MACHI 30–ĨPURO 5, 2026
RWĨMBO NA. 76 Wee Ũiguaga Atĩa?
Aragia Ũhoro wa ma na Njĩra ya Ũtugi
“ Jehova, Ngai wa ũhoro wa ma.”—THAB. 31:5.
ŨNDŨ ŨRĨA WARĨRĨIRIO
Ũrĩa tũngĩaria ũhoro wa ma na njĩra ĩrĩ na maumĩrĩro mega.
1. Tũbatiĩ gwĩka atĩa nĩguo tũtuĩke a famĩlĩ ya Jehova?
RĨRĨA twacemania na mũrũ kana mwarĩ wa Ithe witũ rĩa mbere, kaingĩ tũranagia kĩũria gĩkĩ, “Werutire atĩa ũhoro wa ma?” Amwe macokagia makauga marereirũo ũhoro-inĩ wa ma, nao angĩ no mauge nĩ hĩndĩ marerutire ũhoro wa ma. Tũcokagia na njĩra ta icio tondũ ũhoro ũcio wa ma kuuma Kiugo-inĩ kĩa Ngai nĩguo ũtũtongoragia ũtũũro-inĩ witũ. Nĩ tũmenyaga atĩ kwenda ũhoro wa ma na gũtũũra kũringana naguo no kuo tu kũngĩtũma tũtuĩke a famĩlĩ ya Jehova. Na ũndũ ũcio ũhutĩtie gũkoragwo tũrĩ ehokeku kũgerera ciugo na ciĩko citũ.—Thab. 15:1-3.
2. (a) Jesu ooĩkaine atĩa? (b) Andũ mangĩaiyũkirie atĩa ũhoro ũrĩa Jesu aamarutaga?
2 Jesu aaragia ma hingo ciothe. O na thũ ciake nĩ cioĩ atĩ aragia ma o na gũtuĩka rĩmwe itiakenagio nĩ maũndũ marĩa aaugaga. (Mat. 22:16) Jesu aaugire ũũ agĩtaarĩria ũrĩa andũ mangĩkaiyũkia morutani make: “Ndokire kũrehe ngayũkano, mũndũ okĩrĩre ithe, na mũirĩtu okĩrĩre nyina, na mũtumia wa mũriũ okĩrĩre nyaciarawe.” (Mat. 10:35) Jesu ndeendaga andũ marege ndũmĩrĩri ĩrĩa we na arũmĩrĩri ake maahunjagia, no nĩ aamenyaga atĩ ũguo nĩguo kũngĩathiire. (Mat. 23:37) Nĩ aamenyaga atĩ ũhoro ũrĩa aamarutaga nĩ ũngĩatũmire kũgĩe na ikundi igĩrĩ cia andũ, arĩa mangĩawĩtĩkĩrire na arĩa mangĩaũregire.—2 Thes. 2:9-11.
3. Nĩ maũndũ marĩkũ tũkwarĩrĩria gĩcunjĩ-inĩ gĩkĩ?
3 O ta Jesu, nĩ twĩrutanagĩria gũkorũo twĩ ehokeku na njĩra ya kwaragia ma hĩndĩ ciothe, nginya rĩrĩa gwĩka ũguo kũngĩtũma andũ matũmene. Nĩ twĩkaga ũguo nginya rĩrĩa tũrahunjia na tũrarutana ma cia Bibilia, o na angĩkorũo andũ amwe no mage gũkenio nĩ maũndũ marĩa tũrauga. No ũguo ti kuuga atĩ tũtibatiĩ gwĩciria njĩra ĩrĩa tũkũheana ũhoro ũcio nayo na ihinda rĩrĩa tũkũwarĩrĩria. Gĩcunjĩ-inĩ gĩkĩ, tũkwamba kwarĩrĩria kĩũria gĩkĩ: Nĩ kũ tũngĩona ũhoro ũrĩa wa ma? Ningĩ nĩ tũgũcoka twarĩrĩrie ciũria ici: Twagĩrĩirũo kwaria ũhoro wa ma nĩkĩ? Tũbatiĩ kũwaria na njĩra ĩrĩkũ? Na nĩ rĩ twagĩrĩirũo kũwaria? Macokio ma ciũria icio nĩ megũtũteithia kwaragia ũhoro wa ma na njĩra ya ũtugi, na ũguo nĩ kuuga kwaria tũrĩ na ũtaũku na ihinda-inĩ rĩrĩa rĩagĩrĩire.
NĨ KŨ TŨNGĨONA ŨHORO ŨRĨA WA MA?
4. Tũngiuga Jehova nĩwe Kĩhumo kĩa ũhoro wa ma nĩkĩ?
4 Jehova nĩwe Kĩhumo kĩa ũhoro wa ma, na aragia ma hingo ciothe. Kwa ngerekano, ũhoro ũrĩa atwĩrĩte wĩgiĩ ũndũ ũrĩa mwega na ũrĩa mũũru nĩ wa ma. (Thab. 19:9; 119:142, 151) Na maũndũ marĩa mothe augĩte megiĩ ihinda rĩũkĩte nĩ mahingaga. (Isa. 55:10, 11) Hingo ciothe nĩ ahingagia ũndũ ũrĩa eranĩire. (Ndar. 23:19) Ma nĩ atĩ, gũtingĩhotekeka o na hanini Ngai aheenanie. (Ahib. 6:18) Nĩkĩo gĩtũmaga Jehova etwo “Ngai wa ũhoro wa ma.”—Thab. 31:5.
5. Nĩ kĩĩ kĩngĩtũma tuuge atĩ ti ũndũ mũritũ kũmenya “Ngai wa ũhoro wa ma”? (Atũmwo 17:27)
5 Andũ aingĩ maugaga atĩ gũtirĩ Ngai, na o na angĩkorũo arĩ kuo, nĩ ũndũ mũritũ kũmũmenya. No ũcio ti ũhoro wa ma. Ũũmbi nĩ ũrutaga ũira wa atĩ arĩ kuo. (Rom. 1:20) Ningĩ mũtũmwo Paulo akĩaria na gĩkundi kĩa andũ athomu itũũra-inĩ rĩa Athene aameerire atĩ Ngai nĩ endaga ‘tũmũcarie,’ na atĩ “ndarĩ haraya na o ũmwe witũ.” (Thoma Atũmwo 17:27.) Jehova nĩ agucagĩrĩria andũ enyihia harĩ we arĩa macaragia ũhoro wa ma ũmwĩgiĩ.—Joh. 6:44.
6. Nĩ ma irĩkũ imwe ikoragwo thĩinĩ wa Bibilia, na kũmenya ma icio gũtũmaga ũigue atĩa?
6 Ũndũ ũmwe ũngĩtũteithia kũmenya Jehova nĩ kwĩruta Bibilia. Andũ arĩa maamĩandĩkire maatongoririo nĩ roho mũtheru wa Ngai. (2 Pet. 1:20, 21) Kwoguo maũndũ marĩa mothe maandĩkĩtwo thĩinĩ wa Bibilia nĩ ma ma na no tũmetĩkie. Kwa ngerekano, no twĩtĩkie ũhoro ũrĩa ĩheanĩte wĩgiĩ ũrĩa igũrũ na thĩ ciombirũo o hamwe na indo iria irĩ muoyo. (Kĩam. 1:1, 26) No twĩtĩkie ũhoro ũrĩa yugĩte wĩgiĩ kĩrĩa gĩtũmaga twĩhie na kĩrĩa gĩtũmaga gũkorũo na mathĩna na gĩkuũ. (Rom. 5:12; 6:23) Ningĩ no tũmĩtĩkie rĩrĩa yatwĩra atĩ Jehova nĩ akahũthĩra Mũrũwe kweheria mathĩna marĩa mothe marehetwo nĩ Shaitani, o we “ithe wa maheeni.” (Joh. 8:44; Rom. 16:20) Ũndũ ũngĩ nĩ atĩ no twĩhoke ciĩranĩro cia Bibilia ciĩgiĩ ũrĩa Jesu akaaniina andũ arĩa aganu, ariũkie arĩa makuĩte, atue thĩ paradiso, na atũteithie gũtuĩka andũ akinyanĩru. (Joh. 11:25, 26; 1 Joh. 3:8) Jehova nĩ atũheete mweke wa mwanya na njĩra ya gũtũruta ũhoro wa ma, na agatwĩhokera wĩra wa kũruta arĩa angĩ ũhoro ũcio.—Mat. 28:19, 20.
TWAGĨRĨIRŨO KWARIA ŨHORO WA MA NĨKĨ?
7-8. Nĩ kĩĩ kĩngĩtũma tuuge atĩ Jehova nĩ aroraga muoroto witũ wa kwaria ũhoro wa ma? Heana ngerekano. (Mariko 3:11, 12) (Ningĩ rora mbica.)
7 O ta ũrĩa hekũgwetetwo, no nginya twaragie ũhoro wa ma nĩguo tũtuĩke a famĩlĩ ya Jehova. No nĩ tũrabatara gwĩka ũndũ ũngĩ makĩria ma ũguo nĩguo tũkenie Jehova. Gĩtũmi nĩ tondũ nĩ aroraga muoroto witũ wa kwaria ũhoro wa ma. Ta wĩcirie ũrĩa gwathiire hĩndĩ ya ũtungata wa Jesu arĩ gũkũ thĩ. (Thoma Mariko 3:11, 12.) Rĩrĩa Jesu aahunjagia hakuhĩ na Iria rĩa Galili, andũ kĩrĩndĩ kĩnene nĩ mookire harĩa aarĩ. Gatagatĩ-inĩ kao haarĩ na andũ amwe maarĩ na ndaimono arĩa maathiire makĩinamĩrĩra mbere ya Jesu makĩanagĩrĩra ũũ: “Wee nĩwe Mũrũ wa Ngai.” Nĩ kĩĩ gĩatũmire ndaimono icio ciarie ũhoro wa ma wĩgiĩ Jesu? No kũhoteke cieendaga andũ acio maacithikagĩrĩria maciĩtĩkie, icoke imahĩngĩce matigathiĩ mwena wa Jehova. Kwoguo o na gũtuĩka ndaimono icio nĩ ciaaririe ũhoro wa ma, itiarĩ na muoroto mwega. Jesu ndaakenirio nĩcio tondũ nĩ aamenyire muoroto wacio. Ma nĩ atĩ, o na nĩ aaciathire itikaarie ũhoro wake.
8 Rũgano rũu rũratũruta atĩa? Jehova nĩ aroraga muoroto witũ wa kwaria ũhoro wa ma. Kwoguo nĩ ũndũ wa bata gũtigĩrĩra twĩ na muoroto mwega tũkĩrutana ũhoro wa ma, na tũkerekeria rũgooco harĩ Jehova handũ ha gwĩtũũgĩria.—Mat. 5:16; ringithania Atũmwo 14:12-15.
Rĩrĩa ũraruta mũndũ ũhoro wa ma-rĩ, werekagĩria meciria make harĩ ũ? (Rora kĩbungo kĩa 7-8)
9. Nĩ ũndũ ũrĩkũ tũbatiĩ gwĩthema, na nĩkĩ?
9 Ta wĩcirie ũndũ ũngĩ tũbatiĩ kwĩmenyerera nĩguo twĩtheme gwĩtũũgĩria. Ta tua atĩ mũrũ wa Ithe witũ wĩhokeirũo maũndũ nĩ akũmenyithia ũhoro ũbatiĩ kũiga ũrĩ thiri, no wee ũgacoka ũkahe andũ angĩ ũhoro ũcio. Andũ acio mangĩmenya atĩ ũhoro ũcio ũrameerire nĩ wa ma, no magũtũũgĩrie na mecirie atĩ nĩ wĩhokeirũo maũndũ maingĩ ma thiri. Ũndũ ũcio no ũtũme andũ makuone ũrĩ mũndũ wa bata, no ndũngĩkorũo ũgĩkenia Jehova. (Thim. 11:13) Nĩkĩ? Tondũ ũngĩkorũo ũkĩheana ũhoro ũtabatiĩ kũheana, na ningĩ muoroto waku wa kũheana ũhoro ũcio o na ũrĩ wa ma ti mwega.
TŨBATIĨ KWARIA ŨHORO WA MA NA NJĨRA ĨRĨKŨ?
10. Kwaria na njĩra ya “ũtugi” nĩ kuuga atĩa? (Akolosai 4:6)
10 Thoma Akolosai 4:6. Mũtũmwo Paulo aaririkanirie Akristiano a Kolosai atĩ maabatiĩ kwaragia na njĩra ya “ũtugi hingo ciothe.” Hihi eendaga kuuga atĩa? Ciugo cia Kĩngiriki iria itaũrĩtwo hau cionanagia atĩ tũbatiĩ kwaria ciugo ikũguna arĩa maratũthikĩrĩria na tũciarie na njĩra ya wendo na ĩragucĩrĩria.
11-12. Tũbatiĩ kũhũthĩra ũũgĩ nĩkĩ tũkĩrutana ũhoro wa ma? Heana ngerekano. (Ningĩ rora mbica.)
11 Nĩ tũrabatara kũrũmĩrĩra ũtaaro ũcio wĩgiĩ kwaragia na njĩra ya ũtugi rĩrĩa tũraruta arĩa angĩ ũhoro wa ma. Ma cia Bibilia iringithanagio na rũhiũ rwa njora rũnooretwo wega ũndũ rũngĩgayũkania muoyo na roho. Ũguo nĩ kuuga no itũteithie kũmenya ũrĩa tũtariĩ na thĩinĩ o hamwe na mĩoroto itũ. (Ahib. 4:12) No tũngĩaga kũhũthĩra Bibilia wega, no tũrakarie arĩa angĩ o na kana tũkararanie nao. Kũngĩthiĩ ũguo atĩa?
12 Ta hũũra mbica ũthiĩte kũhunjia, ũgakora mũndũ ũhũthagĩra mĩcongo akĩhoya na ũkũngũyagĩra thigũkũ cia Krismasi na Ista hamwe na famĩlĩ yake. No ũhũthĩre Bibilia kũmuonia atĩ ti ũndũ wa ũũgĩ kũhoya kĩndũ gĩtarĩ muoyo, na atĩ ikũngũĩro cia Krismasi na Ista itiumanĩte na Bibilia. (Isa. 44:14-20; 2 Kor. 6:14-17) No kũmwĩra ũguo na nĩ hĩndĩ ũraria nake riita rĩa mbere, ndũngĩkorũo ũkĩhũthĩra Kiugo kĩa Ngai na ũũgĩ o na akorũo ũramwĩra ũhoro wa ma.
Ũngĩrutana atĩa ũhoro wa ma na njĩra ya ũũgĩ? (Rora kĩbungo gĩa 11-12)a
13. Nĩ na njĩra ĩrĩkũ tũngĩaria ciugo itariĩ ta ciĩkĩrĩtwo cumbĩ?
13 Ningĩ Paulo eerire Akristiano atĩ ciugo ciao ibatiĩ gũkorũo itariĩ ta ciĩkĩrĩtwo cumbĩ. No ndeendaga kuonania atĩ tũbatiĩ kũgarũra ũhoro wa ma kana kũũhithĩrĩra. Ĩndĩ aatwĩkĩraga ngoro twaragie ciugo “ciĩkĩrĩtwo cumbĩ” na njĩra ya atĩ tũkaaragia ũhoro wa ma na ciugo irĩ na “mũcamo” ũndũ ikũgucĩrĩria athikĩrĩria aitũ. (Ayub. 12:11) Rĩmwe ti ũndũ mũhũthũ gwĩka ũguo. Kaingĩ tũkĩruga irio, twĩciragia atĩ mũcamo wa cumbĩ ũrĩa ũgũtũkenia nĩguo ũgũkenia nginya arĩa angĩ. Ũndũ ũmwe na ũcio, no twĩcirie atĩ njĩra ĩrĩa twaragia nayo ĩgucagĩrĩria mũndũ o wothe. No ũguo tiguo kũrĩ. Kwa ngerekano, ũndũire-inĩ ũmwe andũ mationaga arĩ ũũru gũtemania ndeto nginya rĩrĩa mararia na andũ akũrũ kũmakĩra. No andũ a ũndũire ũngĩ no mone kwaria na njĩra ta ĩyo gũtarĩ gwĩtĩkĩrĩku o na kana kũmarakarie. Nĩkĩo Paulo aaugire nĩ tũbatiĩ kũmenya ũrĩa ‘twagĩrĩirũo gũcokeria o mũndũ.’ Ũguo nĩ kuuga atĩ tũbatiĩ gwĩkĩra ciugo citũ cumbĩ kũringana na mũcamo ũrĩa ũkũgucĩrĩria arĩa maratũthikĩrĩria, no ti kũringana na mũcamo ũrĩa tũmenyerete ũndũire-inĩ witũ.
NĨ RĨ TWAGĨRĨIRŨO KWARIA ŨHORO WA MA?
14. Hihi Jesu arĩ gũkũ thĩ nĩ aarutire arũmĩrĩri ake maũndũ marĩa mothe oĩ? Taarĩria.
14 Hingo ciothe Jesu aaragĩria arũmĩrĩri ake na njĩra ya ũtugi, na akamaruta maũndũ maingĩ. (Mar. 6:34) O na gũtuĩka kwarĩ o na maũndũ maingĩ maabataraga kwĩruta, Jesu ndaageririe kũmaruta maũndũ mothe marĩa oĩ. Nĩ aamenyaga atĩ arũmĩrĩri ake matingĩataũkĩirũo nĩ maũndũ mothe ihinda-inĩ rĩmwe. O na harĩ hĩndĩ aaugire atĩ matingĩahotire gwĩtiiria morutani macio mothe. (Joh. 16:12) Tũreruta atĩa?
15. Hihi nĩ tũbatiĩ kũruta arutwo aitũ a Bibilia maũndũ marĩa mothe tũĩ ihinda-inĩ rĩmwe? Taarĩria. (Thimo 25:11) (Ningĩ rora mbica.)
15 Kĩonereria kĩa Jesu kĩronania atĩ kũmenya ũhoro wa ma ti kuuga atĩ tũrabatara kũruta andũ maũndũ marĩa mothe tũĩ ihinda-inĩ rĩmwe. Tũngĩĩgerekania atĩa na Jesu? Nĩ tũrabatara gwĩciria ũrĩa maũndũ ma o mũndũ matariĩ. Ta wĩcirie ũhoro wa mũndũ ũrĩa tũkuugĩte nĩ akũngũyagĩra thigũkũ cia Krismasi na Ista hamwe na famĩlĩ yake. Nĩ tũĩ atĩ ikũngũĩro icio ciumanĩte na ndini cia maheeni na kwoguo itiĩtĩkĩrĩkaga nĩ Ngai. No ta hũũra mbica mwambĩrĩirie kwĩruta Bibilia na mũndũ ũcio Krismasi ĩtigĩtie kiumia kĩmwe kana igĩrĩ ĩkinye. Hihi no ũkorũo ũkĩaria na njĩra ya ũtugi ũngĩmuonia ũrĩa Bibilia yugaga igũrũ rĩgiĩ ikũngũĩro icio na wĩrĩgĩrĩre nĩ egũtiga gũkũngũĩra Krismasi o rĩo? Ma nĩ atĩ, o na gũtuĩka arutwo amwe no mahũthĩre o na ihenya maũndũ marĩa mothe mareruta kuuma Bibilia-inĩ, amwe no mabatare ihinda magĩkagarũrĩra mwĩcirĩrie na ciĩko ciao. No tũteithie arutwo aitũ a Bibilia gũkũra kĩĩroho tũngĩmeeraga maũndũ marĩa marabatara kũmenya ihinda rĩrĩa rĩagĩrĩire, na ũguo nĩ kuuga ihinda rĩrĩa mekũhota gũtaũkĩrũo nĩmo.—Thoma Thimo 25:11.
Wĩgerekanie na Jesu ũgĩtua nĩ rĩ ũkũruta mũndũ ũndũ mũna na ũkũmũhe ũhoro ũigana atĩa (Rora kĩbungo gĩa 15)
16. Tũngĩteithia atĩa arutwo aitũ a Bibilia gũthiĩ na mbere “kũrũmĩrĩra ũhoro ũrĩa wa ma”?
16 Ũndũ ũmwe ũtũrehagĩra gĩkeno kĩnene nĩ gũteithia andũ kũmenya ũhoro wa ma wĩgiĩ Jehova. No tũmateithie gũthiĩ na mbere “kũrũmĩrĩra ũhoro ũrĩa wa ma” tũngĩka maũndũ maya: Maigagĩre kĩonereria kĩega. (3 Joh. 3, 4) Tigagĩrĩra atĩ ũtũũro waku nĩ ũronania nĩ wĩtĩkĩtie ciĩranĩro iria irĩ Kiugo-inĩ kĩa Ngai. Aragia ũhoro wa ma ũrĩ na muoroto mwega. Aragia na njĩra ya ũtugi na ũhooreri rĩrĩa ũrarutana ma cia Bibilia na ũgeka ũguo ihinda-inĩ rĩrĩa rĩagĩrĩire. Na rĩrĩa wagaathĩrĩrio, erekagĩria rũgooco harĩ Jehova. Weka maũndũ macio nĩ ũrĩonanagia atĩ ũtungatagĩra Jehova, Ngai wa ũhoro wa ma.
RWĨMBO NA. 160 “Ũhoro Mwega”!
a GŨTAARĨRIA MBICA: Mbica ya mbere ĩronania mũrũ wa Ithe witũ akĩonia mwene nyũmba gĩcunjĩ kĩrataarĩria atĩ Krismasi yumanĩte na ndini cia maheeni, thutha wa kuona mũtĩ wa Krismasi gwake. Nayo mbica ya kerĩ ĩronania mũrũ wa Ithe witũ ũcio akĩonia mũndũ ũcio gĩcunjĩ kĩrataarĩria ũrĩa angĩtuĩka mũciari mwega. Hihi nĩ njĩra ĩrĩkũ harĩ icio igĩrĩ ĩngĩkorũo na maumĩrĩro mega?