Andũ Maremagwo nĩ Kũrehe Thayũ Nĩkĩ?—Mawoni ma Bibilia nĩ Marĩkũ?

Atongoria na ikundi nene cia kĩĩmabũrũri, matihotete kũrehe thayũ thĩinĩ wa thĩ. Mahinda-inĩ maya, kũrĩ na ngũĩ nyingĩ gũkĩra hĩndĩ ĩngĩ o yothe kuuma hĩndĩ ya Mbaara ya Kerĩ ya Thĩ. Mũndũ ũmwe harĩ ana thĩinĩ wa thĩ, kana andũ ta bilioni igĩrĩ thĩinĩ wa thĩ yothe, maikaraga icigo-inĩ ihutĩtio nĩ ngũĩ ta icio.

Andũ maremagwo nĩ kũrehe thayũ nĩkĩ? Bibilia yugaga atĩa?

Itũmi ithatũ iria itũmaga andũ maremwo nĩ kũrehe thayũ

1. 1. Andũ makoragwo na mĩerekera mĩũru ĩtũmaga ũkorũo ũrĩ ũndũ mũritũ o na kũgeria kũrehe thayũ. Bibilia nĩ yarathĩte atĩ mahinda-inĩ maitũ, “andũ nĩ [mangĩgaatuĩka] eyendi, endi mbeca, egani, egaathi, . . . matarĩ ehokeku, . . . matendaga ũiguano, . . . mategiragĩrĩria, matarĩ tha, . . . momĩtie ciongo, etĩi.”—2 Timotheo 3:2-4.

2. 2. Andũ matikoragwo na ũhoti wa kũniina mathĩna mao marĩ mũndũ ũmwe ũmwe o na kana marĩ gĩkundi, hatarĩ na ũteithio wa Mũũmbi wao Jehovaa Ngai. Bibilia nĩ ĩguũrĩtie atĩ “mũndũ tiwe wagĩrĩirũo o na gũtongoria ikinya rĩake.”—Jeremia 10:23.

3. 3. Thĩ yothe ĩratongorio nĩ mũtongoria mũũru na ũrĩ hinya, na nĩwe Shaitani ũrĩa Mũcukani, “ũrĩa ũhĩtithagia thĩ yothe ĩrĩa ĩikaragwo.” (Kũguũrĩrio 12:9) Tondũ “thĩ yothe ĩkoragwo rungu rwa hinya wa ũrĩa mũũru,” no twĩrĩgĩrĩre atĩ no kũrĩkoragwo na mbaara na ngũĩ.—1 Johana 5:19.

Nũũ ũngĩhota kũrehe thayũ?

Bibilia yonanĩtie atĩ thayũ ndũkoima kũrĩ andũ, no ũkoima kũrĩ Ngai.

• “‘Tondũ nĩ njũĩ wega meciria marĩa ndĩreciria kũmwerekera,’ ũguo nĩguo Jehova ekuuga, ‘meciria ma thayũ, no ti ma ũũru, nĩguo mũgaakorũo na ihinda rĩega rĩũkĩte na mũgĩe na kĩĩrĩgĩrĩro.’”—Jeremia 29:11.

Ngai akaahingia kĩĩranĩro kĩu atĩa? “Ngai ũrĩa ũheanaga thayũ nĩ [akaahehenja] Shaitani.” (Aroma 16:20) Akaahũthĩra thirikari ya igũrũ, ĩrĩa ĩtĩtwo “Ũthamaki wa Ngai” thĩinĩ wa Bibilia, nĩguo arehe thayũ thĩinĩ wa thĩ yothe. (Luka 4:43) Rungu rwa ũtongoria wa Jesu Kristo arĩ we Mũthamaki wa Ũthamaki ũcio, andũ nĩ makaarutwo ũrĩa mangĩtũũra na thayũ.—Isaia 9:6, 7.

• Nĩguo wĩrute makĩria, thoma gĩcunjĩ kĩrĩ na kĩongo “Nĩ Maũndũ Marĩkũ Ũthamaki wa Ngai Ũkahingia?”