Ũrĩa Kĩũngano Kĩĩgerekanagia na Jehova Gĩkĩrũmbũyania na Arĩa Mehĩtie

1. Jehova endaga andũ othe meke atĩa?

JEHOVA oombire andũ marĩ na wĩyathi wa gwĩthuurĩra. Nĩ tũhũthagĩra kĩheo kĩu rĩrĩa rĩothe tũratua matua. Itua rĩrĩa rĩa bata makĩria mũndũ angĩtua nĩ rĩa kwĩyamũrĩra Jehova na gũtuĩka wa famĩlĩ yake. Jehova endaga andũ othe meke ũguo. Nĩkĩ? Tondũ nĩ endete andũ mũno na nĩ amendagĩra maũndũ mega. Nĩ endaga makorũo na ũrata wa hakuhĩ hamwe nake na matũũre tene na tene.—Gũcok. 30:​19, 20; Gal. 6:​7, 8.

2. Jehova erĩgagĩrĩra andũ arĩa mehĩtie no makaga kwĩrira meke atĩa? (1 Johana 2:1)

² O na kũrĩ ũguo, Jehova ndatindĩkagĩrĩria mũndũ amũtungatĩre. Nĩ etĩkĩrĩtie o mũndũ gwĩtuĩra ũrĩa ekwenda. Ĩ Mũkristiano mũbatithie angĩka mehia maritũ? Angĩaga kwĩrira, no mũhaka eherio kĩũngano-inĩ. (1 Kor. 5:13) No o na hĩndĩ ta ĩyo, Jehova no erĩgagĩrĩra atĩ mũndũ ũcio wĩhĩtie nĩ ekũmũcokerera. O na ũndũ ũmwe wa bata watũmire Jehova arute ũkũũri, nĩ atĩ nĩ ũhotithagia arĩa merirĩte kuoherũo mehia mao. (Thoma 1 Johana 2:1.) Ngai witũ ũrĩ wendo nĩ oragia arĩa mehĩtie merire.—Zek. 1:3; Rom. 2:4; Jak. 4:8.

3. Tũkwarĩrĩria maũndũ marĩkũ gĩcunjĩ-inĩ gĩkĩ?

³ Jehova endaga tũgĩe na mawoni ta make kwerekera mehia na andũ arĩa mehĩtie. Gĩcunjĩ gĩkĩ nĩ gĩkwarĩrĩria ũrĩa tũngĩka ũguo. Tũgĩthoma, rora wone maũndũ maya: (1) ũrĩa kĩũngano gĩa Korintho karine-inĩ ya mbere kĩarũmbũyanirie na mũndũ wekĩte mehia maritũ, (2) ũtongoria ũrĩa mũtũmwo Paulo aaheanire rĩrĩa mũndũ ũcio eeririre, na (3) ũndũ ũrĩa rũgano rũu rwa Bibilia rũraguũria igũrũ rĩgiĩ mawoni ma Jehova kwerekera Mũkristiano wĩkĩte mehia maritũ.

ŨRĨA KĨŨNGANO KĨARŨMBŨYANIRIE NA MŨNDŨ WEKĨTE MEHIA MARITŨ

4. Nĩ ũndũ ũrĩkũ wekĩkĩte kĩũngano-inĩ gĩa Korintho karine-inĩ ya mbere? (1 Akorintho 5:​1, 2)

⁴ Thoma 1 Akorintho 5:​1, 2. Paulo arĩ rũgendo-inĩ rwake rwa gatatũ rwa ũmishonarĩ, nĩ aaiguire ũhoro wa kũmakania wekĩkĩte kĩũngano-inĩ gĩa Korintho kĩrĩa gĩakoretwo kĩambĩrĩrio. Nĩ harĩ mũrũ wa Ithe witũ kĩũngano-inĩ kĩu wakomaga na mũtumia wa ithe. Ũcio warĩ mũtugo wĩ magigi ‘ũtoonekete nginya thĩinĩ wa ndũrĩrĩ’! No Akristiano acio nĩ maarekete athiĩ na mbere na mũtugo ũcio arĩ o kĩũngano-inĩ, na no gũkorũo amwe matioonaga harĩ na thĩna. No kũhoteke andũ amwe meeciragia atĩ ũndũ ũcio woonanagia ũrĩa Ngai arĩ mũigua tha na ũrĩa ataũkagĩrũo nĩ andũ matarĩ akinyanĩru. No Jehova ndarekagĩrĩria mehia mathiĩ na mbere gwĩkwo gatagatĩ-inĩ ka andũ ake. Hatarĩ nganja, mũndũ ũcio nĩ aathũkagĩria kĩũngano rĩĩtwa nĩ ũndũ wa mũtugo ũcio wa ũũra-thoni. Ningĩ no gũkorũo nĩ aatũmĩte Akristiano arĩa maarĩ arata ake mende kwĩgerekania nake. Gũkĩrĩ ũguo-rĩ, nĩ ũtongoria ũrĩkũ Paulo aaheire kĩũngano kĩu?

5. Paulo eerire kĩũngano gĩa Korintho gĩke atĩa, na eendaga kuuga atĩa? (1 Akorintho 5:13) (Ningĩ rora mbica.)

⁵ Thoma 1 Akorintho 5:13. Paulo nĩ aamandĩkĩire marũa atongoretio nĩ roho akĩmeera atĩ mũndũ ũcio wehĩtie na akaga kwĩrira abatiĩ kweherio kĩũngano-inĩ. Hihi Akristiano ehokeku maabatiĩ kũrũmbũyania nake atĩa? Paulo aameerire ‘matige gũthiaga thiritũ’ nake. Hihi eendaga kuuga atĩa? Paulo aamataarĩirie atĩ watho ũcio wahutĩtie nginya ‘kwaga kũrĩanĩra na mũndũ ta ũcio.’ (1 Kor. 5:11) Rĩrĩa mũrarĩanĩra na mũndũ, nĩ ũhũthũ kũhũthĩra mahinda kwaranĩria nake na o na mwĩkore mũkĩnyitanĩra nginya maũndũ-inĩ mangĩ. Kwoguo Paulo oonanagia atĩ kĩũngano kĩu gĩtiabatiĩ kũhũthĩra mahinda na mũndũ ũcio maũndũ-inĩ matarĩ ma o mũhaka. Ũndũ ũcio nĩ ũngĩagitĩrire kĩũngano kuumana na ũgucania wake mũũru. (1 Kor. 5:​5-7) Makĩria ma ũguo, kwaga kũnyitanĩra na mũndũ ũcio nĩ kũngĩamũteithirie kuona ũrĩa araihanĩrĩirie na Jehova, na ũndũ ũcio ũtũme acokererũo nĩ meciria na akinyĩrĩre kwĩrira.

6. Kĩũngano kĩaiyũkirie atĩa ũtaaro wa Paulo, na mũndũ ũcio wehĩtie eekire atĩa?

⁶ Thutha wa Paulo gũtũmĩra Akristiano a Korintho marũa, nĩ aambĩrĩirie kwĩyũria ũrĩa mekũiyũkia ũtaaro wake. Mũthia-inĩ Tito nĩ aareheire Paulo ũhoro wamwĩkĩrire ngoro. Kĩũngano kĩu nĩ kĩarũmĩrĩire ũtaaro wa Paulo na gĩkĩeheria mwĩhia ũcio kĩũngano-inĩ. (2 Kor. 7:​6, 7) Makĩria ma ũguo, mĩeri ĩrĩa yarũmĩrĩire kuuma Paulo amatũmĩra marũa macio, mũndũ ũcio nĩ eerirĩte mehia make, akagarũrĩra mĩthiĩre yake na mwerekera wake, na akambĩrĩria kũrũmĩrĩra ithimi cia Jehova cia ũthingu. (2 Kor. 7:​8-11) Hihi Paulo aaheire kĩũngano kĩu ũtongoria ũrĩkũ?

ŨRĨA KĨŨNGANO KĨABATIĨ KŨRŨMBŨYANIA NA MŨNDŨ ŨCIO ERIRA

7. Kweheria mwĩhia ũcio kĩũngano-inĩ kwarĩ na maumĩrĩra marĩkũ mega? (2 Akorintho 2:​5-8)

⁷ Thoma 2 Akorintho 2:​5-8. Paulo aaugire atĩ ‘iherithia rĩrĩa andũ aingĩ maaherithĩtie mũndũ ũcio rĩarĩ rĩiganu.’ Na njĩra ĩngĩ, iherithia rĩu nĩ rĩahingĩtie muoroto warĩo. Muoroto ũrĩkũ? Wa gũteithia mũndũ ũcio akinyĩrĩre kwĩrira.—Ahib. 12:11.

8. Paulo aacokire akĩhe kĩũngano kĩu ũtongoria ũrĩkũ?

⁸ Nĩ ũndũ ũcio, Paulo aaheire kĩũngano kĩu ũtongoria ũyũ: ‘Oherai mũrũ wa Ithe witũ ũcio wĩhĩtie na mũmũũmĩrĩrie,’ na “mũmuonie atĩ nĩ mũmwendete.” Rora wone atĩ nĩ harĩ ũndũ ũngĩ Paulo eendaga kĩũngano kĩu gĩke makĩria ma o gũcokia mũndũ ũcio gatagatĩ-inĩ ka andũ a Jehova. Nĩ eendaga monie mũndũ ũcio kũgerera ciugo na ciĩko ciao atĩ nĩ mamuoheire biũ, na atĩ nĩ mamwendete. Ũndũ ũcio nĩ ũngĩatũmire aigue arĩ mũciĩ thutha wa gũcoka kĩũngano-inĩ.

9. Nĩ kĩĩ kĩngĩkorũo gĩatũmaga andũ amwe maritũhĩrũo kuohera mũndũ ũcio werirĩte?

⁹ Hihi kũrĩ andũ amwe maaritũhagĩrũo kwamũkĩra mũndũ ũcio werirĩte? Bibilia ndĩtwĩrĩte, ĩndĩ no kũhoteke nĩ kwarĩ nao maaritũhagĩrũo. Ma nĩ atĩ ciĩko ciake nĩ ciatuurithĩtie andũ kĩũngano-inĩ na hihi ikarehera amwe gĩconoko, na kwoguo no kũhoteke maarĩ o na ruo rũu ngoro-inĩ. Angĩ nao hihi moonaga ũtarĩ ũndũ wa kĩhooto kwamũkĩra mũndũ ta ũcio na wendo mũingĩ ũguo, na nĩguo o maakoretwo makĩĩrutanĩria gũtũũria mĩthiĩre mĩega. (Ringithania Luka 15:​28-30.) No hihi warĩ ũndũ wa bata nĩkĩ harĩ kĩũngano kuonia mũrũ wa Ithe witũ ũcio wendo wa kuuma ngoro thutha wa gũcoka?

10-11. Hihi kũngĩathiire atĩa korũo athuri a kĩũngano nĩ maagire kuohera mũndũ ũcio werirĩte?

¹⁰ Ta wĩcirie ũrĩa kũngĩathiire athuri a kĩũngano mangĩagire gũcokia mũndũ ũcio kĩũngano-inĩ thutha wa kwĩrira, kana aarĩ na ariũ a Ithe witũ mage kũmuonia wendo thutha wa gũcoka. Mũndũ ũcio nĩ angĩatooririo nĩ “kĩeha kĩingĩ.” Ũndũ ũcio nĩ ũngĩatũmire one ta atangĩetĩkĩrĩkire rĩngĩ kĩũngano-inĩ. O na hihi nĩ angĩakuire ngoro aremererũo nĩ gũthondeka ũrata wake na Jehova.

¹¹ Ũndũ ũngĩ o na mũũru makĩria nĩ atĩ, korũo aarĩ na ariũ a Ithe witũ arĩa angĩ kĩũngano-inĩ nĩ maagire kuohera mũndũ ũcio werirĩte, nĩ mangĩathũkirie ũrata wao na Jehova. Nĩkĩ? Tondũ handũ ha kwĩgerekania na Jehova na njĩra ya kuohera mũndũ ũcio, mangĩakorirũo makĩĩgerekania na Shaitani ũrĩa ũtakoragwo na tha na ũcayanĩri. Na kwoguo mangĩakorirũo magĩtĩkĩria Shaitani amahũthĩre kũniina mũndũ ũcio kĩĩroho.—2 Kor. 2:​10, 11; Ef. 4:27.

12. Kĩũngano gĩa Korintho kĩngĩegerekanirie atĩa na Jehova?

¹² Gũkĩrĩ ũguo-rĩ, kĩũngano gĩa Korintho kĩngĩegerekanirie atĩa na Jehova handũ ha Shaitani? Na njĩra ya kũrũmbũyania na arĩa merirĩte o ta ũrĩa Jehova arũmbũyanagia nao. Ta rora ũrĩa andĩki amwe a Bibilia maaugire igũrũ rĩgiĩ Jehova. Daudi aaugire atĩ Jehova nĩ ‘mwega na akoragwo ehaarĩirie kuohanĩra.’ (Thab. 86:5) Nake Mika aandĩkire ũũ: “Nĩ Ngai ũrĩkũ ũhaana tawe, ũrĩa wohanagĩra mahĩtia na akaga gũtindanĩra na mehia?” (Mik. 7:18) Isaia nake aaugire: “Mũndũ ũrĩa mwaganu nĩ atigane na mĩthiĩre yake na ũrĩa wĩkaga maũndũ moru atigane na methugunda make; nĩ acokerere Jehova, na nĩ ekũmũiguĩra tha, nĩ acokerere Ngai witũ, nĩ gũkorũo nĩ ekuohanĩra na njĩra nene.”—Isa. 55:7.

13. Nĩkĩ warĩ ũndũ mwagĩrĩru gũcokia mũndũ ũcio kĩũngano-inĩ hatarĩ kũmaĩrĩria? (Rora gathandũkũ, “Mũndũ Ũrĩa Weeheretio Kĩũngano-inĩ gĩa Korintho Aacokirio Rĩ?”)

¹³ Aarĩ na ariũ a Ithe witũ a Korintho maabatiĩ kwĩgerekania na Jehova na njĩra ya kwamũkĩra mũndũ ũcio werirĩte, na mamuonie atĩ nĩ mamwendete. Tondũ kĩũngano nĩ kĩarũmĩrĩire ũtongoria wa Paulo wĩgiĩ kwamũkĩra mũndũ ũcio werirĩte, nĩ kĩoonanirie atĩ nĩ “[gĩathĩkaga] maũndũ-inĩ mothe.” (2 Kor. 2:9) O na gũtuĩka mũndũ ũcio aaikarire o mĩeri mĩnini kuuma eherio kĩũngano-inĩ, kũrũngwo na njĩra ĩyo nĩ kwamũteithĩtie gũkinyĩrĩra kwĩrira. Kwoguo hatiarĩ na gĩtũmi gĩa kũmaĩrĩria kũmũcokia kĩũngano-inĩ.

ŨRĨA TŨNGĨĨGEREKANIA NA KĨHOOTO NA THA CIA JEHOVA

14-15. Tũreruta atĩa kuumana na ũrĩa kĩũngano gĩa Korintho kĩarũmbũyanirie na mũndũ ũcio wehĩtie? (2 Petero 3:9) (Ningĩ rora mbica.)

¹⁴ Rũgano rwĩgiĩ ũrĩa kĩũngano gĩa Korintho kĩarũmbũyanirie na mũndũ ũcio wehĩtie rwandĩkirũo ‘rũrĩ rwa gũtũruta.’ (Rom. 15:4) Rũgano rũu rũratũruta atĩ Jehova ndarekagĩrĩria mehia maritũ mathiĩ na mbere gwĩkwo gatagatĩ-inĩ ka andũ ake. Andũ amwe no mecirie atĩ tondũ Jehova nĩ arĩ tha, no etĩkĩrie mũndũ ũtarerira athiĩ na mbere gũikara kĩũngano-inĩ, no ũguo tiguo Jehova onanagia tha. O na gũtuĩka Jehova nĩ mũigua tha, ũguo ti kuuga atĩ etĩkagĩria mĩtugo o yothe kana akaregeria ithimi ciake. (Jud. 4) Gwĩka ũguo ti kuonania tha, tondũ ũndũ ũcio ũngĩkorũo ũkĩingĩria kĩũngano ũgwati-inĩ.—Thim. 13:20; 1 Kor. 15:33.

¹⁵ O na kũrĩ ũguo, nĩ tũreruta atĩ Jehova ndendaga mũndũ o na ũmwe akaaniinwo. Endaga kũngĩhoteka andũ a mĩthemba yothe makaahonoka. Nĩ onanagia tha harĩ andũ arĩa magarũrĩire mĩthiĩre yao na makerutanĩria gũthondeka ũrata wao hamwe nake. (Ezek. 33:11; thoma 2 Petero 3:9.) Kwoguo rĩrĩa mũndũ ũcio warĩ kĩũngano-inĩ gĩa Korintho eeririre na agĩtigana na mĩthiĩre yake mĩũru, Jehova nĩ aahũthĩrire Paulo gũtaarĩria Akristiano acio atĩ mũndũ ũcio aabatiĩ kuoherũo na kwamũkĩrũo wega kĩũngano-inĩ.

16. Kuona ũrĩa kĩũngano gĩa Korintho kĩarũmbũyanirie na mũndũ ũcio wehĩtie gwatũma ũigue atĩa?

¹⁶ Gũthuthuria ũrĩa kĩũngano gĩa Korintho kĩarũmbũyanirie na mũndũ ũcio wehĩtie nĩ gwatũteithia kuona ũrĩa Jehova arũmbũyanagia na andũ na njĩra ya wendo, ũthingu, na kĩhooto. (Thab. 33:5) Na githĩ ũndũ ũcio ndũratũtindĩka kũgooca Jehova o na makĩria? Nĩ tũbataraga wohanĩri wake, tondũ ithuothe tũrĩ ehia. Ningĩ nĩ tũcokagĩria Jehova ngatho nĩ ũndũ wa ũkũũri, tondũ nĩguo ũtũmaga tuoherũo mehia. Nĩ ũndũ wa gwĩkĩra ngoro kũmenya atĩ Jehova nĩ endete andũ ake mũno, na amendagĩra maũndũ mega!

17. Nĩ ciũria irĩkũ ciarĩrĩirio icunjĩ-inĩ iria irũmĩrĩire?

¹⁷ Ĩ ũmũthĩ ũyũ tũbatiĩ kũrũmbũyania atĩa na mũndũ wĩkĩte mehia maritũ? Athuri a kĩũngano mangĩĩgerekania atĩa na Jehova harĩ gũteithia mũndũ wĩhĩtie nĩguo akinyĩrĩre kwĩrira? Kĩũngano kĩbatiĩ kũrũmbũyania atĩa na mũndũ thutha wa kweherio kana gũcokio kĩũngano-inĩ? Ciũria icio nĩ ciarĩrĩirio icunjĩ-inĩ iria irũmĩrĩire.