GĨCUNJĨ KĨA WĨRUTI KĨA 34
RWĨMBO NA. 3 Ngai nĩ Mwĩhoko na Hinya Witũ
Ĩtĩkia atĩ Jehova nĩ Akuoheire
‘Nĩ ũnjoheire mahĩtia ma mehia makwa.’—THAB. 32:5.
ŨNDŨ ŨRĨA WARĨRĨIRIO
Nĩ tũkuona nĩkĩ nĩ ũndũ wa bata gwĩtĩkia atĩ Jehova nĩ atuohagĩra rĩrĩa twerira, na tuone ũrĩa Bibilia ĩtũheaga ũũma ũcio.
1-2. Tũiguaga atĩa rĩrĩa Jehova atuohera mehia maitũ? (Ningĩ rora mbica.)
MŨTHAMAKI Daudi nĩ ooĩ ũrĩa mũndũ aiguaga arĩ na thamiri ĩrĩ na ũcuke tondũ kũrĩ hĩndĩ eekĩte mehia maritũ. (Thab. 40:12; 51:3; kohoro ga gũtaarĩria) No nĩ eeririre kuuma ngoro na Jehova akĩmuohera. (2 Sam. 12:13) Kwoguo Daudi ningĩ nĩ aataũkagĩrũo nĩ gĩkeno kĩrĩa mũndũ agĩaga nakĩo thutha wa kuoherũo nĩ Jehova.—Thab. 32:1.
2 O ta Daudi, o na ithuĩ no tũkorũo na gĩkeno rĩrĩa twamenya atĩ Jehova nĩ atuonetie tha na agatuohera mehia maitũ. Na githĩ ti ũndũ wa kũũmĩrĩria kũmenya atĩ Jehova nĩ akoragwo ehaarĩirie gũtuohera mehia maitũ, nginya mehia maritũ, angĩkorũo nĩ tũkwĩrira kuuma ngoro, tumbũre mehia maitũ, na twĩrutanĩrie biũ kwaga gũcokera mehia macio. (Thim. 28:13; Atũm. 26:20; 1 Joh. 1:9) Ningĩ nĩ tũkenaga mũno kũmenya atĩ rĩrĩa Jehova atuohera mehia maitũ, ndacokaga kũmaririkana rĩngĩ o na kana gũtũherithia nĩ ũndũ wamo.—Ezek. 33:16.
Mũthamaki Daudi nĩ aatungire thaburi nyingĩ iria itaaragĩria wohanĩri wa Jehova (Rora kĩbungo kĩa 1-2)
3-4. Nĩ ũndũ ũrĩkũ mwarĩ wa Ithe witũ ũmwe aaritũhagĩrũo gwĩtĩkia o na thutha wa kũbatithio, na nĩ maũndũ marĩkũ tũkwarĩrĩria gĩcunjĩ-inĩ gĩkĩ?
3 O na kũrĩ ũguo, andũ amwe rĩmwe nĩ maritũhagĩrũo gwĩtĩkia atĩ Jehova nĩ amoheire. Ta wĩcirie ũhoro wa Jennifer ũrĩa warereirũo ũhoro-inĩ wa ma. Arĩ tinĩnja, nĩ aambĩrĩirie gũthiĩ na mĩthiĩre ĩtagĩrĩire ehithanĩtie. Mĩaka ĩigana ũna thutha ũcio, nĩ aacokereire Jehova na agĩkinyĩrĩra kũbatithio. Aaugire ũũ: “Na hau kabere nĩ ndeingĩranagia na ngomanio itagĩrĩire, nganyua njohi gũkĩria gĩthimi, ngakorũo na marakara manene, na ũndũ ũrĩa ndonaga ũrĩ wa bata makĩria nĩ gũcaria mbeca. Meciria-inĩ makwa nĩ ndaamenyaga atĩ ingĩathaithire Jehova anjohere na ndĩĩrire, nĩ angĩanjoheire kũgerera mũthingi wa igongona rĩa Jesu, ĩndĩ nĩ ndaaritũhagĩrũo gwĩtĩkia atĩ nĩ anjoheire.”
4 Hihi rĩmwe nĩ ũritũhagĩrũo gwĩtĩkia atĩ Jehova nĩ aakuoheire mehia marĩa wekire tene? Jehova endaga tũkorũo na ma o ta Daudi atĩ nĩ atuoheire, tondũ nĩ arĩ tha nyingĩ. Gĩcunjĩ-inĩ gĩkĩ, nĩ tũkuona nĩkĩ nĩ ũndũ wa bata gwĩtĩkia atĩ Jehova nĩ atuoheire, na tuone kĩrĩa kĩngĩtũteithia gwĩtĩkia ũguo.
NĨKĨ NĨ ŨNDŨ WA BATA GWĨTĨKIA ATĨ JEHOVA NĨ ATUOHEIRE?
5. Shaitani endaga twĩtĩkie atĩa? Heana ngerekano.
5 Rĩrĩa twetĩkia atĩ Jehova nĩ atuoheire, nĩ twĩthemaga kũgwa mũtego-inĩ wa Shaitani. Ririkana atĩ Shaitani no eke ũndũ o wothe nĩguo tũtige gũtungatĩra Jehova. Kwa ngerekano, no agerie gũtũma twĩtĩkie atĩ Jehova ndangĩtuohera mehia maitũ. Ta wĩcirie ũhoro wa mũndũ ũmwe wa Korintho ũrĩa weeheretio kĩũngano-inĩ nĩ ũndũ wa kwĩingĩria ngomanio-inĩ itagĩrĩire. (1 Kor. 5:1, 5, 13) Rĩrĩa eeririre, Shaitani eendaga andũ kĩũngano-inĩ kĩu mage kũmuohera na matikamwamũkĩre rĩngĩ kĩũngano-inĩ. Ihinda-inĩ o rĩu Shaitani nĩ eendaga mũndũ ũcio werirĩte aigue ta atoheirũo, nĩguo ‘atoorio nĩ kĩeha kĩingĩ’ nginya atige gũtungatĩra Jehova. O na ũmũthĩ Shaitani no arahũthĩra njĩra ta ĩyo nĩguo atũme tũtige gũtungatĩra Jehova. No “tũtirigĩtwo nĩ mawara make.”—2 Kor. 2:5-11.
6. Tũngĩka atĩa nĩguo tũtige gũthumbũrũo nĩ thamiri?
6 Rĩrĩa twetĩkia atĩ Jehova nĩ atuoheire, nĩ tũtigaga gũthumbũrũo nĩ thamiri. Rĩrĩa twehia, nĩ tũthumbũragwo nĩ thamiri. (Thab. 51:17) Ũcio nĩ ũndũ mwega, tondũ no ũtũme tũrũnge mahĩtia maitũ. (2 Kor. 7:10, 11) No tũngĩthumbũrũo nĩ thamiri kwa ihinda iraihu thutha wa kwĩrira, ũndũ ũcio no ũtũme tũkue ngoro. Ĩndĩ tũngĩtĩkia atĩ Jehova nĩ atuoheire, thamiri itũ nĩ ĩtigaga gũtũthumbũra. Nĩ ũndũ ũcio nĩ tũhotaga gũtungatĩra Jehova na njĩra ĩrĩa ĩmũkenagia, tũrĩ na thamiri theru na gĩkeno kĩnene. (Kol. 1:10, 11; 2 Tim. 1:3) No hihi nĩ kĩĩ kĩngĩtũteithia gwĩtĩkia atĩ Jehova nĩ atuoheire?
NĨ KĨĨ KĨNGĨTŨTEITHIA GWĨTĨKIA ATĨ JEHOVA NĨ ATUOHEIRE?
7-8. Jehova eerire Musa atĩ we nĩ Ngai ũhaana atĩa, na ũndũ ũcio ũtũteithagia gũkorũo na ma na ũndũ ũrĩkũ? (Thama 34:6, 7)
7 Wĩcũranagie ũrĩa Jehova augĩte igũrũ rĩmwĩgiĩ. Kwa ngerekano ta wĩcirie ũrĩa eerire Musa Kĩrĩma-inĩ gĩa Sinai.a (Thoma Thama 34:6, 7.) O na gũtuĩka Jehova nĩ arĩ ngumo nyingĩ njega, aathuurire kwĩra Musa atĩ we nĩ “Ngai mũigua tha na mũcayanĩri.” Hihi Ngai ta ũcio no age kuohera ndungata yake ĩrĩa ĩrirĩte kuuma ngoro? Gũtingĩhoteka! Angĩkorũo arĩ na ngoro nyũmũ ĩtarĩ na tha, na gũtirĩ hĩndĩ Jehova angĩkorũo ahaana ũguo.
8 No tũkorũo na ma atĩ Jehova ndaaheenanirie rĩrĩa aaugire atĩ nĩ arĩ tha na nĩ mũcayanĩri, tondũ we nĩ Ngai wa ũhoro wa ma. (Thab. 31:5) Kwoguo no twĩtĩkie ciugo ciake. Nĩ ũndũ ũcio angĩkorũo no ũthumbũragwo nĩ thamiri nĩ ũndũ wa mehia wekire tene, wĩyũrie ũũ: ‘Hihi nĩ njĩtĩkĩtie atĩ Jehova nĩ mũigua tha na nĩ mũcayanĩri, na atĩ gũtirĩ hĩndĩ angĩaga kuohera mũndũ o wothe wĩrirĩte kuuma ngoro? Angĩkorũo nĩ njĩtĩkĩtie ũguo-rĩ, na githĩ ndikĩagĩrĩirũo gwĩtĩkia atĩ nĩ anjoheire?’
9. Rĩandĩko rĩa Thaburi 32:5 rĩtũrutaga atĩa igũrũ rĩgiĩ ũrĩa Jehova atuohagĩra mehia maitũ?
9 Wĩcũranagie ũrĩa Jehova aatongoririe aandĩki a Bibilia kwandĩka ũhoro wa wohanĩri wake. Kwa ngerekano ta wĩcirie ũrĩa Daudi aataarĩirie wohanĩri wa Jehova. (Thoma Thaburi 32:5.) Aaugire ũũ: “Nawe [Jehova] ũkĩnjohera mahĩtia ma mehia makwa.” Kiugo gĩa Kĩhibirania kĩrĩa gĩtaũrĩtwo “kuohera,” no kiuge “kuoya” kana “kweheria.” Rĩrĩa Jehova ooheire Daudi, nĩ ta kuoya ooire mehia make, na akĩmeheria. Nĩ ũndũ ũcio Daudi akĩgĩa na gĩkeno nĩ ũndũ wa kwehererio mũrigo wa mehia make marĩa aakuuĩte. (Thab. 32:2-4) O na ithuĩ no tũgĩe na gĩkeno o ta kĩu, tondũ rĩrĩa twerira kuuma ngoro tũtibataraga gũthiĩ na mbere gũkuua mũrigo wa mehia maitũ, nĩ gũkorũo Jehova nĩ amoete na akameheria.
10-11. Ciugo “ũkoragwo wĩhaarĩirie kuohanĩra” itũrutaga atĩa igũrũ rĩgiĩ Jehova? (Thaburi 86:5)
10 Thoma Thaburi 86:5. Mũhari-inĩ ũcio, Daudi aaugire atĩ Jehova nĩ Ngai “ũkoragwo wĩhaarĩirie kuohanĩra.” Ibuku rĩmwe rĩa gũtaarĩria Bibilia rĩkĩaria ũhoro wĩgiĩ ciugo icio rĩaugire ũũ igũrũ rĩgiĩ Jehova: “Wohanĩri ũkoragwo thĩinĩ wake.” Nĩ kĩĩ gĩtũmaga akorũo ahaana ũguo? Mũhari ũcio ũcokaga ũkoiga: “Wendo waku mwĩhokeku nĩ mũingĩ harĩ arĩa othe magũkayagĩra.” O ta ũrĩa tũrerutire gĩcunjĩ-inĩ kĩrĩa kĩhĩtũku, wendo mwĩhokeku ũtũmaga Jehova akorũo na wendo mũnene kwerekera ndungata ciake njĩhokeku, na ndarĩ hĩndĩ angĩcitiga. Wendo ũcio mwĩhokeku nĩguo ũtũmaga ohere arĩa othe merirĩte “eyendeire.” (Isa. 55:7, kohoro ka magũrũ-inĩ) Angĩkorũo nĩ ũritũhagĩrũo gwĩtĩkia atĩ Jehova nĩ akuoheire, no wĩyũrie ũũ: ‘Hihi nĩ njĩtĩkĩtie atĩ Jehova nĩ Ngai muohanĩri, na atĩ nĩ akoragwo ehaarĩirie kuohera arĩa othe merirĩte na mamũkayagĩra amonie tha? Angĩkorũo nĩ njĩtĩkĩtie ũguo-rĩ, na githĩ ndikĩagĩrĩirũo gwĩtĩkia atĩ nĩ aanjoheire rĩrĩa ndaamũkaĩire anyonie tha?’
11 Ningĩ nĩ tũũmagĩrĩrio nĩ kũmenya atĩ Jehova nĩ ataũkagĩrũo biũ nĩ ũrĩa tũtariĩ, atĩ tũrĩ andũ matarĩ akinyanĩru. (Thab. 139:1, 2) Reke tuone ũndũ ũcio ciugo-inĩ cia Daudi iria irĩ thĩinĩ wa thaburi ĩngĩ, na tuone ũrĩa o nacio ingĩtũteithia gwĩtĩkia atĩ Jehova nĩ atuoheire.
NDŨKANARIGANĨRŨO NĨ ŨNDŨ ŨRĨA JEHOVA ARIRIKANAGA
12-13. Kũringana na Thaburi 103:14, Jehova aririkanaga ũndũ ũrĩkũ ũtwĩgiĩ, na ũndũ ũcio ũmũtindĩkaga gwĩka atĩa?
12 Thoma Thaburi 103:14. Daudi aaugire atĩ Jehova nĩ ‘aririkanaga atĩ tũrĩ o rũkũngũ.’ Kũgerera ciugo icio, Daudi nĩ oonanirie ũndũ ũngĩ ũtũmaga Jehova akorũo ehaarĩirie kuohera athathaiya ake rĩrĩa merira, atĩ hingo ciothe nĩ aririkanaga ũrĩa tũtariĩ, atĩ tũrĩ andũ matarĩ akinyanĩru. Nĩguo tũtaũkĩrũo nĩ ũndũ ũcio wega, reke tũthuthurie ciugo icio cia Daudi na njĩra ndikandikĩru.
13 Daudi aaugire atĩ Jehova “nĩ oĩ wega ũrĩa tũmbĩtwo.” Jehova oombire Adamu “kuuma rũkũngũ-inĩ rwa thĩ,” na kwoguo nĩ oĩ wega ũrĩa andũ matariĩ na kĩrĩa mabataraga o na marĩ akinyanĩru. Kwa ngerekano nĩ mabataraga kũrĩa, gũkoma, na kũhuhia. (Kĩam. 2:7) No tondũ Adamu na Hawa nĩ meehirie, gũkorũo tũrĩ rũkũngũ nĩ kũrehaga rĩciria rĩngĩ rĩa atĩ tũtirĩ akinyanĩru. Tondũ tũrĩ njiarũa ciao, nĩ twagaire kwaga gũkinyanĩra, kũrĩa gũtũmaga tũkorũo na mwerekera wa kwĩhia. Jehova nĩ oĩ wega ũndũ ũcio. No rĩrĩa Daudi aaugire atĩ Jehova nĩ ‘aririkanaga’ atĩ tũrĩ rũkũngũ, ningĩ nĩ eendaga kuonania atĩ hingo ciothe Jehova arũmbũyanagia na ithuĩ arĩ na ũcayanĩri tondũ nĩ oĩ atĩ nĩ tũrĩ mwerekera wa kwĩhia. Na ciugo ingĩ nĩ ta Daudi eendaga kuuga ũũ: Jehova nĩ oĩ atĩ rĩmwe nĩ tũrĩhĩtagia, no rĩrĩa ona atĩ nĩ twĩrirĩte kuuma ngoro, nĩ arĩtuonagia tha na agatuohera.—Thab. 78:38, 39.
14. (a) Nĩ ũndũ ũrĩkũ ũngĩ Daudi aaugire wĩgiĩ ũrĩa Jehova atuohagĩra? (Thaburi 103:12) (b) Nĩ ũndũ ũrĩkũ tũreruta kuumana na ũrĩa Jehova ooheire Daudi? (Rora gathandũkũ, “Jehova Ohanagĩra na Akariganĩrũo.”)
14 Nĩ ũndũ ũrĩkũ ũngĩ ũngĩtũteithia gwĩtĩkia atĩ Jehova nĩ atuoheire? (Thoma Thaburi 103:12.) Daudi aaugire atĩ rĩrĩa Jehova atuohera, aigaga mehia maitũ kũraihu na ithuĩ “o ta ũrĩa irathĩro kũraihanĩrĩirie na ithũĩro.” Nĩ tũĩ atĩ irathĩro rĩkoragwo rĩraihanĩrĩirie biũ na ithũĩro, na mĩena ĩyo ĩĩrĩ ndĩrĩ hĩndĩ ĩngĩcemania. Hihi ũndũ ũcio ũratũruta atĩa igũrũ rĩgiĩ mehia marĩa Jehova ohanagĩra? Ibuku rĩmwe rĩgĩtaarĩria mũhari ũcio riugaga atĩ, “Ngai aigaga mehia maitũ kũraihu na ithuĩ biũ ta ũrĩa kĩndũ kĩngĩigwo kũndũ kũraihu ũũ atĩ ndũngĩigua nginya mũnungo wakĩo.” Kwoguo no tũkorũo na ma atĩ gũtirĩ hĩndĩ Ngai akaaririkana ũhoro wamo. Rĩmwe mũnungo wa kĩndũ nĩ ũtũmaga tũririkane ũndũ mũna. No rĩrĩa Jehova atuohera, nĩ ta akoragwo aniinĩte nginya mũnungo wa mehia macio ũũ atĩ ndangĩmaririkana rĩngĩ kana atũherithie nĩ ũndũ wamo.—Ezek. 18:21, 22; Atũm. 3:19.
15. Tũngĩka atĩa angĩkorũo no tũthumbũragwo nĩ thamiri nĩ ũndũ wa mehia twekire tene?
15 Ciugo cia Daudi thĩinĩ wa Thaburi 103 ingĩtũteithia atĩa gwĩtĩkia atĩ Jehova nĩ atuoheire? Angĩkorũo no tũthumbũragwo nĩ thamiri nĩ ũndũ wa mehia twekire tene, no twĩyũrie ũũ: ‘Hihi nĩ ndiganĩirũo nĩ ũndũ ũyũ Jehova aririkanaga—ũrĩa nyũmbĩtwo, atĩ ndĩ mũndũ ũtarĩ mũkinyanĩru, na atĩ nĩ ohagĩra mũndũ ta niĩ wĩrirĩte? Na hihi nĩ ndirikanaga ũndũ ũyũ Jehova athuurĩte kũriganĩrũo—mehia marĩa anjoheire na atangĩherithia nĩ ũndũ wamo?’ Jehova nĩ athuurĩte kũriganĩrũo nĩ mehia marĩa twekire tene, na kwoguo o na ithuĩ tũtibatiĩ kũmaririkana. (Thab. 130:3) Rĩrĩa twetĩkia atĩ Jehova nĩ atuoheire, nĩ tũrĩhotaga kwĩyohera mehia marĩa twekire tene, na tũthiĩ na mbere gũtungatĩra Jehova tũrĩ na gĩkeno.
16. Heana ngerekano ĩronania ũgwati wa gũikara tũgĩciragia mehia marĩa twekire tene. (Ningĩ rora mbica.)
16 Gũikara tũgĩĩciragia ũhoro wa mehia twekire tene no kũringithanio na ndereba ũraikara arorete gacicio ga kũrora na thutha o agĩtwarithagia ngaari. Nĩ wega rĩmwe kũrora gacicio kau, tondũ no ahote gwĩthema mogwati marĩa angĩona thutha wake. No nĩguo ahote gũtwarithia ngaari wega, no mũhaka arore mbere barabara-inĩ ĩrĩa aragerera. Na njĩra o ta ĩyo, nĩ wega rĩmwe gwĩciria ũhoro wa mahĩtia twekire tene nĩguo twĩrute kuumana namo, na twĩkĩre hinya itua ritũ rĩa kwaga kũmacokera. No tũngĩikaraga tũgĩĩciragia ũhoro wa mahĩtia macio, no tũthumbũrũo nĩ thamiri mũno nginya tũremererũo gũtungatĩra Jehova. Handũ ha gwĩka ũguo, twagĩrĩirũo kũiga meciria maitũ harĩ gũtungatĩra Jehova na harĩ ihinda rĩũkĩte rĩrĩa atwĩrĩire, rĩrĩa maũndũ marĩa moru ma hau kabere ‘matakaaririkanwo.’—Isa. 65:17; Thim. 4:25.
O ta ũrĩa ndereba abatiĩ kũrora mbere handũ ha gũikara arorete gacicio ga kũrora na thutha, no taguo tũbatiĩ kũiga meciria harĩ irathimo iria tũigĩirũo handũ ha gwĩciragia o ũhoro wa mehia marĩa twekire tene (Rora kĩbungo gĩa 16)
WĨRUTANAGĨRIE BIŨ KŨNIINA NGANJA
17. Nĩkĩ nĩ twagĩrĩirũo gũkoragwo na ma atĩ Jehova nĩ atwendete na nĩ atuohagĩra?
17 Nĩ twagĩrĩirũo gwĩka ũrĩa wothe tũngĩhota nĩguo tũkorũo na ma atĩ Jehova nĩ atwendete, na nĩ atuohagĩra. (1 Joh. 3:19) Gĩtũmi nĩ tondũ Shaitani no egũthiĩ na mbere kũgeria gũtũma twĩtĩkie atĩ Jehova ndatwendete na ndangĩtuohera. Erutanagĩria gwĩka ũguo akĩenda tũtige gũtungatĩra Jehova. No twĩrĩgĩrĩre atĩ Shaitani nĩ egũkĩrĩrĩria gwĩka ũguo, tondũ nĩ oĩ atĩ atigĩtie ihinda inini. (Kũg. 12:12) Tũtibatiĩ kũreka atũtoorie!
18. Nĩ maũndũ marĩkũ mangĩgũteithia gũkorũo na ma atĩ Jehova nĩ akwendete na nĩ ehaarĩirie gũkuohera?
18 Gĩcunjĩ kĩrĩa kĩhĩtũku nĩ kĩoonanirie ũrĩa ũngĩka, nĩguo ũkorũo na ma biũ atĩ Jehova nĩ akwendete. Gĩcunjĩ gĩkĩ nakĩo nĩ kĩonania ũrĩa ũngĩka, nĩguo ũkorũo na ma atĩ Jehova nĩ akuoheire. Ũndũ ũmwe ũngĩka, nĩ gwĩcũranagia ũrĩa Jehova augĩte igũrũ rĩmwĩgiĩ. Caragia mahinda ma gwĩcũranagia ũrĩa Jehova aatongoririe aandĩki a Bibilia kwandĩka igũrũ rĩgiĩ wohanĩri wake. Ningĩ ndũkanariganĩrũo atĩ Jehova nĩ oĩ wega ũrĩa ũtariĩ, atĩ ũrĩ mũndũ ũtarĩ mũkinyanĩru, na nĩ arũmbũyanagia nawe arĩ na tha. Ririkanaga atĩ rĩrĩa ohanĩra, ndacokaga kũririkana mehia macio. Maũndũ macio nĩ marĩgũteithagia gũkorũo na ma o ta Daudi atĩ Jehova nĩ akuonagia tha, na kwoguo ũkauga ũũ ũkenete: “Nĩ ngatho Jehova, nĩ ũndũ wa kũnjohera ‘mahĩtia ma mehia makwa.’”—Thab. 32:5.
RWĨMBO NA. 1 Ngumo cia Jehova
a Rora gĩcunjĩ kĩa “Mkaribie Mungu—Yehova Alipofunua Sifa Zake” thĩinĩ wa ngathĩti ya Mnara wa Mlinzi ya Mĩĩ 1, 2009.