Iga Kĩĩrĩgĩrĩro Gĩaku Kĩrĩ na Hinya

1. Nĩ kĩĩrĩgĩrĩro kĩrĩkũ Jehova atũheete?

JEHOVA nĩ atũheete kĩĩrĩgĩrĩro kĩa magegania kĩa muoyo wa tene na tene. Amwe merĩgagĩrĩra gũgaatũũra kũrĩa igũrũ tene na tene marĩ ciũmbe cia roho itangĩkua. (1 Kor. 15:50, 53) O na kũrĩ ũguo, aingĩ makoragwo na kĩĩrĩgĩrĩro gĩa gũgaatũũra gũkũ thĩ tene na tene marĩ na ũgima mwega wa mwĩrĩ na gĩkeno. (Kũg. 21:3, 4) Tũkorũo kĩĩrĩgĩrĩro gitũ nĩ gĩa gũgaatũũra kũrĩa igũrũ kana gũkũ thĩ tene na tene, kĩĩrĩgĩrĩro kĩu nĩ kĩa bata mũno harĩ ithuĩ.

2. Kĩĩrĩgĩrĩro gitũ kĩĩhocetie harĩ kĩĩ, na tũngiuga ũguo nĩkĩ?

² Kiugo “kĩĩrĩgĩrĩro,” ta ũrĩa kĩhũthĩrĩtwo Bibilia-inĩ, no gĩtaarĩrio atĩ nĩ “gũtanya atĩ maũndũ mega nĩ mageekĩka.” Kĩĩrĩgĩrĩro gitũ kĩa mahinda mokĩte nĩ kĩa ma tondũ kiumĩte kũrĩ Jehova. (Rom. 15:13) Nĩ tũĩ maũndũ marĩa eranĩire, na nĩ tũĩ atĩ hingo ciothe nĩ ahingagia kiugo gĩake. (Ndar. 23:19) Tũrĩ na ma biũ atĩ Jehova arĩ na wendi, na arĩ na hinya wa kũhingia maũndũ mothe marĩa augĩte nĩ egwĩka. Nĩ ũndũ ũcio, kĩĩrĩgĩrĩro gitũ gĩtikoragwo kĩĩhocetie harĩ maũndũ ma gwĩcirĩrio kana marĩa tũngĩenda mekĩke, no gĩkoragwo kĩĩhocetie harĩ maũndũ ma ma.

3. Tũkwarĩrĩria maũndũ marĩkũ gĩcunjĩ-inĩ gĩkĩ? (Thaburi 27:14)

³ Ithe witũ wa igũrũ nĩ atwendete, na nĩ endaga tũmwĩhoke. (Thoma Thaburi 27:14.) Kĩĩrĩgĩrĩro gitũ harĩ Jehova kĩngĩkoragwo na hinya, nĩ tũrĩhotaga gũkirĩrĩria magerio, na tũgakorũo na ũmĩrĩru na gĩkeno gũtekũmakania maũndũ marĩa tũngĩcemania namo mahinda mokĩte. Rekei tuone ũrĩa kĩĩrĩgĩrĩro gitũ gĩtũgitagĩra. Tũkwamba kwarĩrĩria ũrĩa kĩĩrĩgĩrĩro gĩtariĩ ta nanga na ngũbia. Thutha ũcio twarĩrĩrie ũrĩa tũngĩkĩra hinya kĩĩrĩgĩrĩro gitũ.

KĨĨRĨGĨRĨRO GITŨ GĨTARIĨ TA NANGA

4. Nĩ na njĩra ĩrĩkũ kĩĩrĩgĩrĩro gitũ gĩtariĩ ta nanga? (Ahibirania 6:19)

⁴ Marũa-inĩ marĩa mũtũmwo Paulo aandĩkĩire Ahibirania, aaringithanirie kĩĩrĩgĩrĩro gitũ na nanga. (Thoma Ahibirania 6:19.) Kaingĩ Paulo nĩ aathiaga na meri, kwoguo nĩ aamenyaga atĩ nanga nĩ ciahũthagĩrũo gũtũma merĩ ndĩgatindĩkwo nĩ rũhuho. Hĩndĩ ĩmwe akuuĩtwo nĩ meri, nĩ kwagĩire na kĩhuhũkanio kĩnene. Hĩndĩ ya kĩhuhũkanio kĩu, nĩ oonire atwarithia a meri magĩikia nanga maĩ-inĩ, nĩguo meri ndĩgatwarũo mahiga-inĩ. (Atũm. 27:29, 39-41) O ta ũrĩa nanga ĩrũmagia meri, noguo kĩĩrĩgĩrĩro gitũ gĩtũteithagia gũikara tũrũmĩte wega kĩĩroho nĩguo tũtikeherere Jehova rĩrĩa twacemania na maũndũ maritũ. Kĩĩrĩgĩrĩro gitũ nĩ gĩtũteithagia gũikara tũhoreire rĩrĩa twacemania na mathĩna tondũ nĩ twĩtĩkagia atĩ maũndũ nĩ marĩagĩra. Ririkana Jesu aaugire atĩ nĩ tũngĩkaanyarirũo. (Joh. 15:20) Kwoguo gwĩcũrania igũrũ rĩgiĩ irathimo iria Jehova atwĩrĩire mahinda mokĩte, nĩ gũtũteithagia gũthiĩ na mbere kũmũtungatĩra.

5. Kĩĩrĩgĩrĩro gĩateithirie Jesu atĩa rĩrĩa aangʼethanĩire na gĩkuũ?

⁵ Ta wĩcirie ũrĩa kĩĩrĩgĩrĩro gĩateithirie Jesu gũikara arĩ mwĩhokeku o na gũtuĩka nĩ aamenyaga atĩ nĩ angĩakuire gĩkuũ kĩa ruo. Mũthenya wa Pentekoste ya 33 Mahinda Maitũ (M.M.), mũtũmwo Petero nĩ aagwetire ciugo cia ũrathi irĩ thĩinĩ wa Thaburi agĩtaarĩria ũrĩa Jesu oonanirie ũmĩrĩru hĩndĩ ya gĩkuũ gĩake. Aaugire ũũ: “Ngũtũũra ndĩ na kĩĩrĩgĩrĩro; tondũ ndũkandiganĩria thĩinĩ wa Mbĩrĩra, o na kana ũreke ũrĩa waku mwĩhokeku abuthe. . . . Nĩ ũgaatũma njiyũrĩrĩrũo nĩ gĩkeno kĩnene ndĩ mbere yaku.” (Atũm. 2:25-28; Thab. 16:8-11) O na gũtuĩka Jesu nĩ aamenyaga atĩ nĩ angĩakuire, aarĩ na kĩĩrĩgĩrĩro kĩrũmu atĩ Ngai nĩ angĩamũriũkirie na atĩ nĩ angĩagĩire na gĩkeno gĩa gũcoka rĩngĩ kũrĩa igũrũ kũrĩ Ithe.—Ahib. 12:2, 3.

6. Mũrũ wa Ithe witũ ũmwe aaugire atĩa igũrũ rĩgiĩ kĩĩrĩgĩrĩro?

⁶ Kĩĩrĩgĩrĩro nĩ gĩteithĩtie aarĩ na ariũ a Ithe witũ aingĩ gũkirĩrĩria. Kwa ngerekano, ta wĩcirie ũhoro wa mũrũ wa Ithe witũ Leonard Chinn, ũrĩa waikaraga bũrũri-inĩ wa Ngeretha. Hĩndĩ ya Mbaara ya Mbere ya Thĩ, nĩ oohirũo njera nĩ ũndũ wa kũrega kũingĩra njeshi-inĩ. Kwa ihinda rĩa mĩeri ĩĩrĩ, oohirũo thero arĩ wiki na thutha ũcio akĩrutithio wĩra mũritũ. Thutha ũcio aandĩkire ũũ: “Maũndũ marĩa ndagereire nĩ maandeithirie kũmenya atĩ kĩĩrĩgĩrĩro nĩ kĩa bata mũno nĩguo tũhote gũkirĩrĩria. Nĩ tũigĩirũo kĩonereria nĩ Jesu, atũmwo, na anabii, na tũrĩ na ciĩranĩro njega iria irĩ thĩinĩ wa Bibilia. Maũndũ macio mothe nĩ matũmaga tũkorũo na kĩĩrĩgĩrĩro kĩrĩ na hinya kĩa mahinda mokĩte na magatũteithia gũkirĩrĩria.” Kĩĩrĩgĩrĩro gĩatariĩ ta nanga harĩ Leonard, na no gĩkorũo gĩtariĩ ta nanga harĩ ithuĩ.

7. Kĩĩrĩgĩrĩro gitũ gĩkagĩrũo hinya atĩa rĩrĩa twacemania na magerio? (Aroma 5:3-5; Jakubu 1:12)

⁷ Rĩrĩa twakirĩrĩria magerio na tũkona Jehova agĩtũteithia, nĩ tũmenyaga atĩ nĩ tũretĩkĩrĩka nĩwe. Ũndũ ũcio nĩ wĩkĩraga hinya kĩĩrĩgĩrĩro gitũ. (Thoma Aroma 5:3-5; Jakubu 1:12.) Kwoguo kĩĩrĩgĩrĩro gitũ nĩ kĩgĩaga hinya makĩria gũkĩra ũrĩa kĩarĩ rĩrĩa twerutire ũhoro wa ma. Shaitani endaga tũtoorio nĩ magerio, no kũgerera ũteithio wa Jehova no tũhote gũkirĩrĩria igerio o rĩothe.

KĨĨRĨGĨRĨRO GĨTARIĨ TA NGŨBIA

8. Nĩ na njĩra ĩrĩkũ kĩĩrĩgĩrĩro gĩtariĩ ta ngũbia? (1 Athesalonike 5:8)

⁸ Bibilia ningĩ ĩringithanagia kĩĩrĩgĩrĩro gitũ na ngũbia. (Thoma 1 Athesalonike 5:8.) Mũthigari ekagĩra ngũbia nĩguo agitĩre mũtwe wake kuumana na tharĩkĩro cia thũ ciake. Mbaara-inĩ itũ ya kĩĩroho, nĩ tũbataraga kũgitĩra meciria maitũ kuumana na tharĩkĩro cia Shaitani. Ahũthagĩra magerio ma mĩthemba mĩingĩ kũgeria gũthũkia mwĩcirĩrie witũ. O ta ũrĩa ngũbia ĩgitagĩra mũtwe wa mũthigari, no taguo kĩĩrĩgĩrĩro gitũ kĩgitagĩra mwĩcirĩrie witũ nĩguo tũtũũrie wĩhokeku witũ harĩ Jehova.

9. Gũthiaga atĩa harĩ andũ arĩa matakoragwo na kĩĩrĩgĩrĩro?

⁹ Kĩĩrĩgĩrĩro gitũ kĩa muoyo wa tene na tene nĩ kĩrĩtũteithagia gũtua matua ma ũũgĩ. Mũgarũ na ũguo, kĩĩrĩgĩrĩro gitũ kĩngĩkorũo gĩtarĩ na hinya na twambĩrĩrie gwĩciria ũhoro wĩgiĩ merirĩria maitũ, ũndũ ũcio no ũtũme tweherie meciria maitũ harĩ kĩĩrĩgĩrĩro gitũ kĩa muoyo wa tene na tene. Ta wĩcirie ũhoro wa Akristiano amwe maatũũraga itũũra-inĩ rĩa tene rĩa Korintho. Nĩ maatigĩte gwĩtĩkia kĩĩranĩro kĩa bata kĩa Ngai kĩgiĩ kũriũka. (1 Kor. 15:12) Paulo aandĩkire atĩ andũ ta acio arĩa matetĩkĩtie ũhoro wĩgiĩ kũriũka, matũũraga nogetha mahingie merirĩria mao ene. (1 Kor. 15:32) Andũ aingĩ ũmũthĩ arĩa matarĩ na kĩĩrĩgĩrĩro harĩ ciĩranĩro cia Ngai, mekaga ũrĩa wothe mangĩhota nĩguo makorũo na gĩkeno ihinda-inĩ rĩrĩ. Ngũrani nao, ithuĩ nĩ twĩhokaga ciĩranĩro cia Ngai ciĩgiĩ mahinda mokĩte. Kĩĩrĩgĩrĩro gitũ gĩtariĩ ta ngũbia ya mũhaano ĩrĩa ĩgitagĩra meciria maitũ na ĩgatũteithia kwaga gwĩciria o ũhoro witũ ithuĩ ene, ũndũ ũrĩa ũngĩthũkia ũrata witũ na Jehova.—1 Kor. 15:33, 34.

10. Kĩĩrĩgĩrĩro kĩngĩtũgitĩra atĩa kuumana na mwĩcirĩrie mũũru?

¹⁰ Ngũbia itũ ya kĩĩrĩgĩrĩro ningĩ no ĩtũteithie gwĩthema mwĩcirĩrie wa atĩ tũtingĩhota gũkenia Jehova. Kwa ngerekano, andũ amwe no meĩre ũũ: ‘Niĩ ndirĩ ũmwe wa andũ arĩa magaatũũra tene na tene. Ndigwĩciria nĩ njagĩrĩire tondũ ndirona ta ingĩhota gũtũũra kũringana na ithimi cia Ngai.’ Mwĩcirĩrie ta ũcio no taguo Elifazu ũrĩa wathiĩte kũũmĩrĩria Ayubu aarĩ naguo. Elifazu aaugire ũũ: “Mũndũ-rĩ, nĩwe kĩ atĩ nĩguo akorũo arĩ mũtheru?” Agĩcoka akiuga ũũ igũrũ rĩgiĩ Ngai: “Atĩrĩrĩ, Ngai ndakoragwo ehokete arĩa ake atheru, na nginya igũrũ rĩtikoragwo rĩrĩ itheru maitho-inĩ make.” (Ayub. 15:14, 15) Macio nĩ maheeni moru mũno! Ririkana atĩ Shaitani nĩwe wendaga twĩcirie na njĩra ta ĩyo. Nĩ oĩ atĩ ũngĩthiĩ na mbere gwĩciria na njĩra ĩyo, kĩĩrĩgĩrĩro gĩaku no gĩthire. Kwoguo, reganaga na maheeni ta macio na ũige meciria maku harĩ ciĩranĩro cia Jehova. Koragwo na ma atĩ nĩ endaga ũgaatũũra tene na tene na atĩ nĩ arĩgũteithagia nĩguo ũkinyĩre muoroto ũcio.—1 Tim. 2:3, 4.

IGA KĨĨRĨGĨRĨRO GĨAKU KĨRĨ NA HINYA

11. Nĩkĩ nĩ twagĩrĩirũo gweterera tũkirĩrĩirie kũhinga gwa kĩĩrĩgĩrĩro gitũ?

¹¹ Ndũkoragwo ũrĩ ũndũ mũhũthũ hingo ciothe kũiga kĩĩrĩgĩrĩro gitũ kĩrĩ na hinya. Rĩmwe no tuone ta Ngai aikarĩte mũno agĩkaahingia ciĩranĩro ciake. O na kũrĩ ũguo, tondũ Jehova atũũrĩte tene na tene, muonere wake wa mahinda nĩ ngũrani na witũ. (2 Pet. 3:8, 9) Akaahingia ciĩranĩro ciake na njĩra ĩrĩa njega biũ, ĩndĩ no age gũcihingia rĩrĩa tũrerĩgĩrĩra. Nĩ kĩĩ kĩngĩtũteithia kũiga kĩĩrĩgĩrĩro gitũ kĩrĩ na hinya o tũgĩetagĩrĩra tũkirĩrĩirie Ngai ahingie ciĩranĩro ciake?—Jak. 5:7, 8.

12. Kũringana na Ahibirania 11:1, 6, kĩĩrĩgĩrĩro kĩhutanĩtie atĩa na wĩtĩkio?

¹² Tũngĩikara hakuhĩ na Jehova no tũhote gũthiĩ na mbere kũiga kĩĩrĩgĩrĩro gitũ kĩrĩ na hinya tondũ nĩwe ũkaahingia kĩĩrĩgĩrĩro kĩu. Nĩguo tũkorũo na kĩĩrĩgĩrĩro, no mũhaka tũkorũo na wĩtĩkio atĩ Jehova arĩ kuo na atĩ “nĩ aheaga arĩa mamũcaragia na kĩyo ngerenwa.” (Thoma Ahibirania 11:1, 6.) Angĩkorũo nĩ twĩtĩkĩtie biũ atĩ Jehova arĩ kuo, nĩ tũrĩkoragwo na ma biũ atĩ nĩ akaahingia maũndũ mothe marĩa atwĩrĩire. Rekei twarĩrĩrie maũndũ tũngĩka twĩkĩre hinya ũrata witũ hamwe na Jehova na nĩ ũndũ ũcio tũthiĩ na mbere kũiga kĩĩrĩgĩrĩro gitũ kĩrĩ na hinya.

13. Tũngĩkuhĩrĩria Ngai atĩa?

¹³ Hoyaga Jehova na ũgathoma Kiugo gĩake. O na gũtuĩka tũtingĩona Jehova, no tũhote kũmũkuhĩrĩria. No twarie nake na njĩra ya mahoya tũrĩ na ma atĩ nĩ egũtũthikĩrĩria. (Jer. 29:11, 12) No tũthikĩrĩrie Ngai na njĩra ya gũthoma na gwĩcũrania Kiugo gĩake. Rĩrĩa twathoma ũrĩa Jehova aarũmbũyagia andũ arĩa maarĩ ehokeku mahinda-inĩ ma tene, kĩĩrĩgĩrĩro gitũ nĩ kĩrĩgĩaga na hinya makĩria. Maũndũ mothe marĩ Kiugo-inĩ kĩa Ngai “maandĩkirũo marĩ ma gũtũruta, nĩgetha kũgerera ũkirĩrĩria witũ na kũgerera kũũmĩrĩrio nĩ Maandĩko tũgĩe na kĩĩrĩgĩrĩro.”—Rom. 15:4.

14. Gwĩcũrania maũndũ marĩa Jehova ekĩire andũ angĩ kũngĩtũteithia atĩa?

¹⁴ Wĩcũranie ũrĩa Jehova ahingĩtie ciĩranĩro ciake. Ta wĩcirie ũrĩa Ngai eekĩire Iburahimu na Sara. Nĩ maakinyĩtie mĩaka ya ũkũrũ, ũndũ matangĩagĩire ciana. No Ngai nĩ aamerĩire atĩ nĩ mangĩagĩire mwana. (Kĩam. 18:10) Hihi Iburahimu aarĩ na mawoni marĩkũ? Bibilia yugaga ũũ: “Aarĩ na wĩtĩkio wehocetie harĩ kĩĩrĩgĩrĩro atĩ nĩ angĩgaatuĩka ithe wa ndũrĩrĩ nyingĩ.” (Rom. 4:18) O na gũtuĩka kũringana na muonere wa ũmũndũ ũndũ ũcio nĩ ũngĩonekire ta ũtangĩhoteka, Iburahimu aarĩ na ma atĩ Jehova nĩ angĩahingirie kĩĩranĩro gĩake. Na Jehova ndaaconorithirie mũthuri ũcio warĩ mwĩhokeku. (Rom. 4:19-21) Ngerekano ta icio nĩ itũrutaga atĩ hingo ciothe no twĩhoke atĩ Jehova nĩ arĩhingagia ciĩranĩro ciake, o na iria ingĩoneka ta itangĩhinga.

15. Twagĩrĩirũo gwĩcũrania maũndũ marĩa Ngai atwĩkĩire nĩkĩ?

¹⁵ Wĩcũranie maũndũ marĩa Jehova agwĩkĩire. Wĩcirie ũrĩa ũgunĩkĩte we mwene nĩ ũndũ wa kũhinga gwa ciĩranĩro iria irĩ thĩinĩ wa Kiugo kĩa Ngai. Kwa ngerekano, Jesu nĩ aatwĩrĩire atĩ Jehova nĩ arĩtũheaga mabataro maitũ ma o mũthenya. (Mat. 6:32, 33) Ningĩ Jesu nĩ akwĩrĩire atĩ Jehova nĩ arĩkũheaga roho mũtheru rĩrĩa wamũhoya. (Luk. 11:13) Jehova nĩ ahingĩtie ciĩranĩro icio. No gũkorũo o na nĩ weciria ũhoro wĩgiĩ ciĩranĩro ingĩ akũhingĩirie. Kwa ngerekano, nĩ eranĩire atĩ nĩ arĩkuohagĩra, nĩ arĩkũmagĩrĩria, na nĩ arĩkũheaga irio cia kĩĩroho. (Mat. 6:14; 24:45; 2 Kor. 1:3) Wecũrania igũrũ rĩgiĩ maũndũ marĩa Ngai agwĩkĩire, nĩ ũrĩkagĩra kĩĩrĩgĩrĩro gĩaku hinya harĩ maũndũ marĩa arĩgwĩkĩra ihinda rĩũkĩte.

KENAGA NĨ ŨNDŨ WA KĨĨRĨGĨRĨRO

16. Nĩkĩ kĩĩrĩgĩrĩro nĩ kĩheo kĩa goro?

¹⁶ Kĩĩrĩgĩrĩro gitũ kĩa muoyo wa tene na tene nĩ kĩheo kĩa goro kuuma kũrĩ Ngai. Tũrĩ na kĩĩrĩgĩrĩro kĩega kĩa ihinda rĩũkĩte kĩrĩa tũrĩ na ma atĩ nĩ gĩkaahinga. Gĩtariĩ ta nanga tondũ nĩ gĩtũteithagia gwĩtiria magerio na kũnyarirũo, o na rĩrĩa tũngʼetheire gĩkuũ. Ningĩ gĩtariĩ ta ngũbia tondũ nĩ gĩtũteithagia kũgitĩra meciria maitũ tũkahota kũregana na maũndũ marĩa moru na tũgeka maũndũ marĩa magĩrĩire. Kĩĩrĩgĩrĩro gitũ kĩrĩa gĩkoragwo kĩĩhocetie harĩ Bibilia nĩ gĩtũteithagia gũkuhĩrĩria Ngai makĩria, na gĩgatũteithia kuona wendo mũnene ũrĩa akoragwo naguo gũtwerekera. Nĩ tũgunĩkaga mũno twaiga kĩĩrĩgĩrĩro gitũ kĩrĩ na hinya.

17. Nĩkĩ kĩĩrĩgĩrĩro gitũ nĩ gĩtũrehagĩra gĩkeno?

¹⁷ Marũa-inĩ marĩa mũtũmwo Paulo aandĩkĩire Aroma, atwĩkĩrĩte ngoro ‘tũkenage nĩ ũndũ wa kĩĩrĩgĩrĩro.’ (Rom. 12:12) Paulo nĩ aakenaga tondũ nĩ aamenyaga atĩ angĩatũũrire arĩ mwĩhokeku nĩ angĩaheirũo muoyo wa tene na tene kũrĩa igũrũ. Rekei o na ithuĩ tũkenage nĩ ũndũ wa kĩĩrĩgĩrĩro gitũ tondũ tũrĩ na ma atĩ Jehova nĩ akaahingia ciĩranĩro ciake. O ta ũrĩa mwandĩki wa Thaburi aandĩkire, “gũkena nĩ mũndũ ũrĩa . . . ũigaga kĩĩrĩgĩrĩro gĩake harĩ Jehova Ngai wake, . . . Ũcio ũtũũraga arĩ mwĩhokeku hingo ciothe.”—Thab. 146:5, 6.