GĨCUNJĨ KĨA WĨRUTI GĨA 15
RWĨMBO NA. 30 Ngai Wakwa, Mũrata Wakwa, na Baba
“Gũkuhĩrĩria Ngai Nĩkuo Kwega” na Ithuĩ
“Niĩ-rĩ, gũkuhĩrĩria Ngai nĩkuo kwega na niĩ.”—THAB. 73:28.
ŨNDŨ ŨRĨA WARĨRĨIRIO
Nĩ tũkuona ũrĩa tũngĩkuhĩrĩria Jehova makĩria na ũrĩa tũgunĩkaga tweka ũguo.
1-2. (a) Tũbatiĩ gwĩka atĩa nĩguo tũkũrie ũrata wa hakuhĩ na mũndũ? (b) Tũkwarĩrĩria maũndũ marĩkũ gĩcunjĩ-inĩ gĩkĩ?
HIHI nĩ ũkoragwo na mũrata wa hakuhĩ? Wekire atĩa nĩguo mũkorũo mũrĩ arata? No kũhoteke nĩ wahũthĩrire mahinda hamwe nake, ũkĩmenya moritũ marĩa agereire ũtũũro-inĩ, na maũndũ marĩa endete na marĩa athũire. Ningĩ nĩ woonire ngumo ciake njega, iria ũngĩenda kwĩgerekania nacio. Nĩ ũndũ ũcio ũkĩmwenda na agĩtuĩka mũrata waku.
2 Nĩguo ũkũrie ũrata wa hakuhĩ hamwe na mũndũ, nĩ ũrabatara gwĩkĩra kĩyo na kũhũthĩra mahinda hamwe nake. Ũguo noguo tũrabatara gwĩka nĩguo tũkũrie ũrata wa hakuhĩ hamwe na Jehova. Gĩcunjĩ-inĩ gĩkĩ, nĩ tũkuona ũrĩa tũngĩkuhĩrĩria Jehova makĩria na ũrĩa tũgunĩkaga tweka ũguo. No rekei twambe tuone nĩkĩ nĩ ũndũ mwega gũkuhĩrĩria Jehova, Mũrata witũ ũrĩa mũnene.
3. Twagĩrĩirũo gwĩcũranagia moguni marĩa maumanaga na gũkuhĩrĩria Jehova nĩkĩ? Heana ngerekano.
3 Tũtirĩ na nganja atĩ gũkuhĩrĩria Jehova nĩkuo kwega. No gwĩcũranagia kĩrĩa gĩtũmaga ũndũ ũcio ũkorũo ũrĩ mwega, no gũtũtindĩke gũthiĩ na mbere kũmũkuhĩrĩria makĩria. (Thab. 63:6-8) Kwa ngerekano, nĩ tũĩ atĩ nĩ tũgunĩkaga rĩrĩa twarĩa irio cia gwaka mwĩrĩ, twamenyeria mwĩrĩ, twakoma toro wa kũigana, na twanyua maĩ wega. O na kũrĩ ũguo, andũ aingĩ matiĩkaga maũndũ macio, na kwoguo matikoragwo na ũgima mwega wa mwĩrĩ. No gwĩcũrania kaingĩ ũrĩa maũndũ macio matũgunaga, no gũtũtindĩke kũmekaga. O ũndũ ũmwe na ũcio, no tũkorũo tũkĩmenya atĩ gũkuhĩrĩria Jehova nĩ kwega na ithuĩ, ĩndĩ gwĩcũranagia moguni ma gwĩka ũguo no gũtũtindĩke gũthiĩ na mbere kũmũkuhĩrĩria makĩria.—Thab. 119:27-30.
4. Mwandĩki wa Thaburi 73:28 ataarĩirie atĩa ũrĩa aaiguaga?
4 Thoma Thaburi 73:28. Mwandĩki wa Thaburi ya 73 aarĩ Mũlawii waamũrĩtwo atungate arĩ mũini hekarũ-inĩ ya Jehova. Kwahoteka nĩ aakoretwo atungatĩire Jehova kwa ihinda rĩa mĩaka mĩingĩ. O na kũrĩ ũguo, nĩ oonire bata wa kwĩririkania atĩ “gũkuhĩrĩria Ngai” nĩkuo kwarĩ kwega nake, na nĩ eendaga arĩa angĩ o nao mamenye atĩ ũrata hamwe na Ngai nĩguo ũndũ ũrĩa mwega harĩ o. Hihi tũgunĩkaga na njĩra ta irĩkũ twakuhĩrĩria Ngai?
“GŨKUHĨRĨRIA NGAI” NĨ GŨTŨREHAGĨRA GĨKENO
5. (a) Gũkuhĩrĩria Jehova makĩria gũtũrehagĩra gĩkeno nĩkĩ? (b) Ũkĩhũthĩra rĩandĩko rĩa Thimo 2:6-16, heana ngerekano ironania ũrĩa ũũgĩ wa Jehova ũngĩkũguna na ũkũgitĩre.
5 O ũrĩa tũrĩkuhagĩrĩria Jehova makĩria, noguo tũrĩkoragwo na gĩkeno. (Thab. 65:4) Tũrĩ na itũmi nyingĩ cia kuuga ũguo. Kwa ngerekano, nĩ tũgunĩkaga rĩrĩa twahũthĩra ũũgĩ ũrĩa ũkoragwo thĩinĩ wa Kiugo gĩake Bibilia. Ũũgĩ ũcio nĩ ũtũgitagĩra kuumana na mogwati na ũgatũteithia gwĩthema gwĩka mehia maritũ. (Thoma Thimo 2:6-16.) Nĩkĩo Bibilia yugaga ũũ: “Gũkena nĩ mũndũ ũrĩa ũgĩaga na ũũgĩ na mũndũ ũrĩa ũgĩaga na ũtaũku.”—Thim. 3:13.
6. Mwandĩki wa Thaburi ya 73 oorirũo nĩ gĩkeno nĩkĩ?
6 Ma nĩ atĩ, o na arata a Jehova rĩmwe nĩ moragwo nĩ gĩkeno. Mwandĩki wa Thaburi ya 73 nĩ oorirũo nĩ gĩkeno rĩrĩa aagĩire na muonere ũtagĩrĩire wa maũndũ. Nĩ aaiguaga ũũru nĩ ũndũ wa kuona ta andũ arĩa mataatindanagĩra na Ngai na ithimi ciake maarĩ na ũtũũro mwega, na akamaiguĩra ũiru. Eeciragia atĩ andũ arĩa mendete ũhinya na etĩi hingo ciothe maakoragwo na ũtonga na ũgima mwega wa mwĩrĩ, na o na matianyamarĩkaga. (Thab. 73:3-7, 12) Ũndũ ũcio nĩ wareheire mwandĩki ũcio wa Thaburi mĩtangĩko mĩingĩ nginya akĩambĩrĩria kuona ta kĩyo gĩake gĩa gũtungatĩra Jehova kĩarĩ gĩa tũhũ. Aaugire ũũ arĩ na kĩeha kĩingĩ: “Ti itherũ ndũũrĩtie ngoro yakwa ĩrĩ theru o tũhũ na ngathambia moko makwa kuonania ndirĩ ũcuke o tũhũ.”—Thab. 73:13.
7. Tũngĩka atĩa rĩrĩa tũrĩ na kĩeha? (Ningĩ rora mbica.)
7 Mwandĩki ũcio wa Thaburi ndaarekire kĩeha kĩmũtoorie, ĩndĩ nĩ oire ikinya. Nĩ ‘aaingĩrire handũ harĩa hatheru na harĩ riri ha Ngai,’ na arĩ kũu Jehova akĩrũnga mwĩcirĩrie wake. (Thab. 73:17-19) Rĩrĩa tũrĩ na kĩeha, Jehova Mũrata witũ ũrĩa mũnene nĩ amenyaga. Tũngĩmũhoyaga atũteithie kũmenya ũrĩa tũgwĩka na twĩtĩkĩre ũtaaro ũrĩa atũheaga kũgerera Kiugo gĩake na kĩũngano, nĩ tũrĩgĩaga na hinya wa gũtooria kĩeha kĩrĩa tũngĩkorũo nakĩo. O na rĩrĩa tũraigua tũtooretio nĩ mĩtangĩko, Jehova nĩ arĩtũũmagĩrĩria na agatũhooreria.—Thab. 94:19.a
Mũlawii ũrĩa waandĩkire Thaburi ya 73 arũgamĩte “handũ harĩa hatheru na harĩ riri ha Ngai” (Rora kĩbungo kĩa 7)
“GŨKUHĨRĨRIA NGAI” NĨ GŨTŨHEAGA KĨĨRĨGĨRĨRO NA ŨTŨŨRO ŨRĨ NA MUOROTO
8. Gũkuhĩrĩria Ngai nĩ kwega na ithuĩ na njĩra irĩkũ ingĩ cia bata?
8 Gũkuhĩrĩria Ngai nĩ kwega na ithuĩ na njĩra ingĩ igĩrĩ cia bata. Ya mbere nĩ atĩ nĩ gũtũmaga tũkorũo na ũtũũro ũrĩ na muoroto. Ya kerĩ nĩ atĩ nĩ gũtũheaga kĩĩrĩgĩrĩro kĩrũmu kĩa ihinda rĩũkĩte. (Jer. 29:11) Rekei tũthuthurie maũndũ macio na njĩra ndikĩru.
9. Gũkuhĩrĩria Jehova gũtũrehagĩra gĩkeno atĩa?
9 Gũkuhĩrĩria Jehova nĩ gũtũmaga tũkorũo na ũtũũro ũrĩ na muoroto. Andũ aingĩ arĩa matetĩkĩtie atĩ nĩ kũrĩ Ngai, meciragia ũtũũro ndũrĩ muoroto na atĩ mũthia-inĩ rũciaro rwa andũ nĩ rũgaathira. O na kũrĩ ũguo, kũringana na maũndũ marĩa twĩrutĩte Kiugo-inĩ kĩa Ngai, tũrĩ na ma atĩ Jehova “arĩ kuo na atĩ nĩ aheaga arĩa mamũcaragia na kĩyo ngerenwa.” (Ahib. 11:6) Makĩria ma ũguo, tondũ tũũmbĩtwo tũrĩ na wendi wa gũtungatĩra Jehova, nĩ tũgĩaga na gĩkeno kĩnene rĩrĩa twaũhingia.—Gũcok. 10:12, 13.
10. Nĩ ũndũ ũrĩkũ Jehova erĩire arĩa mamwĩhokete? (Thaburi 37:29)
10 Andũ aingĩ matikoragwo na kĩĩrĩgĩrĩro kĩa ma kĩa ihinda rĩũkĩte. Maũndũ marĩa mekagĩrĩra ũtũũro-inĩ nĩ kũruta wĩra, kũhika kana kũhikania, kũgĩa ciana, na kwĩigĩra mũthithũ nĩ ũndũ wa matukũ ma ũkũrũ. Matiũĩ ciĩranĩro cia Ngai cia ihinda rĩũkĩte. O na kũrĩ ũguo, ithuĩ tũigaga kĩĩrĩgĩrĩro gitũ harĩ Jehova. (Thab. 25:3-5; 1 Tim. 6:17) Nĩ twĩhokete Ngai Mũrata witũ, na nĩ tũĩ atĩ nĩ akaahingia maũndũ marĩa atwĩrĩire. Nĩ twĩrĩgagĩrĩra maũndũ maingĩ mega ma ihinda rĩũkĩte, ta kũmũtungatĩra tene na tene thĩinĩ wa Paradiso.—Thoma Thaburi 37:29.
11. Gũthiaga atĩa rĩrĩa twakuhĩrĩria Jehova, na ũndũ ũcio ũtũmaga aigue atĩa?
11 Gũkuhĩrĩria Ngai nĩ kwega na ithuĩ na njĩra ingĩ nyingĩ. Kwa ngerekano, Jehova atwĩrĩire atĩ nĩ arĩtuohagĩra mehia maitũ rĩrĩa twerira. (Isa. 1:18) Ũndũ ũcio nĩ ũtũteithagia kwaga gũthumbũrũo nĩ thamiri nĩ ũndũ wa mehia twekire tene. (Thab. 32:1-5) Ningĩ nĩ tũiguaga wega ngoro-inĩ rĩrĩa twakenia Jehova. (Thim. 23:15) Hatarĩ nganja, harĩ na maũndũ mangĩ maingĩ tũkenagĩra nĩ ũndũ wa gũkorũo na ũrata wa hakuhĩ hamwe na Jehova. No hihi tũngĩka atĩa nĩguo tũkuhĩrĩrie Ngai makĩria?
ŨRĨA TŨNGĨKA NĨGUO ‘TŨKUHĨRĨRIE NGAI’ MAKĨRIA
12. Nĩ maũndũ marĩkũ wĩkĩte nĩguo ũkuhĩrĩrie Ngai makĩria?
12 Angĩkorũo ũrĩ Mũkristiano mũbatithie, hatarĩ nganja nĩ wĩkĩte maũndũ maingĩ nĩguo ũkuhĩrĩrie Jehova. Nĩ wĩrutĩte ũhoro wa ma wĩgiĩ Jehova na Jesu, ũkeerira mehia maku ma tene, ũkonania wĩtĩkio mũrũmu harĩ Ngai, na ũkerutanĩria gũtũũra kũringana na wendi wake. O na kũrĩ ũguo, nĩguo ũkuhĩrĩrie Ngai makĩria no nginya ũthiĩ na mbere gwĩka maũndũ macio.—Kol. 2:6.
13. Nĩ maũndũ marĩkũ matatũ mangĩtũteithia gũthiĩ na mbere gũkuhĩrĩria Jehova makĩria?
13 Nĩ kĩĩ kĩrĩtũteithagia gũthiĩ na mbere gũkuhĩrĩria Jehova makĩria? (1) No mũhaka tũthiĩ na mbere gũthoma na kwĩruta Bibilia. Tũgĩka ũguo, muoroto witũ ndwagĩrĩirũo gũkorũo arĩ o kwĩruta igũrũ rĩgiĩ Ngai. Handũ ha ũguo, nĩ twagĩrĩirũo kwĩrutanĩria gũtaũkĩrũo wendi wa Ngai nĩ ũrĩkũ gũtwerekera, na tũtũũre kũringana na motaaro marĩa atũheete Kiugo-inĩ gĩake. (Ef. 5:15-17) (2) Nĩ twagĩrĩirũo gwĩkĩra hinya wĩtĩkio witũ na njĩra ya gwĩcũrania ũrĩa Jehova atuonetie wendo na njĩra nyingĩ. (3) Nĩ twagĩrĩirũo gũthiĩ na mbere gũthũũra maũndũ marĩa matakenagia Jehova na twĩtheme kũgĩa ũrata na andũ arĩa mekaga maũndũ ta macio.—Thab. 1:1; 101:3.
14. Kũringana na ũrĩa 1 Akorintho 10:31 yonanĩtie-rĩ, nĩ maũndũ ta marĩkũ tũngĩka ũtũũro-inĩ wa o mũthenya nĩguo tũkenie Jehova? (Ningĩ rora mbica.)
14 Thoma 1 Akorintho 10:31. Nĩ ũndũ wa bata gũthiĩ na mbere gwĩka maũndũ marĩa makenagia Jehova. Maũndũ macio matihutĩtie tu o gũthiĩ ũtungata na mĩcemanio ya kĩũngano. Twagĩrĩirũo gũkenagia Jehova maũndũ-inĩ mothe ma ũtũũro witũ. Kwa ngerekano, nĩ tũkenagia Jehova rĩrĩa twakorũo tũrĩ ehokeku maũndũ-inĩ mothe na tuonania ũtaana. (2 Kor. 8:21; 9:7) Ningĩ nĩ endaga tuonanie atĩ nĩ tũtĩĩte kĩheo kĩa muoyo. Nĩ tũkuhagĩrĩria Jehova Mũheani wa muoyo rĩrĩa twethema kũrĩa na kũnyua gũkĩria gĩthimi, na rĩrĩa twarũmbũiya ũgima witũ wa mwĩrĩ na njĩra ingĩ. Rĩrĩa Jehova ona tũkĩĩrutanĩria kũmũkenia nginya maũndũ-inĩ mangĩoneka marĩ manini, nĩ atwendaga o na makĩria.—Luk. 16:10.
Nĩ tũkenagia Jehova rĩrĩa twatwarithia ngaari wega, rĩrĩa twarũmbũiya mĩĩrĩ itũ na njĩra ya kũmenyeria mwĩrĩ na kũrĩa irio cia gwaka mwĩrĩ, na rĩrĩa tuonia arĩa angĩ ũtaana (Rora kĩbungo gĩa 14)
15. Jehova endaga tũrũmbũyanagie atĩa na andũ arĩa angĩ?
15 Jehova akoragwo arĩ mũtugi harĩ andũ arĩa athingu na arĩa matarĩ athingu. (Mat. 5:45) Ũguo noguo endaga o na ithuĩ tũrũmbũyanie na andũ arĩa angĩ. Kwa ngerekano, atwĩrĩte ũũ: ‘Mũtikaragie ũũru igũrũ rĩa mũndũ o na ũrĩkũ, mũtigakoragwo mũrĩ andũ a ngũĩ, ĩndĩ mũkoragwo na ũigananĩru, mũkĩonanagia ũhooreri wothe kwerekera andũ othe.’ (Tit. 3:2) Kwoguo o na angĩkorũo mũndũ ti ndungata ya Jehova, tũtiĩyonaga tũrĩ a bata kũmũkĩra. (2 Tim. 2:23-25) Tũngĩrũmbũyanagia na andũ othe na njĩra ya ũtugi nĩ tũkuhagĩrĩria Jehova makĩria.
NO ‘TŨKUHĨRĨRIE NGAI’ O NA RĨRĨA TWAHĨTIA
16. Mwandĩki wa Thaburi ya 73 aambĩrĩirie kũigua atĩa thutha wa gũtungatĩra Jehova kwa ihinda?
16 Rĩmwe no ũigue ta ũraihĩrĩirie Jehova nĩ ũndũ wa mahĩtia wĩkĩte. O ta ũrĩa tuona, ũndũ ta ũcio nĩ wekĩkire harĩ mwandĩki wa Thaburi ya 73. Aaugire ũũ: “Magũrũ makwa maatigĩtie hanini kũũra njĩra; makinya makwa maarĩ hakuhĩ gũtindirũka.” (Thab. 73:2) Nĩ eetĩkĩrire atĩ aarĩ na “marũrũ,” ‘akaga wĩcirio,’ na ‘aatariĩ o ta nyamũ ĩtarĩ wĩcirio’ maitho-inĩ ma Jehova. (Thab. 73:21, 22) No hihi nĩ oonaga ta Jehova aatigĩte kũmwenda nĩ ũndũ wa mwerekera wake ũtagĩrĩire, na atĩ ndangĩetĩkĩrĩkire rĩngĩ?
17. (a) Nĩ ũndũ ũrĩkũ mwandĩki ũcio wa Thaburi eekire o na rĩrĩa aaiguaga akuĩte ngoro mũno? (b) Tũreruta atĩa kuumana na kĩonereria gĩake? (Ningĩ rora mbica.)
17 Angĩkorũo mwandĩki ũcio wa Thaburi nĩ aaiguaga arĩ mũtiganĩrie nĩ Jehova, kwahoteka aaiguire ũguo o kwa ihinda inini. Ciugo ciake nĩ cionanagia atĩ hĩndĩ ĩyo aakuĩte ngoro mũno, nĩ oonire bata wa gũkuhĩrĩria Ngai makĩria. Aaugire ũũ: “Ĩndĩ rĩu ndĩ hamwe nawe [Jehova] hĩndĩ ciothe; nĩ ũnyitĩte guoko gwakwa kwa ũrĩo. Ũndongoragia na ũtaaro waku, na thutha ũcio nĩ ũgũtũma ngĩe na riri.” (Thab. 73:23, 24) O na ithuĩ nĩ twagĩrĩirũo kũhoya Jehova atũtiirĩrĩre rĩrĩa twaigua tũtarĩ na hinya kana rĩrĩa tũkuĩte ngoro nĩ ũndũ wa mahĩtia maitũ. (Thab. 73:26; 94:18) O na tũngĩka mehia maritũ, no tũcokerere Jehova tũrĩ na ma atĩ nĩ ‘ehaarĩirie gũtuohera.’ (Thab. 86:5) Rĩrĩa tũraigua tũkuĩte ngoro mũno, nĩ ũndũ wa bata gũkuhĩrĩria Jehova makĩria.—Thab. 103:13, 14.
Rĩrĩa twaigua tũtarĩ na hinya kĩĩroho, twagĩrĩirũo gũkuhĩrĩria Jehova makĩria na njĩra ya kũnyitanĩra biũ maũndũ-inĩ ma kĩĩroho (Rora kĩbungo gĩa 17)
‘KUHĨRĨRIA NGAI’ TENE NA TENE
18. Nĩ kĩĩ kĩngĩtũma tuuge atĩ tũtingĩkinya mũico wa gũkuhĩrĩria Jehova?
18 Tũtingĩkinya mũico wa gũkuhĩrĩria Jehova na wa kũmũmenya. Bibilia yugaga atĩ njĩra cia Jehova, ũũgĩ wake, na ũmenyo wake ‘itingĩtuĩrĩka.’—Rom. 11:33.
19. Maandĩko macio ma Thaburi matũheete ũũma ũrĩkũ?
19 Thaburi 79:13 yugaga ũũ: “Ithuĩ andũ aku, o ithuĩ rũũru rũrĩa ũrĩithagia, tũgũtũũra tũgũcokagĩria ngatho tene na tene; na nĩ tũrĩkũgoocaga kuuma njiarũa nginya njiarũa.” O ũrĩa ũrathiĩ na mbere gũkuhĩrĩria Jehova, o nawe no ũkorũo na ma atĩ nĩ egũtũũra akũrathimĩte tene na tene, na ũgĩe na ũmĩrĩru wa kuuga ũũ: “Ngai nĩwe rwaro rwa ihiga rwa ngoro yakwa na rwĩga rwakwa tene na tene.”—Thab. 73:26.
RWĨMBO NA. 32 Rũgamai Mwena wa Jehova!
a Andũ amwe arĩa mahiũranagia na mĩtangĩko kana kĩeha kwa ihinda iraihu no mabatare gũcaria ũrigitani. Nĩguo wone ũhoro makĩria, rora ngathĩti ya Mũrangĩri, Na. 1 2023.