Ũhoro Mwega Kuuma Kiugo-inĩ kĩa Ngai—Kĩĩrĩgĩrĩro Kũrĩ Ethari Ngũĩ!

O mwaka, andũ milioni nyingĩ nĩ mabataraga kũũra kuuma mĩciĩ-inĩ yao nĩguo magacarie ũgitĩri. Hihi nĩ ũragerera ũndũ ta ũcio? Angĩkorũo nĩ ũragerera ũndũ ta ũcio, korũo na ma atĩ Ngai arĩ hamwe nawe. Nĩ atũhete kĩĩrĩgĩrĩro kĩega kĩa mahinda mokĩte, na no wĩrute ũhoro wakĩo thĩinĩ wa Maandĩko Matheru.

“Ethari ngũĩ na andũ arĩa mabatarĩte kũũra kuuma mĩciĩ-inĩ yaoa to ũteithio witũ wa na ihenya mabataraga, no nĩ mabataraga nginya . . . kĩĩrĩgĩrĩro kĩa ihinda rĩũkĩte.” Ũguo nĩguo komicona ũmwe wa rũhonge rũmwe rwa Ũrũmwe wa Rũrayab wĩtagwo Christos Stylianides aaugire. Andũ arĩa marĩ na kĩĩrĩgĩrĩro nĩ mahotaga gũkorũo na muonere mwega wĩgiĩ ũtũũro wao wa rũciũ. No makĩria ma gũkorũo na kĩĩrĩgĩrĩro, ethari ngũĩ nĩ mabataraga kũũmĩrĩrio nĩguo mahote kũhiũrania na mĩtangĩko ya ngoro.

“Rĩrĩa ndabatarire gwĩthara kuuma bũrũri-inĩ witũ na gũtiga andũ aitũ a famĩlĩ, nĩ ndaiguire ihooru inene mũno. Ndaiyũrirũo nĩ guoya, kĩeha, na mĩtangĩko.”—Emmanuel, Haiti.

Hihi nĩ ũraigua ta ũguo Emmanuel aaiguaga? Angĩkorũo nĩ wĩtharĩte kuuma kwanyu, nĩ ũrabatara handũ ũngĩona kĩĩrĩgĩrĩro na ũmĩrĩrio. Hihi Kiugo kĩa Ngai, Bibilia, kĩngĩgũteithia atĩa?

Kũũmĩrĩrio nĩ Kiugo kĩa Ngai

Bibilia yugaga ũũ: “Jehovac . . . nĩ endete mũndũ wa kũngĩ.”—Gũcokerithia Maathani 10:17, 18.

Bibilia yugaga ũũ: “Jehova akoragwo hakuhĩ na arĩa othe mamũkayagĩra.”—Thaburi 145:18.

Bibilia yugaga ũũ: “Gũtingĩhoteka Ngai ũrĩa wa ma eke maũndũ ma waganu . . . Mwene-Hinya-Wothe ndogomagia kĩhooto.”—Ayubu 34:10, 12.

Ũguo nĩ kuuga atĩ ti Ngai ũkũrehagĩra mathĩna. Ti gũkũherithia arakũherithia, na ti gũkũgeria arakũgeria na njĩra ya gũkũritũhĩria ũtũũro.

Kĩĩrĩgĩrĩro kuuma Kiugo-inĩ kĩa Ngai

Bibilia nĩ ĩtaarĩirie maũndũ marĩa Ngai agaatwĩkĩra ihinda rĩũkĩte. Ta rora wone ũrĩa kĩĩrĩgĩrĩro kĩu kĩrateithia andũ arĩa metharĩte kuuma kwao.

Bibilia yugaga ũũ: “[Ngai] nĩ ekũmagiria maithori mothe mathire maitho-inĩ mao, na gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo.”—Kũguũrĩrio 21:4.

Ũguo nĩ kuuga atĩ nĩ tũkeehererio mathĩna. Ngai eranĩire atĩ nĩ akaaniina mathĩna mothe marĩa matũmaga andũ mage mwĩhoko ũmũthĩ.

“Ica ikuhĩ Ngai nĩ ekũniina wagi wa kĩhooto na maũndũ moru marĩa mekĩkaga thĩinĩ wa thĩ. Kĩĩrĩgĩrĩro kĩu nĩ kĩndeithagia kũiga meciria makwa harĩ mũthenya ũrĩa mathĩna mothe magaathira.”—Karla, El Salvador.

Bibilia yugaga ũũ: “Maũndũ marĩa ma hau kabere matikaaririkanwo, o na kana maikare ngoro-inĩ.”—Isaia 65:17.

Ũguo nĩ kuuga atĩ tũtigacoka kũririkana maũndũ marĩa moru. Ngai nĩ agaatigĩrĩra atĩ ndũgacoka gũthumbũrũo meciria nĩ maũndũ moru marĩa wanagerera.

“Bibilia ĩranĩire atĩ tũtigacoka kũririkana ruo rwa ngoro kana kĩndũ kĩngĩ kĩrĩa twanorũo nĩ kĩo. Kĩĩrĩgĩrĩro kĩu nĩ kĩndeithagia kũhiũrania na mathĩna marĩa tũracemania namo, tondũ nĩ njũĩ atĩ ica ikuhĩ maũndũ nĩ marĩcenjia.”—Natalia, Ukraine.

Bibilia yugaga ũũ: “Ngai wa igũrũ nĩ akaahanda ũthamaki ũrĩa . . . ũkaamemenda na ũniine mothamaki macio mothe.”—Danieli 2:44.

Ũguo nĩ kuuga atĩ thĩ ĩgaatongoragio nĩ thirikari nginyanĩru ya igũrũ. Ica ikuhĩ Ngai nĩ arĩeheria thirikari ciothe cia gũkũ thĩ na arehe thirikari yake ya igũrũ. Thirikari ĩyo nĩ ĩkaarehe thayũ na ũgitĩri wa ma, ĩrehe kĩhooto, na ĩniine ũthĩni.—Mika 4:3, 4.

“Nĩ njĩkĩragwo hinya nĩ kũmenya atĩ mathĩna ta ũhinyanĩrĩria, rũmena, gwĩkũũanĩra, na mũthutũkanio no ma ihinda inini. Ica ikuhĩ Ũthamaki wa Ngai nĩ ũkũniina mathĩna macio mothe.”—Mustafa, Middle East.

Ũũgĩ kuuma Kiugo-inĩ kĩa Ngai

Motaaro ma ũũgĩ marĩa marĩ thĩinĩ wa Bibilia no magũteithie ũkĩhiũrania na mathĩna marĩa ũragerera. Ningĩ no magũteithie ũkĩhiũrania na mogarũrũku marĩa ũcemanĩtie namo, nginya ma kũũrũo nĩ indo ciaku. Rora wone ũrĩa motaaro maya marũmĩrĩire makoretwo magĩteithia ethari ngũĩ:

Bibilia yugaga ũũ: “O na rĩrĩa mũndũ arĩ na ũingĩ, muoyo wake nduumanaga na indo iria arĩ nacio.”—Luka 12:15.

Ũrĩa ciugo icio cia ũũgĩ ingĩgũteithia gũkirĩrĩria: No kũhoteke thaa ici nĩ ũraigua ũtukanĩirũo mũno na ũrĩ na kĩeha nĩ ũndũ wa indo iria ũrĩtwo nĩ cio. No ũngĩamba ũtithie wĩcirie ũrĩa muoyo waku ũrĩ wa bata gũkĩra kĩndũ o gĩothe ũrĩtwo nĩ kĩo, ũndũ ũcio no ũgũteithie kwaga gũtangĩka mũno nĩ ũndũ wa indo icio.

“Muoyo nĩ wa bata gũkĩra indo. Maũndũ-inĩ mamwe, indo o na kana mbeca itingĩgũteithia.”—Natalia, Ukraine.

Bibilia yugaga ũũ: “Ndũkorie atĩrĩ, ‘Nĩ kĩĩ gĩatũmaga matukũ ma tene makorũo marĩ mega gũkĩra maya?’”—Kohelethu 7:10.

Ũrĩa ciugo icio cia ũũgĩ ingĩgũteithia gũkirĩrĩria: Maũndũ maku no makorũo marĩ maritũ mũno ihinda-inĩ rĩrĩ, no ti wega kũgeria kũmaringithania na ma hau kabere, tondũ gwĩka ũguo no gũtũme ũigue ũrakarĩte.

“Gwĩtĩkĩra ũrĩa maũndũ makwa mahaana ihinda-inĩ rĩrĩ, nĩ kũndeithagia gũkorũo na muonere ũrĩa wagĩrĩire.”—Eli, Rwanda.

Bibilia yugaga ũũ: “Tũngĩkorũo na irio na nguo-rĩ, nĩ tũrĩiganagĩra na indo icio.”—1 Timotheo 6:8.

Ũrĩa ciugo icio cia ũũgĩ ingĩgũteithia gũkirĩrĩria: Geria kũiganagĩra na indo cia o mũhaka cia ũtũũro. Kũiganĩra na indo cia o mũhaka no gũtũme wage gũtangĩka mũno, na ũndũ ũcio ũgũteithie kũhooreria meciria.

“Bibilia nĩ ĩndeithĩtie kuona maũndũ na njĩra ngũrani, ngaga kũiga meciria harĩ indo iria tũũrĩtwo nĩ cio. Tũrĩ na mũtumia wakwa nĩ tũrakena gũkorũo tũrĩ muoyo na tũgĩikara handũ harĩ na ũgitĩri.”—Ivan, Ukraine.

Bibilia yugaga ũũ: “Maũndũ mothe marĩa mũngĩenda andũ arĩa angĩ mamwĩkage, no mũhaka o na inyuĩ mũmekage o tamo.”—Mathayo 7:12.

Ũrĩa ciugo icio cia ũũgĩ ingĩgũteithia gũkirĩrĩria: No ũhote gũikarania wega na andũ arĩa angĩ ũngĩkoragwo wĩhaarĩirie kũmakirĩrĩria na kũmonia ũtugi. Gwĩka ũguo no gũkũhotithie kũingĩrana wega na andũ a kũrĩa ũthamĩire, na mage gũkuonia mũthutũkanio.

“Andũ aingĩ nĩ makenaga rĩrĩa wamonia gĩtĩo, ũtugi, na wendo. Gwĩka ũguo no gũgũteithie gũikarania wega na andũ a gĩcigo kĩrĩa ũthamĩire.”—Angelo, Sri Lanka.

Bibilia yugaga ũũ: “Menyithagiai Ngai maũndũ marĩa mũbataraga . . . naguo thayũ wa Ngai . . . nĩ ũrĩgitagĩra ngoro cianyu na ũhoti wanyu wa gwĩciria.”—Afilipi 4:6, 7.

Ũrĩa ciugo icio cia ũũgĩ ingĩgũteithia gũkirĩrĩria: Hoya Ngai igũrũ rĩgiĩ ũrĩa ũraigua, mabataro maku, na maũndũ marĩa maratũma ũtangĩke. Kũhoya no gũgũteithie kwaga gũtangĩka mũno na kwaga kũritũhĩrũo mũno nĩ ũrĩa maũndũ maku mahaana ihinda-inĩ rĩrĩ.

“Hoyaga Ngai rĩrĩa rĩothe ndĩna mathĩna, na nĩ acokagia mahoya makwa. Maũndũ marĩa ndĩrutĩte kuuma Bibilia-inĩ nĩ mandeithagia gũkorũo na thayũ wa meciria.”—Yol, South Sudan.

“Ũtaaro mwega ũrĩa ũrĩ thĩinĩ wa Bibilia, nĩ ũndeithagia kũgĩa na thayũ wa meciria ũrĩa ndĩrabatara nĩguo hote kũhiũrania na ihinda rĩrĩ iritũ ndĩragerera.”—Valentina, Ukraine.

“Nĩ njĩkĩragwo hinya nĩ kũmenya atĩ Jehova Ngai nĩ atwĩrĩire ũtũũro mwega.”—Emmanuel, Haiti

Hihi no wende kwĩruta makĩria igũrũ rĩgiĩ ciĩranĩro cia Bibilia iria itũũmagĩrĩria na igatũhe kĩĩrĩgĩrĩro na kĩrĩa kĩngĩtũma ũciĩhoke? Ũria Aira a Jehova magũceerere. Nĩ megũkorũo mehaarĩirie gũgũteithia.