“Rĩu nĩ Nyendete Ũtungata!”

KŨŨRŨO NĨ GĨKENO

Ũndũ wa kĩeha nĩ atĩ, rĩrĩa ndakinyirie mĩaka ya ũtinĩnja, ũrata wakwa na Jehova nĩ waambĩrĩirie kwaga hinya. Ndonaga andũ arĩa twathomaga nao marĩ na wĩyathi wa gwĩka maũndũ matiganĩte na kwoguo ngona ta kũrĩ kĩndũ ndĩraga. Ndonaga kũrũmĩrĩra mawatho ma aciari kũrĩ kũritũ o hamwe na kũrũmĩrĩra ithimi cia Gĩkristiano, na ngĩambĩrĩria kuona gũtungatĩra Jehova arĩ ũndũ mũritũ. O na gũtuĩka ndiarĩ na nganja atĩ Jehova arĩ kuo, ndiaiguaga ndĩmũkuhĩrĩirie.

O na kũrĩ ũguo, ndiatigire kũhunjia, o na gũtuĩka ndahunjagia mathaa manini mũno. Ndiehaaragĩria ngĩthiĩ kũhunjia na ũndũ ũcio watũmaga nditũhĩrũo mũno nĩ kwambĩrĩria na gũtwarithia ndeereti na mbere. Na kwoguo ndiakoragwo na moimĩrĩro mega ũtungata-inĩ na ũndũ ũcio ũgĩtũma njage gĩkeno na nogio nĩ ũtungata o na makĩria. Ndeyũragia ũũ: ‘Mũndũ angĩhota atĩa kũhunjia o wiki o wiki, na mweri thutha wa ũrĩa ũngĩ?’

Rĩrĩa ndakinyirie mĩaka 17, nĩ ndendaga mũno gũkorũo na wĩyathi makĩria. Kwoguo ngĩoya indo ciakwa, ngiuma mũciĩ, ngĩthamĩra Australia. Ũndũ ũcio nĩ wekĩrire aciari akwa kĩeha mũno. O na gũtuĩka nĩ maatangĩkaga nĩ ũndũ wakwa, meeciragia atĩ ndathiĩ na kũu nĩ ngũthiĩ na mbere na maũndũ ma kĩĩroho.

Ndathamĩra Australia, maũndũ makwa ma kĩĩroho maathiire na mbere gũthũka o na makĩria. Nĩ ndaambĩrĩirie gũtĩra mĩcemanio. Ndambĩrĩirie kũnyitanĩra na arata arĩa maamenyerete gũthiĩ mĩcemanio-inĩ hwaĩ-inĩ ũmwe, no hwaĩ-inĩ ũyũ ũngĩ magathiĩ irabu-inĩ kũnyua na kũina ndaci. Ndeciria ũhoro wĩgiĩ hĩndĩ ĩyo, nĩ nyonaga atĩ nĩ ta ndataganĩirie ũhoro wa ma na maũndũ ma thĩ ĩno, o na gũtuĩka gũtirĩ mwena ndaiguaga njiganĩire.

KWĨRUTA ŨNDŨ WA BATA ITERĨGĨRĨIRE

Mĩaka ta ĩĩrĩ thutha ũcio, nĩ kũrĩ mwarĩ wa Ithe witũ watũmire nyambĩrĩrie gwĩciria ũhoro wĩgiĩ ũtũũro wakwa o na atekũmenya. Twaikaraga nyũmba-inĩ ĩmwe tũrĩ aarĩ a Ithe witũ atano mataarĩ ahiku, na tũkĩnyita ũgeni mũrori wa mũthiũrũrũko na mũtumia wake Tamara, tũikare nao ihinda rĩa kiumia kĩmwe. Rĩrĩa mũthuri wake ararũmbũiya maũndũ ma kĩũngano, Tamara aahũthagĩra mahinda hamwe na ithuĩ tũkĩaragia na tũgĩthekaga. Ũndũ ũcio nĩ wangenirie. Aarĩ mwĩnyihia na warĩ ũndũ mũhũthũ kwaria nake. Nĩ ndonire ũrĩ ũndũ wa kũgegania kuona mũndũ wa kĩĩroho take agĩkenera kũhũthĩra mahinda hamwe na ithuĩ.

Tamara nĩ aakenagĩra mũno gũtungatĩra Jehova. Gũkorũo endete ũhoro wa ma na ũtungata, nĩ gwatũmaga mũndũ ende kwĩgerekania nake. Aarĩ ngũrani mũno na niĩ tondũ we nĩ aakenagĩra gwĩka ũrĩa wothe angĩhota ũtungata-inĩ wa Jehova, no niĩ ndiakoragwo na gĩkeno tondũ ndierutanagĩria ũtungata-inĩ wa Jehova. Mwerekera wake mwega kwerekera ũtungata na kuona gĩkeno kĩrĩa aarĩ nakĩo nĩ kwahutirie ũtũũro wakwa mũno. Kĩonereria gĩake gĩatũmire ndĩcirie ũhoro wa rĩandĩko rĩrĩa riugaga atĩ Jehova endaga ithuothe tũmũtungatĩre ‘tũcanjamũkĩte, tũkĩanagĩrĩra nĩ gũkena.’—Thab. 100:2.

KWARAHŨRA WENDO WAKWA HARĨ ŨTUNGATA

Nĩ ndendire kũgĩa na gĩkeno ta kĩu Tamara aarĩ nakĩo, no nĩgetha ngĩe nakĩo nĩ ndabataraga gwĩka mogarũrũku manene. Ũndũ ũcio nĩ woire ihinda, na ndambĩrĩirie na tũmaũndũ tũnini tũnini. Nĩ ndambĩrĩirie kwĩhaaragĩria itanathiĩ ũtungata, na rĩmwe na rĩmwe nĩ ndatungataga ndĩ painia wa gũteithĩrĩria. Ũndũ ũcio nĩ wandeithirie gũkorũo itarĩ na guoya mũno na gũkorũo ndĩ na ũmĩrĩru ndĩ ũtungata-inĩ. O ũrĩa ndahũthagĩra Bibilia kaingĩ ũtungata-inĩ, noguo ndaiguaga ngĩkenera kũhunjia. Thutha wa ihinda inini, nĩ ndambĩrĩirie gũtungataga ndĩ painia wa gũteithĩrĩria o mweri.

Nĩ ndambĩrĩirie kũgĩa na arata a ũkũrũ ũtiganĩte arĩa maaigaga maũndũ ma kĩĩroho mbere na arĩa maakenagĩra gũtungatĩra Jehova. Kĩonereria kĩao kĩega nĩ kĩandeithirie gwĩciria maũndũ marĩa njigĩte mbere ũtũũro-inĩ na gũkorũo na mũtaratara mwega wa maũndũ ma kĩĩroho. Ngĩambĩrĩria gũkenera ũtungata o na makĩria, na mũthia-inĩ ngĩambĩrĩria gũtungata ndĩ painia wa hĩndĩ ciothe. Rĩarĩ riita rĩa mbere kũigua njiganĩire na ndĩna gĩkeno gũkorũo ndĩ thĩinĩ wa kĩũngano thutha wa mĩaka mĩingĩ.

GŨCEMANIA NA PAINIA MWEGA NA MŨTUGI

Mwaka ũmwe thutha ũcio, nĩ twamenyanire na Alex, mũrũ wa Ithe witũ mwega na mũtugi wendete Jehova na ũtungata. Hĩndĩ ĩyo aarĩ ndungata ya kĩũngano na aakoretwo arĩ painia ihinda rĩa mĩaka ĩtandatũ. Ningĩ kũrĩ hĩndĩ aatungatire kwa ihinda rĩna bũrũri-inĩ wa Malawi kũndũ kũrĩ na bata mũnene wa ahunjia. Arĩ kũu, nĩ aamenyanire na amishonarĩ matiganĩte arĩa maamũigĩire kĩonereria kĩega na makĩmwĩkĩra ngoro athiĩ na mbere kũiga Ũthamaki mbere.

Mwaka wa 2003 nĩ twahikanirie na Alex, na kuuma hĩndĩ ĩyo tũkoretwo tũgĩthiĩ na mbere ũtungata-inĩ wa mahinda mothe. Nĩ twĩrutĩte maũndũ maingĩ ma bata na Jehova nĩ atũrathimĩte na njĩra nyingĩ mũno.

MŨRANGO ŨNGĨ KŨHINGŨKA

Mwaka wa 2009, nĩ twaheirũo mweke wa gũtungata tũrĩ amishonarĩ bũrũri-inĩ mũnini wa Timor-Leste ũrĩa ũkoragwo icigĩrĩra-inĩ cia Indonesia. Twaiguire twakena, o na gũtuĩka nĩ twathitũkire na tũkĩigua guoya. Mĩeri ĩtano thutha ũcio nĩ twakinyire taũni-inĩ nene ya bũrũri ũcio ĩtagwo Dili.

Twathamĩra kũu, twabatarire gwĩka mogarũrũku manene mũtũũrĩre-inĩ witũ. Ũndũire wa kũu, rũthiomi, irio, na mũikarĩre, ciarĩ ngũrani mũno na ũrĩa twamenyerete. Tũrĩ ũtungata-inĩ, kaingĩ nĩ twakoraga andũ athĩni mũno, andũ matarĩ athomu, na andũ ahinyĩrĩrĩku. Ningĩ nĩ twacemanagia na andũ aingĩ arĩa maarĩ na mathĩna ma kĩĩmwĩrĩ na kĩĩmeciria marĩa mooimanĩte na mbaara na ũhinya.a

Nĩ twakenagĩra mũno ũtungata. Kwa ngerekano, kwĩ hĩndĩ ndahunjĩirie kairĩtu ka mĩaka 13 getagwo Maria.b Mami wao aakuĩte mĩaka ĩigana ũna mbere ĩyo na matioonanaga kaingĩ na Ithe. Maria ndaarĩ na mũndũ wa kũmũrũmbũiya, ũndũ ũrĩa ciana nyingĩ cia riika rĩake ibataraga. Nĩ ndirikanaga hĩndĩ ĩmwe aanjitũrũrĩire ngoro yake nginya akĩrĩra. O na kũrĩ ũguo, ndiataũkagĩrũo nĩ maũndũ marĩa ooigaga tondũ ndiamenyete rũthiomi rwa kũu wega. Nĩ ndahoire Jehova ngĩmũũria andeithie hote kũmũmĩrĩria, ngĩcoka ngĩmũthomera maandĩko ma kũmwĩkĩra ngoro. Mĩaka ĩigana ũna ĩrĩa yarũmĩrĩire, ũhoro wa ma nĩ wateithirie Maria gũcenjia mwerekera wake na ũtũũro wake wothe. Nĩ aabatithirio, na rĩu nĩ akoragwo na arutwo ake a Bibilia. Rĩu Maria akoragwo thĩinĩ wa famĩlĩ nene ya aarĩ na ariũ a Ithe witũ na nĩ aiguaga atĩ nĩ endetwo

Jehova nĩ arathimĩte wĩra wa kũhunjia bũrũri-inĩ wa Timor-Leste. O na gũtuĩka, ahunjia aingĩ mabatithĩtio ihinda-inĩ rĩa mĩaka ikũmi mĩthiru, aingĩ ao nĩ maratungata marĩ mapainia, ndungata cia kĩũngano, kana athuri a kĩũngano. Angĩ nao mateithagĩrĩria wĩra wabici-inĩ ya ũtaũri, magateithĩrĩria gũtaũra mabuku na thiomi cia kũu. Nĩ ndakenaga mũno kuona makĩina mĩcemanio-inĩ, kuona mothiũ mao makenete, na kuona magĩkũra kĩĩroho.

NĨ TWAKENEIRE MŨNO GŨTUNGATA KUO

Gũtungata bũrũri-inĩ wa Timor-Leste kwarĩ ngũrani mũno na gũtungata Australia, no nĩ twakeneire mũno gũtungata kuo. Rĩmwe na rĩmwe twakuuagwo nĩ matatũ ciakoragwo ciyũrĩte andũ, na kũu thĩinĩ ciakoragwo ikuuĩte thamaki na indo cia thoko. Rĩmwe na rĩmwe twarutaga andũ Bibilia marĩ mĩciĩ-inĩ yao mĩnini ĩtaakoragwo ĩrĩ mĩkoroge, kũrĩ na ũrugarĩ, na ngũkũ igĩtengʼeraga kũu. Ĩndĩ o na tũgĩcemanagia na moritũ macio, nĩ ndakenagĩra.

Ndacokia meciria na thutha, nĩ njokagia ngatho tondũ aciari akwa nĩ meerutanĩirie mũno kũnduta njĩra cia Jehova na kũndeithĩrĩria o na mĩaka-inĩ ĩyo mĩritũ ya ũtinĩnja. Nĩ ndĩyoneire ũũma wa ciugo cia Thimo 22:6. Baba na mami nĩ makenagio mũno nĩ niĩ na Alex, nĩ makenaga kuona tũgĩtungatĩra Jehova. Kuuma mwaka wa 2016, tũkoretwo tũkĩruta wĩra wa gũceerera ciũngano gĩcigo-inĩ kĩa wabici ya rũhonge ya Australasia.

Ndiĩtĩkagia atĩ nĩ kũrĩ hĩndĩ itendete wĩra wa kũhunjia. Rĩu nĩ nyendete ũtungata! Nĩ nyonete atĩ gũtekũmakania maũndũ marĩa tũngĩcemania namo ũtũũro-inĩ, gĩkeno kĩa ma kiumanaga na mũndũ gũtungatĩra Ngai na ngoro yothe. Ũrĩa kũrĩ nĩ atĩ, mĩaka 18 ĩrĩa tũkoretwo tũgĩtungatĩra Jehova hamwe na Alex nĩyo ngeneire mũno ũtũũro-inĩ wakwa. Rĩu nĩ nyonaga ũũma wa ciugo ici Daudi mwandĩki wa thaburi eerire Jehova: “Arĩa othe moragĩra harĩ wee nĩ marĩkenaga; marĩanagĩrĩra makenete hingo ciothe. . . . Na arĩa mendete rĩĩtwa rĩaku nĩ marĩkenaga nĩ ũndũ waku.”—Thab. 5:11.