Ũrĩa Ũngĩhiũrania na Mũrimũ wa Hinahi

Hihi ũgima waku wa mwĩrĩ nĩ ũthũkĩte o rĩmwe ũterĩgĩrĩire? Angĩkorũo nĩguo, nĩ ũĩ atĩ thĩna wa mwĩrĩ no ũtũme ũigue ũrĩ na mĩtangĩko, na ũrigitani no ũbatare mbeca nyingĩ. Nĩ kĩĩ kĩngĩgũteithia kũhiũrania na ũndũ ũcio? Ũngĩteithia atĩa mũndũ wa famĩlĩ kana mũrata wĩna thĩna wa mwĩrĩ? O na gũtuĩka Bibilia ti ibuku rĩa ũrigitani, nĩ ĩkoragwo na motaaro mangĩgũteithia kũhiũrania na thĩna waku na njĩra ĩrĩa njega biũ.

Maũndũ mangĩgũteithia kũhiũrania na thĩna wa mwĩrĩ

• Caria ũrigitani

  Ũrĩa Bibilia yugaga: “Andũ arĩa marĩ na ũgima mwega wa mwĩrĩ matibataraga ndagĩtarĩ, no arĩa arwaru nĩo mamũbataraga.”—Mathayo 9:12.

  Ũrĩa ũngĩhũthĩra ũtaaro ũcio: Caria ũteithio wa arigitani rĩrĩa kwabatarania.

  Geria ũũ: Caria ũrigitani ũrĩa mwega biũ ũngĩhota kuona. Rĩmwe no ũkorũo ũrĩ ũndũ wa ũũgĩ kwaria na makĩria ma ndagĩtarĩ ũmwe. (Thimo 14:15) Aranĩria wega na arigitani, ũtigĩrĩre nĩ ũrataũkĩrũo nĩ ũrĩa marakwĩra, nao nĩ marataũkĩrũo nĩ ũrĩa ũraigua. (Thimo 15:22) Geria kũmenya maũndũ megiĩ mũrimũ ũrĩa wĩ naguo, nginya njĩra cia ũrigitani iria ũngĩbatara. Wataũkĩrũo nĩ maũndũ marĩa ũbatiĩ kwĩrĩgĩrĩra, nĩ ũkũhota kwĩhaarĩria wega kĩĩmeciria na gũtua matua mega megiĩ ũrigitani ũrĩa ũrabatara.

• Ĩka maũndũ mangĩteithia mwĩrĩ waku

  Ũrĩa Bibilia yugaga: “Kũmenyeria mwĩrĩ kũrĩ ũguni.”—1 Timotheo 4:8.

  Ũrĩa ũngĩhũthĩra ũtaaro ũcio: Ũngĩka maũndũ mangĩgũteithia ta kũmenyeria mwĩrĩ waku, no ũgunĩke.

  Geria ũũ: Caragia mahinda ma kũmenyeria mwĩrĩ kaingĩ, ũkarĩa irio ingĩguna mwĩrĩ, na ũgakoma toro wa kũigana. O na akorũo nĩ ũraritũhĩrũo nĩ thĩna wa mwĩrĩ ũrĩa ũrĩ naguo, ataaramu maugaga atĩ gũcaria mahinda ma gwĩka maũndũ mangĩteithia mwĩrĩ waku nĩ kũrĩ ũguni. Tigĩrĩra atĩ ũndũ o wothe ũgũthuura gwĩka ndũgũtũma thĩna waku ũnenehe makĩria, na ũtigĩrĩre atĩ nĩ ũgũtwarana na ũrigitani ũrĩa ũraheo.

• Hoya ũteithio kuuma kũrĩ arĩa angĩ

  Ũrĩa Bibilia yugaga: “Mũrata wa ma onanagia wendo hingo ciothe, na aciarĩtwo atuĩke mũrũ wa nyina na mũndũ hĩndĩ ya mĩtangĩko.”—Thimo 17:17.

  Ũrĩa ũngĩhũthĩra ũtaaro ũcio: Arata aku no magũteithie rĩrĩa ũrahiũrania na maũndũ maritũ.

  Geria ũũ: Aria na mũrata wĩhokete ũrĩa ũtangĩtigĩra gũitũrũrĩra ngoro yaku. Gwĩka ũguo no gũgũteithie kũnyihanyihia mĩtangĩko ĩrĩa ũngĩkorũo nayo na kũigua wĩna gĩkeno. Arata aku na andũ a famĩlĩ no mende gũgũteithia na njĩra ingĩ, no mahota kwaga kũmenya ũteithio ũrĩa mangĩkũhe. Kwoguo mataarĩrie wega ũrĩa mangĩka nĩguo magũteithie. Ndũkerĩgagĩrĩre maũndũ manene kuuma kũrĩ o, na ũkoragwo na ngatho nĩ ũndũ wa ũteithio ũrĩa makũhe. Ningĩ no ũbatare kũiga mĩhaka, ta hihi maita marĩa andũ marĩũkaga gũgũceerera na ihinda rĩrĩa megũikara, nĩgetha ndũkaigue ũritũhĩirũo mũno.

• Tũũria mwerekera mwega

  Ũrĩa Bibilia yugaga: “Ngoro ĩrĩ na gĩkeno nĩ ndawa njega, no roho mũthuthĩku nĩ ũniinaga mũndũ hinya.”—Thimo 17:22.

  Ũrĩa ũngĩhũthĩra ũtaaro ũcio: Gũkorũo na mwerekera mwega na mwĩhoko no gũgũteithie gũikara ũhooreire nĩgetha ũhote kũhiũrania na thĩna waku wa mwĩrĩ.

  Geria ũũ: O ũkĩĩrutanĩria kũgarũrĩra kũringana na ũrĩa thĩna waku ũhaana, iga meciria maku harĩ maũndũ marĩa ũngĩhota gwĩka, no ti marĩa ũtangĩhota. Wĩtheme kwĩringithania na andũ arĩa angĩ kana kwĩringithania na ũrĩa wahaanaga ũtanagĩa na thĩna wa mwĩrĩ. (Agalatia 6:4) Wĩigĩre mĩoroto ĩrĩa ũngĩhota gũkinyĩra, na ũndũ ũcio no ũgũteithie gũtũũria mwerekera mwega. (Thimo 24:10) Ĩkagĩra andũ arĩa angĩ maũndũ matiganĩte kũringana na ũhoti waku. Gĩkeno kĩrĩa kiumanaga na kũheana no gĩgũteithie kwaga gwĩciria mũno thĩna ũrĩa ũrĩ naguo.—Atũmwo 20:35.

Hihi Ngai no agũteithie kũhiũrania na thĩna wa mwĩrĩ?

Bibilia yonanagia atĩ Jehova Ngaia no ateithie mũndũ kũhiũrania na mathĩna ma mwĩrĩ. O na gũtuĩka tũtingĩrĩgĩrĩra kũhonio na njĩra ya kĩama, arĩa mathathayagia Ngai no mamũkĩre ũteithio wake kũgerera njĩra ici:

Thayũ. Jehova no atũhe “thayũ wa Ngai ũrĩa ũkĩrĩte ũtaũku wothe.” (Afilipi 4:6, 7) Thayũ ũcio wa ngoro no ũteithie mũndũ kwaga gũtoorio nĩ mĩtangĩko. Ngai aheanaga thayũ ũcio harĩ arĩa mamũhoyaga na makamũitũrũrĩra mĩtangĩko yao.—1 Petero 5:7.

Ũũgĩ. Jehova no atũhe ũũgĩ nĩguo tũhote gũtua matua mega. (Jakubu 1:5) Mũndũ agĩaga na ũũgĩ ũcio rĩrĩa eruta na ahũthĩra motaaro ma ũũgĩ marĩa marĩ thĩinĩ wa Bibilia.

Kĩĩrĩgĩrĩro kĩega kĩa ihinda rĩũkĩte. Jehova nĩ eranĩire ihinda rĩũkĩte rĩrĩa gũtarĩ “mũikari . . . ũkoiga: ‘Ndĩ mũrwaru.ʼ” (Isaia 33:24) Kĩĩrĩgĩrĩro kĩu nĩ gĩteithagia andũ aingĩ gũtũũria gĩkeno o na angĩkorũo marĩ na thĩna mũnene wa mwĩrĩ.—Jeremia 29:11, 12.