ kwĩrorera kana gũthoma maũndũ mekĩtwo nĩ andũ angĩ handũ ha o ene gũkorũo magĩka ũndũ mũna. Thenema, mabuku, na tabarĩra cia TV ikuonagia maũndũ marĩa mekĩtwo nĩ andũ angĩ, no ti marĩa wĩkĩte. Andũ aingĩ nĩ monete atĩ gwĩka ũndũ arĩ o ene nĩguo mekenie, kũrĩ ũguni makĩria gũkĩra kwĩrorera kana gũthoma maũndũ mekĩtwo nĩ andũ angĩ. Kwa ngerekano, andũ amwe mekenagia na njĩra ya kũina makĩhũthĩra indo cia kũina kana gũcora mbica. Angĩ nao makenagĩra maũndũ ta gũthaaka mũbira, kwambata irĩma, kana gũthiĩ gũceera na arata. Ũndũ o wothe tũngĩthuura wa gwĩkenia, rekei ‘twĩkage maũndũ mothe nĩguo tũgoocithie Ngai.’—1Ko 10:31.