ŨRĨA TŨNGĨTOORIA RŨMENA

3 | Eheria Rũmena Meciria-inĩ Maku

Ũrutani wa Bibilia:

“Mũgarũrũke na njĩra ya kũgarũrĩra meciria manyu, nĩgetha mwĩmenyagĩre wendi wa Ngai ũrĩa mwega, wa gwĩtĩkĩrĩka na mũkinyanĩru.”—AROMA 12:2.

Ũguo nĩ Kuuga Atĩa?

Ngai nĩ aroraga mũno maũndũ marĩa twĩciragia. (Jeremia 17:10) Gwĩthema kuuga kana gwĩka ũndũ o wothe wa rũmena ti kũiganu. Rũmena rwambagĩrĩria meciria-inĩ na ngoro-inĩ. Nĩ ũndũ ũcio, twagĩrĩirũo gũtiga o na ihenya gwĩciria igũrũ rĩgiĩ maũndũ marĩa mangĩtũma tũkorũo na rũmena. Gwĩka ũguo tu nokuo kũngĩtũteithia ‘tũgarũrũke’ na tũtoorie rũmena.

Ũrĩa Ũngĩka:

Wĩthuthurie ũrĩa wĩciragia igũrũ rĩgiĩ andũ arĩa angĩ na ũrĩa ũmonaga, makĩria a kuuma bũrũri ũngĩ kana a rũrĩrĩ rũngĩ. Wĩyũrie ũũ: ‘Nyonaga andũ acio matariĩ atĩa? Hihi mawoni makwa mehocetie harĩ ũrĩa niĩ mwene ndĩmoĩ, kana hihi mehocetie harĩ mũthutũkanio?’ Wĩtheme kwĩrorera kana gũthoma maũndũ marĩa macogagĩra rũmena na mbaara thĩinĩ wa nenda cia ũkinyanĩria, thenema, kana indo-inĩ ingĩ ta icio.

Kiugo kĩa Ngai no gĩtũteithie kweheria rũmena ngoro-inĩ na meciria-inĩ maitũ

Ndũkoragwo ũrĩ ũndũ mũhũthũ hingo ciothe gũthuthuria meciria maitũ na ngoro citũ na njĩra nũngĩrĩru. No Kiugo kĩa Ngai no gĩtũteithie “gũkũũrana meciria na methugunda ma ngoro.” (Ahibirania 4:12) Nĩ ũndũ ũcio, thiĩ na mbere kwĩruta Bibilia. Ringithania ũrutani wayo na mwĩcirĩrie waku, na ũgerie gũthondeka mwĩcirĩrie waku nĩguo ũtwarane na ũrĩa Bibilia ĩrutanaga. Kiugo kĩa Ngai no gĩtũteithie kweheria rũmena rũrĩa rũngĩkorũo ‘rũrũmĩte mũno’ meciria-inĩ na ngoro-inĩ citũ.—2 Akorintho 10:4, 5.

Ũndũ Wonetwo—STEPHEN

Nĩ Aagarũrĩire Mwĩcirĩrie Wake

Stephen na andũ a famĩlĩ yao nĩ meekagwo maũndũ ma rũmena nĩ athũngũ. Ũndũ ũcio watũmire ende gwĩka maũndũ marĩa meekagwo nĩ gĩkundi kĩmwe gĩa gĩũteti, kĩrĩa kĩahũthagĩra gĩthũri gũtetera ihooto cia ũmũndũ. Thutha wa ihinda akĩambĩrĩria kwĩingĩrania na wĩki-naĩ ũtongoretio nĩ mũthutũkanio wa kĩĩrũrĩrĩ. Stephen aaugire ũũ: “Hĩndĩ ĩmwe twĩ na arata akwa nĩ tweroreire thenema cionanagia ũrĩa ngombo cia kuuma Afrika cianyamaragio tene thĩinĩ wa Amerika (U.S). Wagi ũcio wa kĩhooto watũmire twakanwo nĩ marakara, ũũ atĩ twatharĩkĩire andũ amwe ethĩ maarĩ athũngũ o rĩo, tũrĩ o kũu tweroragĩra thenema. Thutha ũcio tũgĩthiĩ matũũra-inĩ marĩa maaikaragwo nĩ athũngũ, gwetha athũngũ angĩ nĩguo tũmahũũre.”

Stephen nĩ aacenjirie mwĩcirĩrie wake biũ rĩrĩa aambĩrĩirie kwĩruta Bibilia na Aira a Jehova. Aaugire ũũ: “Nĩ ũndũ wa gũkorũo ndĩyoneire mũthutũkanio wa kĩĩrũrĩrĩ, nĩ ndonire maũndũ maangegirie gatagatĩ-inĩ ka Aira a Jehova. Kwa ngerekano, rĩrĩa Mũira ũmwe wa Jehova mũthũngũ aabatarire gũthiĩ thabarĩ, aatigĩire famĩlĩ ya andũ airũ ciana ciake mamũroragĩre. Ningĩ, famĩlĩ ĩmwe ya athũngũ, nĩ yoire mwanake ũtaarĩ mũthũngũ, wabataraga handũ ha gũikara.” Stephen nĩ aagĩire na ma atĩ Aira a Jehova makoragwo na wendo wa aarĩ na ariũ a Ithe ũmwe, ta ũrĩa Jesu aarathĩte ũngĩgaakorũo gatagatĩ-inĩ ka Akristiano a ma.—Johana 13:35.

Nĩ kĩĩ gĩateithirie Stephen gũtigana na ciĩko icio cia rũmena? Rĩandĩko rĩa Aroma 12:2 nĩ rĩamũteithirie. Aaugire ũũ: “Nĩ ndaambĩrĩirie kuona nĩ njagĩrĩire gũcenjia mwĩcirĩrie wakwa. Ngĩtua itua rĩa kwerũhia meciria makwa nĩguo ndigatuĩke o mũndũ wa kũiga thayũ tu, no nyone ũndũ ũcio ũrĩ guo njĩra ĩrĩa njega ya ũtũũro.” Stephen nĩ ahotete kweheria rũmena meciria-inĩ make kwa ihinda rĩa makĩria ma mĩaka 40.