Hihi nĩ Ũraririkana?
Nĩ ũthomete na kinyi icunjĩ cia mwaka ũyũ cia Mũrangĩri? Ta rora kana no ũhote gũcokia ciũria ici:
Nĩ kĩĩ gĩtũtindĩkaga kũhe Jehova riri?
Tũheaga Jehova riri tondũ nĩ tũmũtĩĩte mũno na tũkamwenda mũno. Ningĩ nĩ tũmũheaga riri tondũ nĩ twendaga andũ arĩa angĩ mamũmenye.—w25.01, kar. 3.
Rĩrĩa mũndũ atũhĩtĩria-rĩ, nĩ kĩĩ kĩngĩtũteithia kũmuohera?
Tũtibatiĩ kwaga gũtindanĩra na ũrĩa tũraigua; o na kũrĩ ũguo, rĩrĩa tweheria muku tũkoragwo tũkĩgitĩra ngoro citũ itigatoorio nĩ marakara.—w25.02, kar. 15-16.
Mariko nĩ kĩonereria kĩega harĩ ariũ a Ithe witũ ethĩ nĩkĩ?
Mariko nĩ eetĩkĩrire gũthiĩ gũtungata gĩcigo-inĩ kĩngĩ. O na gũtuĩka no gũkorũo harĩ ũndũ watuurithirie Mariko na ũkĩmũũraga ngoro, ndaatigire gũtungatĩra arĩa angĩ. Nĩ aagĩire na ũrata wa hakuhĩ na Paulo hamwe na Akristiano angĩ agimaru kĩĩroho.—w25.04, kar. 27.
Jesu eendaga kuonania ũndũ ũrĩkũ rĩrĩa aaugire ũũ akĩhoya: “Nĩ ndĩmamenyithĩtie rĩĩtwa rĩaku”? (Joh. 17:26)
Arutwo a Jesu nĩ maamenyaga atĩ Ngai etagwo Jehova. No nĩ aamateithirie kũmenya Jehova wega, na ũndũ ũcio wahutĩtie kũmenya mĩoroto yake, mawĩko make, na ngumo ciake.—w25.05, kar. 20-21.
Gũkorũo tũrĩ na wĩnyihia kũngĩtũteithia gwĩtĩkĩra ũndũ ũrĩkũ?
Nĩ twĩtĩkagĩra atĩ nĩ harĩ maũndũ mamwe tũtoĩ. Kwa ngerekano, tũtiũĩ rĩrĩa mũico ũgaakinya na tũtiũĩ maũndũ mothe marĩa Jehova ageka hĩndĩ ĩyo. Ningĩ tũtiũĩ ũhoro wa rũciũ na tũtingĩtaũkĩrũo biũ Jehova atũĩ na gĩkĩro kĩrĩkũ.—w25.06, kar. 15-18.
Tũngĩka atĩa nĩguo tũgunĩke kuumana na gĩcunjĩ kĩna kana mĩario ya andũ othe?
No twĩyũrie: ‘Nĩ ihooto irĩkũ ihũthĩrĩtwo ingĩteithia mũndũ gwĩtĩkia ũrutani ũyũ wa Bibilia? Hihi nĩ haraheanwo ngerekano ingĩhũthĩra ngĩrutana? Nũũ ũngĩgucĩrĩrio nĩ ũrutani ũyũ?’—w25.07, kar. 19.
Tũngĩĩruta atĩa igũrũ rĩgiĩ wohanĩri wa Jehova kuumana na ũrĩa aahiũranirie na Daudi?
O na gũtuĩka Daudi nĩ eekĩte mehia maritũ, nĩ eeririre kuuma ngoro na Jehova akĩmuohera. (1 Ath. 9:4, 5) Rĩrĩa Jehova atuohera mehia maitũ, ndacokaga kũmaririkana rĩngĩ o na kana gũtũherithia nĩ ũndũ wamo.—w25.08, kar. 17.
Tũngĩka atĩa angĩkorũo harĩ na ũndũ mũrutwo araremwo gũtaũkĩrũo nĩguo?
Angĩkorũo harĩ na ũndũ araremwo gũtaũkĩrũo nĩguo o na thutha wa kũmũruta wega kuuma Bibilia-inĩ, no mwambe mũtigane naguo mũrĩcoka ho thutha-inĩ.—w25.09, kar. 24.
Bibilia yugaga mehia nĩ marĩ ‘hinya wa gũtũheenereria.’ (Ahib. 3:13) na njĩra ĩrĩkũ?
Kwaga gũkinyanĩra gwitũ nĩ gũtũmaga twĩhie. Ningĩ no gũtũme tũikare tũgĩkagĩrĩra nganja kana Jehova nĩ atwendete.—w25.10, kar. 16.
Nĩ maũndũ marĩkũ matatũ mangĩtũteithia kwagagĩria mahoya maitũ?
(1) No twĩcũranagie ngumo cia Jehova. (2) No twĩcirie ũhoro wa moritũ marĩa tũrahiũrania namo na tũmagwete mahoya-inĩ maitũ. Kwa ngerekano, no gũkorũo harĩ mũndũ tũrabatara kuohera. (3) No tũhoyage tũtarĩ na ihenya. Gwĩka ũguo nĩ kũrĩtũteithagia gũitũrũrĩra Jehova kĩrĩa kĩrĩ ngoro-inĩ.—w25.10, kar. 19-20.
Tũngĩteithĩrĩria atĩa arĩa akũrũ?
No tũceeragĩre aarĩ na ariũ a Ithe witũ arĩa akũrũ kana tũkamahũũrĩra thimũ. Ningĩ no tũmatwarage rĩrĩa marathiĩ thibitarĩ. O na no tũhunjagie hamwe nao.—w25.11, kar. 6-7.
Nĩ maũndũ marĩkũ Akristiano mangĩka nĩguo meke ũhiki ũngĩheeka gĩtĩo?
Athĩkĩrai mawatho ma thirikari megiĩ kĩhiko. Tigĩrĩrai atĩ ũhiki wanyu nĩ wekwo na njĩra ya gĩtĩo ĩronania ngumo iria ciumanaga na roho mũtheru. Korũoi na ũigananĩru ũhoro-inĩ wĩgiĩ mwĩhumbĩre, na mwĩtheme biũ mĩtugo ĩrĩa ĩtaratwarana na Bibilia. Aranĩriai na njĩra ya gĩtĩo mumĩranĩtie ngoro mũkĩbanga ũhiki wanyu.—w25.12, kar. 21-24.