Rũmena Rũingĩhĩte Ũguo Nĩkĩ?—Mawoni ma Bibilia nĩ Marĩkũ?

Kũrĩ na mohoro maingĩ megiĩ andũ kwaria mĩario ya rũmena na gwĩka ciĩko cia rũmena nĩ ũndũ wa mũthutũkanio wa kĩĩrũrĩrĩ, na megiĩ mbaara.

• “Mĩario ya rũmena nĩ yongererekete mũno nenda-inĩ cia ũkinyanĩria, makĩria nĩ ũndũ wa mbaara ĩrĩa ĩrĩ gatagatĩ-inĩ ka Israel na Gaza, na nĩ ũndũ wa andũ arĩa macogagĩra ngũĩ na rũmena.”—The New York Times, Novemba 15, 2023.

• “Kuuma Oktomba 7, nĩ kũgĩte na wongerereku mũnene wa mĩario ya rũmena na ciĩko cia rũmena nĩ ũndũ wa mũthutũkanio wa kĩĩrũrĩrĩ.”—Dennis Francis, mũnene wa United Nations General Assembly, Novemba 3, 2023.

Mĩario ya rũmena, ciĩko cia ũhinya, na mbaara, nĩ maũndũ makoretwo kuo. Bibilia nĩ ĩtaarĩirie ũhoro wa andũ maatũũraga mahinda-inĩ ma tene, arĩa ‘meerekagĩria ciugo ciao ndũrũ o ta mĩguĩ’ na magacogera mbaara na maũndũ ma ũhinya. (Thaburi 64:3; 120:7; 140:1) No Bibilia nĩ yonanagia atĩ rũmena rũrĩa rũrĩ kuo mahinda-inĩ maya nĩ rũtũririkanagia ũndũ wa bata.

Rũmena nĩ kĩmenyithia kĩmwe kĩa mahinda marĩa tũratũũra

Bibilia nĩ ĩheanĩte itũmi igĩrĩ iria itũmĩte rũmena ruongerereke ũmũthĩ.

1. 1. Nĩ yarathĩte ũhoro wa ihinda ‘wendo wa andũ aingĩ ũngĩkanyiha.’ (Mathayo 24:12) Handũ ha wendo, andũ mangĩgakorũo na ngumo iratũma rũmena ruongerereke.—2 Timotheo 3:1-5.

2. 2. Rũmena rũnene rũrĩa rũrĩ kuo mahinda-inĩ maya, rũronania ũgucania mũũru wa Shaitani ũrĩa Mũcukani. Bibilia yugaga atĩ “thĩ yothe ĩkoragwo rungu rwa hinya wa ũrĩa mũũru.”—1 Johana 5:19; Kũguũrĩrio 12:9, 12.

O na kũrĩ ũguo, Bibilia ningĩ nĩ ĩranĩire atĩ ica ikuhĩ Ngai nĩ arĩeheria kĩhumo kĩa rũmena. Makĩria ma ũguo, nĩ akaaniina ruo ruothe rũrĩa rũrehetwo nĩ rũmena. Bibilia yugĩte ũũ:

• Ngai “nĩ ekũmagiria maithori mothe mathire maitho-inĩ mao, na gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo. Maũndũ marĩa ma tene nĩ mathiru.”—Kũguũrĩrio 21:4.